Marcos 14
14
Tjeyá sin nkexrín tsotsé sin chꞌin Jesús
(Mt. 26:1-5; Lc. 22:1-2; Jn. 11:45-53)
1 #
Ex. 12:1-27. *Na̱xa̱ tꞌitjáña yaá ña̱o ndá tsjasin sin ti kia Pascua, la ko sinie sin ti nio̱tja̱ tjikohya ti nkehe tꞌánkíxin.
Ndá ti sin ncha̱tꞌá tꞌe̱to̱an la ko ti sin maestro tjako ley mé kjueyá sin nkexrín sichꞌiyehe sin chꞌin Jesús kixin jína tsotsé sin ndá tsꞌóñá sin. 2La ndáchro sin:
―Jehya ti ña̱o kia kixin chrókꞌuixité ti chojni la chrókónínkaon sin.
Ijnko tjan kui̱ki̱te aceite xraxé náxrjón ikja Jesús
(Mt. 26:6-13; Jn. 12:1-8)
3 #
Lc. 7:37, 38. *Ndá chꞌin Jesús kjuákꞌe chjasin Betania ndo̱e chꞌin Simón, ti nkexro kꞌuéchónta chin lepra. A̱ndá ti ó tjenie chꞌin Jesús, la ikui ijnko tjan kjui̱ka̱o tjan ijnko ixro̱ tsíkꞌónaxín mármol tjiá aceite tsíkꞌónaxín itsjo nardo xraxé náxrjón, imá tjete sínkí. Ndá kuakitje̱he̱ tjan ti ixro̱ la kui̱ki̱te tjan ikja chꞌin Jesús ti aceite a. 4A̱ndá iso ti sin tjejó ntiha la kónínkaon sin la ikjo kícho sin, ndáchro sin:
―¿Nkekuènté kjuínchexéhe tjan ti aceite náxrjón xraxé í? 5Ícha jína chrókóxi̱xi̱n iní ciento denario, ndá ti chichaon la chrókui̱to̱nhe̱n ti chojni nóa ―ichro sin.
6Ndá ndáchro chꞌin Jesús:
―Ti̱to̱héra tjan; ¿nkekuènté tꞌándaxíhínra tjan? Ó ncho̱xon ti nkehe kjuíchꞌéna tjan, 7#Dt. 15:11.*kixin ti chojni nóa la nkochríxín tsꞌejóko̱ara sin la jína tsjínki̱tsara sin nkojín ña̱o. Ndá janhan la nkochríxínhña tsꞌejóni. 8Méxra̱ jehe tjan la ó kjuajon tjan ti nkehe chrókjuajon tjan. Ó kjuíncheka tjan xro̱a̱n ti cuerpo kuénta̱na ti ó tso̱xravána. 9Chaxín ndáxrja̱n kixin ti tsjako sin ti itan jína tsaáxin chojni kuenté chjasintajni, la kja̱xin tsochronka sin kixin xi̱kaha kjuíchꞌe tjan, la xi̱kaha tsoxraxinkakonxín sin tjan.
Chꞌin Judas kjuínchekji ti chꞌin Jesús
(Mt. 26:14-16; Lc. 22:3-6)
10A̱ndá Judas Iscariote, ijnko ti sin teyóxin kꞌuájiko chꞌin Jesús, mé sákjuichenka chꞌan ti ncha̱tꞌá tꞌe̱to̱an nkexrín tsotsé sin ti chꞌin Jesús. 11Ndá ti kuíhin sin tíha la kóchéhe̱ sin, la ndáchro sin kixin tsochjéhe sin chichaon ti chꞌin Judas. Ndá ndesi ti hora a la kjuénka̱yáxin chꞌan nkexrín tsochronka chꞌan kixin jína tsotsé sin ti chꞌin Jesús.
Ti kjuixixín kjonieko sin chꞌin Jesús
(Mt. 26:17-29; Lc. 22:7-23; Jn. 13:21-30; 1Co. 11:23-26)
12Ti ña̱o xránkíxixín ti kia sinie sin ti nio̱tja̱ tjikohya ti nkehe tꞌánkíxin, ti ó tꞌóñá sin ti kolélo kuènté kia Pascua. Ndá ti sin kꞌuájiko chꞌin Jesús mé kjuanchankí sin:
―¿Nketí tjinkaoan sátsjini sincheyaxíni kixin sinieni kuènté ti kia Pascua? ―ichro sin.
