Yohana 5
5
Zûûli n'a za ɵimaɗi Avai
1Asakal hanɗa fet na wiiɗi Yudiyakai te za, Yesu a hala amai a Yeruzalem. 2Amma a Yeruzalem gobi ɵimaɗi magala na wiini adumai avai ktai te na n'e yikiti war meme na wiiɗi Hebrekai ɓa: Betzata, balak n'abai kai a na ɵim. 3Azumai pini balak n'abakai hanɗa, zi veglek e ɗa, na malvanai, na daŋlaŋai, na höyökai e ɗa. 4Hlai zamai ɗa, ɗif zi ɵeŋ na war fuŋ-n'Alaw par a niyasi azumai warɗi avai, a durguza yem ɗa amai, ɗif n'a niya li asakalni dûrgûzini yem ɗa, a zuula, koo ɓa aŋ sini a veglek na wata ɗi. 5Ɗif ktai a na fu woni veglek, a buza war veglekni buza doogo doogo- hu-pi-miwis. 6Yesu a talaŋ waŋ, a sɗa ɓa aŋ won na buza yaw, a zilbaŋ a muɗa: Ku firiya ku nava zûûli ɗi? 7Ɗif zi veglek a waya seŋ a miɗini: Epiɗ-ɗai, ɗif ktai n'a tikaɗa agoɗom warɗi avai won hlai na yem a durguza li amai ɗa aŋ kai, won hlai na mu co ta ɗa, ktai a niya agoɗom li, ktai a niya agoɗom li. 8Yesu a miɗini: Faka amai, tika walaku zi feŋ, hala. 9Tizaw tar, ɗif a nava zûûli, a tika walani zi feŋ, a hala lai. Amma mefeŋ ni ɗa a mefeŋ Sabbat. 10Nɵa Yudiyakai e miɗini wiini ɗif n'a zuula ɓa: Girna ɗa a Sabbat, futi te sa buri ku luba walaku zi feŋ ɗa kai. 11A wiyiɗi seŋ a muɗa: Ni n'a zuulaŋa ɗa a muɗaŋa ɓa: Tika walaku zi feŋ, hala. 12E zilbiŋ e miɗi: Ɗif n'a muɗuku ɓa: Tika walaku zi feŋ, hala lai ɗa, asiya ɗa? 13Amma ni n'a zuula ɗa, a sɗa ni n'a zuulaŋ kai, buri Yesu a diila diila buri firiɗi ɗai e ɗi fu woni viya. 14Asakal hanɗa Yesu a navaŋ amlai warni tempel, a miɗini: Pɗem, ku nava zûûli ya, ku za tuwur kir kai, kapai wala na meefeŋ n'a suwa hanɗa a za suku kai. 15Ɗif a hala a miɗiɗi wiiɗi Yudiyakai ɓa a zuulaŋ ɗa a Yesu. 16Nɵa, Yudiyakai e zini gir wiini Yesu buri a za hanɗa war Sabbat.
17Yesu a waya seŋ miɗiɗi: Apa a na za sda haa tiyana, ta lai mu za sda. 18Buri hanɗa, Yudiyakai e piyiŋ a suwa pra buri e fiɗiŋ edi. Buri sɗa n'a zaŋ war Sabbat ɗa kiini kai, amma buri a yika sini ba, Alaw ɗa a Epini mal, a kata sini gaini Alaw.
Spakni Ahini Alaw
19Yesu a waya seŋ a midiɗi: Jre, jre, mu miɗiki, Ahi a kiɗa a za wala gaini midini dama kai, sai a n'a talaŋ sini Epini par, wala na Api a zaŋ ɗa, Ahi a zaŋ kal kal ɵa lai. 20Buri Api a marmaini Ahi, a siŋkini wazagai n'abakai a suwa pra, kapai tiki ki bindi hiyak. 21Buri maini Api a ɵiyiɗi zi mri amai war mri par a bindiɗi karɗi, nɵa Ahi lai a sa suŋfa wiini asiya ɗi paŋ pini dirini. 22Pra, Api a ɗûkûliti sariya midini ɗif kai, a sini sariya war tini ahi. 23Kapai ɗai paŋ e sini hormo wiini Ahi maini n'e siŋni wiini Api ɗa nɵa, ni n'a sini hormo wiini Ahi kai ɗa, a sini hormo wiini Api n'a ɵinaŋsi ɗa kaalai.
