John 6
6
Niyaayinwaau chishemitaahtumitanuu iinuuh kaa ashamaat Jesus
Matthew 14.13-21; Mark 6.30-44; Luke 9.10-17
1Paatimaa anite Jesus chii aashuuham Galilee saakahiikaniyuu. Tiberias saakahiikan chii ishinihkaataakanuu kaye uu Galilee saakahiikan. 2Chii mihchetiyuu maak aweyuuh kaa nuushuushkaakut wesh chii wii waapamikuu e maamishkaach ihtit e miinuwaachihaat aweyuuh e aahkusiyich. 3Jesus maak chii shaakachuweu wachiyu ekut anit kaa waweyapit uchischinuhamuwaakan e wiitapimaat. 4Shaash chii peshunaakuniyuu aniyuu Jewa iinuuch kaa chii makushetwaau Miyaaskaachewin makushewin kaa ishinihkaateyich. 5Jesus maak chii aitaapuu kaa waapamaat mihchetu aweyuuh e pechi nituwaapamikut, ekw kaa itaat aniyuu Philip, “Taanite chechii uhtinahk aaihkunaau misiwe chechii ashamahkwaau uchii iinuuch.” 6Eukw uyuu kaa ishi kakwechimaat uyuuh Philip mikw e chii wii nituu chischeyimaat taan che itweyikwen aat shaash e chii chischeyihtahk Jesus taan che ihtit.
7Philip kaa itaat, “Aat mikw apishiish ashamahkw paahpeyakw awen, yaapach uste niishwaau mitaahtumitanuu chipaa ispayuu shuuliyaau aaihkunaau utinaakanuut.”
8Ekw peyakw aniyuu kutak uchischinuhamuwaakan Andrew, aniyuu Simon Peter wiichiinuu chii iteyuuh, 9“Ihtaau utah naapesh niyaayin aaihkunaauh ekw maak niishu namesa e ayaawaat. Chika chii aa maak ispayuu uu miichim e ispihchetitwaau uchii iinuuch.”
10Ekw Jesus kaa itaat, “Itaahkuch anichii iinuuch chechii apitwaau.” Naashch chii maskushiyuuniyuu anit aniyuu kaa ihtaatwaau. Ekw misiwe anichii iinuuch kaa apitwaau, wiyesh niyaayinwaau chishemitaahtumitanuu chii itashuuch naapeuch. 11Ekw Jesus kaa utinaat aniyuu aaihkunaau, kaa nanaaskumaat Chishemanituu kaa ati maamaatinamuwaat aniyuu uchischinuhamuwaakan ekw kaa ati maatinuweyich. Ekun kaa ihtuutuwaat kaye aniyuu namesa. Misiwe maak mikw waa ishpish miichisutwaau chii ishpish miichisuuch. 12Iskutak maak misiwe awen kaa tepimiichisut, ekw Jesus kaa itaat aniyuuh uchischinuhamuwaakan, “Maamuustinamukw misiwe taan e ishpish iskupayihch, ekaawii mitun nanaayuuhtaataau chekwaan.” 13Ekw kiipaa kaa maamuushtinihkwaau, niishushaap maak utipiiwat chii saakaschinitaauch e chii iskupuwaakanuyich aaihkunaauh.
14Anichii maak iinuuch anit kaa ihtaatwaau, anichii kaa waapamaatwaau Jesus aniyuu miskach ihtuwiniyuu e ihtuutamiyich chii iteuch, “Cheshtinaash eukw uu uchischiwehiichesuu an kaa ashuwaapamuhkw chechii pechi itishahwaakanuut utah aschiihch.” 15Jesus maak chii chischeyimeu ekw che pechi nituwaapamikut aayihkam che wii chisheuchimaauhiikut, ekw kaa chistuhtet, mikw wiya chechii peyakushit.
Nipiihch kaa pimuhtet Jesus
Matthew 14.22-33; Mark 6.45-52
16Iskutak maak e ati utaakushiyich Jesus uchischinuhamuwaakan chii naasipeyuuh. 17Chii puusuuch utiyuu e chii wii aashuuhahkwaau, nete Capernaum e chii wii isichimetwaau. Shaash maak chii ati ukaayuu eshkw ekaa uhchi nachihiikutwaau Jesus. 18Chek chii mista yuutiniyuu kaye chii maamihkaahaniyuu. 19Nishtu maak neu aschiiyuu tipahiikan chii ishpish pimiskaachenich ekw kaa waapamaatwaau Jesus. Chii pechi naatikuuch anite utihch e ihtaatwaau nipiihch e pimuhteyich. Naashch maak chii kushtaachuuch. 20Chii itikuuch maak Jesus, “Ekaawii kushtaachikw, eukw wesin niya.” 21Ekw maak kaa pachishtinaatwaau chechii wiich puusiimikutwaau. Namui maak pwaaskuu shaash kaa mishikaatwaau nete kaa wii isichimetwaau.