13A̱ndá kꞌue̱tue̱hen chꞌin Jesús yaá ti sin kꞌuájiko chꞌan, ndáchro chꞌan:
―Sátjira chjasin Jerusalén, ndá ntiha tsoxétara ijnko nkexro yámá tóa tjiá ìnta̱ la chréhéra chꞌan. 14A̱ndá ti nchia tsꞌixehen chꞌan la tsjanchankíhíra ìnché ti nchia, ndáchrora: “Kꞌue̱to̱an ti Maestro: ¿Nketí itjen ti cuarto sinie̱ki̱a̱nxian ti sin xríki̱a̱n ti kia Pascua?”, ichrora. 15A̱ndá ti ìnché nchia mé tsja̱ko̱hara ijnko cuarto ijié, ti yaáxin piso, la ó chónta kaín ti nkehe tsicháxi̱n. Ntiha ncheyáxixínra ti nkehe sinieni ―ichro chꞌan.
16Ndá jehe sin la sákjui̱ sin Jerusalén, la ntiha kꞌuitja sin éxi chrónka chꞌin Jesús. Ndá ntiha kjuíncheyáxixín sin ti nkehe sinie sin ti kia Pascua.
17A̱ndá ti ó kóntó ndá kjuíji chꞌin Jesús la ko ti teyó ti sin kꞌuájiko chꞌan. 18#Sal. 41:9.*Ndá ti ó tjejónie sin la ndáchro chꞌin Jesús:
―Chaxín ndáxrja̱n kixin ijnko ti jahara tjejónieni ntihi mé sinchekji ti janhan.
19Ndá kjuankíxin kꞌuává sin la nkojnko sin kjuanchankí sin ndáchro sin:
―¿Á janhan ní?
20Ndá kjuáte̱he chꞌin Jesús ndáchro:
―Tíhi mé ijnko ti teyóxinra, tjénie̱kian nkoko̱a plato. 21Chaxín ti Xje̱en Díos kꞌóna Chojni mé tso̱hen éxi nixja ti xroon itén Díos, kjánchó nóa ti nkexro sinchekjina, ícha jína chrókokjíehya.
22A̱ndá na̱xa̱ tjejónie sin la chꞌin Jesús kuákja ijnko nio̱tja̱, la chjéhe Díos kjuasáya. Ndá kóchrítꞌo̱ chꞌan ti nio̱tja̱ la chjéhe chꞌan ti sin kꞌuájiko chꞌan. La ndáchro chꞌan:
―Intera, tíhi mé ti cuerpo kuénta̱na.
23La kja̱xin kuákja chꞌan ijnko vaso la chjéhe chꞌan Díos kjuasáya ndá kjuajon chꞌan ikꞌui sin kaín sin. 24#Ex. 24:8; Jer. 31:31-34.*La ndáchro chꞌan:
―Tíhi mé ti ijni̱ kuénta̱na chrónkaxín kixin chaxín tsoxiteyá ti nkehe ni̱xin kixin tsaáxin nchónhña chojni. 25Chaxín ndáxrja̱n kixin í tsꞌihya ti ìnté to uva i ti na̱xa̱ tsjixrakánhña ti ña̱o itsi ti kjuachaxin kuènté Díos, a̱ndá ti ña̱o a mé xíkꞌia ìnté ti to uva ínaá.
Chrónka Jesús kixin sinchemá Pedro ti jehe chꞌan
(Mt. 26:30-35; Lc. 22:31-34; Jn. 13:36-38)
26Ndá kjuixin itsje sin ijnko himno, ndá sákjui̱ sin ti ijna̱ Olivo. 27#Zac. 13:7.*Ndá chꞌin Jesús ndáchro:
―Ijie tie la kaínra tsi̱to̱héra ti janhan. Ndá tsoxiteyá éxi ndáchro ti xroon itén Díos: “Janhan tsꞌo̱ña ti nkexro tꞌayakohen ti kolélo ndá jehe va tsjichròe va.” 28#Mt. 28:16.*Kjánchó ti ó tso̱xechóna, ndá sátsjia Galilea, la ntiha tsoxétani ―ichro chꞌan.
