Tio 5
5
Uvaʼs talt quBʼaal Jesuus ibʼant inqʼa xaol u bʼaʼnla txumbʼal uvaʼ nik isaʼ quBʼaal Tiuxh
Luk 6.20-23
1Tiletz vet Jesuus uvaʼ mamala xaol txhʼuyich vet s-tiʼ, tul pal vet jaʼ Jesuus kʼuqloq viʼ val u vitz. Tul ijetxh vet ok tibʼ inqʼa nikich motx itxhus tibʼ kʼatz Jesuus. 2Tul xeʼt vet Jesuus txhus tetz inqʼa xaol. Tul ech tal Jesuus s-eche:
3—At vibʼaʼnil quBʼaal Tiuxh tiibʼa inqʼa xaol, inqʼa nik inatxh tu taanxelal uvaʼ atel vibʼaʼnil quBʼaal Tiuxh nik isaʼon s-te. Tan aʼetz inqʼae laʼ oksal s-tuul tiʼ ibʼant iqʼesalil taʼn quBʼaal Tiuxh, uvaʼ tu amlikaʼ.
4At vibʼaʼnil quBʼaal Tiuxh tiibʼa inqʼa xaol, inqʼa nik toqʼ vatz quBʼaal Tiuxh tiʼ inqʼa ipaʼv. Tan aʼetz inqʼae laʼ kʼuqbʼal ikʼuul taʼn quBʼaal Tiuxh, uvaʼ tu amlikaʼ.#Isaiias 61.2; 1 Luʼ 3.14
5At vibʼaʼnil quBʼaal Tiuxh tiibʼa inqʼa xaol, inqʼa tzʼuʼkinxh nik ibʼaneʼ. Tan aʼetz inqʼae laʼ etzan u txʼavaʼ s-tetz uvaʼ toq taqʼ quBʼaal Tiuxh.#Saalmo 37.11
6At vibʼaʼnil quBʼaal Tiuxh tiibʼa inqʼa xaol uvaʼ aʼxh tatxhaʼv ibʼanax u jik vatz quBʼaal Tiuxh, eche invaʼq u xaol uvaʼ kamxh t-tzaqa tziʼil, atz kamxh t-vaʼy. Tan aʼetz inqʼae laʼ kuʼsal ikʼuul taʼn quBʼaal Tiuxh, eche ikuʼsal ikʼuul invaʼq xaol uvaʼ nik inoj tibʼaʼnil.#Isaiias 56.1
7At vibʼaʼnil quBʼaal Tiuxh tiibʼa inqʼa xaol, inqʼa nik oybʼan ivatz imol. Tan aʼetz inqʼa xaole uvaʼ echatxh laʼ toybʼal ivatze taʼn quBʼaal Tiuxh.
8At vibʼaʼnil quBʼaal Tiuxh tiibʼa inqʼa xaol, inqʼa eenxh taanima tiʼ ibʼanax u bʼaʼn vatz quBʼaal Tiuxh. Tan aʼetz inqʼae toq atinoq kʼatz quBʼaal Tiuxh.#Saalmo 24.4-5
9At vibʼaʼnil quBʼaal Tiuxh tiibʼa inqʼa xaol, inqʼa aʼ nik itxhok tok u bʼaʼnil xoʼlaq imol. Tan aʼetz inqʼae laʼ tal quBʼaal Tiuxh s-kʼaol imeʼal.
