John 10
10
Tipaachimuwin Chiskutamaachewin kaa miyeyihtaakusit kaa kanumaanishchaanishuwet kaa aayimuumaakanuut
1“Kuiskw chiwiihtamaatinaawaau, awen e chimutiskuut namui anite e ishkwaahtemuuniyich maanishchaanishikamikuyuu uhchi piihcheu. Aahchiiuh anite uhchi paastaahtawiyuu e wii piihchet. 2Ekw an anite e ishkwaahtemuuniyich maanishchaanishikamikuyuu kaa uhchi piihchet eukw uyuu umaanishchaanishuuiiniimuwaauh anichii maanishchaanishach. 3Aapahamaakuu maak aniyuu kaa kanuushkwaahtuweyich anit maanishchaanishikamikuhch. Aniyuu maak maanishchaanisha nisituhtamiyuu upehtaakusuwin iskutak tiyepwaataach wesh wiya aniyuuh umaanishchaanishim. Ekw maak piyechi wiiwiiyich ekw e ati nuushuushkaakut. 4Aniyuu maak e ati wiiwiihtahaat wiya niikaanihteu. Nuushuushkaakuu maak aniyuuh maanishchaanisha wesh nisituhtamiyuuh upehtaakusuwin. 5Kutak aweyuu namui chika uhchi nuushuushkuweuch anichii maanishchaanishach. Chika ushimeuch, wesh taapaa nisituhtamuweuch maaniteuh upehtaakusuwiniyuu.”
6Jesus chii wiihtamuweu uyuu chiskutamaacheu tipaachimuwiniyuu mikw maak namui uhchi nisituhtaakuu aniyuu taan kaa ishi aayimuutamuwaat.
7Ekw maak Jesus miin kaa itaat, “Kuiskw chiwiihtamaatinaawaau, niya eukw ishkwaahtem anite wehchi piihchetwaau kaye anite wehchi wiiwiitwaau anichii maanishchaanishach. 8Misiwe kutakach kaa takushihkwaau e wii wiiwiihtahaatwaau aniyuu maanishchaanisha eshkw ekaa uhchi takushinuuch chimutiskach wiyawaau. Mikw maak namui uhchi nituhtaakuuch wiyawaau aniyuuh maanishchaanisha. 9Niya eukw ishkwaahtem. An awen niya e ihtaauch kaa uhchi piihchet chika pimaachihuu. Taapwe chika wiihkuchihuu an awen kaye taapwe chika miyeyimuu. 10Chimutisk takushinuu mikw chechii kachemutit maak chechii nipahiiwet maak chechii waanachihiiwet. Niya maak wii nichii takushin chechii miiweyaan an pimaatisiiwin anit ekaa wiiskaat nuuhtepayihch chekwaan.”
11“Niya eukw maanishchaanishuiinuu kaa miyu kanuweyimaat umaanishchaanishimh. An awen kaa miyu kanuweyimaat umaanishchaanishimh chika pachishtinam upimaatisiiwin aniyuu umaanishchaanishimh chechii uhchi pimaachihuyich. 12Ekw an mikw kaa utaaskunaakanuut chechii kanuweyimaat aniyuu maanishchaanisha ekaa maak chihchiwe maanishchaanishuiinuut, ekaa tipiyeusiit aniyuu maanishchaanishah ushimuu iskutak wiyaapamaach mahiihkan e takushiniyich. Ekw aniyuuh mahiihkanh kuywaaskuhtutawaayich peyakw aniyuuh maanishchaanisha ekw e paahpiwepahiituyich e ushimuyich aniyuuh kutak maanishchaanisha. 13Ushimuu, wesh mikw chii utaaskunaakanuu. Namui chihchiwe aapateyimeu aniyuu maanishchaanisha. 14Niya eukw maanishchaanishuiinuu kaa miyu kanuweyimaat umaanishchaanishimh. Nichischeyimaauch nimaanishchaanishimach anichii kaa tipiyeusiyaan kaye maak wiyawaau nichischeyimakuch, 15mwehch e ishi chischeyimit Uhtaawiimaau kaye maak niya e ishi chischeyimak. Mitun maak nititeyihtamihiikuwaan chechii pachishtinisuuch chechii nipahiikuuch wiyawaau uhchi anichii nimaanishchaanishimach. 16Kutakach maanishchaanishach nitayaawaauch ekaa utah uyuu maanishchaanishikamikuyuu uhchiitwaau. Kaye wiyawaau maak yaaitei nika peshuwaauch. Chika nisituhtamuch kaye wiyawaau nipehtaakusuwiniyuu ekw maak che peyakuhch maanishchaanishikamikw kaye chika peyakushuu an maanishchaanishuiinuu.”
17“Eukw uyuu wehchi naashch saachihiit Uhtaawiimaau mitun e pachishteyimisuuch chechii nipahiikuuch chechii uhchi miin pimaatisiyuuch. 18Namui awen nika chii nipahiikw chiishpin eshkw ekaa utihchipayiyiche taanit che pachishteyimisuuch chechii nipahiikuuch. Nichii miikuun suuhkaatisiiwin chechii pachishteyimisuyaan chechii nipahiikuyaan kaye nichii miikuun suuhkaatisiiwin miin chechii pimaatisiyaan. Nuuhtaawii uyuu kaa itashumit chechii ihtuuch.”
19Ekw miin kaa pahkaanipayihuyich aniyuuh Jewa iinuuh iskutak piyehtaakut uyuu e itwet. 20Mihchetu maak anichii Jewa iinuuch chii iteuch, “Machiahchaahkwa piihchishkaakuu. Chiiskweu. Chekwaan wehchi nituhtawekw.”
