JOHANA 1
1
Ng'aleek che indou
1Eng' taunet ko ki mi Ng'olyoot, ak ki mi Ng'olyoot ak Kamuktaindet, ak Ng'olyoot ko ki Kamuktaindet. 2Ki mi ineendet ak Kamuktaindet eng' taunet. 3Ki kiyai tuguuk tugul eng' ineendet; ak ma mi kiy agot agenge ne ki piit ama eng' ineendet. Kiy ne ki yaak 4eng' ineendet ko ki saboondo, ak saboonooto ko ki lapkeiyetap piik, 5ak iluu lapkeiyet eng' mesundeito; ak ma iterteer `mesundeito lapkeiyonooto.
6 # Mat 3.1; Mar 1.4; Luk 3.1-2 Ki nyo chii ne ki iyook Kamuktaindet, ne ki kiguure Johana. 7Ki nyo chiichooto koek paoryat, si kobaoryanji lapkeiyet, si kobiit koyan piik tugul amu ineendet. 8Ki ma ko lapkeiyonooto ineendet, ago ki nyo si kobaoryanji lapkeiyonooto. 9Ki mi lapkeiyet ne po iman, ne nyoonei ng'wony, ne iluuchin chii tugul.
10Ki mi ng'wony ineendet, ak ki kiyai ng'wony eng' ineendet, ak ki ma nai `ng'wony ineendet. 11Ki nyoonji chechiik, ak ki ma taach ineendet `piikyik. 12Ago tugul che kitaach ineendet, ko ki igoochi kamuget koek lagogap Kamuktaindet, icheek che iyani kainennyi, 13che ki kisich ama eng' korotiik, anan eng' mageetap poorto, anan eng' mageetap chii, ago eng' Kamuktaindet.
14Ak ki ek Ng'olyoot poorto ak komeny kwenunnyo (ak ki kigeer toroornatennyi, toroornatet ne uu ne po ne ki kisich ineegei kobunu Kwanda), ko nyiitaat myeeindo ak imanit.
15Ki paoryanji ineendet `Johana, koititen kole, “Ineendet ni ne ki amwaitoi ale, ‘Ineendet ne isubwo koegu ne po tai eng' anee, amu ki po tai ineendet eng' anee.’ ”
16Amu ko ki kitaach acheek tugul che po nyiennyi, ak myeeindo eng' myeeindo. 17Amu ki kigoon ng'atuutyet eng' Musa; konyo myeeindo ak imanit eng' Jeso Kristo. 18Ma mi chii ne ki keer Kamuktaindet ole kigoi; kigong'ang'wech Kamuktaindet Weeriit ne ki kisich ineegei, ne mi tegetap Kwanda.
Paornateetap Johana Kabatisanindet
(Mat 3:1-12; Mar 1:1-8; Luk 3:1-18)
19Ak ni ko paornateetap Johana, ye kingo yook `Yahudik Tisiik ak Lawiik eng' Jerusalem koba koteebe kole, “Ii ng'oo inyee?” 20Ak ki ng'aany ineendet, ama tiiyo; ki ng'aany kole, “Ma aa Kristo anee.” 21#NKNg'a 18.15,18; Mal 4.5 Ak kiteebe ineendet kole, “Ara ii ng'oo anyun? Ii Elijah?” Ak ki le, “Ma aa ineendet.” “Ii maotyondonooto?” Ak ki wol kole, “Achicha.” 22Ki leenji anyun ineendet, “Ii ng'oo inyee? Si kobiit kewolji che koiyookwech. Imwae nee agobo inyegei?” 23#Isa 40.3 Ki le,
“Aa kutitap chii ne ititeni eng' surkwen,
‘Olitit ooreetap Kiptaiyat,’ ”
ko uu ye ki mwa maotyot Isaiah.
24Ak icheeget che ki kiyok ko ki po Pharisaik. 25Ak kiteebe ineendet, koleenji, “Kalya anyun si ibatisanisyei, ngo ma ii Kristo, anan Elijah, anan maotyondonooto?” 26Kowolji Johana pichooto koleenji, “Abatisanisye peek: ago tononi eng' kwenung'wong' age ne mongen, 27ineendet ne isubwo, ne ma nyoljino atyach anoogap kweonikyik.”
28Kiyaogis tuguuchuuto eng' Bethania Jordan komosin, ole ki ibatisanisye Johana.