10At vibʼaʼnil quBʼaal Tiuxh tiibʼa inqʼa xaol, inqʼa yeʼ kuxh nik ikaj utxhchil s-tiʼ, tiʼ ikʼaxbʼisaleʼ tiʼ kuxh vibʼant u jik. Tan aʼetz inqʼae laʼ oksal s-tuul tiʼ ibʼant iqʼesalil taʼn quBʼaal Tiuxh uvaʼ tu amlikaʼ.#1 Luʼ 3.14
11At vibʼaʼnil quBʼaal Tiuxh setiibʼa, ex inqʼa tiʼ kuxh vinnimaleʼ. Tul laʼ xeʼtik inqʼa xaol tiʼ teesal eqʼij, atz yeʼ ikaj setiʼ, tiʼ ekʼaxbʼisaleʼ, atz tiʼ talax kam kuxh yaabʼla txhaq yol setiʼ, [atz tiʼ itzʼeqex tzij setiʼ].#1 Luʼ 4.14 12Tan echatxh laʼ motx ekʼaxbʼisal tiʼ vinnimaleʼ, eche ikʼaxbʼisal inqʼa qʼexsanich tetz viyol quBʼaal Tiuxh, inqʼa naʼy tul sevatz. Poro niimxh vetxʼaqaʼm laʼ bʼen ekʼul tu amlikaʼ tiʼ vekotxʼt evatz. Echetz laʼ kuxh chiibʼ ex s-tiʼ, atz laʼ txuqʼtxun ex.#2 Kroonikas 36.16; Vibʼanoʼm inqʼa Apoostol 7.52
Uvaʼs ibʼant quBʼaal Jesuus eela inqʼa niman tetz tuchʼ tatin u atzʼam
13Echetz atoq etxumbʼal tiʼ ikʼutxhux inqʼa bʼaʼnla txumbʼal xoʼl inqʼa xaol, inqʼa yeʼ nik qeon in vatz u txʼavaʼ, eche tatin u atzʼam. Tan bʼaʼn u atzʼam oq uvaʼ at vichiʼl. Pet oq laʼ motxeʼl vichiʼl, tul kametz koq vet laʼ ulbʼel itxhej vichiʼl inpaqte. Pet aʼetz laʼ ulbʼel vet u atzʼam uvaʼ laʼ kʼonil vet el t-nikʼa bʼey. Tul jaʼl kuxh laʼ pal tzeqʼon veteʼ. Echetz uvaʼe laʼ ibʼan quBʼaal Tiuxh te inqʼa xaol, inqʼa yeʼ laʼ kʼutxhun u bʼaʼnla txumbʼal xoʼl inqʼa imol.{*}#5.13 Eche u yol u atzʼam, tan aʼ nikich ibʼan inqʼa tij imam Israeel eela tuchʼ u txumbʼal. Oqetz yeʼl tatzʼmil, tul: —Aʼetze yannaʼq iviʼ, atz yeʼl itxumbʼal, —chichichaqe. Xaʼtetze aʼ tiqʼo tzaan quBʼaal Jesuus u atzʼam tiʼ ibʼant eela tuchʼ inqʼa niman tetz. Tan jaʼl inqʼa niman tetz uvaʼ at itxumbʼal tiʼ ibʼen s-niman tetz Jesuus, tul aʼetz inqʼae at itxumbʼal s-bʼaʼn. Atz aʼ inqʼae laʼ txiqun vibʼey inqʼa imol, inqʼa yeʼ ootzaqin tetz u bʼey. Tan jaʼl inqʼa yeʼl itxumbʼal tiʼ inimal quBʼaal Jesuus, tul aʼetz inqʼae, yeʼl itxumbʼal. Aʼetz nik ibʼan eela tuchʼ inqʼa xaol uvaʼ yeʼl vet tatzʼmil, atz qat itzʼeql vet vichiil.
