Xhun 9
9
Uvaʼs ibʼant quBʼaal Jesuus bʼaʼn val u tzot, tul iqej veteʼ uvaʼ, aʼich quBʼaal Jesuus u Kriisto
1Tinvaʼtetz vet qʼij, tul sebʼtich ixaon Jesuus, tul til Jesuus val u vinaq uvaʼ tzotichxh s-talaleʼ. 2Yaʼne ech tal inqʼa nikich itxhus tibʼ kʼatz Jesuus s-te s-eche: —Txhusul qetz, ¿kam s-tiʼil tzotichxh naq u vinaq uvaʼe s-talaleʼ? ¿Maq tiʼ ipaʼv naq? Atz ¿maq tiʼ ipaʼv itxutx ibʼaal naq? —xeʼtaq te Jesuus.
3Yaʼne ech tal Jesuus s-eche: —Yeʼle. Jit ipaʼv naq; atz jitoq ipaʼv itxutx ibʼaal naq. Pet, tiʼ uvaʼ, toq ikʼutxh quBʼaal Tiuxh vibʼanoʼm tiʼ ibʼanax naq bʼaʼn. 4Tan tetxhal toq inbʼan inqʼa bʼanoʼm uvaʼ qat itxhaq tzaan in vinBʼaal tiʼ ibʼanaxeʼ. Loqʼe tuul tele, eche tutxh aqʼon tuulbʼal u qʼiil. Tan topoon u qʼij uvaʼ yeʼ vet laʼ utxh inbʼantaʼ, eche yeʼ laʼ tutxh vet aqʼon tuulbʼal aqʼbʼal. 5Tuulbʼaletz uvaʼ at in xoʼl inqʼa xaol vatz txʼavaʼ, tul in kʼutxhul tetz u titzʼabʼal quBʼaal Tiuxh s-xoʼl. Tan ech vatin s-xoʼl, eche txiqubʼal; tan in kʼutxhul tetz u bʼey kʼatz quBʼaal Tiuxh, —xeʼt Jesuus.#Tio 5.14; Xhun 8.12
6Taletz kuxh Jesuus u yol uvaʼe, tul tzubʼ kuʼ Jesuus t-txʼavaʼ. Tul ibʼan Jesuus inbʼiil u xooqʼol tuchʼ vitzubʼ. Tul isujoʼk Jesuus tiʼ inqʼa bʼaqʼ ivatz u tzot. 7Yaʼne ech tal Jesuus te u tzot s-eche: —Quuxh; tul quxh txʼaj inqʼa bʼaqʼ avatz tu naʼebʼal aʼ Siloee, —xeʼt Jesuus. (‹Txhaqel,› chich telaʼp u yol Siloee.)
Bʼenetz vet u tzot, tul ex itxʼaj vet inqʼa bʼaqʼ ivatz. Tul nikich tilon veteʼ uvaʼs iqʼaʼveʼ.{*}#9.7 Aʼetz nik elkaʼpun u yol Siloee ‹txhaq tzaan,› eche itxhaqax tzaan quBʼaal Jesuus vatz txʼavaʼ.
8Atichetz inqʼa etz tzʼalol, atz inqʼa xaol uvaʼ ilonaʼqich tetz u vinaq uvaʼ tzotiche. Tul echaq motx tal vet s-eche: —¡Aʼ u vinaqe uvaʼe, uvaʼ kʼuqlich kuxh tiʼ tabʼil ipuaq te inqʼa xaol! —chichichaq veteʼ.
9Tul at jolol xaol ech nikich alon s-eche: —¡Aʼe! —chichichaqe.
Atz at jolt ech nikich tal s-eche: —Yeʼle. Jit aʼe, pet eela kuxh bʼiil tuchʼ naq u vinaq, —chichichaqe.
Yaʼne ech tal vet u vinaq uvaʼ tzotiche s-eche: —¡Ine, uvaʼ tzotich in! —xeʼte.
