LUKA 19
19
Kotuitos Jeso ak Zakayo
1Kimong'ji anyun Jeriko ak kobun kwenut. 2Ak ogeero, chiito ne kiguure Zakayo; ak ki ne oo ineendet eng' taagigap aisuruut, ak ki mogoryo. 3Ak ki cheeng'ei kole kogeer Jeso si konai kole ng'oo ineendet; ago ki ma imuuch amu tuiyet, amu ki nwach. 4Ak ki labat kondo, kwo kolaany mogoywet si kogeer ineendet: amu ki nyo kosiirtoe oranooto. 5Ak ye kingo it Jeso yooto, konyal keetoto, ak koleenji, “Zakayo, chooruge, chogu; amu kanyolja aru koong'ung' ra. 6Ak ki chook, kochoorgei, ak kotaach ineendet eng' poiboiyet. 7Ak ye kingo keer pichooto, kong'unyng'ung'so tugul, kole, ‘kawo kotebi eng' kootap chiito ne kiptengekyo.’ 8Ak ki tonon Zakayo, ak koleenji Kiptaiyat, Keero, Kiptaiyat, agoochini kibananook kebebertap tuguukyuk; ak ngo ki aibe chii age tugul kiy eng' ng'aalseet, aweekyini konyil ang'wan. 9Ak ki leenji Jeso, Kagonyo yetunet rani kooi, amu weeriitap Abraham agine ineendet. 10#Mat 18.11 Amu ki nyo Weeriitap chii kocheeng' ak kosar ne kiga kobet.”
Kalewenet agobo otwogik taman
(Mat 25:14-30)
11 # Mat 25.14-30 Ak ye kingo ta kogasei icheek tuguuchu, kotes komwa kalewenet, amu ki neegit Jerusalem, ak ki ibwaati icheeget koleen taagu laitornatetap Kamuktaindet sainooto. 12Ki mwa anyun kole, “Ki wo chii anum ne tagunoot emet ne loo, kwo konam pounateet kobunji, ak koweek. 13Yeityo koguur otwogikyik taman, ak kogoochi fedhaisyek taman, ak koleenji, Oboisyee agoi tuun aitu. 14Ago kiwech ineendet piigap emennyi, koyookto ng'olyoot kosube ineendet, kole, ‘Ma kimache chiichi koboiywech.’
15“Ak ye kingo week kogeny, ko kagonam pounateet, kong'at keguur otwogichooto, chu kiga kigoochi fedhaisyek, kobwa ole mi ineendet, si kobiit konai che kinyoor pichooto eng' poisyet. 16Ak ki nyo tainnyi chiito ne po tai, kole, ‘Kiptaiyat, ki konyoor fedhaiyandeng'ung' fedhaisyek alak taman.’ 17Ak ki leenji ineendet, Ki iyai ne myee, otwogindoni myee: amu ki iegu ne kiyani eng' kiit ne ming'in miising', pou nganasook taman. 18Ak ki nyo ne po aeng', kole, ‘Kiptaiyat, kigonyoor fedhaiyandeng'ung' fedhaisyek muut alak.’ 19Ak ki leenji nooto agine, ‘Pou nganasook muut aginye.’
