O Kandɔɔ 8
8
Noe fula o dɛ̀ndɔ̀ɔ́ nin
1Mí Hala loonun a Noe a visia yondoa, visia cieeninnda a á ɲɛ-ɲɛ va Noe ikɛi o dɛ̀ndɔ̀ɔ́ nin. Mó cuu hoeyii fùkù-fùkùei o lɛŋnden coo, mí mɛnndan ma kandu velaa. 2Mí soonnda mɛnndan ma va fulaa nin lɛŋ-ndan la baŋul, mí halataalaa bɛɛ kindan, mí piɔɔ viangu. 3Mí mɛnndan ma kandu tolɔɔ o lɛŋnden coo ma pɔm-pɔmbɔ. Mí ma va velaa o palɛi kɛmɛ a beleŋuɛɛnu bɛngu. 4O paale tɔ́ a leŋɔmmɛwndɔlen coo, o paangii ŋɔmmɛwndɔɛi nin, mí dɛ̀ndɛ̀ bɛndu kon kundun o pembon Ararat bollen, mó sim ndon. 5Mɛnndan ma lo kɔlan a velaa háá mí paangii tɔ́ndɔɛi tiiya. O paale tasele paangii ken, mí pembon fula bolle muɲɛ́ɛ́-muɲɛ́ɛ́.
6Mɛɛ palɛi tosan belehiɔɔlu, mí Noe kumbi dio-pɔmbɔ o tosa o dɛ̀ndɔ̀ɔ́-o. 7Mó soli basabasakoendoo lon, mó mal ndu. Basabasakoendoo kɔlan, o viw le mó muungu o dɛ̀ndɔ̀ɔ́. Mɛɛ mì vanáà cum-ndɔ ɲɛ-pɔmbɔ le mɛnndan velaa o lɛŋnden coo. 8O kon kɔɔli, mó soli vɛlɛ poonpoondo le sinaa te mɛnndan maa vela nin. 9Kɛ poonpoon kon kɔ sɔla fonda calaa le, kani mɛnndan ma va vɔ o lɛŋnden kpow coo. Mó muungu Noe ikɛi o dɛ̀ndɔ̀ɔ́ nin, mí Noe siɛndi baa, mó bii ndu, mó luei ndu o dɛ̀ndɔ̀ɔ́ nin. 10Mɛɛ nda cii palɛi ndii ŋɔmmɛw o kon kɔɔli, mó soli vɛlɛ poonpoon kon, mó mal ndu. 11Mí poonpoondo muungu ndu o ibuŋ icɔllo a peele kiyɛile yɔm oliviee o icɔcɔ. Mí Noe sina dɔ́ɔ́ maa mɛnndan ma kandu tolɔɔ. 12Má tosa vɛlɛ palɛi ŋɔmmɛw, mó soli poonpoondo, mó mal ndu. Kɛ poonpoondo muungu lɛ ndu o ibuŋ te.
13Vɔsi Noe suili vɔsilan kɛmɛ leŋɔmpum a ò pilɛ-o, paale tasele vɔsi kon, mí mɛmma man ma vela o lɛŋnden kpow coo. Mí Noe faŋa yindɔ ndóò handu o dɛ̀ndɔ̀ɔ́ coo-o, mó tofa o bɛ́ɛ̀, mó ca maa lɛŋnden le vesa. 14O paale bidiin a leŋɔmmɛwndɔle paangii diinndɔɛi coo, mí lɛŋnden le vesa sɛ́ɛ́n.
15O kon, mí Hala dimul Noe aa: 16«Fula o dɛ̀ndɔ̀ɔ́ nin a laa nɔm, a poaa nɔmnda a á laandaa ndaa. 17Soli visia co nɔm ikɛi lon-nda kpow: yowva kpede, visia bɛndua a à pɔmbɔa faw, haliko ma sɛŋin o lɛŋnden coo, mà kui.» 18Mí Noe fula o dɛ̀ndɔ̀ɔ́ nin nda laa ndɔ, poaa ndɔa a laandaa poaa ndɔa kan. 19Mó soli vɛlɛ visia, yowva a ɲaa yoomaa pɔm-pɔmbɔa sasun lɛŋ-nda kpow a ŋiɔn-ŋiɔnda.
20Mó cɔaw fonda-loamaa-lasálàá le Mɛlɛka sálàá solullo lecoo. Mó cua visia diandaa yɛ́-yɛ́a a yovaa diandaa yɛ́-yɛ́a, mó soli sálà loamaa a cɔlua kan o fonda-loamaa-lasálà kon coo. 21Mɛɛ Mɛlɛka tuei hoeyii kɛndɛi sálà kon cun, mó dimi aa: «I dow lɛnin lɛŋnden danga le kela vɔɔn vanacieo le. Kani cɔn o felengiyɛi nin, yiyan tosaa yɔŋ vɔɔndo kposon co ndu o kɔl ni. I tɛɛmbuu lɛnin ɲaa yoomaa kpede mɛɛ ya tosa o laan nuaa yɛ le.
22Te lɛŋnden le co vɔ pɛ,
ciɛɔn vanin saŋnɔnndo a kownɔnndo,
hoeiye a hangullo vanin,
vɔɔlen a sialten le vanin,
paalen a ɲumndan ma vanin.
Ɲɛm mun pɛnginin tosanndo le few.»
S'ha seleccionat:
O Kandɔɔ 8: BKG
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© Alliance Biblique en Guinée