Jɔn 5
5
Yesu ka chɛ esa ko nchu ko ase be asheŋ
1Yesu ka wora nchɛnnyɔ nɛ e yɔ Juwebi be kabɔrɛbɛso be daŋkare ko be Kejigboŋ to ashi Jerusalɛm. 2Kepa ko malɛ kɔ adɛdɛ anu a wɔ Jerusalɛm a mata kakpa nɛ baa tre Mbolpɔ be Kabuna na. Hibruwebi be ŋgbar to kepa na nɛ baa tre Betɛsda. 3Belɔpo nnaŋ to damta ko fanɛ betanpo nɛ ebobi nɛ eyurwusowuraana daa ba ndoŋ nna m ba kaa dese a jo nchu na be kebagato. 4[Ŋkpal manɛ so, Enyɛnpe be malaika daa ba saŋko saŋko nna m ba kaa baga nchu na to. Kebagato na malɛ be kaman elɔpo kama daŋ baŋ juŋkpar n luri nchu na to, amodoŋwura be kulɔ kama nɛ k daa kɔ mo beeŋ lar mo to.] 5Kanyɛn ko malɛ daŋ dese nfɛ adesa nɛ aburwa a lɔ nsaa wɔ ndoŋ. 6Yesu ka wu mo nɛ e dese ndoŋ nseŋ pin e ka dese ndoŋ n chɛr nɛ e bishi mo le: “Fee sha kenya alenfia a?” 7Nɛ elɔpo na kaŋɛ mo le: “Ebunyampo, m maŋ kɔ esa kikɛ nɛ e chɛ ma to nɛ n luri nchu ere to, saŋkama nɛ b baga amo to. Ma alɛ baŋ wora ania a sha keluri amo to nɛ esa ko teŋ daŋ ma keluri to.” 8Ndoŋ nna nɛ Yesu kaŋɛ mo: “Niŋi to ŋ koso m bɔɔ fo kelaŋ to a nite.” 9Epul na to nɛ kanyɛn na nya alenfia nseŋ bɔɔ mbe kelaŋ to n fara a nite.
10Amo be kamɔnchɛ malɛ daa la kewushiachɛ nna, amoso, Juwebi be benimu na ka wu kanyɛn na nɛ b kaŋɛ mo le: “Kabre la kewushiachɛ nna. Anyi be mbra na malɛ maa sa ekpa fanɛ fo di fo kelaŋ a na.” 11Ndoŋ nna nɛ e kaŋɛ bumo le: “Kanyɛn nɛ e chɛ ma na e kaŋɛ ma fanɛ: ‘Bɔɔ fo kelaŋ to a nite.’ ” 12Nɛ b bishi mo: “Esa mo malɛ e kaŋɛ fo fanɛ fo bɔɔ fo kelaŋ to a na?” 13Kanyɛn nɛ e daŋ nya alenfia na daa maŋ nyi amodoŋwura, ŋkpal manɛ so, jimaŋ damta ko e daa wɔ ndoŋ nɛ Yesu daŋ lar bumo to n choŋ. 14Saŋko ba choŋ nna pɔɛŋ nɛ Yesu ya wu mo bɔrɛlambu na to be kelɔnɛ so nseŋ kaŋɛ mo le: “Keni, fo naŋ nya alenfia nna na, yige alubi be kebaawora. Nɛ mannɛ aloŋ, kusɔ nɛ k lubi a chɔ fo kulɔ na beeŋ nya fo.” 15Ndoŋ nna nɛ kanyɛn na ya kaŋɛ Juwebi be benimuana na fanɛ Yesu e daŋ chɛ mo na. 16Amoso, Juwebi na daŋ fara nna a tɔrɔ Yesu, ŋkpal e ka daŋ wora le be asheŋ kewushiachɛ na so. 17Nɛ Yesu kaŋɛ bumo: “Saŋkikɛ n Tuto bee shuŋ nna, amoso, a daga fanɛ ma alɛ gba e baa shuŋ loŋ.” 18Le be kamalga ere malɛ e daŋ naŋ shin nɛ Juwebi na nyaŋɛ to n ti so a sha kemɔ Yesu na, ŋkpal manɛ so, mannɛ fanɛ e daa jija kewushiachɛ na nawule nna, ama e daa tre Ebɔrɛ mo Tuto gbagba nna a ti so a ŋini fanɛ mo nɛ Ebɔrɛ ka la kukoŋwule.