20“Ak ki nyo age, kole, ‘Kiptaiyat, keero, ineni fedhaiyandeng'ung' ne kigaratyi angeet ak agonor: 21amu ki aiywein, amu ii chii ne kolgol: inemu ne ki ma inde ng'wony, ak igese che ki ma igol.’ 22Koleenji anyun ineendet, Arwoogun agobo ne kemwa eng' kuting'ung', otwogindoni ya. Ki ingen ile aa chii ne kolgol, anemu ne ki ma ande ng'wony, ak agese che ki ma agool; 23kilya anyun si mende fedhaisyekyuk ole kiwalawale, ta kaanyooru ko kaitu kobooto che kitesak? 24Ak ki mwachi icheek che kitonondos eng' ye neegit, koleenji, ‘Orebe ineendet fedhaiyat, ak ogoochi ineendet ne tinyei fedhaisyek taman. 25Ak ki leenji icheek ineendet, Kiptaiyat, tinyei ineendet fedhaisyek taman. 26#Mat 13.12; Mar 4.25; Luk 8.18 Amwaiwok ale, chii age tugul ne tinyei, kigoochin; ago ineendet ne ma tinyei, kerebe agot ne tinyei. 27Ago omutu anyun puunichuchuk kobwa yu, che ma chamei aboi, si obar eng' tainnyu.’ ”
Taagetap Jeso eng' Jerusalem
(Mat 21:1-11; Mar 11:1-11; Jhn 12:12-19)
28Ak ye kiga komwa ko uu nooto, kwo kondo, kotogostoi Jerusalem. 29Ak ye kingo kagoriikta Bethphage ak Bethania, eng' tulweet ne kiguure tulweetap Mseituni, koyookto aeng' che po kasubikyik, 30koleenji, “Oba agoi oit nganaseet ne mi taing'wong'; ak ye oit ogeer moitap sigiryet ne rataat, ne tomo kolaany chii: otyach, ak ogetu. 31Ak ngo teebenak chii age tugul, kole, ‘Kalya si otyach? Oleenji anyun, Makyingei Kiptaiyat.’ ”
32Koba anyun che kagagiyookto, ak konyoor ko uu ye kagamwachi ineendet icheek. 33Ak ye kita kotyachi moitap sigiryet, koleenji piigap ko po, Kalya si otyach moitap sigiryet? 34Ak ki leenji, “Makyingei Kiptaiyat.” 35Ak kiget konyo ole mi Jeso: yeityo koiito ngoroikwak eng' moata po sigiryet, ak koganapchi Jeso parak. 36Ak ye kiwendi, koiitoot ngoroikwak eng' ooreet.
37Ak kingo riikta tegeiyatap tulweetap Mseituni, kotoi tuiyet tugul ne po kasubik koboiboitu ak kolas Kamuktaindet eng' kutit ne oo agobo poisyonik tugul che po kamuktaet che kiga kogeer; 38#T.Kal 118.26 koleen, Iberuurot Laitoryat ne nyoonei eng' kainetap Kiptaiyat: kaalyeet eng' kipsengwet, ak liilindo eng' ole toroor miising'.
39Ak ki leenji Pharisaik alage che po tuiyet ineendet, Kaneetindoni, kergong' kasubiguk. 40Ak ki wolji koleenji, “Amwaiwok ale, ngot kosiisyo chu, koboldos koik.”
Koriirchin `Jeso Jerusalem
41Ak kingo riik, kogeer nganaseet ak koriirchi, 42koleen, Nda kengen eng' peetuuni, agot inyee, tuguuk che po kaalyeet! Ago nguno ko kagoung'ogis eng' konyeguk. 43Amu tuun pwonjinin peetuusyek che teechei puuniguk irimeet koyiemin komoswek tugul, ak kogerchin ko eng' komosta age tugul, 44ak kowiirchin ng'wony, ak lagoguk che mi oriing'ung'; ama pagaagun agot koita agenge ne mi paragutap age; amu ki ma inai peetuutap rutochineng'ung'.
Kochutei `Jeso Hekaluut
(Mat 21:12-17; Mar 11:15-19)
45Ak ki wo Hekaluut oriit, ak kotoi koon komanda che ki aldaisyei, 46#Isa 56.7; Jer 7.11 koleenji icheek, Ki kisir keele, Egu koonnyu kootap saaet: ago kaoyai koek kebeneetap rebiik.
47 # Luk 21.37 Ak ki ineetisyei peetuut age tugul eng' Hekaluut. Ago ki cheeng' tisiik che eecheen ak siriik ak che taagunotiin eng' piik, kobar ineendet: 48ak ma nyoor kiit ne ki imuuchi koyai; amu ki epchin iit piik tugul ineendet miising'.
S'ha seleccionat:
LUKA 19: KAPR
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
©Bible Society of Kenya, 2019