Mihchetu awenich kaa wii waapamaatwaau Jesus
22Miin wiyaapaniyich mihchetu awenich eshkw chii ihtaauch anite kwestehchekaam aniyuu saakahiikaniyuu anite Jesus kaa ashamaat mihchetu aweyuuh. Chii chischisuuch maak anichii iinuuch mikw e chii peyakushiyich utiyuu e chii aapachihtaayich chischinuhamuwaakanh kaye ekaa uhchi puusiyich Jesus anit. 23Kutak maak utih chii pechi naatakaamepayuuh anite Tiberias e uhchipayihkwaauh. 24Namui maak uhchi waapameuch Jesus ekw maak uchischinuhamuwaakanh chechii ihtaayich anit ekw kaa puusitwaau utih anite Capernaum kaa isichimetwaau che nituu naanituwaapamaatwaau Jesus.
Jesus eukw pimaachihiiweu aaihkunaau
25Iskutak meskawaatwaau Jesus anite kwestehchekaam aniyuu saakahiikaniyuu chii iteuch, “Chischinuhamaachesuu taaishpish kaa takushiniyin utah.”
26Jesus kaa itaat, “Kuiskw chiwiihtamaatinaawaau, namui mikw an e chii waapamiyekw maamishkaach waapahtiiwewinh e ihtuutamaan wehchi pechi naanituwaapamiyekw. An e chii muwekw aaihkunaau kaye e chii chiishpuyekw ekun wehchi naanituuwaapamiyekw. 27Ekaawii aapatisikw mikw e wii uhchistamaasuyekw miichim an che wiinipayihch, teyakuch wii uhchistamaasuk an miichim kaachiche che ihtakuhch. Iinuu Ukusisa chika miikuwaau miichimiyuu ekaa nihtaa che uhchi wiinipayihch. Wesh Chishemanituu Uhtaawiimaau chii nuukuhtaau taapwe e naheyimaat.”
28Ekw kaa kakwechimaatwaau, “Taan maak che ihtiyaahch chechii atushkuwachiht Chishemanituu.”
29Jesus kaa nishkweushihaat e itaat, “Eukw uyuu e ishi nituweyihtahk Chishemanituu chechii ishi atushkuwaakanuut, chechii taapweyimekw aniyuu kaa pechi itishahwaat.”
30Ekw kaa itaatwaau aniyuu Jesus, “Taan chechii ishi miskaach ihtiyin chechii uhchi taapweyimataahch. 31Anite weskach aniyaahkaanaanich niwaahkumaakanaanich chii muweuch aniyuu aaihkunaau kaa miyaakanuutwaau mekwaach anite pakwaatiskamikaahch kaa ihtaatwaau. Itashteyuu Chishemanituu utayimuwin,
Chii miyaakanuuch aaihkunaau kihchikiishikuhch uhchi.”
32Jesus kaa nishkweushihaat e itaat, “Kuiskw chiwiihtamaatinaawaau, aniyuu aaihkunaau Moses kaa miitaakw namui anite kihchikiishikuhch uhchi uhchipayuuh. Chishemanituu, Nuuhtaawii eukw an maayitaakw aniyuu chihchiwe aaihkunaau kihchikiishikuhch kaa uhchipayihch. 33An maak aaihkunaau Chishemanituu kaa miiwet eukw an kihchikiishikuhch kaa uhchipayit, kaye eukuu kaa miyaat aweyuuh utah aschiihch kaa ihtaayich pimaatisiiwiniyuu,” chii iteu Jesus.
34Ekw kaa itaatwaau aniyuu Jesus, “Utipeyihchikeu, muush maa pechi miinaan an aaihkunaau.”