Komwaitoi Johana kole Jeso ko Kristo
29Eng' peetuut ne po aeng' kogeer `Johana Jeso konyonjin, ak kole, “Ogeero, Aarwet ne po Kamuktaindet, ne ibei tengektap ng'wony! 30Ineendet ni ne ki amwa ale, ‘Isubwo chiito ne egu ne tai eng' anee amu ki po tai eng' anee.’ 31Ak ki ma angen anee ineendet; ago si kobiit kibarta ineendet eng' Israel, ki anyoo anyun amu nooto abatisane peek.”
32Ak kibaoryan Johana, kole, “Ki ageer Kabuuset ne Tiliil kochoorugei eng' kipsengwet ko uu cheptuget; ak kotebee ineendet. 33Ak ki ma angen ineendet: ago ineendet ne ki iyookwo abatisane peek, ko ineendet ne kimwaiwo koleenjo, ‘Chiichooto igeere kochorchingei Kabuuset ne Tiliil, ak koteebee ineendet, ko nooto ne ibatisane Kabuuset ne Tiliil.’ 34Ak ki ageer, ak ki abaoryan ale niito ko Weeriitap Kamuktaindet.”
Kasubik che tai che po Jeso
35Kogeny eng' peetuut ne ki isubu peetuunooto, ko kitononi Johana, ak aeng' che po kasubikyik; 36ak ki keerot `ineendet Jeso kowendoti, ak kole, “Ogeero, Aarwet ne po Kamuktaindet!” 37Ak ki kas chooto aeng' che po kasubikyik kong'alaali ineendet, ak koosup Jeso. 38Ak kiwelelgei Jeso, ak kogeer icheek kosubu, ak koleenji, “Ocheeng'e nee?” Ak ki leenji ineendet, “Rabbi (ye kiweech keele, Kaneetindet), imenye ano?” 39Koleenji icheek, “Obwa si ogeer.” Ki pwa anyun kogeer ole menyei, ak ki tebi kobooto ineendet peetuunooto; ki olo po sait taman.
40Ki Andrea, ne tupcho ak Simion Petero, age eng' chooto aeng' che kigasei kong'alaali Johana, ak ki isup ineendet. 41Ki sip konyoor Simion ne tupcho, ak koleenji, “Kagenyooru Mesia” (ye kiweech, ko Kristo). 42Ki imutyi `ineendet Jeso. Ki keer `Jeso ineendet ak kole, “Ii Simion weeriitap Johana. Ta keguurenen Kepa” (ye kiweech, ko Petero).
Keguurei Philipu ak Nathanael
43Eng' peetuut ne ki isubi ko kimach anyun Jeso kwo Galilaya. Ki nyoor `ineendet Philipu ak koleenji, “Isubwo.” 44Ki punu Philliph Bethsaida, nganaseet ne po Andrea ak Petero. 45Ki nyoor `Philipu Nathanael ak koleenji, “Kagenyooru ineendet ne ki sir Musa eng' Ng'atuutyet ak kosir maotik, nooto Jeso ne po Nazareth weeriitap Joseph.” 46Ak ki leenji `Nathanael ineendet, “Tos imuuchi kobun Nazareth kiy age tugul ne myee?” Koleenji `Philipu ineendet, “Nyoo si igeer.” 47Kingo keer `Jeso Nathanael konyonei ole mi ineendet, ak komwa agobo ineendet kole, “Ogeero, Yahudyot iman, ne ma tinyei ng'aalseet!” 48Koleenji `Nathanael ineendet, “Kenaena nee?” Kowolji Jeso koleenji, “Kageerin, ye kemi mogoywet keel, kotom koguurin Philipu.” 49Kowolji Nathanael kole, “Rabbi, ii Weeriitap Kamuktaindet; ii Laitoryatap Israel!” 50Kowolji Jeso koleenji, “Iyani amu kamwaun ale, kaagerin ye kemi mogoywet keel? Tatun igeere tuguuk che eecheen che siirei chu.” 51#Tau 28.12 Ak ki leenji, “Amwaiwok, iman, iman, ale, tatun ogeere kipsengwet koyatoksei, ak kotogostoi malaikaisyek che po Kamuktaindet ak kochoorchigei Weeriitap chii.”
S'ha seleccionat:
JOHANA 1: KAPR
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
©Bible Society of Kenya, 2019