Uvaʼs ibʼant quBʼaal Jesuus eela inqʼa niman tetz tuchʼ tatin u txiqubʼal
14Atz echatxh laʼ ekʼutxht ibʼanax u bʼaʼn xoʼl inqʼa xaol vatz u txʼavaʼ, inqʼa yeʼ nik qeon in, eche u xamal uvaʼ nik itxiquneʼ. Tul echatxh ebʼan tiʼ ikʼutxhux u bʼaʼn, eche tatin invaʼq u tenam uvaʼ een atil jaʼ viʼ invaʼq vitz uvaʼ yeʼxhkam invaʼq laʼ muqun tilixeʼ.{*}#5.14 Eche u yol tiʼ u txiqubʼal uvaʼ nik tal tzitza, tan aʼ nik tal tiʼ inqʼa niman tetz Jesuus uvaʼ, aʼ u bʼaʼnla txumbʼal laʼ motx ikʼutxh vatz jolt inqʼa xaol uvaʼ yeʼ ootzaqin tetz viyolbʼal quBʼaal Tiuxh. Atz aʼ laʼ ikʼutxhe uvaʼ kam laʼ tulbʼe inqʼa xaol taqʼbʼ kʼatz quBʼaal Tiuxh, eche uvaʼ nik itxiqut invaʼq xaol ibʼey s-aqʼbʼal tiʼ taqʼbʼ tal uvaʼ kʼaqel taʼn. 15Tan bʼane laʼ koq matxax invaʼq txiqubʼal, tul een laʼ bʼen oksalik ok jaqʼ invaʼq kaaxha tiʼ itxiquneʼ. Pet een laʼ bʼen aqʼaxik jaʼ t-invaʼq u atibʼal uvaʼ niim at jaʼ tiʼ itxiqul jankʼal inqʼa at tuul u otzotz. 16Tul ech uvaʼe ebʼan tiʼ ikʼutxhux u bʼaʼn vatz inqʼa xaol. Tan ajt laʼ til inqʼa xaol u bʼaʼn uvaʼ laʼ motx ebʼan s-vatz, tul laʼ motx toksa vet iqʼij u quBʼaal Tiuxh uvaʼ tu amlikaʼ.#1 Luʼ 2.12
Uvaʼs toksat quBʼaal Jesuus iqʼij inqʼa ibʼekʼbʼal quBʼaal Tiuxh
17Poro yeʼ etitzʼa uvaʼ, aʼ ul veesa iqʼij inqʼa ibʼekʼbʼal quBʼaal Tiuxh uvaʼ itzʼibʼa ka Moisees. Atz jitoq aʼ ul veesa iqʼij inqʼa yol, inqʼa tzʼibʼamal ka taʼn inqʼa qʼexsanich tetz viyol quBʼaal Tiuxh. Yeʼxhkam invaʼq ul veesa iqʼij, pet aʼ ulk in tiʼ itzoqpisaleʼ.{*}#5.17 ¿Kam s-tiʼil nik tal quBʼaal Jesuus uvaʼ aʼ ul itzoqpisa quBʼaal Jesuus inqʼa bʼekʼbʼal uvaʼ itzʼibʼa ka Moisees? Bʼaxa tzij, aʼxh bʼenk quBʼaal Jesuus tiʼ kam inqʼa bʼekʼbʼal uvaʼ itzʼibʼa ka Moisees. Tul aʼ uvaʼe, ibʼan quBʼaal Jesuus. Atz vaʼte, uvaʼ jit kuxh taʼn quBʼaal Jesuus niman s-junal. Pet echatxh nikich itxhus quBʼaal Jesuuse te inqʼa nikich motx itxhus tibʼ s-kʼatza uvaʼ tetxhal laʼich motx inima. Atz vaʼte, aʼ nik tal quBʼaal Jesuus inpaqte uvaʼ, aʼ quBʼaal Jesuus ul jupun iviʼ taqʼax inqʼa oya vatz Tiuxh. Tan aʼ inqʼa txoo nikich itzʼeʼsal s-naʼya tiʼ ikuyux inqʼa xaol. Poro aʼ kuxh nikich ibʼan inqʼa txoo vikuyux vipaʼv inqʼa xaol tuulbʼal uvaʼs nikich itxʼebʼex tul quBʼaal Jesuus. Pet jit tira nikich koq isotzsa el vipaʼv inqʼa xaol. Petetz koq vet uvaʼ ibʼan quBʼaal Jesuus, tan aʼ vet quBʼaal Jesuus ul bʼanon ivatzil inqʼa txoo tiʼ ikuyux isotzsal vipaʼv inqʼa xaol, eche uvaʼ nik tal t-Evreeos 10.1-14. 