35Jesus maak chii iteu, “Niya eukw an aaihkunaau anit chechii uhchi pimaatisiit awen. Awen maak che pechi naasikwe kaye che pechi taapweyimikwe, namui wiiskach miin chika uhchi siiweyuu kaye namui wiiskaat miin chika uhchi nuuhteyaapaakweu. 36Shaash maak chichii wiihtamaatinaawaau, shaash chichii waapaminaawaau yaapach maak namui kuuhchiwii taapweyiminaawaau. 37Misiwe aniyuu aweyuu Uhtaawiimaau kaa pechi miit nika pechi naatikuch. An maak awen che pechi naasit namui wiiskaat nika uhchi iichenaau. 38Wesh nichii takushin kihchikiishikuhch e uhtuhteyaan chechii ihtuutamuch Chishemanituu utiteyihtamuwin, an kaa pechi itishahuut. Namui nuuhchi takushin utah aschiihch mikw niya nititeyihtamuwin chechii ihtuutamaan. 39Eukw maak uyuu Chishemanituu utiteyihtamuwin an kaa pechi itishahuut, ekaa chechii wanihiimach waachipeyakw aniyuu aweyuu kaa pechi miit, maak chechii wanishkaanimach maahchishtai chiishikaayiche kaachiche chechii pimaatisiyich. 40Wesh eukw uyuu Nuuhtaawii utiteyihtamuwin, misiwe aweyuu kaa waapamaayich kaye kaa taapweyimaayich Ukusisimaau kaachiche pimaatisiiwiniyuu chechii ayaayich. Niya maak che wanishkaanak maahchishtai chiishikaache.”
Taanite chechii uhchi chischeyimahkw Jesus
41Iskutak kaa chiishi ayimit Jesus, anichii Jewa iinuuch chekwaayuu chii iteyimeuch uyuu e chii itweyich, “Niya eukw an aaihkunaau kihchikiishikuhch kaa uhchi pachishtinaakanuut.” 42Ekw kaa itwetwaau, “Namayeu aa uu Jesus, Joseph ukusisa. Nichischeyimaanaan uhtaawiih kaye ukaawii. Chekwaayuu maak wehchi itwet kihchikiishikuhch e uhchiit.”
43Jesus kaa nishkweushihaat e itaat, “Ekun ishpish pukunuumuwekw. 44Namui nika chii pechi naatikw awen ekaa Nuuhtaawii ihtuutaakute chechii pechi naasit. Maahchishtai chiishikaache misiwe awen e chii pechi naasit nika wanishkaanaau. 45Mwaauyuu kaa itasinahiichetwaau aniyehkaanaanich uchischiwehiichesuuch,
Chishemanituu chika chiskutamuweu misiwe aweyuuh.
Misiwe maak anichii kaa pehtawaatwaau kaye kaa chiskutamaakutwaau Nuuhtaawii nika pechi naatikuch. 46Namui awen uhchi waapameu Uhtaawiimaau mikw aniyuuh Chishemanituu kaa pechi itishahwaat eukun an kaa waapamaat Uhtaawiimaau. 47Kuiskw chiwiihtamaatinaawaau, an awen kaa pechi taapweyimit ayaau kaachiche pimaatisiiwiniyuu. 48Niya eukw aaihkunaau kaa miiwet pimaatisiiwiniyuu. 49Anite weskach chiwaahkumaakanuuch chii muweuch aniyuuh aaihkunaau maanaa e chii ishinihkaataakanuyich, mekwaach anite pakwaatiskamikaahch kaa ihtaatwaau. Yaapach maak chii nipuuch. 50Mikw maak an awen che muwaakwe aniyuu aaihkunaau anite kihchikiishikuhch kaa uhchi pachishtinaakanuyich, namui wiiskaat chika uhchi nipuu. 51Niya maak an pimaachihiiweu aaihkunaau kihchikiishikuhch kaa uhchi pachishtinaakanuut. Awen maak che muwaakwe uyuu aaihkunaau kaachiche pimaatisiiwiniyuu chika ayaau. An maak aaihkunaau che miiweyaan eukw uu niyaas anit chechii uhchi ayaatwaau awenich pimaatisiiwiniyuu.” Eukw uyuu Jesus kaa itwet.
52Ekw anichii Jewa iinuuch chii machipayuuch e itwetwaau, “Taanite chechii uhchi miiwet uu naapeu wiyaas chechii uhchi miichinaanuyich.”