10Tul ech tal vet inqʼa xaol te u vinaq s-eche: —¿Kametz qat uulbʼe, tul nik avilon veteʼ? —xeʼtaqe.
11Yaʼne ech tal vet u vinaq s-eche: —Naqe val u vinaq uvaʼ Jesuus ibʼij, qat bʼanon inbʼiil u xooqʼol. Tul qat isujoʼk naq tiʼ inqʼa bʼaqʼ invatz. Tul ech qat tal naq s-ve s-eche: «Quxh txʼaj inqʼa bʼaqʼ avatz tu naʼebʼal aʼ Siloee,» chich naq s-ve. Qatetz bʼen vet in. Tul qat ex intxʼaj vet inqʼa bʼaqʼ invatz. Tul ¡qat ilon vet in! —xeʼt u vinaq.
12Yaʼne ech tal vet inqʼa xaol s-eche: —¿Taletz atil u vinaq uvaʼ nik aaleʼ? —xeʼtaqe.
Tul ech tal u vinaq s-eche: —Yeʼ vootzaqle talebʼ atila, —xeʼte.
Uvaʼs tabʼit inqʼa fariseeo inuqul u yol te u vinaq uvaʼ tzotiche
13Yaʼne iqʼol vet u vinaq vatz inqʼa fariseeo, u vinaq uvaʼ tzotiche. 14Tan tuulbʼalich val u xeem qʼij saavado, tul ibʼan Jesuus inbʼiil u xooqʼol. Tul isujoʼk Jesuus tiʼ inqʼa bʼaqʼ ivatz u tzot, tul ilon veteʼ.
15Yaʼne tabʼi vet inqʼa fariseeo inuqul te u vinaq uvaʼ kam tulbʼe, tul nikich isaqin veteʼ.
Tul ech tal u vinaq s-eche: —Naqe val u vinaq qat sujun ok inbʼiil xooqʼol tiʼ inqʼa bʼaqʼ invatz. Qatetz ex intxʼaj veteʼ, tul qat ilon vet in, —xeʼt u vinaq.
16Tul ech tal vet jolol inqʼa fariseeo s-eche: —Jit een tzajnaʼql naq uvaʼe kʼatz quBʼaal Tiuxh, tan yeʼ nik inima naq u xeem qʼij saavado, —xeʼtaqe.
Tul ech nikich tal jolt inqʼa fariseeo s-eche: —Oqetz aj paʼvom naq uvaʼe, tul ¿keʼchetz laʼ ibʼant naq kaebʼal aanima bʼa, eche uvaʼe? —chichichaqe. Echetz tok vet ixoʼl inqʼa fariseeoe s-vatzaq.
17Yaʼne ech motx taltxha inqʼa fariseeo inpaqt te u vinaq s-eche: —¿Keʼchetz axh? ¿Kametz toq aal tiʼ naq u vinaq uvaʼ nik avilon vet taʼn? —xeʼtaqe.
Tul ech tal u vinaq s-eche: —Qʼexsan tetz viyol quBʼaal Tiuxh naq, —xeʼte.
18Poro tira yeʼ nikich motx iqej inqʼa iqʼesal fariseeo uvaʼ tzotich u vinaq, tuchʼ uvaʼ maʼtich ibʼant vet bʼaʼn u bʼaqʼ ivatz taʼn Jesuus. Pet ex nalichxh eloq itxutx ibʼaal u vinaq. 19Tul motx abʼil vet s-te. Tul ech motx tal s-eche: —¿Aʼetz kol naqe vakʼaol uvaʼ tzotichxh s-talaleʼ nik etaleʼ? Tul ¿keʼchetz nik tilon vet naq? —xeʼtaqe.
20Yaʼne ech tal vet itxutx ibʼaal u vinaq s-eche: —Bʼantan, qunitxaʼaxhte qʼaoq. Tul tzotichxhte s-talaleʼ. 21Pet yeʼl s-qukʼuul keʼch qat tiqʼot tibʼ inqʼa bʼaqʼ ivatz. Atz yeʼlat s-qukʼuul jabʼil qat bʼanon, tul ile nik tilon veteʼ. Pet abʼivaq s-te. Tul antxh toq alon inuqul sete, tan vinaqt veteʼ, —xeʼt vitxutx ibʼaal u vinaq.
