Mar thehr liq 4
4
Yer suq ber che lawd che haq gha khanr che
1U kheh te peg lehq, ned haeg ber che lawd che haq Yer suq gha khanr tug Awg ha phu yawd haq heh pir khuhn teq chaweh mad cawg awg god khehz teag lo sir ve kae che yaog. 2Yer suq awr lehr, awr ma cad che uhd chi ni uhd chi hax gaeg lehq awr meq jad vehr che yaog. 3Awg yand u ve khuhn, ned haeg ber par u ve yawd chehd huh lag lehq koz che. “Nawg Ghig sa ve Yad phu awg cehg mag ver, huhx meh dig che ve teq pa haq pax kaq lehq khaor mod teog,” lehz Yer suq haq koz vid che yaog. 4Yer suq kawq koz vid che, “Liq phu khuhn che kheh koz buhq lar che yaog.
#
Bon 8:3
‘Chaw yad awr lehr, cad tug haq lehax te lehq
a saq teq gha che ma hez hawg.
Ghig sa ve mawq kaw awg khuhn
tuhaz che tawd khuhd awg mag gha lia haq te lehq a saq teq gha che yaog.’”
5U kheh te peg lehq ned haeg awr lehr, Yer suq haq daq kehg che med lo sir ve kae lehq, bon yehg nux muh jad che awg thag lo hox vid lar lehq koz che, 6“Nawg awg cehg mag Ghig sa ve Yad phu awg lehd koz ver, pawz kha peog. Awg lawn ghod ver, Liq phu khuhn che kheh koz buhq lar che yaog.
#
Chid 91:11-12
‘Nawg haq haq sax tug awg pun
yawd ved muhd nuh maq cuh yad haq
yawd koz vid lar peg che yaog.’
‘Nawg ved khi kud huhx meh haq maq gha yaw vid tug,
i hehd ve laq kuhr che lehq nawg haq haq yug ax vehr tug yaog.’”
7Yer suq yawd haq kawq koz vid che, “Liq phu khuhn ted kag kawq buhq lar ser che, #Bon 6:16‘Nawg ved Jawd mawd Ghig sa haq nawg maq gha ber maq gha lawd hawg,’ lehz kawq koz vid che yaog.” 8Te pawz ned haeg yawd haq suaq keh muh jad che keh dig ted mag thag huh sir ve kae che yaog. Mig gig khod-aq kha cawg che muhd mig teq pa he lehq muhd mig u ve teq pa ve awg mig awg phond awg gha lia yawd haq maw vid lehq koz vid che, 9“Nawg ngag haq nar khehr teh mi lehq a kor pia ver, chuhr huh kha mawg chehd che teq pa awg gha lia ngag nawg haq pehar tug yaog,” lehd koz vid che yaog.
10Kheh te lehq Yer suq yawd haq kawq koz vid che, “Sar tanr-og, phawe lor. Awg lawn ghod ver,
#
Bon 6:13
‘Nawg ved Jawd mawd Ghig sa haq lehax nawg a kor gha pi lehq,
yawd ved kanx haq lehax nawg gha te che yaog,’
lehz Liq phu awg khuhn buhq lar che yaog.” 11Kheh te peg lehq, ned haeg yawd haq teh lar haz lehq phaw veh lehq muhd nuh maq cuh yad teq pa lag lehq yawd haq ga vid lehq ngawx haq sax vid che yaog.
Yer suq Gar liq lehd muhd mig khuhn ha lehg che bon khuhd kanx tanr te che
12Yod hanr haq su pheh yug lehq thawnr khuhn ke vehr che awg lawn Yer suq gha kad che te yand, yawd Gar liq lehd muhd mig lo kae che yaog. 13Yawd Nar sar rehq med khuhn tuhez lehq, Sar bur lonr he lehq Nar tar liq muhd mig awg kanr huh, ghig po nux pad huh cawg che Kar per nar unr med khuhn gaeg lehq u huh chehd chehd che yaog. 14Che kheh te che awr lehr, cuh kar var Id sar yaq koz lar che tawd khuhd u ve heh phehaq che yaog.
15 #
Isy 9:1-2
“Sar bur lonr muhd mig he lehq Nar tar liq
muhd mig awr lehr, Gar liq lehd ghig po nux awg pad huh,
Yawd danr lawg ox pax awr, Yud daq chaw ma hez che teq pa
chehd kig Gar liq lehd muhd mig yaog.
16Awg naz tud te che khuhn chehd che chaw teq pa awr lehr
ir jad pawd jad che awg ghiz haq gha mawg lehq
suh che muhd mig he lehq suh che awg ha khuhn
chehd che chaw teq pa awg pun liz awg ghiz paw vid vehor,”
lehz koz lar che yaog. 17Awg yand u ve haq tanr lehq, Yer suq bon tanr mar lehq koz che, “Vend bax haq duhd phuhz lehq ni ma pa lor. Awg lawn ghod ver, Ghig sa ve muhd mig lag gag vehr tez-or,” lehd koz mar vid che yaog.
18Gar liq lehd ghig po nux pad huh Yer suq yaq kaw tod kae tod-ag huh, Per troq lehd koz che Sid monr he lehq yawd ved awg nax var Anr drehr ix mag, ghig po khuhn geq phehd chehd che haq Yer suq gha mawg che yaog. Awg lawn ghod ver, I hehd awr lehr, ngad ca var phehq che yaog. 19Kheh te lehq Yer suq koz che, “Ngag khaz nuhr ghaq laoq. Ngag nig mag haq chaw ca var te cuha laq,” lehz ix mag haq koz vid che yaog. 20Ix mag te pawaz lehax geq haq teh lar haz lehq yawd khaz nuhr ghaq veh che yaog.
21Kheh te peg lehq Yer suq awg nuz awr teq tawn nehax kawq kae che te yand Yer ber dehd ve awg yad par Yar koq he lehq Yod hanr awr pa Yer ber dehd geh huh lawd kor khuhn geq ghu behz chehd che haq Yer suq gha mawg lehq ix mag haq liz yawd kug yug che yaog. 22Ix mag liz te pawz maq lehax huh lawd kor he lehq ix mag ved awr pa haq teh lar haz lehq yawd khaz nuhr ghaq veh che yaog.
Yer suq bon mar lehq chaw nag haq ghu na vid che
23Yer suq awr lehr Gar liq lehd muhd mig khuhn ted kag peg ted kag kaod kae lehq, i hehd teq pa ve bon lawg kig teq pa awg khuhn Ghig sa ve muhd mig awg lawn he lehq ha lehg che bon khuhd liz ca kaod mar vid tod che yaog. Chaw u ve teq pa khuhn cawg che a nar awg ceng gha lia he lehq kha nag chehd che chaw awg gha lia haq yawd ghu na vid che yaog. 24Kheh te cheaq te lehq Sud riq muhd mig khuhn yawd ved awg lawn hax ceh nux maz buhg veh che yaog. A nar laex ceng te nag chehd che chaw, puhq phez che chaw, khi kud laq kuhr suh vehr che chaw, ned geh che chaw awg gha lia yawd chehd lo sir veha lag lehq, yawd chaw nag u ve teq pa haq saw ghu na vid che yaog. 25Kheh te lehq Gar liq lehd muhd mig, Der kar pawd liq muhd mig, Yer ruq sar lehnr med, Yud daq muhd mig he lehq Yawd danr lawg kax ox pax awr ve chaw mor nux u ve teq pa yawd khaz nuhr ghaq veh che yaog.
S'ha seleccionat:
Mar thehr liq 4: lhiNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2015, Wycliffe Bible Translators, Inc. All rights reserved.