53Jesus kaa itaat, “Kuiskw chititinaawaau, namui chika chii ayaanaawaau kaachiche pimaatisiiwin ekaa miichuwekwe Iinuu Ukusisa wiyaas kaye ekaa minihkwewekwe umihkw. 54An maak awen che miichikwe niyaasiyuu kaye che minihkwewekwe nimihkuyuu ayaau kaachiche pimaatisiiwiniyuu, kaye maak niya nika wanishkaanaau maahchishtai chiishikaayiche. 55Wesh niyaas eukw chihchiwe miichim kaye nimihkw chihchiwe minihkwewinuwin. 56An maak awen che miichikwe niyaasiyuu kaye che minihkwekwe nimihkuyuu, nipiihchishkaakw kaye niya maak nipiihchishkuwaau. 57Nuuhtaawii an kaa miiwet pimaatisiiwiniyuu nichii pechi itishahuukw kaye nimiikw pimaatisiiwiniyuu. Ekun maak mwehch kaye wiya an awen kaa miichit niyaasiyuu, nika miyaau chechii pimaatisiit. 58Eukw uu aaihkunaau kihchikiishikuhch kaa uhchi pachishtinaakanuut. Awen maak che muwaakwe uyuu aaihkunaau kaachiche pimaatisiyuu. Namiyeyuu aniyuu aaihkunaau aanische chiwaahkumaakanuuch kaa muwaatwaau anite weskach, aat e chii muwaatwaau aniyuu aaihkunaau yaapach chii nipuuch.”
59Eukw uyuuh chekwaayuu kaa aayimuutahk Jesus kaa chischinuhamaachet anite Jewa ayimiheukamikuhch anite Capernaum ihtaawinihch kaa ihtaat.
Jesus utayimuwinihch ekut che uhchi pimaatisiit awen
60Iskutak maak kaa pehtaakut mihchetu aniyuu kaa nuushuushkaakut aniyuu e itwet, chii itweyuuh, “Taapwe aayimaniyuu aniyuu kaa itwet, awen chechii nisituhtahk.”
61Jesus maak chii chischeyimeu, aat ekaa uhchi wiihtamuwaakanuut, taan e itituyich ekw kaa itaat, “Kuushtuweyihtamihiikunaawaau aa uu kaa itweyaan. 62Taan maak che iteyihtamekw waapamekwe Iinuu Ukusisa e uhpipayit anite ishi kaa chii ihtaat eshkw ekaa uhchi pechi itishahwaakanuut utah aschiihch. 63Mikw Kaa payehchisiit Ahchaahkw miiweu kaachiche pimaatisiiwiniyuu, namui wii naapeu chika chii ihtuutam uyuu. Chichii wiihtamaatinaawaau maak taanite chechii uhchi ayaayekw uu Ahchaahkw pimaatisiiwin. 64Pasch maak utah e tashiyekw namui chitaapweyihtenaawaau.” Shaash chii chischeyihtam Jesus aweyuu ekaa che uhchi taapwehtamiyich kaye chii chischeyimeu aniyuu aweyuu che wiyeshipachishtinikut. 65Ekw kaa itwet, “Eukw maak wehchi ititakuch namui awen nika chii pechi naatikw paatish Uhtaawiimaau miikute chechii naasit.”
66Iskutak maak kaa itwet uyuu mihchetu aniyuuh kaa nuushuushkaakut chii nakatikuu kaye namui uhchiwii wiicheukuu. 67Ekw Jesus kaa kakwechimaat aniyuu niishushaap uchischinuhamuwaakanh e itaat, “Kaye aa chiyawaau chiwii nikasinaawaau.”
68Kaa nishkweushihiikut Simon Peter e itikut, “Utipeyihchikeu, awen maak che nituwaapamachiht. Chitayimuwinihch ekut wehchi ihtakuhch kaachiche pimaatisiiwin. 69Nitaapwehtenaan maak kaye nichischeyihtenaan chiya e aawiyin kaa payehchisiit, an kaa pechi itishahukut Chishemanituu.”
70Jesus kaa nishkweushihaat e itaat, “Namui aa niya kuuhchi wiyaapamitinaawaau e niishushaapuyekw, peyakw maak anit e tashiyekw machimanituu.” 71Judas, Simon Iscariot ukusiyuu eukw aniyuu kaa aayimuumaat wesh eukw an peyakw anit e niishushaapuutwaau che wiyeshipachishtinaakupane aniyuu Jesus.
S'ha seleccionat:
John 6: crjrNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.