22Echetz kuxh u yole uvaʼ tal vitxutx ibʼaal u vinaq, tan nikich motx ixoʼv te inqʼa iqʼesal tuqʼeʼybʼal inqʼa tij imam Israeel. Tan maʼtich talt inqʼa iqʼesal uvaʼ, jaʼl uvaʼ laʼich alon Jesuus s-Kriisto, tul tukimal laʼich teleʼl tu kʼulbʼal tibʼ inqʼa tij imam Israeel. 23Echetz s-tiʼile ech tal u txutxa bʼaala s-eche: —Abʼivaq s-te. Tul antxh toq alon inuqul, tan vinaqt veteʼ, —xeʼtaqe.
24Yaʼne isaʼ tzaan inqʼa fariseeo u vinaq inpaqte, uvaʼ tzotiche. Tul tabʼitxha inqʼa fariseeo te u vinaq inpaqte. Tul echaq motx tal s-eche: —Vatz Tiuxh aalvat inuqul u yol tiʼ naq uvaʼe. Tan qootzaqle uvaʼ aj paʼvom naq uvaʼ bʼanon axh bʼaʼn, —xeʼtaqe.
25Yaʼne ech tal u vinaq s-eche: —Yeʼ vootzaqle oq aj paʼvom naq. Pet taʼn kuxh vootzaqle uvaʼ tzotich in, tul il in nik vilon vet s-txheel taʼn naq, —xeʼte.
26Tul ech taltxha inqʼa iqʼesal inpaqt s-eche: —¿Kametz qat tulbʼe axh naq? Atz ¿kam qat tulbʼe naq, tul il axh nik avilon veteʼ? —xeʼtaqe.
27Yaʼne ech tal vet u vinaq s-eche: —Qat motx vall sete. Tul yeʼ nik motx eqej kam uvaʼ nik valeʼ. ¿Kam teletz esaʼ, s-tiʼ uvaʼ laʼ valtxha inpaqte? Pet ¿maqetz aʼat esaʼ laʼ bʼen ex simol naq? —xeʼte.
28Yaʼne xeʼt vet inqʼa qʼesal uqʼeʼybʼal tiʼ iyoqʼox u vinaq. Tul echaq motx tal s-eche: —Axhebʼ imol naq, xaʼte. Pet oʼ, tan oʼ niman tetz inqʼa yol uvaʼ tzʼibʼamal ka taʼn Moisees. 29Tan qootzaqle uvaʼ quBʼaal Tiuxh alon inqʼa yol te Moisees. Pet naq uvaʼe, tan yeʼ qootzaqle talebʼ kuxh tzajnaʼql tiqleʼm naq, —xeʼtaqe.
30Yaʼne ech tal u vinaq s-eche: —Tira sotzebʼal kuxh kʼuul ex, tiʼ uvaʼ yeʼ etootzaqle tal tzajnaʼql tiqleʼm naq u vinaq uvaʼ nik valeʼ, poro taʼn kuxh loqʼ qat ibʼanl naq bʼaʼnil s-ve. Tul il in nik vilon veteʼ. 31Tan qootzaql setuchʼ uvaʼ yeʼl invaʼq aj paʼvom laʼ tzaqʼbʼel taʼn quBʼaal Tiuxh. Pet jaʼl u natxhkʼuulan tetz Tiuxh, atz laʼ ibʼan kam uvaʼ nik tal quBʼaal Tiuxh, tul aʼetz uvaʼe, laʼ tzaqʼbʼel taʼn. 32Tan yeʼl inpaqxoʼq qabʼi talaxeʼ uvaʼ: «Qat oleʼvy val u xaol tiʼ ijaqpisal ivatz val u vinaq uvaʼ tzotichxh s-talaleʼ,» chich koq eʼli.
