यूहन्ना 14
14
स्यूस्स्यायूने येशूदे बोङ् पीनब
1नमयूजे सेम् अन्ठोस्य। परमेश्वर फ्याने विश्वास ची मेस्ये ङै फ्यानेये विश्वास ची। 2ङैजे पजे कीम्ने टूङ नेयू कूम ख्यङ्। नमयूजे लागि ङ ने तयार चेने प्रेन ख्यङ्, कादेये येर त्वयलो ङ नमयूने येर पो अन्-य ख्यङ्दे। 3होर्दे ङ प्रदेबे नमयूजे ने तयार चीक्क ङ्येदे ङ फेरि ल्वारीय, होर्दे नमयूने ङ टूङब नेने कूबीय, केने ङ क्यूक्क्य, होने नमयूये क्यूक्क्य। 4ङ केने प्रेन ख्यङ्, होने प्रब लम् नमयूदे स्ये ख्यङ्।”
प ट्याने प्रब लम् येशू ख्यङ्
5थोमादे ङूने यदे, “ओ प्रभु, न केने प्रमे ख्यङ्, यदेबे ङीने था त्वो, यलो ङीदे लम् केरे स्ये?”
6येशूदे ङूने यदे, “लम्, सत्य मेस्ये जीया ङने ख्यङ्। ङैजे लम् क्यूत्देबे अम्प्रदासेमे सूये प ट्याने र अन्खू। 7नमयूदे ङैने स्ये यलो, ङैजे पनेये स्ये ख्यङ्दे। जेम्सेमेस्ये ङूने स्येय, मेस्ये नमयूदे ङूने तङ्क ख्यङ्।
8फिलिपदे ङूने यदे, “प्रभु, ङीने प तम्मी। हन्छ्वात्या चीम्मीलो ङीने पूक्तीय।”
9येशूदे ङूने यदे, “फिलिप अन्छ्वासेमे ङ नमयूप्रे ख्यङ्लीने नदे ङैने अन्स्येया? सूदे ङैने तङ ख्यङ्, हम्बदे पनेये तङ ख्यङ्। नदे केरे य खूइय, ‘ङीने प तम्मी?’ 10ङ पप्रे ख्यङ्, मेस्ये प ङैप्रे ख्यङ् यदेबे नमयू विश्वास अन्चे? कम्ब पो ङ नमयूने यीय, हम्ब ङैदे रङ्सेजे पो य दी, तर ङैप्रे क्यूत्देबे टूनब पदे रङ्सेजे काम फर्क्य। 11ङ पप्रे ख्यङ्, मेस्ये प ङैप्रे ख्यङ् यदेबे ङैने विश्वास ची, कादेये विश्वास अन्क्यूल्लो अम्ब ङैदे चेब हार्मन्देब चीन्नयू लेत्देबे विश्वास ची।
12“तम्दम्ने ङ नमयूने यीय, सूदे ङैने विश्वास चीक्क्य, हम्बदे ङैदे चेब कामये चीक्क्य, मेस्ये हम्बयली थेप् केन् काम चीक्क्य, चेनेयलो ङ प ट्याने प्रेन ख्यङ्। 13नमयूदे ङैजे मीन्ने चनेस्यली च फ्याने पजे महिमा क्यूस्स्य यदेबे ङ हम्ब चीम्मीय। 14नमयूदे ङैजे मीन्ने चैसेने स्यली ङ चीम्मीय।
पवित्र आत्मा पीनब कबुल
15नमयूदे ङैने प्रेम चीक्क्य यलो ङैजे आज्ञायू मन्दीय। 16होर्दे ङ पप्रे ला जोर्तीय, मेस्ये ङूदे नमयूने सूजो मोतो पीनब त्या कूल्बीय, होर्दे ङू येतार्ने नमयूप्रे क्यून्नीय। 17ङू सत्यजे आत्मा ख्यङ्, संसारदे ङूने ग्रहण चे-अन्खू, चेनेयलो संसारदे ङूने तङ अन्खू होर्दे स्ये अन्खू। नमयूदे ङूने स्येय, चेनेयलो ङू नमयूप्रे टूङ्क्य मेस्ये ङू नमयूप्रे क्यून्नीय।