29Ndá chꞌin Pedro ndáchro:
―Kjónté kaín sin tsíto̱he sin ti jaha, la janhan la náhí.
30Ndá ndáchro chꞌin Jesús:
―Chaxín ndáxrja̱n kixin ijie tie ti na̱xa̱ tsjehya ti kochi̱ntólá, yaá vece, la si̱nchemá iní vece ti janhan.
31Ndá na̱xa̱ kjuáte̱he chꞌin Pedro, ndáchro:
―Kjónté kja̱xin janhan itsꞌén la si̱ntamáhña.
La xi̱kaha ndáchro sin kaín sin.
Chꞌin Jesús nixje̱xín Díos ti Huerto Getsemaní
(Mt. 26:36-46; Lc. 22:39-46)
32Ndá kjuíji sin ijnko nonte itꞌin Getsemaní. Ndá chꞌin Jesús kꞌue̱tue̱hen ti sin kꞌuájiko, ndáchro:
―Tꞌejora ntihó, ndá janhan sátsjia tsonixja̱ha̱ Díos.
33Ndá sákjuíko chꞌan Pedro, Jacobo la ko Juan. Ndá kjuankíxin imá kꞌuává a̱sén chꞌan la kóxakohen chꞌan. 34Ndá ndáche chꞌan sin:
―Imá tꞌává a̱sená éxi chrókꞌuen xi̱kaha. Ijie la ntihó tito̱hara, tꞌejotsjehéra.
35Ndá sákjuí chꞌan kanhñó ikjín, ndá kjuákꞌexín tochꞌin chꞌan. Ndá chrónoéhe̱ chꞌan Díos kixin chrókjuajonhña kjuachaxin kixin chrókjuasóte chꞌan ti ña̱o a. 36La ndáchro chꞌan:
―Itꞌéni. Jaha chonta kaín kjuachaxin, chrónòani kixin tsjakjían kaín ti nkehe náxrjónhña tso̱heni ijie. Kjánchó jehya éxi tjinkaoni chrókóhen. Náhí. Éxi tjinkaoan jaha ―ichro chꞌan.
37Ndá ikjan chꞌan la kꞌuíkon chꞌan kixin ti sin kuíto̱he ntiha la tꞌejójua sin. Ndá ndáche chꞌan ti chꞌin Pedro:
―Simón, ¿á tjéchrian ní? ¿Á xitjahya nijnko hora chrókjuakꞌetsjehé ní? 38Ijie la tꞌejotsjehéra la ko chrónoéhéra Díos kixin tsíto̱ehya chꞌan kixin ti Jínahña chrókjuitꞌayahara; chaxín ti a̱sánra la tjinkaon chrókjuinchexiteyá, kjánchó ti cuerpo kuèntára la tjachahya.
39Ndá sákjuí chꞌan ínaá, la xi̱kahó chrónoéhe̱ chꞌan Díos ínaá. 40Ndá ikjan chꞌan la ó tꞌejójua sin ínaá kixin imá kui̱hi̱ sin kotáchrin. Ndá í noehña sin nkexrín chrókjuate̱he sin. 41Ndá ti ó níxin sáxikji chꞌan la ti ó ikjan chꞌan la ndáchro chꞌan:
―¿Á na̱xa̱ tjejochrínra, to̱kꞌáhara ní? Ótjen. Ó kjuixraká ti hora kixin ti Xje̱en Díos kꞌóna Chojni tsꞌáyéhe̱ ti sin chónta ijie̱, sinchekjasóte sin. 42Tꞌàyara sátsjini kixin ó ikjui ti nkexro sinchekji ti janhan.
Itsé sin ti chꞌin Jesús
(Mt. 26:47-56; Lc. 22:47-53; Jn. 18:2-11)
43Ndá na̱xa̱ tjenixja chꞌin Jesús, la ikjui chꞌin Judas, ijnko ti teyóxin sin kꞌuájiko chꞌan la nchónhña chojni kjui̱ka̱o chꞌan kjuíjiko sin chika espada la ko inta. Kjui̱xi̱n sin kjuachaxíen ti sin ncha̱tꞌá tꞌe̱to̱an la ko ti sin tjako ley la ko ti sin táda tꞌe̱to̱an ni̱nko.