21Kutakach chii itweuch, “Namui chipaa uhchi ishpish miyuuhtaakusuu awen e ayimit e piihchishkaakut machiahchaahkwa e ishpish miyuuhtaakusit uu naapeu e ayimit. Taanite chipaa chii uhchi ishinaakuniyuu awen e piihchishkaakut machiahchaahkwa chechii ihtuutuwaat aweyuu ekaa waapahtamiyich chechii waapahtamiyich ekw.”
Jesus ekaa kaa taapweyimikut aniyuuh Jewa iinuuh e aawiyit Christ
22Mekwaach chii pipun anit Jerusalemihch, chii ati utihchipayuu maak anit eshikum pipun kaa chii makushetwaau e chischisitwaau anichii Jewa iinuuch anit kaa chischinuwaachishtaakanuyich uchisheayimiheukamikuwaau Chishemanituu ishi e ihtaayich. Chischinuwaachihiiweu makushewin chii ishinihkaatamuch uyuu e makushetwaau. 23Jesus maak mekwaach chii papaamuhteu anite pwaahchihch, Solomon upwaahchim kaa ishinihkaateyich. 24Ekw kaa pechi waaskaakaapuushtaakut aniyuuh Jewa iinuuh. Ekw kaa itikut, “Taaishpish ekw che miyaahch chechii chischeyimitaahch awen chiya. Kuiskw maa pechi wiihtamuunaan, ewaa chiya Christ an Chishemanituuh kaa pechi itishahukut.”
25Ekw Jesus neshkweushihaat, “Shaash kuiskw chichii wiihtamaatinaawaau namui maak kuuhchi wii taapwehtuunaawaau. Aniyuu misiwe kaa ishi pechi miit Nuuhtaawii chechii ishi maamishkaach ihtuuch niyaanitam utah e ihtaayekw ekut e nuukuhch awen e aawiyaan. 26Chiyawaau maak wii namui chika uhchi taapwehtuunaawaau wesh taapaa anite nimaanishchaanishimach e ihtaatwaau chit ishi wiichihiiwenaawaau. 27Nituhtamuch nipehtaakusuwiniyuu nimaanishchaanishimach. Kaye maak nichischeyimaauch, ekw maak piyechi nuushuushkuutwaau. 28Nimiyaauch kaachiche pimaatisiiwiniyuu, namui maak wiiskaat chika uhchi nisuunaatisiyuuch. Kaye maak namui awen nika chii miskamukw e tahkunamach. 29Nuuhtaawii, an kaa pechi miit uyuu maanishchaanisha, eukw maauch chesteyihtaakusit. Namui maak aweyuuh ihtaayuuh chechii miskamikut uyuuh maanishchaanisha e tahkunaat. 30Niya ekw maak Nuuhtaawii nipeyakunaan.”
31Ekw anichii Jewa iinuuch kaa uhchi utinaatwaau asinii miin e wii pimushinaatahwaatwaau Jesus e wii nipahaatwaau. 32Ekw Jesus kaa itaat, “Mihchetwaau chichii waapahtenaawaau taan kaa ishpish chii miyutuutamaatakuch. Nanaahkuu chichii nuukuhtwaatinaawaau miyutuutamaachewinh Chishemanituu e chii pechi miit chechii waapahtiitikuch. Taan an kaa ihtuutamaan wehchi wii pimushinaatahuyekw.”
33Chii itikuu maak e niskweshihiikut, “Namayeu wii miyutuutamaachewin wehchi wii pimushinaatahutaahch, chipaashtaamun eukw wehchi wii nipahiitaahch. Chititwen e Chishemanituwiyin mikw maak e naapewiyin.”
34Ekw Jesus kaa nishkweushihaat e itaat, “Itashteu Chishemanituu utayimuwinihch e chii itaakupane Chishemanituu aniyuu kaa miyaat chechii wiyaaskunicheyich,
Nichii itwen, manituuch chiyawaau. 35Chichischeyihtenaanuu kaachiche e taapwemakahch taan e itashtech Chishemanituu utayimuwinihch. Manituuch chii ishinihkaateu Chishemanituu aniyuuh kaa miyaakanuyich utayimuwin. 36Niya maak, Uhtaawiimaau nichii wiyeyimikw kaye nichii pechi itishahuukw utah aschiihch. Taanite chechii uhchi itweyekw e paashtaamuyaan e itweyaan, eukw niya Chishemanituu Ukusisa. 37Ekaa e ihtuutamuwaauche aniyuu kaa ishi nituweyimit Nuuhtaawii chechii ihtuutamuch ekw kiipaa namui ihtakun chechii taapweyimiyekw Chishemanituu Ukusisa e aawiyaan. 38Aat ekaa wii taapweyimiyekw e itweyaan Chishemanituu Ukusisa e awiyaan mitun chipaa cheshtinaateyihtamihiikunaawaau e piihchishkuut Uhtaawiimaau kaye niya maak e piihchishkuuk an uhchi e maamishkaach ihtiyaan.”
39Iskutak maak kaa itwet Jesus uyuu ekw miin kaa wii maakunikut aniyuu Jewa iinuuh, mikw maak shaash chii chistuhteu.
40Ekw Jesus miin kaau kaa aashuukaamehahk aniyuu Jordan siipiiyuu. Anite kaa chii siikahaahtaacheyich John ekute kaa ituhtet. Ekut anit kaa ihtaat. 41Mihchetu maak aweyuu chii pechi nituwaapamikuu kaa itweyich, “Namui wiiskaat uhchi maamishkaach ihtuutam John, mikw maak misiwe taapwemakaniyuu taan kaa itaachimaat uyuuh naapeuh.” 42Mihchetu maak aweyuu chii taapweyimikuu Jesus anit kaa ihtaayich.
S'ha seleccionat:
John 10: crjrNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.