Marcos 15
15
Chꞌin Jesús itjen nkayakon chꞌin Pilato
(Mt. 27:1-2, 11-14; Lc. 23:1-5; Jn. 18:28-38)
1Ndá ti ó kꞌuínkaséña ndá ti sin ncha̱tꞌá tꞌe̱to̱an la kónkotséko sin ti sin táda la ko ti sin tjako ley la ko kaín ti sin tꞌe̱to̱an kuènté ni̱nko kixin ikjo kícho sin. Ndá kjuixin la kjuínchenteto sin ti chꞌin Jesús ndá kjuikaán sin ti itjen ti chꞌin Pilato. 2Ndá chꞌin Pilato kjuanchankí, ndáchro:
―¿Á jaha ti Rey kuènté ti sin judío ní?
Ndá kjuáte̱he chꞌin Jesús ndáchro:
―Ó jaha ndáchrua.
3A̱ndá ti sin ncha̱tꞌá tꞌe̱to̱an mé kꞌueka sin chꞌan nchónhña ijie̱. 4Ndá chꞌin Pilato xíkjanchankí ínaá, ndáchro:
―¿Nkekuènté tjáte̱ehya ninkehó? Tsjehé nchónhña ijie̱ tꞌeka sin ti jaha.
5A̱ndá chꞌin Jesús la ninkehó kjuáte̱hya la chꞌin Pilato la í noehña nkehe tsixro.
Chꞌin Pilato kꞌue̱to̱an kixin tsjasóte chꞌin Jesús ndá itsꞌen
(Mt. 27:15-31; Lc. 23:13-25; Jn. 18:38—19:16)
6Ndá chꞌin Pilato mé kuéhen kixin ti kia Pascua la tjajon chꞌan kjuachaxin kixin tsꞌaxrje ijnko ti chojni tjechjina éxi tsjanchia ti sin chjasin. 7Ndá ntiha techjína ijnko nkexro itꞌin Barrabás, la ko íso ti sin tsíkꞌóñá itsjé chojni ti tsíkꞌixin ijnko kjuanínkaon. 8Ndá ikui nchónhña chojni la kjuankíxin kjuanchehe sin ti chꞌin Pilato kixin chrókjuíchꞌe chꞌan éxi kaín nánó. 9Ndá kjuáte̱he chꞌin Pilato:
―¿Á tjinkáonra tsi̱to̱ha̱ sátsji ti Rey kuènté ti sin judío ní?
10Mé xi̱kaha ichro chꞌan kixin nohe chꞌan kixin ti kjuachji̱no̱xíhin chónta ti sin ncha̱tꞌá tꞌe̱to̱an, la itsé sin ti chꞌin Jesús ndá kjuikaán sin. 11Kjánchó ti sin ncha̱tꞌá tꞌe̱to̱an mé kjuínchekónínkaon sin kaín ti chojni siín ntiha la ndáche sin kixin ícha jína chrókjuanchia sin chrókꞌuaxrje ti chꞌin Barrabás. 12Ndá chꞌin Pilato kjuanchankí ínaá, ndáchro:
―Ndá, ¿nkehe tjinkáonra si̱tꞌaha̱ ti nkexro tíki̱texínra Rey kuènté ti sin judío?
13Ndá jehe sin kꞌóyako sin ndáchro sin:
―¡Tsjakꞌenkáni chꞌan ntacruz!
14Ndá chꞌin Pilato xíkjanchankí ndáchro:
―¿Xá nkehe nduáhya kjuíchꞌe ti nkexro i?
Kjánchó jehe sin a̱ntsí itsen kꞌóyako sin ndáchro sin:
―¡Tsjakꞌenkáni chꞌan ntacruz!
15Ndá chꞌin Pilato tjinkaon sinchexiteyá ti nkehe tjanchia ti sin chjasin, la kuíto̱he chꞌan sákjuí ti chꞌin Barrabás. Ndá kꞌue̱to̱an chꞌan kixin tsjate sin ti chꞌin Jesús. Ndá kjuixin la kjuajon chꞌan kjuachaxin kixin sátsjiko sin chꞌan tsjakꞌenkáni chꞌan ntacruz.
Ti sin soldado kjuanoá ti chꞌin Jesús
16Ndá ti sin soldado mé sákjuíko sin chꞌin Jesús ti nda̱sin kuènté sin. La ntiha kónkotsé kaín ti sin soldado. 17Ndá kuakitsjehe sin chꞌan ti iké chꞌan la kjuínchekꞌinkáya sin chꞌan ijnko ika kjátsetié la ko kjua̱kꞌe̱nka̱ya sin ijnko corona tsíkꞌónaxín ntachꞌi̱ ti ikja chꞌan. 18La kjuankíxin kꞌóyako sin, ndáchro sin:
―Nkochríxín tsjakꞌe tsétue̱hén ti sin judío ―ichro sin.