44A̱ndá Judas, ti nkexro sinchekji chꞌin Jesús, mé tsíndáchro:
―Ti nkexro tsotjahá ijnko kochíto mé tíha itse̱ra la sátjikoára.
45Ndá ti ó kjuíji sin, la tuénxín kóchjina Judas ti itjen chꞌin Jesús la ndáchro:
―Maestro, Maestro.
Ndá chjéhe chꞌan jnko kochíto. 46Ndá ti sin kjuíji mé itsé sin ti chꞌin Jesús.
47Ndá ijnko ti sin tjejó ntiha mé kuakitsje ti espada kuènté la kóchríjin ndatsjon ti nkexro chꞌehe ixra̱ ti ncha̱tꞌá tꞌe̱to̱an. 48Ndá chꞌin Jesús ndáchro:
―¿Nkekuènté éxi chrótse̱ra ijnko xíche̱e xi̱kaha kꞌuinkakoara espada la ko inta kixin tso̱tse̱ra ti janhan? 49#Lc. 19:47; 21:37.*Kaín ña̱o kjuakꞌé nkaxehen ni̱nko kjuákohára, ¿ndá nkekuènté tse̱hyarani? Kjánchó ticháxi̱n tsoxiteyá ti nkehe nixja xroon itén Díos.
50Ndá kaín ti sin kꞌuájiko chꞌan mé kuíto̱he sin jehó chꞌan, ndá kuinká sin sákjuí sin.
Ijnko ndasoá sákjuixin ntiha
51Ndá ijnko ndasoá mé kja̱xin tinkáchréhe̱ ntiha, la jehó ijnko kamanta ó tjetsáte chꞌan, ndá kja̱xin itsé sin. 52Kjánchó ti iké chꞌan ó tsítsé sin, la kjónté tjóchín chꞌan, la kuinká chꞌan.
Sákjuíko sin chꞌin Jesús ti tjejó ti sin tꞌe̱to̱an
(Mt. 26:57-68; Lc. 22:54-55, 63-71; Jn. 18:12-14, 19-24)
53Ndá sákjuikohe sin ti chꞌin Jesús ti ncha̱tꞌá imá tꞌe̱to̱an. Nta ntiha mé tsíkónkotsé kaín ti sin ncha̱tꞌá tꞌe̱to̱an la ko ti sin táda tꞌe̱to̱an ni̱nko la ko ti sin maestro tjako ley. 54Ndá chꞌin Pedro la ikjín tjechrèxi̱n chꞌan, ndá kjuíji chꞌan ti nda̱sin ndo̱e ti ncha̱tꞌá tꞌe̱to̱an. Ndá ntiha kjuákꞌetja̱xi̱nko chꞌan ti sin policía tjejóchjíxro̱he.
55Ndá ti sin tꞌe̱tue̱hen ti sin ncha̱tꞌá la ko kaín ti sin tꞌe̱to̱an kjueyá sin chojni kixin tsochronka sin ti ijie̱ kjuasin chꞌin Jesús kixin jína chrókꞌóñá sin, kjánchó kꞌuitjahya sin ninkehó ijie̱. 56La itsjé sin kjuíchꞌéna kjuachꞌia kuènté chꞌin Jesús, kjánchó nkokónhña ndáchro sin kixin chꞌia sin. 57Ndá iso sin kꞌuínkatjen, la kjuíchꞌia sin, ndáchro sin:
58 #
Jn. 2:19. *―Jeheni kuíhini ndáchro ti nkexro i kixin tsꞌóxika chꞌan ti ni̱nko tsíkjichꞌénaxín chojni itja, la níxin ña̱o la ó tsjakꞌe chꞌan íjnko ni̱nko jehya chojni sichꞌéna ―ichro sin.
59La kjónté xi̱kaha la nkokónhña ti nkehe chrónka sin.
60Ndá ti chꞌin tꞌe̱tue̱hen ti sin ncha̱tꞌá kꞌuínkatjen la kjuanchankíhi ti chꞌin Jesús:
―¿Á ninkehó tsjate̱éhya jaha? ¿Á chaxín ti ijie̱ tꞌeka sin ní?
