KANTHOUNA 11
11
Babelyei Shangkai Cheemtang
1Bongei chaan khatrou tlaipangpal nammani tloulim khattomcha yunkhou, heirou tloulhang'khi chungmakni yunrilkhou. 2Heirouri thimi rapne kulkung lhangroueini yul hungurbi, heirou yani Shinar ramra phaikar khat karthangkur, heitoubi yani bi heitamrou yuldabini paalkur. 3Heirouri yani khatle khat thourilbini, “Soh, wawalo, kani thleibul mankonbini seowase, heitoubi chiek ikkase,” toubine markhulkur. Heisitoubi ani thlungei runghutnung chiek ikbini, heirou naprilyernanungeini thleibulya hoiyerkur. 4Heitoubi yani kyun, “Soh, wawalo, waiyoulakase; heitoubi kani khukarthil phunbaangbi, heirou nungthou katokni Shangkai Cheemtang chouni khat sabaanglakase. Heitoubi kani kaitamei min chayerrase; heisi nimanungri kari tlaipangpalla kaitam karbaikur kya.” 5Heirouri tlaipang thimi rapne phunbaangkur khukarthille Shangkai Cheemtang heiya Umpune yongbi yeelthikur. 6Heirou Umpune kyun, “Thilak, thimi rapne lim khattom khoini leikhou, heirou yani tloulim khattomya yunkhou, heirou yani asitoubi lhou touyouwura; heirou asinungri yaiyei toukniya touweise toulanungri manimakri makrou. 7Heine asinungri Kane yongchumbini yai kyun tlouya manokyerbi tamungyerlakase; heiyanungri yani khatle khat yunkril tloulhangrap heiri mayekrilmakarou.” 8Heisitoubi Umpune yaya bi heirouwei touchekkurbi tlaipangpal thleidou karyoukur; heitounei yani khukarthil heiwaya sabaangmakni lakurkhou. 9Heitounei ngammei bi heiyei minri Babel toubine ungkur; ngamri Umpune bi heitamrou tlaipangei tlouya manokyerkur, heirou bi heirouwei Umpune yaya chekyerwurbi tlaipang thleidou karyouyerkur.
Shemyei Yu-charap
(1 Ch 1.24-27)
10Shemyei yu-cha rapri: Shem'yei kum macha khat ka'tlungeinung, yuitanghil kum'khni heirouri ani Arphaxad pukkhou. 11Heirou Shem'ne Arphaxad'ya pukkur hilloukhi kum macha-phanga paalkhoubi, heirou ani chanapawa deikhi heirou chanapuiya rapkhi pukkhou.
12Heirou Arphaxad'ne kum somthumle phanga paalkhoubi, heirou ani Shelah'ya hungpukkur. 13Heirou Arphaxad'ne Shelah'ya pukkur hilloukhi kum macha-phali'le khyum paalkhoubi, heirou ani chanapawa deikhi heirou chanapuiya rapkhi pukkhou.
14Shelah'ne kum somthum paalkhou, heitoubi ani Eber pukkhou. 15Heirou Shelah'ne Eberya puk'hilloukhi kum macha-phali'le khyum paalkhoubi, heirou ani chanapawa deikhi heirou chanapuiya rapkhi pukkhou.
16Heirou Eber'ne kum somthumle phali paalkhoubi, heitoubi Peleg'ya hungpukkur. 17Heirou Eberni Peleg'ya pukkur hilloukhi kum macha-phali'le somthum paalkhoubi, heitoubi ani chanapawa deikhi heirou chanapuiya rapkhi pukkhou.
18Heirou Peleg'ne kum somthum paalkhoubi, heitoubi ani Reu'ya hungpukkur. 19Heirou Peleg'ne Reu'ya pukkur hilloukhi, kum macha-khnile tako paalkhoubi, heitoubi ani chanapawa deikhi heirou chanapuiya rapkhi pukkhou.
20Heirou Reu'ne kum somthumle khni paalkhoubi, heitoubi ani Serug'ya pukkur. 21Heirou Reu'ne Serug'ya pukkur hilloukhi kum macha-khnile eni paalkhoubi, heitoubi ani chanapawa deikhi heirou chanapuiya rapkhi pukkhou.
22Heirou Serug'ne kum somthum paalkhoubi, heitoubi ani Nahor'ya pukkur. 23Heirou Serug'ne Nahor'ya pukkur hilloukhi kum macha-khni paalkhoubi, heitoubi ani chanapawa deikhi heirou chanapuiya rapkhi pukkhou.
24Heirou Nahor'ne kum somnile tako paalkhoubi, heitoubi ani Terah'ya hungpukkur, 25Heirou Nahor'ne Terah'ya pukkur hilloukhi kum machale chiple tako paalkhoubi, heiroubi ani chanapawa deikhi heirou chanapuiya rapkhi pukkhou.
26Heirou Terah'ne kum somretbil paalkhoubi, heitoubi ani Abram, Nahor heirou Haran'ya hungpukkur.
27Asinungri Terah'yei yu-cha rapri asitoubi leilei: Terah'ne Abram'le, Nahor heirou Haran'ya pukkhou, heirou Haran'ne Lot'ya pukkhou. 28Heirou Haran'ri aiyei pa Terah'ne hibongnung, aya pukna bi Chaldea rapbei ram Ur khukarthilla hikur. 29Heirou Abram'le, Nahor yakhuntari nu louwurla; Abramei nuri min Sarai toubine ung; heirou Nahoryei nuri min Milcah toubine ung, heirou Milcah'ri Iscah'yei pa Haranyei chanapuiya. 30Heirou Sarai'ri khungurbi, chanao pukmakkur.
31Heirou Terah'ne aiyei chanapawa Abram'le, aiyei chanapawa Haran'yei chawa Lot touri aiyei yuwale, heirou aiyei mouwi, Abramei nu Sarai, yarap nammaya ruiloubini Chaldea rapbei ram Ur khukarthilya lakurkhoubini Canaan ramranung chakur; heiya yani Haran'ra wa'tlungurbi, heitoubi yani bi heitamrou paalkur. 32Heirou kheen heinungri Terah'yei kumri macha-khnile phanga tlungura; heirou Terah'ri Haran'ra hikur.
S'ha seleccionat:
KANTHOUNA 11: MARIBSI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.