John 6
6
Niyaayinwaau chishemitaahtumitanuu iinuuh kaa ashamaat Jesus
Matthew 14.13-21; Mark 6.30-44; Luke 9.10-17
1Paatimaa anite Jesus chii aashuuham Galilee saakahiikaniyuu. Tiberias saakahiikan chii ishinihkaataakanuu kaye uu Galilee saakahiikan. 2Chii mihchetiyuu maak aweyuuh kaa nuushuushkaakut wesh chii wii waapamikuu e maamishkaach ihtit e miinuwaachihaat aweyuuh e aahkusiyich. 3Jesus maak chii shaakachuweu wachiyu ekut anit kaa waweyapit uchischinuhamuwaakan e wiitapimaat. 4Shaash chii peshunaakuniyuu aniyuu Jewa iinuuch kaa chii makushetwaau Miyaaskaachewin makushewin kaa ishinihkaateyich. 5Jesus maak chii aitaapuu kaa waapamaat mihchetu aweyuuh e pechi nituwaapamikut, ekw kaa itaat aniyuu Philip, “Taanite chechii uhtinahk aaihkunaau misiwe chechii ashamahkwaau uchii iinuuch.” 6Eukw uyuu kaa ishi kakwechimaat uyuuh Philip mikw e chii wii nituu chischeyimaat taan che itweyikwen aat shaash e chii chischeyihtahk Jesus taan che ihtit.
7Philip kaa itaat, “Aat mikw apishiish ashamahkw paahpeyakw awen, yaapach uste niishwaau mitaahtumitanuu chipaa ispayuu shuuliyaau aaihkunaau utinaakanuut.”
8Ekw peyakw aniyuu kutak uchischinuhamuwaakan Andrew, aniyuu Simon Peter wiichiinuu chii iteyuuh, 9“Ihtaau utah naapesh niyaayin aaihkunaauh ekw maak niishu namesa e ayaawaat. Chika chii aa maak ispayuu uu miichim e ispihchetitwaau uchii iinuuch.”
10Ekw Jesus kaa itaat, “Itaahkuch anichii iinuuch chechii apitwaau.” Naashch chii maskushiyuuniyuu anit aniyuu kaa ihtaatwaau. Ekw misiwe anichii iinuuch kaa apitwaau, wiyesh niyaayinwaau chishemitaahtumitanuu chii itashuuch naapeuch. 11Ekw Jesus kaa utinaat aniyuu aaihkunaau, kaa nanaaskumaat Chishemanituu kaa ati maamaatinamuwaat aniyuu uchischinuhamuwaakan ekw kaa ati maatinuweyich. Ekun kaa ihtuutuwaat kaye aniyuu namesa. Misiwe maak mikw waa ishpish miichisutwaau chii ishpish miichisuuch. 12Iskutak maak misiwe awen kaa tepimiichisut, ekw Jesus kaa itaat aniyuuh uchischinuhamuwaakan, “Maamuustinamukw misiwe taan e ishpish iskupayihch, ekaawii mitun nanaayuuhtaataau chekwaan.” 13Ekw kiipaa kaa maamuushtinihkwaau, niishushaap maak utipiiwat chii saakaschinitaauch e chii iskupuwaakanuyich aaihkunaauh.
14Anichii maak iinuuch anit kaa ihtaatwaau, anichii kaa waapamaatwaau Jesus aniyuu miskach ihtuwiniyuu e ihtuutamiyich chii iteuch, “Cheshtinaash eukw uu uchischiwehiichesuu an kaa ashuwaapamuhkw chechii pechi itishahwaakanuut utah aschiihch.” 15Jesus maak chii chischeyimeu ekw che pechi nituwaapamikut aayihkam che wii chisheuchimaauhiikut, ekw kaa chistuhtet, mikw wiya chechii peyakushit.
Nipiihch kaa pimuhtet Jesus
Matthew 14.22-33; Mark 6.45-52
16Iskutak maak e ati utaakushiyich Jesus uchischinuhamuwaakan chii naasipeyuuh. 17Chii puusuuch utiyuu e chii wii aashuuhahkwaau, nete Capernaum e chii wii isichimetwaau. Shaash maak chii ati ukaayuu eshkw ekaa uhchi nachihiikutwaau Jesus. 18Chek chii mista yuutiniyuu kaye chii maamihkaahaniyuu. 19Nishtu maak neu aschiiyuu tipahiikan chii ishpish pimiskaachenich ekw kaa waapamaatwaau Jesus. Chii pechi naatikuuch anite utihch e ihtaatwaau nipiihch e pimuhteyich. Naashch maak chii kushtaachuuch. 20Chii itikuuch maak Jesus, “Ekaawii kushtaachikw, eukw wesin niya.” 21Ekw maak kaa pachishtinaatwaau chechii wiich puusiimikutwaau. Namui maak pwaaskuu shaash kaa mishikaatwaau nete kaa wii isichimetwaau.
