Luuk 21
21
Ekulpoche be kakɛ be asheŋ
(Maak 12:41-44)
1Yesu ka wu kananɛ damawuraana bee ta bumo be kakɛ a wɔtɔ amansherbi be deka na to na 2nɛ e wu ekulpoche tirpo ko malɛ ka ba ta aninibi anyɔ n wɔtɔ. 3Nɛ e kaŋɛ le: “Ma e kaŋɛ menyi na fanɛ ekulpoche tirpo ere wɔtɔ amansherbi ga ashi amansherbi be deka na to a chɔ bumo nɛ b ka na kikɛ. 4Ŋkpal manɛ so, bekama nɛ b wɔtɔ na kikɛ lara bumo be kedama to be gbrɛgbrɛ nna m ba wɔtɔ, ama mo ere etirpo ta kusɔ nɛ e kɔ kikɛ nna m ba wɔtɔ. E wɔtɔ mbe kusɔ jiso kikɛ.”
Yesu malga bɔrɛlambu na be kebure be asheŋ
(Matiu 24:1-2; Maak 13:1-2)
5Basa ko ka bee ji bɔrɛlambu na be asheŋ a malga yawu kpakpaso be ajembu nɛ basa ta m pɔr kumo na be asheŋ nɛ Yesu kaŋɛ bumo le: 6“Asɔ nɛ menyee wu ere bre kikɛ, saŋko beeŋ ba nɛ kejembu koŋwule kama gba maaŋ ba ka a bɛ kumo barkasa so. Baaŋ ba da amo kikɛ n lɛ.”
Etɔrɔ nɛ kekishi be kasogberge be asheŋ
(Matiu 24:3-14; Maak 13:3-13)
7Ndoŋ nna nɛ b bishi mo: “Eŋinipo, saŋɛ mo nɛ kesheŋ nɛ fo malga na beeŋ wora? Nɛ jemanɛ na malɛ ba kaa taga to, manɛ e naaŋ ŋini fanɛ kumo be loŋ be saŋɛ na fo?” 8Nɛ e kaŋɛ bumo le: “Men baa da so nɛ esa kikɛ e sa maŋ fule menyi, ŋkpal manɛ so, basa damta beeŋ ba kaa kɔ ma ketre a na a kaŋɛ le: ‘Ma e la mo!’ ŋko ‘Jemanɛ na fo!’ Men sa maŋ bɛ bumo so. 9Nɛ men kaŋ ba kaa nu fanɛ basa bee kɔ abar ana nseŋ naa nu alantokɔ be asheŋ, men sa maŋ shin nɛ menyi be ŋgbene e baa ku menyi, ŋkpal manɛ so, a daga fanɛ loŋ be asheŋ e juŋkpar n wora pɔɛŋ, ama lalaloge be jemanɛ na maaŋ bɛ so epul na to.”
10Ade be kaman nɛ e naŋ kaŋɛ bumo le: “Efuli ko beeŋ kɔ kuko kena nɛ kuwurgboŋ ko e kɔ kuwurgboŋ nyɔsopo malɛ kena. 11Abembeŋgboŋ beeŋ ba nɛ akoŋ nɛ alɔana e tɔr mboŋ damta. Alemaŋkarsheŋ damta beeŋ shi ebɔrɛso n wora nɛ kufu e pɛ basa ga. 12Ama pɔɛŋ nɛ le be asheŋ malɛ kikɛ e wora, basa beeŋ pɛ menyi n tɔrɔ menyi a ta menyi a bɔɔ nshɛrbuana to be benimuana enɔ nsaa ti menyi ebuana. Basa beeŋ kpal ma ketre so n yɛr menyi bewurgboŋana nɛ egomena be anishito. 13Kumo be jemanɛ na so menyeeŋ nya ekpa n ji ma asheŋ be shɛda. 14Men baa nyi geeŋ menyi be ŋgbene to fanɛ a maŋ daga men ka beeŋ chena n fɛ kananɛ menyeeŋ malga be asheŋ. 15Ŋkpal manɛ so, meeŋ bugi menyi be nnɔ nɛ men doŋana e pɔɔ menyi so ŋ gben ŋko n ji m bri menyi ŋ gben. 16Betuto nɛ benioana nɛ bedaana nɛ bekurgepoana nɛ beteriana beeŋ ta menyi m bɔɔ men doŋana enɔ nɛ b mɔ menyi be beko. 17Ekama beeŋ kpal ma ketre so ŋ kishi menyi, 18ama menyi be kemin koŋwule kama gba maaŋ mur. 19Ama ekama nɛ e ji kanyiti n lar, e beeŋ nya mbe ŋkpa.