18Tan toq val sete uvaʼ mij invaʼtoʼq inqʼa ibʼekʼbʼal quBʼaal Tiuxh uvaʼ tzʼibʼamal ka uvaʼ yeʼ koq laʼ bʼen elaʼpunoq kʼuxh kamxh laʼ pal vatz u txʼavaʼ, atz vatz u amlikaʼ. Pet tetxhal kuxh laʼ bʼen elaʼpunoq s-kaqaayil.#Luk 16.17 19Echetz jaʼl u xaol uvaʼ yeʼ laʼ niman invaʼq inqʼa ibʼekʼbʼal quBʼaal Tiuxh, tul yeʼxhkam kuxh vet itxaʼk s-vatz, tul aʼetz u xaole uvaʼ yeʼxh jankʼal tiqleʼm laʼ ibʼan vatz quBʼaal Tiuxh tal uvaʼ nik ibʼanvat quBʼaal Tiuxh iqʼesalil, u quBʼaal Tiuxh uvaʼ tu amlikaʼ. Tul yeʼxhatetz jankʼal tiqleʼm inqʼa xaol uvaʼ laʼ motx itxhus txha vet tiʼ yeʼ inimal inqʼa bʼekʼbʼal.
Pet jaʼl u xaol laʼ niman inqʼa ibʼekʼbʼal quBʼaal Tiuxh, atz laʼ itxhus xoʼl jolt inqʼa xaol, aʼetz u xaole uvaʼ sibʼ tiqleʼm laʼ ibʼan vatz quBʼaal Tiuxh, tal uvaʼ nik ibʼanvat quBʼaal Tiuxh iqʼesalil. 20Tul toq val sete uvaʼ aʼxh enima inqʼa ibʼekʼbʼal quBʼaal Tiuxh viʼ uvaʼ nik inima inqʼa fariseeo, atz viʼ inqʼa nik inima inqʼa nik txhusun inqʼa bʼekʼbʼal xoʼl inqʼa qumol s-tijaq imam Israeel. Tan oqetz ech laʼ ebʼan vet, eche uvaʼ nik ibʼan inqʼa xaol inqʼae, tul yeʼletz etokebʼal tiʼ etatin tal uvaʼ nik ibʼanvat quBʼaal Tiuxh iqʼesalil, u quBʼaal Tiuxh uvaʼ t-amlikaʼ.
Uvaʼs itxhusun quBʼaal Jesuus tiʼ yeʼ ibʼanax u kʼaʼnal
Luk 12.57-59
21Abʼimal etaʼn uvaʼ ech val u bʼekʼbʼal alel s-naʼya te inqʼa kʼuy qumam s-eche: «Yeʼ laʼ yatzʼon axh,» chiche. Tan jaʼl uvaʼ laʼ yatzʼon vimol, tul tetxhal kuxh laʼ aqʼax jaʼp u yol s-tiibʼa taʼn u aqʼol kuʼ yol tinuqul.#Eeksodo 20.13; Deuteronoomio 5.17
22Pet toq val sete, jaʼl uvaʼ laʼ lakp ikʼaʼnal te vimol, tul tetxhal kuxh laʼ aqʼax jaʼp u yol s-tiibʼa taʼn quBʼaal Tiuxh. Atz echat kuxhte tiʼ u xaol uvaʼ ech laʼ tal te imol s-eche: «¡Bʼokkin!» chaqe, tul tetxhaletz kuxh laʼ jaʼp u yol s-tiibʼa taʼn inqʼa aqʼolaq kuʼ yol tinuqul. Atzoq ech laʼ tal te imol s-eche: «¡Tira yeʼl atxumbʼal!» chaqe, tul aʼetz uvaʼe, aʼ vet u xamal uvaʼ sebʼt toybʼeʼ nik itxʼebʼon s-tiʼ taʼn quBʼaal Tiuxh.
