Gen 4
4
Kayini ni Abele
1Adamu* ŵatemi malo gamo ni Hawa ŵamkwakwe, nipo ŵamkwawowo ŵakwete cilu, ni ŵaŵelece mwanace jwamlume, ni ŵatite, “Mbocele mwanace jwamlume mwa cikamucisyo ca AMBUJE.”* Myoyo mwanacejo ŵampele lina lyakwe Kayini. 2Panyuma pakwe ŵaŵelece soni mwanace jwine jwamlume lina lyakwe Abele, mpwakwe jwa Kayini. Piŵakusile, Abele masengo gakwe galiji gakucinga ngondolo, nambo mkulugwe jula Kayini ŵaliji mnamalima. 3Pali papite ndaŵi, Kayini ŵajigele yisogosi yine ya kumgunda, ni ŵayitasile mbopesi kwa AMBUJE. 4Abele nombe nawo ŵajigele mwanace jwandanda kupagwa mwa jimo ja ngondolo syakwe, ni ŵajipelece mbopesi kwa AMBUJE, pamo ni mawuta gakwe. Mlungu ŵasangalele ni Abele, ni ŵajipocele mbopesi jakwe.#Aheb 11:4 5Nambo AMBUJE ngananonyelwa najo Kayini, ni nganajipocela mbopesi jakwe. Ligongo lya yeleyi Kayini ŵatumbile mnope, kwakuti ngope jakwe jaliji jakugwa ni jakwete sinya. 6Nipo AMBUJE ŵamwusisye Kayinijo kuti, “Ana mtumbilile cici camti myiyi? Ligongo cici ngope jenu jili jakugwa? 7Mkaŵe kuti mtasile mbopesi jenu mwakwenelela, une ngajipocele. Nambo ligongo lyakuti mtesile yakusakala, ulemwa ukusamgwaŵilila pa mlango penu kusosa kuti umlamulile, nambo m'mwejo mwupunde ulemwawo.”*
8Lisiku line Kayini ŵamsalile Abele mpwakwe kuti, “Kwende tukajendejende.” Ali ayice kumalo gaŵaŵilipe, Kayini ŵamjimucile mpwakwe jula Abele ni ŵamwuleje.#Mat 23:35; Luk 11:51; 1 Yoh 3:12
9AMBUJE ŵamwusisye Kayini kuti, “Ana mpwenu Abele ali kwapi?” Jwalakwe ŵajanjile kuti, “Ngangumanyilila, ana gali masengo gangu gakumlolela mpwanga?” 10AMBUJE ni ŵamwusisye soni kuti, “Ana cimtesileci ni cici? Miasi ja mpwenu jikundilila une kutyocela mwitaka.#Aheb 12:24 11Sambano m'mwejo mli ŵakulweseka. Ngasimlima soni pa litakali lyalijinjile miasi ja mpwenu, jele jimjikopwesye ni makono genu pakumwulaga. 12Patimlimeje mbeju, litaka ngasilimpa m'mwejo yagowola yiliyose. Nipo timŵe mundu jwagamba kwendajenda, jwakusoŵa pakutama pa cilambo capasi.”
13Kayini ŵatite kwa AMBUJE, “Cilango celeci cikusile mnope, kugapunda macili gangu. 14Sambano mundopwele une pa cilambo acino ni pameso penu. Timbe mundu jwakutilatila pa cilambo capasi, jwalijose jwakusimana une, tacimbulaga.”
15Nambo AMBUJE ŵamjanjile kuti, “Ngaŵa myoyo! Jwalijose jutamwulaje m'mwejo Kayini, tacipocela cilango cacikulungwa, une tinjimwucisya mundujo kasano ni kaŵili.” Myoyo AMBUJE ŵaŵisile cilocesyo pa Kayini kuti mundu jwalijose jwakumsimana Kayini akusamwulaga. 16Myoyo Kayini ŵatyosile pameso pa AMBUJE kuja kutama ku cilambo ca Nodi, kungopoko lyuŵa kwa Edeni.
Yisukulu ya Kayini
17Kayini ŵatemi malo gamo ni ŵamkwakwe, nipo jwamkongwejo ŵakwete cilu ni ŵaŵelece mwanace jwamlume, juŵampele lina lyakwe Enoki. Kaneko Kayini ŵataŵile msinda ni ŵawupele lina lya mwanagwe jwamlume jula Enoki. 18Enoki ŵakwete mwanace jwamlume lina lyakwe Iladi. Iladi ŵakwete mwanace lina lyakwe Mehuyaele. Mehuyaele ŵakwete mwanace lina lyakwe Metusaele. Metusaele ŵakwete mwanace lina lyakwe Lameki. 19Lameki ŵalombele acakongwe ŵaŵili, Ada ni Sila. 20Ada ŵaŵelece Yabali jwali nangolo jwa mtundu wa ŵandu ŵakulanga yilangwa, ni ŵakutama m'ma tenti. 21Mpwakwe lina lyakwe ŵaliji Yubali, juŵaliji nangolo jwa ŵandu ŵakwimba yida yakwimbila ya ngonji ni citolilo. 22Sila ŵaŵelece Tubali Kayini. Jwalakweju ni nangolo jwa ŵandu ŵakukamula masengo gakusyana kopa* ni yisyano. Mlumbugwe jwa Tubali Kayini ŵaliji Naama.
23Lisiku line Lameki ŵasalile aciŵamkwakwe kuti,
“M'mwe Ada ni m'mwe Sila pikanicisyani maloŵe gangu.
Une mbuleje mundu ligongo ŵambulesye,
namwuleje mcanda jwele juŵambutile.
24Naga mundu jwakumwulaga Kayini akumwucisya kasano ni kaŵili,#Mat 18:22
ni kuti mundu jwakumbulaga une Lameki tacimwucisya kwakwanila 77.”
Kupagwa kwa Seti ni Enoshi
25Adamu ŵatemi soni malo gamo ni ŵamkwawo, nipo ŵakwete cilu ni ŵaŵelece mwanace jwamlume. Hawa ŵatite, “Mlungu ambele mwanace jwine jwakwinjila m'malo mwa Abele, juŵawulajidwe ni Kayini.” Mwanacejo ŵampele lina lyakwe Seti. 26Seti ŵakwete mwanace jwamlume juŵampele lina lyakwe Enoshi. Ndaŵi jeleji ni jiŵatandite ŵandu kulilumba lina lya AMBUJE m'mapopelo gawo.
S'ha seleccionat:
Gen 4: YAWO
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Chiyawo Bible: Buku Jeswela © Bible Society of Malawi, 2014