Yesu ka malga Jerusalɛm be kemur be asheŋ
(Matiu 24:15-21; Maak 13:14-19)
20Jemanɛ nɛ men baŋ wu benapo ka kulti Jerusalɛm na, men baa nyi fanɛ kade na be kemur be jemanɛ taga to. 21Amo be jemanɛ na, men shin nɛ bumo nɛ b wɔ Judiya be efuli so e shile n yɔ abee ase nɛ bumo nɛ b wɔ kade na be epunto e lar kumo to nɛ bumo nɛ b wɔ ndɔana to e sa maŋ bɛta n luri kade na to, 22ŋkpal manɛ so, naniere baaŋ gberge Israɛlebi kusoe n tal to n shin nɛ abɔrɛsibɛ na kikɛ e bɔla ekpa. 23Yee, kumo be jemanɛ na, bedampoche nɛ beche nɛ b kɔ mbia nɛ b kraa wɔ enɔ to, beeŋ wu asheŋ ga, ŋkpal manɛ so, awurfoŋ damta beeŋ ba durnya ere to nɛ kasogberge e ba basa ere so. 24Basa beeŋ ta etokobi m mɔ bumo be beko nɛ efuliana so ebi kikɛ e pɛ bumo be beko anya n yɔ bumo be efuliana so nɛ nnyamase e mur Jerusalɛm kikɛ nyam. K beeŋ ba du loŋ nna hale nɛ nnyamase na be eleŋ be jemanɛ e ya choŋ.
Nyiŋgbasa Pibinyɛn be keba be asheŋ
(Matiu 24:29-31; Maak 13:24-27)
25Amo be jemanɛ emamachisheŋ beeŋ shi epeŋi so nɛ kufɔl so nɛ achɛkpabi so m ba nɛ durnya ere to ebi be ŋgbene e kaa bumo nɛ b wul to ŋkpal teku be atiligboŋ be egbri nɛ amo be kebagato so. 26Kufu beeŋ pɛ basa, hale nɛ b ya kaa chɛl ŋkpal emamachisheŋ nɛ baaŋ wu a ka beeŋ wora durnya ere to so, ŋkpal manɛ so, ebɔrɛso be eleŋana kikɛ beeŋ wea abarto. 27Saŋɛ na so baaŋ wu ma, Nyiŋgbasa Pibinyɛn ka shi awɔlpa so nɛ eleŋ nɛ kemaŋkura gboŋ a ba. 28To, nɛ asheŋ ere kaŋ ba fara a wora, men maŋ menyi be amuana so n saŋɛ menyi be eyurana to, ŋkpal manɛ so, menyi be kumɔlga be jemanɛ taga to.”
Kakuluwu be kedibi be kesheŋ ŋini be asheŋ
(Matiu 24:32-35; Maak 13:28-31)
29Ade be kaman nɛ e bɔ bumo keŋasa ere ŋ kaŋɛ: “Men baa keni kakuluwu nɛ ndibi kikɛ. 30A baŋ ba kaa purge, menyi alɛ gba beeŋ wu nsaa nyi fanɛ kebleŋ be saŋɛ tea taga to. 31To, loŋ koŋwule na nna fanɛ nɛ asheŋ ere kikɛ kaŋ ba kaa wora, men baa nyi fanɛ Ebɔrɛ be kuwura na be keba nɛ jemanɛ na taga to. 32Kashenteŋto nɛ mee kaŋɛ menyi na fanɛ asheŋ ere kikɛ beeŋ wora pɔɛŋ nɛ mbreebi nɛ b wɔ ŋkpa to ere kikɛ e wu. 33Ebɔrɛso nɛ kasawule kikɛ beeŋ ba mur, ama ma mmalga maa ba nɛ a ba mur kikɛ.
34Ama men baa de menyi be amu so nsaa maa wɔ kebaawɔtɔ jiga nɛ kasanuu nɛ durnya ere to be kasɔsha be kebaawɔtɔ to nɛ menyi be aba e pɔ menyi nɛ kachɛ nɛ ma, Nyiŋgbasa Pibinyɛn beeŋ ba na e purgi menyi fanɛ kejigbelɛ na. 35Ŋkpal manɛ so, kachɛ na beeŋ ba durnyaebi kikɛ so nyam. 36Amoso, men baa da so saŋkama a kule Ebɔrɛ eleŋ nɛ menyeeŋ tiŋ n ta n luri asheŋ nɛ a beeŋ wora ere kikɛ to n lar nseŋ tiŋ m ba yili ma, Nyiŋgbasa Pibinyɛn be anishito.”
37Karechɛ kama e daa wɔ bɔrɛlambu na to nna a ŋini basa abɔrɛsheŋ nɛ kanyɛso nɛ e yɔ kebee nɛ baa tre Ɔlifs be kebee na so n ya kaa wɔtɔ. 38Chipurdidi basa na kikɛ daa ba mo kutɔ bɔrɛlambu na to nna m ba kaa nu mbe mmalga.
S'ha seleccionat:
Luuk 21: GJNb
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2015 GILLBT Ghana Institute of Linguistics, Literacy and Bible Translation