Luka 19
19
Ebya Zakaayo omuhooza
1Yaataaha omuri Yeriko, yaagumizamu naahingura. 2Kandi hakaba hariho omushaija orikwetwa Zakaayo omuhooza mukuru, kandi omutungi. 3Yaayenda kureeba oku Yesu arikushusha; kwonka tiyaabaasa ahabw'omutwe gw'abantu, kandi n'ahabw'okuba mugufu. 4N'ahabw'ekyo yairuka, yaaza omumaisho, yaatemba omuri gw'omusikamoori, ngu amureebe; ahakuba akaba naija kuraba aho. 5Yesu ku yaahikire omu mwanya ogwo, yaareeba ahaigur, yaamugira ati: Zakaayo, rahuka, temburuka; ahabw'okuba erizooba nshemereire kusiiba omu nju yaawe. 6Yaarahuka kutemburuka, yaamutaasya owe ashemereirwe. 7#Luk 15:2. Abantu boona ku baakireebire, baayetomboita, nibagira bati: Yaaza kuraarira omuntu omusiisi. 8#Kur 22:1; Kub 5:6, 7. Zakaayo yaayemerera, yaagambira Mukama ati: Reeba, Mukama wangye, ekicweka ky'ebintu byangye naaza kukigabira abooro; kandi ou naagobeize weena, nimmuriha kana. 9#Byak 16:31. Yesu yaamugira ati: Eri izooba okujunwa kwataaha omu nju egi, ahakuba ogu nawe n'omwana wa Abrahamu; 10#Ezk 34:16; 1 Tim 1:15. kandi Omwana w'omuntu akaija kusherura n'okujuna ekyabuzire.
Enfumu ya miina ikumi
11 #
Mat 25:14-30. Ku baahuriire ebyo, yaagaruka yaacwa enfumu, ahabw'okuba akaba ari haihi na Yerusaalemu, kandi bakateekateeka ngu obukama bwa Ruhanga bwaza kureebwa omu bunaku obwo.#Luk 24:21; Byak 1:6. 12Nikyo yaagiriire ati: Omunyiginya omwe akagyenda omu nsi ya hare kuheebwa obugabe ngu bwanyima agarukye. 13Yaayeta #19:13 Omu Rugriika n'omuhuuku. abambari be ikumi, ati: Muzishuuuze, okuhitsya obu ndigaruka. 14#Yoh 1:11. Kwonka abantu be bakaba nibamwanga; baamukuratsa entumwa, nibagira bati: Titurikwenda muntu ogwo ku atutegyeka. 15Ku yaagarukire, aheirwe obugabe, yaaragiira kumwetera abambari abo abu yaahaire empiiha, ngu amanye enshaagi ezi baihire omu kushuubura kwabo. 16Ow'okubanza yaija omu maisho ge, yaagira ati: Mukama wangye, miina yaawe eshaagizemu ezindi miina ikumi. 17#Luk 16:10. Yaamugira ati: Okozire gye, mwambari wangye omurungi! Ahakuba oyesigirwe ahari bikye munonga, obe omutegyeki w'endembo ikumi. 18N'owa kabiri yaija, yaagira ati: Mukama wangye, miina yaawe eshaagizemu ezindi miina itaano. 19Yaamugira ati: Naiwe otegyekye endembo itaano. 20N'ondiijo yaija, yaagira ati: Mukama wangye, miina yaawe ngigi! Nkagibiika omu kiremu. 21Ahakuba nkakutiina, ahabw'okuba oba omuntu ogumire; oyaanura ebi otaanikire; ogyesha ebi otabibire. 22Yaamugira ati: Iwe mwambari 'we omubi, ninkucwera orubanja, niinyiha aha bi waagamba. Okamanya ku ndi omuntu ogumire, ku nyanura ebi ntaanikire, nkagyesha ebi ntabibire. 23Mbwenu n'enki ekyakuzibiire kuha empiiha zangye abazibiika kuzishuubuza, naanye ku naakugarukire, nkaaziihireyo n'enshaagi? 24Yaagambira abaabaire beemereire aho ati: Mumwakye miina egyo, mugihe oine miina ikumi. 25Baamugira bati: Mukama waitu, ka aine ezindi kumi! 26#Mat 13:12. Nimbagambira nti: Oine niwe aryongyerwa; kwonka otaine aryayakwa n'eki aine. 27Kandi abo bazigu bangye abatarenzire ku mbategyeka, mubareete aha, mubaitire omu maisho gangye.
