Genesis 8
8
CAB. VIII
1As chooinee Jee er Noah, as er dagh cretoor bio, as er ooilley yn maase va mârish ’syn arg: as hug Jee er geay dy heidey harrish y thalloo, as ren ny ushtaghyn sloateil. 2Va myrgeddin thooillaghyn y diunid, as uinniagyn yn aer dooint seose, as va’n fliaghey veih’n aer er ny lhiettal. 3As ren ny ushtaghyn traie jeh’n thalloo dy kinjagh: as lurg kione shiaght-feed laa as jeih va ny ushtaghyn er sloateil.
4As ayns y chiaghtoo vee, er y chiaghtoo laa yeig jeh’n vee, ghow yn arg grunt er sleityn Ararat. 5As ren ny ushtaghyn lhaggaghey dy kinjagh derrey’n jeihoo vee. Ayns y jeihoo vee, er y chied laa jeh’n vee, haink mullagh ny sleityn rish.
6As haink eh gy-kione lurg da-eed laa, dy ren Noah fosley uinniag yn arg v’eh er hroggal. 7As hug eh magh feeagh, dettyl noon as noal derrey va ny ushtaghyn chyrmit seose jeh’n thalloo. 8Myrgeddin hug eh magh calmane, dy akin row ny ushtaghyn er sloateil jeh eaghtyr y thallooin. 9Agh cha dooar y calmane ynnyd dy choyrt e chass er, as hyndaa ee huggey reesht gys yn arg: son va ny ushtaghyn er slane eaghtyr y thallooin: eisht heeyn eh magh e laue, as ghow eh ee, as hayrn eh ee stiagh huggey ’syn arg. 10As ren eh farkiaght foast shiaght laa elley, as hug eh reesht yn calmane magh veih yn arg. 11As haink y calmane stiagh huggey ’syn astyr, as cur-my-ner, ayns e veeal va duillag olive pluckit jeh; myr shoh va fys ec Noah, dy row ny ushtaghyn er draie jeh’n thalloo. 12As duirree eh foast shiaght laa elley, as hug eh magh y calmane, nagh daink back huggey arragh.
13As haink eh gy-kione ’sy cheyoo cheead as un vleïn, ayns y chied vee, er y chied laa jeh’n vee, dy row ny ushtaghyn er draie jeh’n thalloo: as scugh Noah yn coodagh jeh’n arg, as yeeagh eh magh, as Cur-my-ner, va eaghtyr y thalloo er jeet rish. 14As ayns y nah vee, er y chiaghtoo laa as feed jeh’n vee va’n thalloo er jyrmaghey.
15As loayr Jee rish Noah, gra. 16Gow magh ass yn arg, uss, as dty ven, as dty vec, as mraane dty vec mayrt. 17Cur lhiat magh dy chooilley nhee bio ta mayrt, jeh dy chooilley ghooghys, chammah jeh ny eeanlee, as jeh’n maase, as jeh dagh cretoor ta snaue er y thalloo; dy vod ad cheet er-ash dy palchey er y thalloo, as ve messoil, as bishaghey er yn ooir. 18As hie Noah magh, as e vec, as e ven, as mraane e vec mârish: 19Dy chooilley vaagh, dy chooilley nhee snauee, as dy chooilley eean, as cre-erbee ta snaue er y thalloo, lurg nyn geint, hie ad magh ass yn arg.
20As hrog Noah altar da’n Chiarn, as ghow eh jeh dagh baagh glen, as jeh dagh eean glen, as heb eh ourallyn-losht er yn altar. 21As ren y Chiarn soiagh dy mie jeh’n oural, as dooyrt y Chiarn ayns e chree, Cha jean-ym arragh yn seihll y stroie er yn aght shoh, er coontey sheelnaue; ga dy vel smooinaghtyn chree dooinney peccoil veih e aegid: chamoo nee’m arragh dagh nhee bio y stroie, myr ta mee er n’yannoo. 22Choud as ta’n seihll er-mayrn, cha jean traa-correy, as fouyr, feayraght as chiass, sourey as geurey, laa as oie, dy bragh failleil.
S'ha seleccionat:
Genesis 8: BIB1819
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© British and Foreign Bible Society 1819, 2019