18ङ नमयूने ट्वे प्र चीत्देबे अम्पोङ्गी। ङ नमयू ट्याने रीय। 19जेम्से छीत्त्या ङ्येदे संसारजे मीयूदे ङैने कलङ्बेये तङ्स्ये त्वो, तर नमयूदे ङैने तङ्क्य। ङ सोम्बो क्यूरबदे, नमयूये सोम्बो क्यूक्क्य। 20ङ ङैजे पप्रे ख्यङ्, होरप्रने नमयू ङैप्रे मेस्ये ङ नमयूप्रे ख्यङ् यदेबे हन्छ्वाब नमयूदे स्येय। 21ङैजे आज्ञा ङ्यीन्देबे सूदे मन्दीय हम्बदे ङैने प्रेम चेब क्यूक्क्य। होर्दे ङैने प्रेम चेबने ङैजे पदे प्रेम चीक्क्य। ङ हम्ब मीने प्रेम चीक्क्य, मेस्ये ङ रङ्सेब ङू ट्याने तङ्रीय।”
22यहूदादे (इस्करियोत ब दी) ङूने यदे, “प्रभु, नदे च य, न सू ख्यङ्, यदेबे रङ्सेदे ङीनेत्या तम्मे संसारजे मीयूनेब अन्तम्मे?”
23येशूदे ङूने जवाफ पीन्दे, “सूदे ङैने प्रेम चीक्क्य, हम्बदे ङैजे वचन मन्दीय, होर्दे ङैजे पदे हम्बने प्रेम चीक्क्य, मेस्ये ङी हम्ब ट्याने रीय, मेस्ये हम्बप्रे टूङ्क्य। 24ङैने प्रेम अन्चेबदे ङैजे वचन अम्मन्दी। कम्ब वचन नमयूदे ङ्यीन्क्य, हम्ब ङैजे दी तर ङैने कूल्बेब पजे ख्यङ्।
25“अम्ब पो नमयूप्रे क्यूप्पने ङैदे नमयूने य ख्यङ्। 26तर पदे ङैजे मीन्ने मोतो पीनब, या पवित्र आत्मा कूल्बीय, ङूदे साप्ता पो नमयूने लोम्मीय, मेस्ये ङैदे नमयूने येयेब साप्ता पो नमयूने ह्वेरलाबे चीम्मीय। 27ङ नमयूने शान्ति पोङ्गीय। ङ रङ्सेजे शान्ति नमयूने पीन्क्य। ङ नमयूने संसारदे पीनप्र अम्पीन्। नमयूजे सेम् अन्ठोस्य, मेस्ये अम्फस्य।
28ङैदे नमयूने ‘ङ अन्-यादे प्रेन ख्यङ्, मेस्ये फेरि नमयू ट्याने ल्वारीय’ यब पो नमयूदे तैक ख्यङ्। नमयूदे ङैने प्रेम चे यलो ङ प ट्याने प्रेन ख्यङ् यब पो तदेबे नमयू सोरो तङ ख्यङ्दे, चेनेयलो प ङ यली सोरो केन् ख्यङ्। 29जेम्से अम्ब क्यूट्ट यली खूम्ने ङैदे नमयूने येमीक ख्यङ्, मेस्ये कन्छ्वाब अम्ब क्यूट्टीय नमयूदे विश्वास चे खूस्य। 30जेम्से ङ नमयूप्रे कूम अन्क्यम्, चेनेयलो अम्ब संसारजे हुकुम चील्लेब रेन ख्यङ्। ङै फ्याने हम्बजे चै हकये त्वो। 31पदे ङैने चै आज्ञा पीन ख्य, हम्ब अनुसार ङैदे चीक्क्य मेस्ये ङैदे पने प्रेम चेटूङ् यदेबे संसारजे मीयूदे स्येस्य। लङ्, अन्-यादे ङीन प्रे।”
S'ha seleccionat:
यूहन्ना 14: सर् कबुल
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Ghale New Testament © Nepal Bible Society, 2011.