19La chjéhe sin ikja chꞌan ijnko ntavara la ko kui̱ki̱te sin nda̱té sin la kꞌuejóxin sin tochꞌin sin nkayakon chꞌan éxi chrókjuikosáyehe sin chꞌan. 20Ndá ti ó kjuixin kjuanoá sin chꞌan, la kuakitsjehe sin chꞌan ti ika tsíkjinchekꞌinkáya sin, ndá kjuínchekꞌinkáya sin ti ika xráxín tjechrꞌinkáya chꞌan. Ndá kuakitsje sin chꞌan sákjuíko sin tsjakꞌenkáni chꞌan ntacruz.
Chꞌin Jesús kjuákꞌenkáni ntacruz
(Mt. 27:32-44; Lc. 23:26-43; Jn. 19:17-27)
21 #
Ro. 16:13. *Ndá ijnko nkexro tsíkji̱xi̱n Cirene, itꞌin Simón, itꞌé ti chꞌin Alejandro la ko Rufo, mé kjui̱xi̱n chꞌan no̱nte̱e chꞌan, la kꞌuatsínka chꞌan ntiha. La ti sin soldado kꞌue̱to̱an sin kixin tsamá chꞌan ti ntacruz tsjakꞌenkáni chꞌin Jesús.
22Ndá sákjui̱ko sin chꞌin Jesús ijnko itjo itꞌin Gólgota, mé tꞌaxrjexín Itjo hueso ikja chojni. 23Ndá ntiha chjéhe sin chꞌin Jesús xranvino tsíkjiko xro̱a̱n mirra chrókꞌui chꞌan, kjánchó kꞌuihya chꞌan. 24#Sal. 22:18.*Ndá ti ó kjuixin la kjua̱kꞌe̱nka̱ni sin chꞌan ti ntacruz. Ndá ti sin soldado la kjuíchꞌexín sin suerte ti iké chꞌan kixin tso̱nohe sin nkexéhe ti ika sátsjiko nkojnko sin.
25Ti hora kjua̱kꞌe̱nka̱ni sin chꞌin Jesús ti ntacruz mé las nueve nchítjen. 26La ikja ti ntacruz mé kjua̱kꞌe̱nka̱ni sin ijnko inta tsíkjin sin, chronka nkekuènté kjuínchekjasóte sin chꞌan, mé ndáchro:
“Ti nkexro i mé ti Rey kuènté ti sin judío.”
27 #
Is. 53:12. *Kja̱xin yaá xíche̱e kꞌuejóyáni sin ntacruz, ijnko sin la itja chꞌan chjina la íjnko la itja chꞌan kjon. 28Mé xi̱kaha xiteyá éxi nixja xroon itén Díos ndáchro: “Éxi ijnko chojni kjuasin ijie̱ xi̱kaha kꞌuíkon sin chꞌan.”
29 #
Sal. 22:7; 109:25;
Mr. 14:58; Jn. 2:19. *A̱ndá ti sin tꞌatsínka ntiha mé kjuanoá sin chꞌan la ko kꞌuándaxíhi̱n sin chꞌan, ti̱nka̱tji̱a̱ ikja sin ndáchro sin:
―Jaha ndáchrua kixin chrókꞌóxika ti ni̱nko, a̱ndá yꞌáxin ña̱o ó chrókjui̱chꞌéna ínaá, ichrua. 30Jahuá tꞌinka̱jinxián ti ntacruz méhe̱ la nchekaá a̱sán ―ichro sin.
31Ndá ti sin ncha̱tꞌá tꞌe̱to̱an la ko ti sin tjako ley mé kja̱xin sin kjuanoá sin chꞌan, la ikjo kícho sin, ndáchro sin:
―Kjuínchekaá chꞌan ókjé chojni, a̱ndá jehe chꞌan la xitjahya sinchekaá chꞌan a̱sén chꞌan. 32Ti Cristo, Rey kuènté ti nación Israel, jehó chrókjuinkaji̱nxi̱n a̱sén ti ntacruz, ndá chrókꞌuíkoni la kja̱xini chrókuitekaoni ―ichro sin.
La ti yaá sin tjejóyáni ntacruz mé kja̱xin sin kjuanoá sin chꞌan.
