LUKE 22
22
Jesu'ya Yorkur
(Mt 26.1-5; Mk 14.1-2; Jn 11.45-53)
1 #
Hoy 12.1-17. Phri siklhakmak mumtollei khulbung marngeini touri Ralthutpinei Puluk markhulni heiri hungtlungura. 2Heirou Suipipu upa raple Tloulam marnopi pu rapne thimi chungya chinei ngamrou, heirou yane munne thimidei hukhatyakhi muyermakne hatnanungei wairaangkur.
Judas'ne Jesu'ya Munne Yorwurnung Yalhakkur
(Mt 26.14-16; Mk 14.10-11)
3 #
Jn 13.2. Heirouri ruishik chiple-khni hangrouwei, minri Iscariot toubi ung Judas'yei ukningra Satan changurbi; 4heirou ane wathukkurbi Suipipu upa raple Pukhrumna cheem kngaak rapbei ruipipu raple pulne murilbine, heirou ane Jesu'ya kousitoubi yanungei yorlhakserouwo toubi yunrilkur. 5Heitounarou yane beimakne nungwaiwurbi, anungei tuy pirou toubi yarilbi yane mardingkur. 6Heirouri Judas'ne yalhakurbi, heitoubi thimi deine muthungmakne Jesu'ya manbi yaihutra piwurnanungei tlakchaya thiphakur.
Jesu'ne Ralthutpinei Puluk Markhulnungei Marshikkur
(Mt 26.17-25; Mk 14.12-21; Jn 13.21-30)
7 #
Hoy 12.18-20; Khn 16.5-8. Heirouri phri shikmak mumtollei khulbung marngeinei kheen hungtlungura, heine Ralthutpinei Puluk markhulnungei yao rapya hatnanung wairangura. 8#Pao 3.1; Lk 19.29. Heirou Jesu'ne Peterle John'ya atoubi shunmatupikur, “Nane louchawurbi heirou kaiyei Ralthutpinei Puluk markhulnungei loumarshiklakalo” toubi louhilkur. 9“Nangne kaya marshikyerkni biri koutam'rouwo?” toubi yane anung loukngai. 10Heirou Ane yanung loushun, “Nane khukarthilla wachangeinung yuikhang urbine napawa khatne naya lourorillou. Heirou nane aihilla heichanthungbi aiyei wachangna cheem heirou wachangniya. 11Heitoubi nane wachangbi cheempu heiwanung wayunlak: ‘Upawane neinungei shunthunglei, Keile heirou Keiyei ruishik raple pulne Ralthutpinei Puluk markhulnungei neiyei cheemra dourei bomtho heiri koulhangra leileiyo?’ 12Heirouri ane aiyei cheem dourei marya bomtho khat lhangaidui mansambi loukhou heiso nanungei ruimutpirou, bi heirou Puluk markhulna'nungei putchei namyerwa marshikbi louklei nane wamurou.” 13Heirou yane wanarou, Aiyei shunthungkur heinakrimne namyerwa heiso marshikchibi louklei yane wamukur, heirouri yane bi heirou Ralthutpinei Puluk khangnanung marshikkurkhou.
Umpuei Puluk Markhul
(Mt 26.26-30; Mk 14.22-26; 1 Co 11.23-25)
14 #
Mt 26.20; Mk 14.17; Jn 13.17. Heirouri kheen hungtlungkur heirouri, Jesu'ne Aiyei ruishik raple pulne lukturngra karhilne omkarhungkur. 15#Lk 12.49-50. Heirou Ane yanungei kyun, “Keine klah-mrim doubongnung nale kalhonne anaksi Ralthutpinei Puluk markhulkhoukni. 16#Lk 14.15. Keine nanung atoubi kyun ngamri, Dunpuei Krungbomra anakei lhouya tlungyerbongyen Keiri nale atoubi pulne omkanthrinbi chamaikhou manemarou”. 17#Mt 26.27; Mk 14.23; 1 Co 10.16. Heirouri Jesu'ne daarkep shinbi, heitoubi Dunpuya mathangbi Ane kyun, “Daarkep aya loubi nane kallunmonglak. 18#Mt 26.29; Mk 14.25. Keiyei nanung kyunri, arouwei waiyoubine Dunpuei Krungbom yongbongyen Keiri anakei darkha yuiri mongkhoumarou.”