Ebinyɛn na be eleŋ be asheŋ
19Ndoŋ nna nɛ Yesu kaŋɛ bumo le: “Kashenteŋ nɛ mee ji menyi na fanɛ ma, Ebɔrɛ Pibinyɛn na maa tiŋ a wora shɛŋ ŋ gbagba be kumu so kikɛ. Kusɔ nɛ mee wu n Tuto na ka bee wora nawule nɛ ma alɛ gba bee wora. Kusɔ nɛ Etuto na bee wora, kumo nɛ ma, Ebinyɛn na gba bee wora. 20Ŋkpal manɛ so, Etuto na bee sha ma, Ebinyɛn na ga. Amoso, kusɔ kama nɛ e bee wora, e bee ŋini ma kumo nna. Mo alɛ kraa beeŋ ŋini ma asɔ nɛ a chɔ ade ere nɛ men be nnɔ e mɔ menyi. 21Ŋkpal manɛ so, kananɛ Etuto na bee tiŋi basa luwu to a sa bumo ŋkpa na, loŋ gbagba nna nɛ ma, Ebinyɛn na bee sa basa nɛ mee sha ŋkpa. 22Kumo be kaman, Etuto na maa ji esa kama demu, e ta demu be keji kikɛ nna m bɔɔ ma, Ebinyɛn na enɔ, 23saŋɛ na so, ekama beeŋ bunyaŋ ma, Ebinyɛn na fanɛ kananɛ baa bunyaŋ Etuto na. Ekama malɛ nɛ e maa bunyaŋ ma, Ebinyɛn na maa bunyaŋ Etuto nɛ e shuŋi ma na gba nna na.
24Ma e kaŋɛ menyi kashenteŋto na fanɛ esa kama nɛ e nu ma mmalga ere nseŋ yirda esa nɛ e shuŋi ma na kɔ ŋkpa nɛ k maŋ kɔ ekar na, mo alɛ maaŋ ji n tɔr, ama e teŋ lar luwu to m ba luri ŋkpa to. 25Ma e kaŋɛ menyi kashenteŋto na fanɛ saŋko beeŋ ba fo, saŋɛ na teŋ fo gba fanɛ bubuni beeŋ nu ma, Ebɔrɛ Pibinyɛn na be ebɔl, ekama malɛ nɛ e nu kumo beeŋ nya ŋkpa a wɔtɔ. 26Kananɛ ŋkpa shi Etuto na to na, loŋ gbagba na nɛ e shin nɛ ŋkpa bee shi Ebinyɛn na gba to. 27Mo alɛ sa Ebinyɛn na ekpa nna nɛ e ji basa demu ŋkpal ebi na ka la Nyiŋgbasa Pibinyɛn na so. 28Men sa maŋ shin nɛ kesheŋ ere e baa chinchiŋ menyi, ŋkpal manɛ so, saŋko beeŋ ba fo nɛ basa nɛ b wɔ bumo be nchaŋana to na kikɛ e nu Ebinyɛn na be ebɔl 29nseŋ lar bumo be nchaŋana na to nɛ bumo nɛ b wora alelasheŋ na e tiŋi a wɔ ŋkpa to nɛ bumo nɛ b wora alubisheŋ na malɛ e tiŋi n luri kasogberge to.