Mihchetu awenich kaa wii waapamaatwaau Jesus
22Miin wiyaapaniyich mihchetu awenich eshkw chii ihtaauch anite kwestehchekaam aniyuu saakahiikaniyuu anite Jesus kaa ashamaat mihchetu aweyuuh. Chii chischisuuch maak anichii iinuuch mikw e chii peyakushiyich utiyuu e chii aapachihtaayich chischinuhamuwaakanh kaye ekaa uhchi puusiyich Jesus anit. 23Kutak maak utih chii pechi naatakaamepayuuh anite Tiberias e uhchipayihkwaauh. 24Namui maak uhchi waapameuch Jesus ekw maak uchischinuhamuwaakanh chechii ihtaayich anit ekw kaa puusitwaau utih anite Capernaum kaa isichimetwaau che nituu naanituwaapamaatwaau Jesus.
Jesus eukw pimaachihiiweu aaihkunaau
25Iskutak meskawaatwaau Jesus anite kwestehchekaam aniyuu saakahiikaniyuu chii iteuch, “Chischinuhamaachesuu taaishpish kaa takushiniyin utah.”
26Jesus kaa itaat, “Kuiskw chiwiihtamaatinaawaau, namui mikw an e chii waapamiyekw maamishkaach waapahtiiwewinh e ihtuutamaan wehchi pechi naanituwaapamiyekw. An e chii muwekw aaihkunaau kaye e chii chiishpuyekw ekun wehchi naanituuwaapamiyekw. 27Ekaawii aapatisikw mikw e wii uhchistamaasuyekw miichim an che wiinipayihch, teyakuch wii uhchistamaasuk an miichim kaachiche che ihtakuhch. Iinuu Ukusisa chika miikuwaau miichimiyuu ekaa nihtaa che uhchi wiinipayihch. Wesh Chishemanituu Uhtaawiimaau chii nuukuhtaau taapwe e naheyimaat.”
28Ekw kaa kakwechimaatwaau, “Taan maak che ihtiyaahch chechii atushkuwachiht Chishemanituu.”
29Jesus kaa nishkweushihaat e itaat, “Eukw uyuu e ishi nituweyihtahk Chishemanituu chechii ishi atushkuwaakanuut, chechii taapweyimekw aniyuu kaa pechi itishahwaat.”
30Ekw kaa itaatwaau aniyuu Jesus, “Taan chechii ishi miskaach ihtiyin chechii uhchi taapweyimataahch. 31Anite weskach aniyaahkaanaanich niwaahkumaakanaanich chii muweuch aniyuu aaihkunaau kaa miyaakanuutwaau mekwaach anite pakwaatiskamikaahch kaa ihtaatwaau. Itashteyuu Chishemanituu utayimuwin,
Chii miyaakanuuch aaihkunaau kihchikiishikuhch uhchi.”
32Jesus kaa nishkweushihaat e itaat, “Kuiskw chiwiihtamaatinaawaau, aniyuu aaihkunaau Moses kaa miitaakw namui anite kihchikiishikuhch uhchi uhchipayuuh. Chishemanituu, Nuuhtaawii eukw an maayitaakw aniyuu chihchiwe aaihkunaau kihchikiishikuhch kaa uhchipayihch. 33An maak aaihkunaau Chishemanituu kaa miiwet eukw an kihchikiishikuhch kaa uhchipayit, kaye eukuu kaa miyaat aweyuuh utah aschiihch kaa ihtaayich pimaatisiiwiniyuu,” chii iteu Jesus.
34Ekw kaa itaatwaau aniyuu Jesus, “Utipeyihchikeu, muush maa pechi miinaan an aaihkunaau.”