Yesu okutaaha Yerusaalemu n'ekitiinisa
28Ku yaaherize kugamba ebyo, yaagumizamu kwinamuka Yerusaalemu. 29#Mat 21:1-9; Mak 11:1-10; Yoh 12:12-16. Ku yaahikire haihi na Besifaage na Besania aha kibungo ekirikwetwa Zeituuni, yaatuma babiri aha beegi be, yaagira ati: 30Mugyende omu kirorero ekibari omumaisho; ku muraabe nimutaahamu, nimwija kushanga omwana gw'endogoya gutisbikire, ogutakatembwahoga muntu; mugutsibure, mugureete aha. 31Omuntu weena, ku araababuuze ati: Nimugutsiburira ki? Mugarukyemu muti: Mukama waitu naagwenda. 32Abo abatumirwe baagyenda, baashanga kiri nk'oku yaabagambira. 33Ku baabaire nibatsibura omwana gw'endogoya, bakama baagwo baababuuza bati: Nimutsiburira ki omwana gw'endogoya? 34Baabagarukamu bati: Mukama waitu naagwenda. 35Baagureetera Yesu, baagutaho ebijwaro byabo, baagumushutamyaho. 36Ku yaabaire naagyenda, baayara ebijwaro byabo omu nguuto. 37KU yairiire haihi, yaahika aha kashuumo k'ekibungo kya Zituuni, omutwe gwona gw'abeegi be gwatandika kushemererwa n'okuhimbisa Ruhang n'eiraka rihango ahabw'eby'okutangaaza ebi baareebire, 38#Zab 118:26. nibagira bati: Omugabe orikwija omu iziina rya Mukama asiimwe! Obusingye bube omu iguru, n'ekitiinisa kibe ahaiguru ya byona. 39Bamwe aha Bafarisaayo abaabaire bari omu mutwe ogwo, baamugira bati: Mwegyesa, hana abeegi baawe. 40Yaabagarukamu ati: Nimbagambira nti: Aba ku baakuhunama, amabaare gakaagamba munonga.
Yesu okuririra Yerusaalemu
41 #
Yoh 11:35. Ku yairiire haihi, yaareeba orurembo, yaaruririra, 42#Bir 32:29. naagira ati: Eri izooba, kuri noomanya ebyakukureetera obusingye! Kwonka shi hati bisherekirwe amaisho gaawe. 43Ahakuba ebiro biryakwizira, abazigu baawe bakuzitireho orugo, bakwehinguririze, bakutangatangye embaju zoona; 44#Luk 21:6. bakuteere ahansi n'abaana baawe abakutwiremu; tibarikutsigamu ibaare eriri aha rindi, ahabw'okuba toramanyire biro eby'okutaayaayirwa kwawe.
45 #
Mat 21:12-16; Mak 11:15-18; Yoh 2:13-16. Yaataaha omuri hekalu, yaatandika kubingamu abaabaire nibatunda, 46#Isa 56:7; Yer 7:11. yaabagira ati: Kikahandiikwa ngu, Enju yangye eryaba ey'okushabirwamu; mbwenu imwe mugihindwire enyanga y'abambuzi. 47#Luk 22:53; Yoh 18:20. Yaaguma naayegyesa obutoosha omuri hekalu. Kwonka abanyamurwa abakuru n'abahandiiki n'abakuru b'abantu baacwa obwengye oku baraamwite; 48baabura eki baraakore, ahakuba abantu boona bakata omutima munonga aha bigambo bye.
S'ha seleccionat:
Luka 19: RR64
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
The Bible in Runyankore-Rukiga © United Bible Societies, 1964