Matayo BŪSOMBOOJI BO KŪGUNAANA
BŪSOMBOOJI BO KŪGUNAANA
Ī shitabo sha ng'wa Matayo shilītwinha Nghūlū Jawiza mu kūtoolekeja gīkī, ū Yesu hū ng'wene ū Mpīja ūyo banhū baalī bisagījiwa na Mulungu. Īyo walī wabisagīja a banhū bakwe ū Mulungu mu shikū j'Ilagano lya Kale, akīshikīlīja mu nzīla yakwe ū Yesu. Ū Yesu akabyalīlwa ng'wihanga lya Bayudaya, nū kūkūla ūkūlīla mu sī yabo, nī milīmo yakwe wītīla kwenūko, kūshisha ūmala ū nīmo ūyo walī wiza kūgwīta. Aho lyang'wa ī likanza ūcha hama ūjūūka; hūna ūshoka ng'wigūlū hangī.
Ū mu shitabo sha ng'wa Matayo, pyī ī mihayo īhelilwe mu būgaliili chiza. Tūloolekejiwa kwandīja ya būhangi bo kūbyalwa kwa ng'wa Yesu, mihayo ya ha būnīgīnī bokwe, ya kūbatīījiwa kwakwe mu būbatīīja bo ng'wa Yohana, na ya kūgeng'wa kwakwe, aho ataalī kwandya milīmo. Tūlīsoma gīkī ū Yesu akandīja ū būtūmami bokwe mu sī ya Galilaya. Wajaga akūlomeelaga na kūlanga, hamò na kūpīja būsaatu bo mbika jose.
Tūloolekejiwa nī ya lūgendo lokwe ū Yesu, aho wafumaga Galilaya kūja Yelusalemu, nī yīyo īkang'wilongela mu nyuma ya kūmalīja būtūmami bokwe aho alī mu mīlī gwa mu sī. Ū mu būsombooji bo ng'wa Matayo tūlīyīsoma ī mihayo ya ng'wa Yesu kūshisha ikanza lya kūbūlagwa kwakwe ha nsalaba, na kūjūūka kwakwe kūfuma mu bafu.
Ū nīmo go ng'wa Yesu ūyo tūlīgūbona ū mu shitabo shenīshi, gūlī gwa būlangi. Tūlīmona gīkī alī Nangi Ntaale, ūyo adūgije kūbatonga mu būlembeezu a banhū, na kūbalanga chiza ī shilagīlo sha ng'wa Musa, nī mihayo ya būtemi bo ng'wa Mulungu, nguno ayīmanile chiza. Īyo wīlangaga ū Yesu, tūlībona īsūmbiwe mu magele mataale atanò ū mu shitabo shenīshi.
1. Būlomeeji mū lūgūlū
Ū būlomeeji wenūbo būtūūlilwe ng'wigele līmò; būhelwa kwandīja sula ya katanò kūshisha ya mpungatī. Ū ng'wigele lyenīlī tūlīlangwa ūmo būlī ū būtemi bo ng'wa Mulungu, nī yīyo ībigelile abo bigeleelilwe kūbiza mo ū mu būtemi wenūbo.
2. Amemba bakwe
Ū mu sula y'ikūmi tūlībona alībalanga a bahemba bakwe gīkī ū wei h'alī ntūmi wabo; na lūūlū alīboolekeja īyo ībigelile kwīmana ū mu būtūng'wa wabo.
3. Būlangi mu soma
Ī sumo ī ningī ījo akajitūmamīla ū Seeba Yesu kūlanga mihayo ya būtemi bo ng'wigūlū, jisūmbiwe mu sula y'ikūmi n'idatū.
4. Kūhembekwa na Yesu
Ū kūbiza nghemba o ng'wa Yesu gūtī mhayo gwa nyaleele-leele. Shiigelile ū munhū ilanghane mu yose īyo akwītaga; atizūbipamya a banhū mu mhayo gose-gose. Ū būlangi wenūbū būsūmbiwe na kūhelwa chiza mu sula y'ikūmi n'inaane.
5. Būkalīkījo w'ikanza
Ī mihayo ya būkalīkījo w'ikanza īlī tūlī nalyo ī haha, nī ya kwiza kwa būtemi bo ng'wa Mulungu, īhelilwe chiza mu sula ya makūmi abīlī n'inè kūshisha makūmi abīlī n'itanò.
ĪYO ĪLĪMO
Shibyalīlwe sha bakūlūgenji ba ng'wa Yesu, na kūbyalwa kwakwe (1:1 — 2:23)
Būtūmami bo ng'wa Yohana Matīīja (3:1-12)
Kūbatīījiwa kwa ng'wa Yesu na kūgeng'wa kwakwe (3:13 — 4:11)
Būtūmami bo ng'wa Yesu mu Galilaya (4:12 — 18:35)
Yesu kwīnga Galilaya kūja Yelusalemu (19:1 — 20:34)
Nyuma ya būkalīkījo bo būtūmami bokwe mu Yelusalemu (21:1 — 26:46)
Kūding'wa na kūbūlagwa ha nsalaba (26:47 — 27:66)
Kūjūūka na kwiyoolecha kwakwe (28:1-20)
S'ha seleccionat:
Matayo BŪSOMBOOJI BO KŪGUNAANA: SNT00
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Sukuma New Testament © Bible Society of Tanzania, 2000.