35Jesus maak chii iteu, “Niya eukw an aaihkunaau anit chechii uhchi pimaatisiit awen. Awen maak che pechi naasikwe kaye che pechi taapweyimikwe, namui wiiskach miin chika uhchi siiweyuu kaye namui wiiskaat miin chika uhchi nuuhteyaapaakweu. 36Shaash maak chichii wiihtamaatinaawaau, shaash chichii waapaminaawaau yaapach maak namui kuuhchiwii taapweyiminaawaau. 37Misiwe aniyuu aweyuu Uhtaawiimaau kaa pechi miit nika pechi naatikuch. An maak awen che pechi naasit namui wiiskaat nika uhchi iichenaau. 38Wesh nichii takushin kihchikiishikuhch e uhtuhteyaan chechii ihtuutamuch Chishemanituu utiteyihtamuwin, an kaa pechi itishahuut. Namui nuuhchi takushin utah aschiihch mikw niya nititeyihtamuwin chechii ihtuutamaan. 39Eukw maak uyuu Chishemanituu utiteyihtamuwin an kaa pechi itishahuut, ekaa chechii wanihiimach waachipeyakw aniyuu aweyuu kaa pechi miit, maak chechii wanishkaanimach maahchishtai chiishikaayiche kaachiche chechii pimaatisiyich. 40Wesh eukw uyuu Nuuhtaawii utiteyihtamuwin, misiwe aweyuu kaa waapamaayich kaye kaa taapweyimaayich Ukusisimaau kaachiche pimaatisiiwiniyuu chechii ayaayich. Niya maak che wanishkaanak maahchishtai chiishikaache.”
Taanite chechii uhchi chischeyimahkw Jesus
41Iskutak kaa chiishi ayimit Jesus, anichii Jewa iinuuch chekwaayuu chii iteyimeuch uyuu e chii itweyich, “Niya eukw an aaihkunaau kihchikiishikuhch kaa uhchi pachishtinaakanuut.” 42Ekw kaa itwetwaau, “Namayeu aa uu Jesus, Joseph ukusisa. Nichischeyimaanaan uhtaawiih kaye ukaawii. Chekwaayuu maak wehchi itwet kihchikiishikuhch e uhchiit.”
43Jesus kaa nishkweushihaat e itaat, “Ekun ishpish pukunuumuwekw. 44Namui nika chii pechi naatikw awen ekaa Nuuhtaawii ihtuutaakute chechii pechi naasit. Maahchishtai chiishikaache misiwe awen e chii pechi naasit nika wanishkaanaau. 45Mwaauyuu kaa itasinahiichetwaau aniyehkaanaanich uchischiwehiichesuuch,
Chishemanituu chika chiskutamuweu misiwe aweyuuh.
Misiwe maak anichii kaa pehtawaatwaau kaye kaa chiskutamaakutwaau Nuuhtaawii nika pechi naatikuch. 46Namui awen uhchi waapameu Uhtaawiimaau mikw aniyuuh Chishemanituu kaa pechi itishahwaat eukun an kaa waapamaat Uhtaawiimaau. 47Kuiskw chiwiihtamaatinaawaau, an awen kaa pechi taapweyimit ayaau kaachiche pimaatisiiwiniyuu. 48Niya eukw aaihkunaau kaa miiwet pimaatisiiwiniyuu. 49Anite weskach chiwaahkumaakanuuch chii muweuch aniyuuh aaihkunaau maanaa e chii ishinihkaataakanuyich, mekwaach anite pakwaatiskamikaahch kaa ihtaatwaau. Yaapach maak chii nipuuch. 50Mikw maak an awen che muwaakwe aniyuu aaihkunaau anite kihchikiishikuhch kaa uhchi pachishtinaakanuyich, namui wiiskaat chika uhchi nipuu. 51Niya maak an pimaachihiiweu aaihkunaau kihchikiishikuhch kaa uhchi pachishtinaakanuut. Awen maak che muwaakwe uyuu aaihkunaau kaachiche pimaatisiiwiniyuu chika ayaau. An maak aaihkunaau che miiweyaan eukw uu niyaas anit chechii uhchi ayaatwaau awenich pimaatisiiwiniyuu.” Eukw uyuu Jesus kaa itwet.
52Ekw anichii Jewa iinuuch chii machipayuuch e itwetwaau, “Taanite chechii uhchi miiwet uu naapeu wiyaas chechii uhchi miichinaanuyich.”