23Echetz oq iqʼomal invaʼq oya etaʼn tiʼ taqʼax ka vatz quBʼaal Tiuxh viʼ u natxhkʼuulabʼal, tal uvaʼ nik tzʼeʼk inqʼa oya, tul oqetz tzitzi laʼ ulk sekʼuul uvaʼ at etxhʼaʼo tuchʼ invaʼq emol, 24tul aʼetz laʼ ebʼana uvaʼ nal kuxh laʼ etaqʼ ka u oya vatz u natxhkʼuulabʼal.{*}#5.24 ¿Kam nik elkaʼp u yol uvaʼ: —Laʼ etaqʼ ka u oya vatz u natxhkʼuulabʼal, —chiche? Aʼetz nik elkaʼpun tiʼ invaʼq u xaol uvaʼ nikich ex tzʼeʼsan ok oya viʼ u natxhkʼuulabʼal vatz Tiuxh tu tostiuxh tu tenam Jerusaleen. Aʼ nik tal uvaʼ laʼ kuxh taqʼ ka u xaol u oya vatz u natxhkʼuulabʼal, oq yeʼnaq ibʼaneʼt tutxh tatin tuchʼ vimol uvaʼ kantxhaq tatin s-tuchʼ nik inatxheʼ. Pet bʼaxa tzij maʼt ibʼant vet tutxh u tatin tuchʼ vimol uvaʼ kantxhaq tatin s-tuchʼ, yaʼne xamtel laʼ qʼaʼv tiʼ itzʼeʼsal u oya uvaʼ laʼ taqʼ ka vatz u natxhkʼuulabʼal.
Tul bʼaxa tzij laʼ bʼen vet ex tiʼ ibʼanax tutxh vetatin tuchʼ vemol. Yaʼne laʼ qʼaʼv ex inpaqte kʼatz u oya uvaʼ maʼt etaqʼt ka. Tul laʼ etaqʼ vet te quBʼaal Tiuxh.
25Poro nal kuxh laʼ ebʼan tutxh vetatin tuchʼ invaʼq vemol uvaʼ atoʼk exoʼl s-tuchʼ, tuulbʼal uvaʼs ant atil ex t-bʼey, atz uvaʼ yeʼnaq aqʼbʼoq ex vatz u aqʼol kuʼ yol tinuqul. Tan oqetz yeʼ laʼ ebʼan tutxh vetatin tuchʼ vemol, tul antxh vemol laʼ oksan ex vatz u aqʼol kuʼ yol tinuqul. Yaʼne aʼ vet u aqʼol kuʼ yol tinuqul laʼ oksan bʼen ex tiqʼabʼ pol. Tul yekl vet ex t-tzeʼ. 26Tul toq val sete uvaʼ yeʼl ex laʼ txhaqpul el ex oq uvaʼ yeʼ laʼ etxhoj jankʼal uvaʼ laʼ tabʼi u aqʼol kuʼ yol tinuqul sete. Pet laʼ nal txhoon ka ex tuchʼ jankʼal vatz epuaq uvaʼ at sexeʼ, yaʼne laʼ txhaqpul vet el ex.