Ikꞌuén Chꞌin Jesús
(Mt. 27:45-56; Lc. 23:44-49; Jn. 19:28-30)
33Ndá ti ó chonkíxin mé kꞌuíxin tie kuenté chjasintajni hasta las tres kójín. 34#Sal. 22:1.*Ndá ti hora a mé itsen kꞌóyako chꞌin Jesús, ndáchro:
―Eloi, Eloi, ¿lama sabactani? ―mé tꞌaxrjexín: Itꞌéni, Itꞌéni, ¿nkekuènté kuíto̱heni?
35Ndá iso ti sin tjejó ntiha kuíhin sin la ndáchro sin:
―Tihínra, tꞌéye̱he̱ chꞌan Elías ―ichro sin.
36 #
Sal. 69:21. *Ndá ijnko ti sin tjejó ntiha la kuinká chꞌan kjuikákja chꞌan ijnko kachjo̱n la chrꞌankí chꞌan ti vino isán ndá kjua̱kíchónta chꞌan ijnko inta kjíjin, la kjuínchechjinehe chꞌan irꞌua chꞌin Jesús kixin chrókꞌui ti vino isán la ndáchro chꞌan:
―Ti̱to̱héra, tsotsjeheni á itsi chꞌin Elías tsjinkajin ti jehe chꞌan.
37Ndá chꞌin Jesús itsen kꞌóyako chꞌan ndá ikꞌuén chꞌan. 38#Ex. 26:31-33.*Ndá ti ika tjenkákuèxín nkaxehen ni̱nko la kꞌuichje, kꞌóna yaá, kjuankíxixín noi la hasta nonte. 39Ndá ti chꞌin romano tꞌe̱to̱an itjen chjinaxón ti itjen chꞌin Jesús, kꞌuíkon chꞌan xi̱kaha kóhen la ndáchro chꞌan:
―Chaxín ti nkexro i la Xje̱en Díos.
40 #
Lc. 8:2, 3. *Kja̱xin ikjín kꞌuejótsjexin iso chojnichjin la ntiha kja̱xin kjuákꞌe ti tjan María Magdalena, ti íjnko tjan María, ìñé chꞌin Jacobo, ti chꞌin tsoyo, la ko José. La ntiha kja̱xin kjuákꞌe ti tjan Salomé. 41Ti chojnichjin i mé chréhe̱ sin ti chꞌin Jesús la kꞌuékjinki̱tsa sin chꞌan ti kꞌuékjakꞌe chꞌan Galilea la ko kja̱xin íso chojnichjin chréhe̱ sin ti ó sákjui̱ chꞌan Jerusalén.
Ti xravá chꞌin Jesús
(Mt. 27:57-61; Lc. 23:50-56; Jn. 19:38-42)
42Ndá ti ó tinkákꞌixitie la ó kjuixrakán ti ña̱o tóyaxíhin sin kixin ó xránkíxixín ti ña̱o to̱kꞌéhe sin, 43mé ikui ijnko nkexro itꞌin José, tsíkji̱xi̱n Arimatea. Jehe chꞌan mé ijnko chojni imá tjetoan kuènté ti sin tꞌe̱to̱an siín ntiha. La kja̱xin tjechóhen chꞌan itsi ti kjuachaxin kuènté Díos. Mé chrakonhña chꞌan kjuichréhe̱ chꞌan ti chꞌin Pilato la kjuanchia chꞌan ti cuerpo kuènté chꞌin Jesús. 44Ndá chꞌin Pilato la imá chrákon kixin ó tsíkjixin tsíkꞌen ti chꞌin Jesús, ndá kꞌuéye̱he̱ chꞌan ti chꞌin capitán la kjuanchankí chꞌan á chaxín tíha. 45Ndá ti ó chrónka ti chꞌin capitán kixin chaxín ó ikꞌuén chꞌin Jesús, la chꞌin Pilato kjuajon kjuachaxin kixin tsákja chꞌin José ti cuerpo. 46Ndá chꞌin José mé kꞌue̱na ijnko ika kjíjin la tjete sínkí. Ndá kjuinkájin chꞌan ti cuerpo kuènté chꞌin Jesús, la kjuínchekꞌísímá chꞌan ti ika. Ndá kjuixin, la kjuákꞌe chꞌan ijnko itjo̱ tsíxraya. Ndá kjuínchenkájin sin ijnko ixro̱ ijié kuíkjèxin ti itjo̱. 47Ndá ti tjan María Magdalena la ko María, ìñé chꞌin José, mé kꞌuíkon sin nketí kjuákꞌe ti cuerpo kuènté chꞌin Jesús.
S'ha seleccionat:
Marcos 15: poeNTplus
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2016, Wycliffe Bible Translators, Inc. All rights reserved.