61Ndá chꞌin Jesús tání la ninkehó kjuáte̱hya. Ndá ti ncha̱tꞌá tꞌe̱to̱an la xíkjanchankí ínaá, ndáchro:
―¿Á jaha ti Cristo, Xje̱en Díos imá tjikosáyehe chojni ní?
62 #
Dn. 7:13. *Ndá ndáchro chꞌin Jesús:
―Chaxín janhan tíha. Ndá chrꞌéxi̱n tsꞌikonra kixin ti Xje̱en Díos kꞌóna Chojni mé tsjakꞌetja̱xi̱n chꞌan ti itja chjina kuènté Díos chónta kaín kjuachaxin la ti ó tsokjan chꞌan la tsjakꞌekakjan chꞌan ti itji̱ siín nka̱jní itsi chꞌan ―ichro chꞌin Jesús.
63Ndá ti ncha̱tꞌá tꞌe̱to̱an la kótséchje ti iké kjua̱ko̱xi̱n kixin imá nínkaon la ndáchro:
―Í ticháxi̱nhña íso chojni tsꞌeka sin ijie̱. 64#Lv. 24:16.*Jahara ó kuihínra kixin kꞌuándaxíhi̱n chꞌan Díos. ¿Ndá nkehe ichrora?
Ndá kaín sin ndáchro sin kixin itsꞌen chꞌin Jesús.
65Ndá iso sin la kjuankíxin sin kui̱ki̱te sin nda̱té sin ti chꞌin Jesús la iso sin la kꞌuekjéhe̱ sin ikon chꞌan la kjuate sin chꞌan la ndáchro sin:
―Tónoha nkexro kjuatíá ―ichro sin.
A̱ndá ti sin policía kuènté ni̱nko chjéhe ito̱n sin nkayakon chꞌan.
Chꞌin Pedro kjuínchemá ti chꞌin Jesús
(Mt. 26:69-75; Lc. 22:56-62; Jn. 18:15-18, 25-27)
66Ndá ti nda̱sin chrꞌájin mé itjen chꞌin Pedro. Ndá ikui ijnko tjan chꞌehe ixra̱ ti ncha̱tꞌá tꞌe̱to̱an. 67La kꞌuíkon tjan kixin ntiha tjechjíxro̱he chꞌin Pedro. Ndá komá tjan la ndáchro tjan:
―Jaha la kja̱xin xriko̱a ti chꞌin Jesús tsíkji̱xi̱n Nazaret ―ichro tjan.
68Ndá chꞌin Pedro mé kjuínchemá chꞌan, ndáchro chꞌan:
―Chonhña ti nkexro la nonahña ti nkehe ndáchrua.
Ndá kꞌuaxrjexín chꞌan ntiha sákjuí chꞌan ndója. La xrína̱hña itsje ijnko kochi̱ndólá. 69Ndá ti tjan a mé kꞌuíkon tjan ti jehe chꞌan ínaá la chenka tjan ti sin tjejó ntiha:
―Ti nkexro la ijnko ti sin a.
70Kjánchó kjuínchemá chꞌin Pedro ínaá. Ndá a̱ntsí chrꞌéxi̱n, la ti sin kꞌuejóntaxín ntiha la ndáchro sin:
―Chaxín jaha la nkojín ti nkexro a kixin tsíkjíxian Galilea kixin tjatso̱anxíni ti nixja.
71Ndá chꞌin Pedro kjuankíxin kjuínchenohe chꞌan Díos, ndáchro chꞌan:
―Chaxín chonhña ti nkexro ndáchrora.
72Ndá ó yaáxin itsje ti kochi̱ndólá. La chꞌin Pedro xráxinkaon chꞌan ti nkehe ndáchro chꞌin Jesús: “Ti na̱xa̱ yàyahya itsje ti kochi̱ndólá la ó níxin vece si̱nchemá ti janhan.” Ndá xráxinkaon chꞌan tíha, la kjuankíxin tsjánka chꞌan.
S'ha seleccionat:
Marcos 14: poeNTplus
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2016, Wycliffe Bible Translators, Inc. All rights reserved.