Uvaʼs itxhusun quBʼaal Jesuus tiʼ yeʼ ibʼanax u yansa ibʼ tuchʼ vaʼt xaol uvaʼ jit ikʼulel tibʼ s-tuchʼ
27Abʼimal invaʼt u bʼekʼbʼal etaʼn uvaʼ ech nik tal s-eche: «Yeʼ laʼ eyansa etibʼ tuchʼ vaʼt xaol uvaʼ jit ekʼulel etibʼ s-tuchʼ,» chiche.#Eeksodo 20.14
28Pet toq val sete, jaʼl invaʼq u vinaq uvaʼ laʼ bʼen ivatz tiʼ invaʼq u ixoq tiʼ tatxhvat tilt tibʼ s-tuchʼ, tul tuchʼ kuxh u tatxhvat u vinaq u ixoq t-titzʼabʼal, tul iyansaletz vet tibʼe tuchʼ u ixoq uvaʼ qat tatxhva. 29Echetz oq nik epaʼvin taʼn u bʼaqʼ evatz, uvaʼ tesebʼal, tul taʼnxh bʼaʼn uvaʼ maqvaq etibʼ tiʼ isaqileʼ. Tan aʼl bʼaʼn uvaʼ tira laʼ eteesa el oq uvaʼ nik taqʼ bʼen ex tu paʼv nik enatxheʼ. Tan bʼaʼn kuxhtuʼ kʼuxh paqʼit kuxh bʼaqʼ evatz laʼ aqʼbʼ ex tu amlikaʼ, viʼ uvaʼ, ex sekaqaayil tuchʼ kaʼvaʼl u bʼaqʼ evatz laʼ bʼen ex t-xamal.
30Atzoq nik epaʼvin taʼn veqʼabʼ, uvaʼ tesebʼal, tul taʼnxh bʼaʼn uvaʼ maqvaq etibʼ. Tul yeʼ paʼvin vet ex. Tan aʼl bʼaʼn uvaʼ tira laʼ eteesa el oq uvaʼ nik taqʼ bʼen ex tu paʼv nik enatxheʼ. Tan bʼaʼn kuxhtuʼ kʼuxh paqʼit kuxh eqʼabʼ s-laʼ etaqʼbʼ t-amlikaʼ, viʼ uvaʼ, ex sekaqaayil tuchʼ kaʼvaʼl veqʼabʼ laʼ bʼen ex t-xamal.
Uvaʼs itxhusun quBʼaal Jesuus tiʼ yeʼ itukit bʼen u vinaq u tixqel
31Atz abʼimalat invaʼt u bʼekʼbʼal etaʼn uvaʼ ech nik tal s-eche: «Jaʼl invaʼq u vinaq laʼ tukin bʼen u tixqel, tul tetxhal kuxh laʼ taqʼ vaʼl uʼ te u tixqel, tal uvaʼ laʼ talvat uvaʼ qat ijatxl vet tibʼ s-tuchʼ,» chiche.#Deuteronoomio 24.1-4 32Pet toq val sete uvaʼ yeʼ laʼ utxhi laʼ ituki bʼen u vinaq u tixqel. Pet ech kuxh laʼ tutxhe oq aʼ u ixoq laʼ iyansa tibʼ tuchʼ vaʼt vinaq. Tan oq loqʼs kuxh laʼ ituki bʼen u vinaq u tixqel, tul iqʼaqʼaletz vet u vinaq laʼ paʼvin u ixoq oq uvaʼ laʼ tiqʼo vet invaʼt vinaq. Echatetz kuxh u vinaqe uvaʼ laʼ iqʼon vet u ixoq, tan paʼvatetz laʼ ibʼan veteʼ.
