Pi zi tiki 7
7
Nowa a niya war hulum n'abai gaiɗi pakataini paŋ
1EPIƊ-ƊAI a miɗini wiini Nowa: Niya warni hulum, tuku gaini dalamku paŋ, buri ku tuku ktai na mu tuluku wuzani ara jre ɗikat arbaɗi pinziba hanɗa. 2Arbani wazagai n'ezini puɗu paŋ na hilu ɗa aga ku mula jaɓ jaɓ muguzak, muni gaini wus, muni gaini wus, pini na haharai ku mula jaɓ, wus ktai na muni ktai lai. 3Wala zi ɗufli n'arbani hlai n'amai nɵa lai, jaɓ jaɓ muguzak, muni gaini wus, muni gaini wus, kapai pinzibani a sisiɗa midini afti paŋ. 4Buri asakalni mefeŋ muguzak par aga mu hina faŋ a ɵa midini afti hanɗa haa mefeŋ doogo doogo puɗu, girvudi gaini duvuk paŋ, aga mu vada edi midini afti par wazagai na mu zaŋ paŋ. 5Nowa a za kal kal maini n'EPIƊ-ƊAI a gdaŋ ɗa nɵa.
Yem n'a biti yai
6Won hlai na yem n'abai a cosi midini afti sek ɗa, Nowa buzani miya ɵaara.
7Nowa a niya warni hulum n'abai, gaiɗi alini, gaiɗi munini gaiɗi falakaiɗi alini lai, burini yem n'abai hanɗa. 8Wazagai n'ezini puɗu puɗu na hilu gaini na haharai, wala zi ɗufli gaini wazagai n'a hidila midini afti ɗa paŋ, 9jaɓ jaɓ, wus gaiɗi muni, wus gaiɗi muni a halasi sini Nowa war hulum, maini Alaw a miɗiŋni wiini Nowa ɗa nɵa. 10Asakal na mefeŋ muguzak a vuga li, yem a rɓa afti paŋ.
11War buza n'ag'aŋ miya ɵaara na wiini Nowa, war mefeŋ n'ag'aŋ doogo pi muguzak na wiini tile n'ag'aŋ sulu, mefeŋ ni ɗa, mini hlaini yem n'azumai pini afti par paŋ a haɗasi edi, mini hlai n'amai par a malasi edi. 12Faŋ a ɵasi azumai midini afti mefeŋ doogo doogo puɗu girvudi gaini duvuk paŋ.
13War mefeŋ ni dama Nowa a niya warni Hulum gaiɗi alini, Sem, Kam gaini Yafet lai munini Nowa gaiɗi falakaiɗi aliɗi na hu lai. 14Pinzibani wazagai n'ezini puɗu puɗu na basga gaini n'aha lai, pinzibani wazagai n'a hidila midini afti gaini pinzibani wala ɗufli paŋ, gaini wala na baada graŋni paŋ lai. 15Wazagai zi rgi na gaini suŋfa warni paŋ a halasi sini Nowa warni hulum sulu sulu. 16Wazagai paŋ n'a niya warni hulum a na wus gaiɗi muni, wus gaiɗi muni, e niyi maini Alaw a miɗiŋni wiini Nowa ɗa nɵa. EPIƊ-ƊAI a dogo mini hlai amai miɗi duk. 17Yem n'abai a fana midini afti mefeŋ doogo doogo puɗu, yem a riya amai abai haa a tika hulum amai a fana amai midini. 18Yem a tika amai haa, a za abai midini afti, hulum n'abai a fana amai midini yem. 19Yem a riya amai wuzani sek sek midini afti haa huwaŋai na mogo kai gara n'a suwa paŋ a rɓa paŋ, 20yem a suwa huwaŋai amai haa metir muguzak, huwaŋai paŋ a rɓa paŋ, 21wazagai na karni na midini afti paŋ: Wala zi ɗufli, wazagai n'ezini puɗu puɗu n'aha, wazagai na buza gaini wazagai n'agogoi n'a na midini afti, gaiɗi ɗai lai, a mra paŋ.
22Wazagai n'a suŋfa gaini merfeŋni n'a na ka midini afti na huleŋ paŋ, a mra kap. 23EPIƊ-ƊAI a vada wazagai na karni na midini afti paŋ maini nɵa, ɗai gaini farai, gaini wazagai n'agogoi, wazagai zi ɗufli n'arbani hlai n'amai, a vadaŋ edi paŋ, a hina sai a Nowa gaiɗi nagai na gaini war hulum n'abai ɗa tar.
Nowa gaiɗi pakataini e niyi edi war hulum n'abai ɗa par
24Yem n'a tika amai ɗa a za mefeŋ miya gaini doogo doogo ɵim, midiɗi yai.
S'ha seleccionat:
Pi zi tiki 7: MUSGUM
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964