30Ma alɛ gbagba maaŋ tiŋ n wora shɛŋ ma kumu so. Kusɔ nɛ Ebɔrɛ bee kaŋɛ ma be demu nɛ mee ji, amoso, ma demu be keji kɔ kashenteŋ nna, ŋkpal manɛ so, mannɛ ŋ gbagba be aparsheŋ nɛ mee wora, esa nɛ e shuŋi ma na be aparsheŋ nɛ mee wora. 31Nɛ m baŋ ji ŋ gbagba be kumu so be shɛda, kumo ere ma shɛda na maŋ la shɛda kpakpaso. 32Ama esa pɔtɛ ko wɔtɔ a ji ma shɛda a sa basa nɛ ma alɛ nyi amodoŋwura be loŋ be shɛda na ka bɔla ekpa. 33Men gbagba e shuŋi mbɔ Jɔn kutɔ, mo alɛ ji kashenteŋ na be shɛda n sa menyi. 34Mannɛ fanɛ dimɛdi be shɛda nɛ mee sha, ama m malga kesheŋ ere nna nɛ men tiŋ n nya kumɔlga. 35Jɔn daa du fanɛ fitila nɛ k chɔɔ so nna a sa basa kefulto nɛ men daŋ shuli n wu kefulto na be ebel gbrɛbi. 36Ama ŋ kɔ shɛda kpakpaso a chɔ Jɔn be shɛda na. Ŋkpal manɛ so, ashuŋ nɛ mee shuŋ ere, amo nɛ Etuto na sa fanɛ n shuŋ na e naa ji ma shɛda a ŋini fanɛ Etuto na e shuŋi ma. 37Etuto nɛ e shuŋi ma na malɛ gba bee ji ma shɛda nna a sa basa. Menyi maŋ naŋ nu mbe ebɔl ŋko n wu mbe anishito. 38Mbe kamalga na malɛ gba maa chena menyi to, ŋkpal manɛ so, men maŋ yirda esa nɛ e shuŋi mo na. 39Menyi e naa kaa keni abɔrɛsibɛ na to nɛnɛ ŋkpal men ka bee fɛ fanɛ amo to nɛ menyeeŋ bɔla n nya ŋkpa nɛ k maŋ kɔ ekar na so, ama ma alɛ be asheŋ nɛ abɔrɛsibɛ na malɛ bee ji shɛda a kaŋɛ na. 40Ama menyi alɛ maa sha keba ŋ kutɔ m ba nya ŋkpa na.
41M maa fin kechɔrɔ ashi basa kutɔ. 42Ama n nyi menyi, men maŋ kɔ kasha a sha Ebɔrɛ menyi be ŋgbeneana to. 43N Tuto be ketre nɛ n ta m ba nɛ men kini ma na, ama nɛ esa pɔtɛ ko baŋ ta mo gbagba be eleŋ m ba, menyeeŋ sɔ amodoŋwura na. 44Menyee sha kebaanya mbo abar kutɔ, ama men maa wora ania a fin mbo ashi Ebɔrɛ koŋwule na kutɔ nɛ nuso nɛ menyeeŋ wora n yirda? 45Ama men sa maa fɛ bre fanɛ ma e naaŋ yili Ebɔrɛ be anishito ŋ ŋini mo menyi be alubi. Ayai, esa nɛ e beeŋ shin nɛ menyi be alubi e dii efuli e la anebi Mosis nɛ men ta menyi be tama kikɛ n deŋi so na. 46Nɛ men daŋ yirda Mosis be mmalga kenishipereso nna, men daa beeŋ yirda ma, ŋkpal manɛ so, ma asheŋ nɛ e daŋ sibɛ n sa menyi na. 47Ama men ka maŋ yirda kusɔ nɛ e sibɛ na bre, nuso nɛ menyeeŋ wora n yirda asheŋ nɛ mee malga?”
S'ha seleccionat:
Jɔn 5: GJNb
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2015 GILLBT Ghana Institute of Linguistics, Literacy and Bible Translation