Uvaʼs itxhusun quBʼaal Jesuus, tiʼ uvaʼ yeʼxhkam kuxh vaʼq laʼ tiqʼo tzaan u xaol tiʼ vaʼq iyol uvaʼ, aʼ kuxh isaʼ laʼ inimaleʼ
33Tul abʼimalat etaʼn uvaʼ ech vaʼt u bʼekʼbʼal alel ka te inqʼa kʼuy qumam s-naʼya s-eche: «Yeʼ laʼ etzʼeq tzij tiʼ talax vaʼq eyol sinvatz. Pet tetxhal laʼ enima veyol uvaʼ laʼ etal sinvatz,» chiche.#Nuumeros 30.2; Deuteronoomio 23.21-23; Leviitiko 19.12
34Pet toq val sete uvaʼ yeʼl ibʼij invaʼq kam laʼ etoksa tzaan s-tuul tiʼ inimal veyol. Jitoq u amlikaʼ laʼ etoksa tzaan s-tuul, tan aʼ vikʼuqeʼvbʼal u quBʼaal Tiuxhe tal uvaʼ nik ibʼanvat iqʼesalil tiibʼa inqʼa xaol.#Isaiias 66.1 35Tul jitoq u txʼavaʼ laʼ etoksa tzaan s-tuul, tan aʼ u kuʼebʼ toq quBʼaal Tiuxhe. Atz jitoq ibʼij u tenam Jerusaleen laʼ etiqʼo tzaan tiʼ inimal veyol, tan aʼ u tatibʼal quBʼaal Tiuxhe, u mam iqʼesal.#Saalmo 48.1-2 36Atz jitoq laʼ etoksa tzaan u xiʼl eviʼ s-tuul tiʼ enimat veyol, tan bʼane at koq teqʼabʼ uvaʼ tira laʼ etaqʼ bʼen invaʼq u xiʼl eviʼ s-qʼeq oq maʼt ibʼen vet s-saq. Atz oq qʼeq u xiʼl eviʼ, tul at koq teqʼabʼ uvaʼ tira laʼ etaqʼ bʼen s-saq. 37Pet taʼn kuxh laʼ ebʼana uvaʼ: «Laʼi,» chaq ex. Tul laʼi. Atz oq: «Yeʼle,» chaq ex, tul yeʼletzeʼe. Tan oq laʼ kuxh etoksa vet tzaan invaʼtoʼq u yol s-tuul, tul aʼetz telaʼpun uvaʼ, aʼ tzajnaʼql u yaabʼla txumbʼal kʼatz Satanaas uvaʼ nik etaleʼ.{*}#5.37 Aʼ nik tal inqʼa versiikulo inqʼaa, uvaʼ mij bʼeeq laʼ tiqʼo tzaan inqʼa xaol vibʼij quBʼaal Tiuxh tiʼ inimat invaʼq viyol uvaʼ laʼ taltzii te invaʼtoʼq imol. Atz jitoq kuxh invaʼq kam laʼ tiqʼo tzaan tiʼ viyol. Pet bʼaʼn uvaʼ taʼn kuxh laʼ tal u xaol kam vaʼq uvaʼ laʼ ibʼana, tul laʼetz ibʼana. Atzoq laʼ tal u xaol uvaʼ yeʼ laʼ ibʼan u kam, tul yeʼletz laʼ ibʼana. Echetz kuxh uvaʼe laʼ tala, pet jit tetxhal koq kuxh laʼ tiqʼo tzaan vaʼq kam tiʼ talt viyol.
Uvaʼs itxhusun quBʼaal Jesuus te inqʼa niman tetz, tiʼ uvaʼ atoq taanima tiʼ kaqaayil inqʼa xaol, kʼuxh nik itxhiʼkʼuulal taʼn
Luk 6.27-38
38Tul abʼimalat invaʼt u bʼekʼbʼal etaʼn uvaʼ ech nik tal s-eche: «Oq laʼ itzottisa u xaol paqʼoq bʼaqʼ avatz, tul echatxh laʼ atzottisat paqʼil bʼaqʼ ivatze. Atz oq laʼ iqʼos axh invaʼq u xoal, tul laʼ teesa avej, tul echatxh laʼ eesat teje,» chiche.#Eeksodo 21.24
39Pet toqetz val sete uvaʼ yeʼ laʼ isaʼa laʼ ekʼulela u xaol uvaʼ laʼ bʼanon txhiʼtxhoil sete. Pet oq jaʼl invaʼq xaol laʼ paqʼon txala etziʼ, tesebʼal, tul yeʼl ichʼexel laʼ etaqʼa. Pet aʼl laʼ esutxhqʼit ok inpaqʼite. 40Atz oq jaʼl invaʼq xaol laʼ isaʼ ixeʼt sekʼatza tiʼ imaax vekamiʼs, tul laʼ etaqʼ s-te, atz aʼl laʼ etaqʼt bʼen veqinkin txhas etoksaʼm s-tiʼ. 41Atz oq laʼ iyaʼlu ex invaʼq xaol tiʼ tiqal bʼen vaʼq iqatz tuulbʼal nikʼaʼmoq oora, tul aʼl tira vaʼl oora laʼ etiqa bʼen. 42Oqetz jaʼl invaʼq laʼ jaqon invaʼq kam sete, tul aqʼtaq s-te. Atz oq kam invaʼq laʼ tabʼi vemol sete s-kʼam, tul yeʼ laʼ ebʼan etxhiʼtxhoil s-te. Pet laʼ etaqʼa.