19Heitoubi Ane mumtolkhi loubi, heirou Dunpuya mathangkur, heitoubi threlchaalbine yanung malanpikur heirou Ane kyun, “Ari nanung'tlim pithutkur Keiyei sharung. Keiya ningthutnanungei nane aya toulak.” 20#Jer 31.31-34. Heinakrimne mumtol shaikur hillouri Ane daarkep heiya shinbi yanung kyun, “Ari Dunpuei ranyei mardingrilna Keiyei heene hutlha dayerwurbi nanungei fleithutkur daarkep.”
21 #
Mt 26.21-24; Mk 14.18-21; Jn 13.3-16; Laa 41.9. “Heiya thilak! Keiya yorrou thimi heiri Keile lukturng pongra kanthrinni ommalnabi leilei! 22Thimiyei Chanapawa heiri Dunpune Anungei mardingpikur heiyei hilthungne hirouwa, heiya Aya yorkur napawa heinungri kounakei lah'kna hoirouwo!”
23Heirouri yaihangra heinak thimi heiri huwo toubine yane khatle-khat ngairilkur.
Hune Tangdui Thimi Hoileiyo Tounei Ngamrou Tlou Yitkril
24 #
Lk 9.46; Mk 9.34; Mt 18.1. Ruishik rapne yaihangra hune tangdui thimi hoileiyo toubi yaitam beimakne yeetrilyoukur. 25#Mt 20.25-27; Mk 10.42-45; Jn 13.3-16. Heirouri Jesu'ne yanung shun, “Gentile rapbei krung rapne yai doura pu hoinanungtom waikrang, heirou yai lhou'ur-laa'ur upa rapne yaitam yunkna touri ‘Kari thimi deinungei lhangai lhou toupi paluirap.’ 26#Mt 23.11; Mk 9.35,48. Heiya naihangrari heinakne hoimakrou, heinung tlimri, naihangra duiyei tang thimi heiwane nam'rouwei mandidui thimi hoiyasu, heirou ruichingthimi heiri minung watlhou toupi'kni thimi hoiyasu. 27#Jn 13.12-15. Heiyanungri, hune tang thimi hoileiyo, lou'ombine chamaithung heiwane tang thimi hoirouwo? Nimanung yanungei watlhou yentoupi thimi heiwane tang thimi hoirou? Moi, ombi louchathung thimi heiwane tang thimi hoimakrouwa? Heiya Keiri naihangra minungei watlhou toupi thimi heinaklei.
28 #
Lk 4.13; Heb 2.18; 4.15. #Mt 19.28. “Nari Keiyei klah-mrim nangnara kalhonbi leiwurkhoula; 29heirou Keiyei Pawane Keidoura maneyei mantrang piwurkhou heinakne, Keinekhi heinakrim nanungei manenei mantrangya pilei. 30#Mk 10.37; Mt 19.28; Kre 3.21; 20.4. Keiyei Krungbom-omna doura ombine Israellei phungh chiple khniyei doura pichar toubi leiheirou.”
Jesu'ne Peter'ri Aya Yapimakne Horrouyounei Ngamrou Yunthutkhou
(Mt 26.31-35; Mk 14.27-31; Jn 13.36-38)
31 #
Job 1.6-12; Ams 9.9. “Simon, Simon, louningpilak! Satan'ne naya malhimrou waiyoulei, loutrun thimine gehuya yuile-tsaile hommathaibi khaithutkur heinakne, lhangaile lhangaimakle khaithutnanung yapiwurla. 32#Jn 17.15; 21.15-17. Heiya Simon, neiyei uklumya hil kallengmaknungei Keine neinung'tlim shunchapiwurla. Heirou nangne Keinungei hanui kallengthuanungri, neiyei teinao rapya nangne yai uklumya mantrangyerpilak.”
33 #
Mt 26.33-35; Mk 14.29-31; Jn 13.37-38. Heirou Peter'ne loumallang, “Upawa, keiri Nangle kalhonne kulrilla chalphoprou dawanungkhi, heirou hirou dawanungkhi keiri Neihilla chanthungrou!”