53Jesus kaa itaat, “Kuiskw chititinaawaau, namui chika chii ayaanaawaau kaachiche pimaatisiiwin ekaa miichuwekwe Iinuu Ukusisa wiyaas kaye ekaa minihkwewekwe umihkw. 54An maak awen che miichikwe niyaasiyuu kaye che minihkwewekwe nimihkuyuu ayaau kaachiche pimaatisiiwiniyuu, kaye maak niya nika wanishkaanaau maahchishtai chiishikaayiche. 55Wesh niyaas eukw chihchiwe miichim kaye nimihkw chihchiwe minihkwewinuwin. 56An maak awen che miichikwe niyaasiyuu kaye che minihkwekwe nimihkuyuu, nipiihchishkaakw kaye niya maak nipiihchishkuwaau. 57Nuuhtaawii an kaa miiwet pimaatisiiwiniyuu nichii pechi itishahuukw kaye nimiikw pimaatisiiwiniyuu. Ekun maak mwehch kaye wiya an awen kaa miichit niyaasiyuu, nika miyaau chechii pimaatisiit. 58Eukw uu aaihkunaau kihchikiishikuhch kaa uhchi pachishtinaakanuut. Awen maak che muwaakwe uyuu aaihkunaau kaachiche pimaatisiyuu. Namiyeyuu aniyuu aaihkunaau aanische chiwaahkumaakanuuch kaa muwaatwaau anite weskach, aat e chii muwaatwaau aniyuu aaihkunaau yaapach chii nipuuch.”
59Eukw uyuuh chekwaayuu kaa aayimuutahk Jesus kaa chischinuhamaachet anite Jewa ayimiheukamikuhch anite Capernaum ihtaawinihch kaa ihtaat.
Jesus utayimuwinihch ekut che uhchi pimaatisiit awen
60Iskutak maak kaa pehtaakut mihchetu aniyuu kaa nuushuushkaakut aniyuu e itwet, chii itweyuuh, “Taapwe aayimaniyuu aniyuu kaa itwet, awen chechii nisituhtahk.”
61Jesus maak chii chischeyimeu, aat ekaa uhchi wiihtamuwaakanuut, taan e itituyich ekw kaa itaat, “Kuushtuweyihtamihiikunaawaau aa uu kaa itweyaan. 62Taan maak che iteyihtamekw waapamekwe Iinuu Ukusisa e uhpipayit anite ishi kaa chii ihtaat eshkw ekaa uhchi pechi itishahwaakanuut utah aschiihch. 63Mikw Kaa payehchisiit Ahchaahkw miiweu kaachiche pimaatisiiwiniyuu, namui wii naapeu chika chii ihtuutam uyuu. Chichii wiihtamaatinaawaau maak taanite chechii uhchi ayaayekw uu Ahchaahkw pimaatisiiwin. 64Pasch maak utah e tashiyekw namui chitaapweyihtenaawaau.” Shaash chii chischeyihtam Jesus aweyuu ekaa che uhchi taapwehtamiyich kaye chii chischeyimeu aniyuu aweyuu che wiyeshipachishtinikut. 65Ekw kaa itwet, “Eukw maak wehchi ititakuch namui awen nika chii pechi naatikw paatish Uhtaawiimaau miikute chechii naasit.”
66Iskutak maak kaa itwet uyuu mihchetu aniyuuh kaa nuushuushkaakut chii nakatikuu kaye namui uhchiwii wiicheukuu. 67Ekw Jesus kaa kakwechimaat aniyuu niishushaap uchischinuhamuwaakanh e itaat, “Kaye aa chiyawaau chiwii nikasinaawaau.”
68Kaa nishkweushihiikut Simon Peter e itikut, “Utipeyihchikeu, awen maak che nituwaapamachiht. Chitayimuwinihch ekut wehchi ihtakuhch kaachiche pimaatisiiwin. 69Nitaapwehtenaan maak kaye nichischeyihtenaan chiya e aawiyin kaa payehchisiit, an kaa pechi itishahukut Chishemanituu.”
70Jesus kaa nishkweushihaat e itaat, “Namui aa niya kuuhchi wiyaapamitinaawaau e niishushaapuyekw, peyakw maak anit e tashiyekw machimanituu.” 71Judas, Simon Iscariot ukusiyuu eukw aniyuu kaa aayimuumaat wesh eukw an peyakw anit e niishushaapuutwaau che wiyeshipachishtinaakupane aniyuu Jesus.
S'ha seleccionat:
:
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.