Uvaʼs itxhusun quBʼaal Jesuus, tiʼ uvaʼ laʼ isaʼ inqʼa niman tetz Jesuus inqʼa xaol, inqʼa nik itxhiʼan s-tiʼ
43Tan abʼimal invaʼt u bʼekʼbʼal etaʼn uvaʼ ech nik tal s-eche: «Saʼvaq inqʼa emol s-tijaq imam Israeel. Pet txhiʼanoq ex tiʼ inqʼa jit tij imam Israeel,» chiche.#Leviitiko 19.18
44Pet toq val sete: Saʼvaq inqʼa xaol, inqʼa nik itxhiʼan setiʼ kʼuxh jit tijaq imam Israeel. [Tul alvaq bʼaʼnla txhaq yol tiʼ inqʼa xaol uvaʼ nik alon yeʼbʼaʼn setiʼ. Atz bʼanvaq u bʼaʼn te inqʼa xaol uvaʼ nik iyan ivatz sete. Tul natxhvaq Tiuxh tiʼ inqʼa nik bʼanon u yeʼbʼaʼn sete, atz inqʼa yeʼ kuxh nik ikaj setiʼ, tiʼ ekʼaxbʼisaleʼ.]
45Oqetz ech laʼ ebʼane, tul echetz laʼ ekʼutxht vete uvaʼ, ex vet kʼaol imeʼal u quBʼaal Tiuxh uvaʼ tu amlikaʼ. Tan vaʼl kuxh nik taqʼt quBʼaal Tiuxh u qʼij tiibʼa inqʼa xaol, uvaʼ nik bʼanon u bʼaʼn, tuchʼ inqʼa nik bʼanon u yeʼbʼaʼn. Atz vaʼlat kuxh nik taqʼt quBʼaal Tiuxh u jabʼal tiibʼa inqʼa xaol uvaʼ nik bʼanon u jik tuchʼ inqʼa jit aʼ u jik nik ibʼaneʼ. 46Tan oq taʼn kuxh inqʼa emol s-tijaq imam Israeelil at etaanima s-tiʼ, inqʼa at taanima setiʼ, tul yeʼletz invaʼq etxʼaqaʼm laʼ taqʼ quBʼaal Tiuxh s-tiʼ. Pet taʼn kuxh etxʼaqaʼm u toksat inqʼa emol eqʼij. Tan echat kuxh nik ibʼan inqʼa molol tetz puaqe s-vatzaqil. 47Atzoq taʼn kuxh nik jaʼk evatz te inqʼa emol s-tijaq imam Israeelil, tul yeʼletz invaʼq jalbʼal etibʼe tuchʼ inqʼa xaol, inqʼa jit tij imam Israeel, inqʼa yeʼ nik qeon quBʼaal Tiuxh. Tan echatetz kuxh uvaʼe nik motx ibʼan inqʼa xaol inqʼae s-vatzaq. 48Pet jikxh ex ebʼana, tul aʼxh u bʼaʼn ebʼan te inqʼa xaol, eche u quBʼaal Tiuxh uvaʼ tu amlikaʼ.
S'ha seleccionat:
Tio 5: ixlC
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2016, Wycliffe Bible Translators, Inc. All rights reserved.