34“Peter, Keine neinung tanghakne shunlei,” Jesu'ne anung loushun, “Angtu masarou nangne Keiya yamakne ‘mumakme’ toubi khyumbuibil yunbongnung waapane khungmakrou.”
Tuykao, Kaotang, Heirou Raalshon
35 #
Lk 10.4; Mt 10.9-10; Mk 6.8-9; Lk 9.3. Heirouri Jesu'ne aiyei ruishik rapnung kngai, “Keine naya tuykaokhi, nimanung kaotangkhi nimanung khorkhangkhi yaomakne watyilbi malhetkur, heiya kheen heirouri nai kwatsamri kou klei?” “Heinangri koukhatkhi kwatsam makme,” toubi yane loumallangkur. 36#Lk 22.49-50. “Heiya arouri,” Jesu'ne kyun, “Na huhune tuykao nimanung kaotang klei thimine ruilaka; heitoubi huhune raalshon mak thimi rapne ai'aiyei linglikchulya yorwurbine khatsol lolaka. 37#Isa 53.12. Keine nanung kyunri, Khyingei Lailikra atoubi mayekhoulei, ‘Ayakhi thimihat thimi'nakne yaihangra sherchoklei.’ Keiyei ngamra heinakrimne mayelhakhou heiso chimne thukkeirouso, ngamri mayethutkhou heiri Keinung hungtlungyerrou.”
38Ruishik rapne, “Thilak, Upawa! Arou raalshon khintam leileime!” toubi loukyun.
Heirouri Jesune, “Heiwane kro hoilakasu!” toubi loushun.
Jesu'ne Olive Lhungdoura Shunchakur
(Mt 26.36-46; Mk 14.32-42)
39 #
Mt 26.30; Mk 14.26; Jn 18.1. Jesu'ne aiyei youkna khoine Khukarthilya horkhoubi, Ane Olive lhungdoura kakur; heirou ruishik rapkhi aihilla katchanthungkur. 40#Lk 11.4. #Heb 5.7-8. Ane bi heirou ka'tlungnarou, yanung kyun, “Nane malhimnara dawurmaknung Dunpunung shunchalaklo.”
41Heirouri Ane thlung khingphana ramnak tlatrilni yaibirouwei chutdurbi, heirou ane khuklu kanthrunchabi shunchakur. 42#Mk 10.38; Jn 18.11; 5.30. “Pawa,” Ane kyun, “Neiyei kning hoiyanungri Keiyei klah-mrim nangei daarkep awaya louthutdurpilaklo; heisiya hoiyanungkhi Keiyei kning hoimakne Neiyei kning hoiyasu!” 43Heirouri Thangmunrei Thangringne Anungei yongbi Aya mantrangyerkur. 44Ane beimakne klahne kalleng kallengne shunchakur; heirouri Aiyei sharungrei tlankhi heenak thleira kungsundakur.
45Heitoubi Ane shunchana birouwei kanthoubi, heirou Aiyei ruishik rapbei leinara yenkallengeinung yane lahwurnei ngamrou ipbine louklei yenchanphakur. 46Heitounei Ane yanung shunkur, “Nari koutounei ipkurawo? Phyoubi malhimnara damaknanungei shunchalaklo.”
Jesu'ya Kman
(Mt 26.47-56; Mk 14.43-50; Jn 18.3-11)
47Heirouri Jesu'ne tlou yunbine louleiyeinung, ruishik chiple khniyei hangrouwei Judas'ne thimi chungne heiruiheibine bi heitamrou wa'tlungkur. Heitoubi ane Jesuei pongra pokarsilbine Aya machupkur. 48Heirou Jesu'ne loushun, “Judas, nangne Thimiyei Chanapawayari hanuitom machupbi yorchakuraleinu?” 49#Lk 22.38. Heirouri lhouthuk heiya munarou, Jesule kalhonbi louklei thimi rapne kyun, “Upawa, kaishon-khyang rapya louthutbi yrengserouko aya?” 50Heirouri yaihangrei napung-khatpane Suipipuei shok khatya thyarei khnabil shatsundawurpi. 51Heiya Jesu'ne shunkur, “Heiya duine toupimaka!” Heirou Ane napawa heiwaei khnabilla thirpibi raiyerpikur. 52Heirouri Jesu'ne Aya manrou wakur thimi, Suipi purap, Pukhrumna Cheem kngak thimiyei ruipi purap, heirou upa rapnung loushun, “Mucha thimiya manrou kyounakne, nane shonle-cheile shinbine Keiya manrou wathukkuraleine? 53#Lk 19.47; 21.37. Keine tlainiser Pukhrumna Cheemra nale kalhonne leiyeinungri nane Keiya mannimak, heiya angturi kmehyei mantrangne makhubpopbi leiyeinung nane Keiya mannanungei kheen hoikurraleinu!”
