Sdaɗi Apostelai 3
3
Zûûli na wiini ɗif n'ezini gaini mri
1Peter gaini Yohana e hili amai warni tempel war ler na wiini siiwa, a dara a muɗa, sah hu na wiini kuskoi. 2E niviɗi ɗai e ɗa libisi ɗif ktai na a wa ɗa ezini gaini mri ca, na mefeŋ paŋ e ɗa kiŋ mini magalani tempel n'e yikiŋ ɓa: Juv gara ɗa taaha taaha aŋ siiwa tiɗi nagai n'e zini piɗi na hurofai. 3Won hlai n'a tala Peter gaini Yohana e ɗa niyi amlai warni Tempel sek ɗa, a zilbiɗi buri e sini wala ktai na a zina pini agwi. 4Peter a mula arni sini gaini Yohana lai a muɗa: Mulasi arku siyi. 5Ni a mula arni siɗi war hiini na ɓa aga a nava wala tiɗi par. 6Amma Peter a muɗa: Arzaŋ ta kaalai, or ta kaalai, amma wala n'aŋ ta ɗa mu dara mu suŋku war yikini Yesu Kristu na Nazaret par, faka amai, hala. 7A yimaŋsi gaiɗi tini na wus a ɗiyaŋ amai, won hlai ni tizaw, ezini gaini huhunaini-ezini a nava gdaŋ. 8Ɗif a fakasi azumai par kot, a ɗiya amai zaw, a tika pini aŋ hala, a niya amlai warni Tempel gaiɗi aŋ hili blaŋ, a pra lai, a kola Alaw lai. 9Ɗai paŋ e tiliŋ a na hala, a na kola Alaw lai. 10Ɗai e siɗiŋ ya, a ni na a na ka azumai mini magalani Tempel n'e yikiŋ ɓa juf gara ɗa dam aŋ siiwa tiɗi nagai n'e zini piɗi ɗai na hurofai ɗa. Ɗai e bindi hiyak, e miliŋi burini wala na a za ɗa.
Ɓikini-seŋ na wiini Peter n'amlai warni tempel
11A dara a ɓurwa edi gaini Peter gaini Yohana kir kai, ɗai paŋ e bindi hiyak, e liwisi siɗi sek sek pini balak n'e yikiŋ ɓa, balak na wiini Salmun. 12Won hlai na tala hanɗa, Peter a miɗiɗi wiiɗi ɗai maini nɵa: Tiki ɗai na Izrayel, ki bindi hiyak buri hanɗa buri maɗa? Ki tiliyi maini na ɓa mi fiki ɗif hanɗa amai aŋ hili mi ɗi tiyi gaini gdaŋyi, gaini jreyi ɵa lai ɗa buri maɗa? 13Alaw na wiini Abraham, Alaw na wiini Isaak, Alaw na wiini Yakob, -Alaw na wiiɗi tamaimu, - a sitini abai wiini Yesu na ɵeŋni, na tiki ki siŋ edi na ki miɗi edi midini wuzani Pilatus ɓa ki siɗiŋ kai, paŋ ktai a tala arni Pilatus pɗem ɓa a ɵaŋ a ɵi. 14Tiki ɗa, ki bili edi sini na Sɗik, na Jre, amma ki zilbi ɓa e ɵikisi ɗa a ɗif zi ɵiɓi belek ɗa. 15Ki fiɗi Epini suŋfa ɗa edi su, Alaw a ɵiyaŋsi amai arbaɗi zi mri par, tiyi mi ɗi zaidakaini. 16Pini yimi na war yikini, yikini ɗa a bunda ɗif na tiki ki tiliŋ, ki sɗiŋ lai na ɗa gdaŋ. A sini zûûli na marwai hanɗa a yimi, yimi na war Yesu ɗa.
17Tiyana ɗa, tawalakaya, mu sɗa ɓa, ki zi na ɗa war siɗi kai, maiɗi ɗaiki n'abakai nɵa lai, 18gaini hanɗa Alaw a va amai na ɗa a wala na a muɗasi edi miɗini avut par war miɗi ɗai na mini Alaw paŋ ɓa: Kristu na wiini aga a sɗa gir. 19Nɵa ki bindi payaiki gamai, ki bindisi arki gamai kapai tuwurki a sɗa aŋ girda edi. 20Kapai hlai na pɗem a sɗa aŋ halasi sini Epiɗ-ɗai par, a sɗa aŋ ɵinasi Kristu na a varaŋsi edi buriki, a dara a muɗa ɓa: Yesu. 21Ni n'Alaw a yimaŋ jaaɓama haa sini mefeŋ na wazagai n'Alaw a muɗa gaini war miɗi ɗai na mini Alaw na Sɗik na ɗipar a zizina war balamni. 22Musus a muɗa: EPIƊ-ƊAI Alaw na wiiki ɗa, aga a fakasi ɗif na mini Alaw na maya ɵa arbaɗi tawalakaiki par amai buriki, tiki aga ki ɵini pini war wala paŋ n'aga a miɗiŋki ɗa. 23Amma asiya ɗi paŋ n'aga a ɵina mini ɗif na mini Alaw hanɗa kai ɗa, aga e birgiŋ edi arbaɗi ɗaini par. 24Ɗai na mini Alaw paŋ sini Samuwel par haa siɗi nagai n'e hilisi asakal ni par, nagai e miɗi miɗini mefeŋ hanɗa, e miɗisi edi miɗini lai. 25Tiki ɗa ki ɗi aliɗi ɗai na mini Alaw, ki ɗi alini bonu n'Alaw a zaŋ gaiɗi tamaiki won hlai na a miɗini wiini Abraham ɓa: Pinzibaɗi ɗai na midiɗi yai paŋ aga e nivi ɓiki pini pinzibaku. 26Tiyana ɗa, Alaw a ɵinasi ɵeŋni na ɗa siki tiki avut, a ɵinaŋsi buri a ɓikiki, a bindikisi arki edi sini sdaki na meefeŋ par lai.
S'ha seleccionat:
Sdaɗi Apostelai 3: MUSGUM
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964