24Jre, jre, mu miɗiki Ni n'a ɵina seŋŋa, n'a yima warni ni n'a ɵinaŋasi lai, suŋfa n'a vada kai a wiini. Aga a niya warɗi sariya kai, a vuga war mri par sini suŋfa. 25Jre, jre mu miɗiki, hlai aga a halasi, a cosi ya lai, won hlai ni ɗai zi mri aga e ɵini wulani ahini Alaw, nagai n'e ɵini wulani li ɗa, aga e bindi karɗi. 26Buri maini Api suŋfa aŋ warni sini dama, nɵa lai a sini wiini Ahi buri aŋ nava suŋfa warni sini dama, 27a sini spak aŋ ɗûklûti sariya buri ɓa a Ahini ɗif. 28Ki bindi hiyak burini hanɗa kai, buri hlai aga a halasi, won hlai ni, nagai n'e ɗa warni waŋ ɗa paŋ aga e ɵini wulani. 29Aga e niyisi edi, nagai n'e zi pɗem e ɵiyi war suŋfa n'a vada kai, nagai n'e zi meefeŋ e ɵiyi amai warɗi sariya lai.
30Ta ɗa, mu za wala gaini mada dama kai, mu ɗûklûti sariya pini wala na mu ɵinaŋ ɗa, sariyaŋa te jre buri ɓa mu paya ɗa a diriŋa kai, amma a diri na wiini Ni n'a ɵinaŋasi ɗa.
Zaida na miɗini Ahi
31Na ɓa mu za zaida mada mu ta dama ɗa, zaidaŋa a jre kai. 32A za zaida mada ɗa a ɗif zamai, mu sɗa lai ɓa, zaidani n'a zaŋ mada ɗa a jre. 33Ki ɵini ɗai sini Yohana ki ɗi tiki, a za zaida miɗini jre lai. 34Amma ta ɗa, a za zaida mada ɗa a ɗif kai, amma mu muɗa hanɗa kapai tiki ki nivi kûri. 35Ni ɗa a na ka ɗa a lampa n'a ya, a za gaglai, amma tiki ki firiyi pini gaglai buri hlai n'agwi.
36Ta ɗa, zaida na mada ɗa abai a suwa na wiini Yohana ɗa, buri ɓa sɗa na Api a saŋa aŋ vaŋ amai ɗa, sɗa na mu na zaŋ hanɗa, a za zaida mada, a siŋkaŋa edi ɓa a ɵinaŋasi ɗa a Api. 37Api n'a ɵinaŋasi ɗa ni gaini midini dama a za zaida mada, ki ɵini wulani duk kai, ki tili wuzani arni duk kaalai. 38Seŋni a sumna warki kai buri ɓa ki yimi warni Ni n'a ɵinaŋsi ɗa kai. 39Tiki ki fifiki ɗû war hiini na ɓa aga ki nivi suŋfa n'a vada kai warni, paŋ ktai a za zaida mada ɗa a ɗû hanɗa lai. 40Tiki ki diri ki hilisi sa aŋ nivi suŋfa kai. 41-42Kol na wiya mu navaŋ siɗi ɗai par kai, mu siɗiki ya, tiki ɗa diri na wiini Alaw aŋ warki kai. 43Ta mu halasi war yikini Apa, amma tiki yimiŋa kai, na ɓa ɗif zamai a halasi war yikini ni dama, ɗif ni ɗa tiki aga ki yimiŋ siki. 44Ki siɗi aŋ yimi maɵa maɵa ɗa? Ki piyi ɗa a kol n'a halasi sini Alaw par kiini kai.
45Ki hiini ɓa ta aga mu pa seŋ midiki wuzani Apa ɗi ɗa, ki hiini nɵa kai. Ni n'aga a pa seŋ midiki ɗa a Musus na tiki ki tiki hiiniki paŋ miɗini ɗa. 46Buri ɓa ki yima yimi pini Musus ɗa, aga ki yimi pa lai, buri ɓa ni a ɗo ɗa mada. 47Amma na ɓa ki yimi pini ɗû na wiini kai ɗa, aga ki yimi pini na wiya ɗa maɵa maɵa ɗa?
S'ha seleccionat:
Yohana 5: MUSGUM
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964