Peter'ne Jesu'ya Yapimakur
(Mt 26.57-58,69-75; Mk 14.53-54,66-72; Jn 18.12-18,25-27)
54Heirouri yane Jesu'ya manlouheibine, aya Suipi puwaei cheemra ruilouheila; Peter'ne bei tlatnarouwei heichanthungkur. 55Heitoubi yane yuntlangmaira meibom lukbine leinarou, bi heirou Peterkhi meibom karhilne omkarhungbi klei thimi rapbei hangra mei rahaibi hei'omthungkur. 56Heirouri nangaka-shok rapbei hangrei khatpini ane meipongra ombi klei heiwaya munarouri, thimanrebine, “Napawa heikhi Jesule kalhonkhou!” toubine heikyun. 57Heiya Peter'ne yanimakne loushun, “Nangaka, keiri aya tekhi mumak!” 58Heihillou beicha leibi napawa napung khatnekhi mulhakurnarou ane kyun, “Tanghakne nangkhi yaihangrei napung-khat nimakeiya?” Heiya Peter'ne yanimakne loumallangkur, “Napawa, keiri nimakso!” 59Heirou lepcha leibi hanuikhi napawa napung khatnekhi shunmandobine kyun, “Tanghakne napawa heikhi Jesule chamalnakhou thimiso, ngamri a heikhi Galilee'rei thimiso!” 60Heiya Peter'ne loumallang, “Napawa, neikyun heiri huyawo keiri aya mumakso!” Heirouri tallengne waapa khatne katkhungkur. 61#Lk 7.13; 22.34. Heirouri Upawane heikallekbi Peterya thikur, heirou Peter'ne Jesuei yunthutdurkhou heiya ane, “Angtumasa waapane katkhungbongnung nangne keiya khyumbuirek yapimakkeirou.” toubi loumayekthutkur. 62Heirou Peter'ne daangra wathukbi malungdouni chapkur.
Jesu'ya Laokna Heirou Umkur
(Mt 26.67-68; Mk 14.65)
63 #
Jn 18.22-24. Heirou Jesu'ya manbine kngak thimi rapne Aya laonakur heirou umkhi ummurpi. 64Yane Aya mitlung yitkhalbi heitoubi anungei tlou kngai, “Neiya hei'umkurri huwo muleiya, louyunthi?” 65Heirou yane Aya khremknaei tloune yunbi beimakne laokna.
Jesu'ya Yama-krung rapbei Maibongra Urthut
(Mt 26.59-66; Mk 14.55-64; Jn 18.19-24)
66 #
Mt 26.57; Mk 14.53; Lk 22.54. Tlaini khuwaarkur heirouri, upa raple, Suipipu raple heirou tloulamyei upa raple kartilbine, heitoubi yane Jesu'ya yama-krung rapbei maibongra urthutkur. 67“Kanungei yunlak,” yane tlou loukngai, “Nangri Messiahko?” Heirou Ane loumallang, “Keine yunpibikhi nane Keiyei tlou loupimakrou; 68heirou Keine tlou ngaibikhi nane Keinung loumallangpirou nimak. 69Heiya angturou waiyoubine Thimiyei Chanapawane Mantrang Dunpuei thyalhangra ombine leirouwa.” 70Heirou ya nammane kyun, “Heiyanungri nangri Dunpuei Chanapawako?” Ane yanung loumallang, “Keime toubi nai yunkur heiwariya.” 71Heirou yane kyun, “Kane ayaduinara tlou ngaiduinungkhi makkurra! Aiyei murrei yunthutkur tlou rapya ka nammane mayekkurla!”
S'ha seleccionat:
LUKE 22: MARIBSI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.