33Tan yeʼxhabʼil invaʼq laʼ oleʼv tiʼ ibʼanax invaʼq bʼaʼnil, oq jit een tzajnaʼql kʼatz quBʼaal Tiuxh, —xeʼte.
34Yaʼne ech tal inqʼa qʼesal uqʼeʼybʼal s-eche: —¡Aj paʼvom kuxh axh savalaleʼ! Tul ¡aʼ txhan vet axh laʼ txhusun oʼ nik aaleʼ! —xeʼtaqe. Tul tukimich tel vet ul u vinaq taʼn inqʼa fariseeo tu kʼulbʼalaq tibʼ.
Uvaʼs talt quBʼaal Jesuus uvaʼ atich bʼen titzʼabʼal inqʼa iqʼesal tuqʼeʼybʼal inqʼa tij imam Israeel t-tokto
35Tabʼietz vet Jesuus uvaʼ tukimich teluʼl u vinaq taʼn inqʼa qʼesal uqʼeʼybʼal, tul ex leqexoq u vinaq taʼn Jesuus. Tul ech tal Jesuus s-te s-eche: —¿Niketz kol aqej viKʼaol quBʼaal Tiuxh? —xeʼt Jesuus.{*}#9.35 At jolt iyolbʼal quBʼaal Tiuxh uvaʼ tzʼibʼamal tu yolbʼal grieego, aʼ nik taleʼ uvaʼ: —...in, u Kʼaola uvaʼ qat bʼen s-alam aanima, —chiche.
36Yaʼne ech tal u vinaq s-eche: —InBʼaal, ¿jaʼletze viKʼaol quBʼaal Tiuxh nik aaleʼ, tul toq inqejeʼ? —xeʼte.
37Tul ech tal Jesuus s-eche: —Qatetz eell in, tul il in, nik eel in s-txheel. Tan aʼ ine, uvaʼ nik inyolon savuchʼ, —xeʼt Jesuus.
38Yaʼne ech tal u vinaq te Jesuus s-eche: —¡Nik inqejeʼ, inBʼaal! —xeʼte. Tul iqajbʼa tibʼ vatz Jesuus, atz natxhkʼuulal vet Jesuus taʼn.
39Yaʼne ech tal Jesuus s-eche: —Qat ul in vatz u txʼavaʼ tiʼ taqʼax kuʼ yol tinuqul tiibʼa inqʼa xaol. Tan at xaol uvaʼ yeʼ nik ibʼen s-te uvaʼ nik ipaʼvineʼ. Pet laʼetz bʼen vet s-te, tul laʼ titzʼa tibʼ t-vipaʼv. Ech laʼ ibʼan eche inqʼa tzot uvaʼ yeʼ nik tiloneʼ, atz xamtel laʼ ilon veteʼ. Atetz jolt xaol uvaʼ ootzaqimal quBʼaal Tiuxh taʼn, tul nik tiloneʼ, nik taleʼ. Aʼetz vet uvaʼe, yeʼ tootzaq quBʼaal Tiuxh, eche inqʼa tzot uvaʼ yeʼ nik tiloneʼ, —xeʼt Jesuus.
40Atichetz jolol inqʼa fariseeo kʼatz Jesuus uvaʼ abʼin u yol uvaʼ tal Jesuus, tul echaq motx tal s-eche: —Aʼetzebʼ nik aaleʼ uvaʼ ant vet oʼ tzottinaʼql oʼ, tul nik aal u yol s-eche, —xeʼtaqe.
41Yaʼne ech tal Jesuus s-eche: —Eche uvaʼ, ex koqxh tzot, tul yeʼletz epaʼve. Pet, tiʼ uvaʼ nik etaleʼ: «Nik qil qʼaoq,» chich ex, antetz kuxh al exe s-aj paʼvom, —xeʼt Jesuus.
S'ha seleccionat:
Xhun 9: ixlC
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2016, Wycliffe Bible Translators, Inc. All rights reserved.