Luke 24
24
Jesus kaa wanishkaat
Matthew 28.1-10; Mark 16.1-8; John 20.1-10
1Niishtam maak e chiishikaayich aniyuu e tuushteyich naashch maak wiipach e chechishepaayaayich anichii iskweuch chii ituhtataauch anite kaa waatikwaapiskahiikanuyich aniyuu kaa ayeskuushtaatwaau e wiihchimaakusiyikwaau chekwaayuu chechii tuuminahkwaau aniyuu miiyuuyuu. 2Kaa takushihkwaau maak anit kaa waatikwaapiskahiikanuyich shaash chii iichetihtipinaakanuyikupanen aniyuu asinii anit kaa chipishimaakanuyich ishkwaahtemihch. 3Kaa piihchetwaau anite namui maak uhchi miskamuweuch Utipeyihchikeu Jesus wiiyuuyuu. 4Mekwaach maak e maamituneyihtamihiikutwaau uyeyuu chiihtihtawii chii uhchi niishiyuu naapeuh e waashtuweyikwaau uchekwaanimiyuu. 5Ekw naashch kaa sechisitwaau kaa ati utihtipayihutwaau anite ishi aschiihch, kaa itikutwaau aniyuu naapeuh, “Chekwaan wehchi naanituwaapamekw an kaa pimaatisiit utah kaa nipiyich e ihtaayich. 6Namui ihtaau utah. Wesh chii wanishkaau. Chichischisinaawaau aa taan kaa ititaakw mekwaach Galileehch kaa ihtaat, 7e chii ishi niikaan itaachimitisut, ‘Kata pachishtinaakanuuch umachihtwaauch Iinuu Ukusisa chechii chiistaaskuhwaatwaau, ekw maak chii nishtu chiishikaayiche miin kata wanishkaau.’ ” 8Ekw maak anichii iskweuch kaa uhchi chischisitwaau Jesus taan kaa itweyich.
9Chii nakatamuch maak anichii iskweuch aniyeyuu kaa waatikwaapiskahiikanuyich, kaa chiiwetwaau ekw kaa waawiihtamuwaatwaau aniyuuh kaa peyakushaapuyich chischinuhamuwaakanh kaye misiwe aniyuuh kutak aweyuu kaa chii waawiichewaayich Jesus misiwe taan kaa ispayiyich. 10Eukunich uchii iskweuch uyuu kaa ishi waawiihtamuwaatwaau aniyuu apastalach, Mary Magdalene ekw maak Joanna kaye maak Mary, aniyuu James ukaawii kaye kutak iskweuh aniyuuh kaa wiicheukutwaau anite kaa ituhtetwaau. 11Ekw mikw anichii apastalach namui uhchi taapwehtaweuch aniyuuh iskweuh, nanatayaachimuuch, e chii iteyimaatwaau. 12Peter maak chii ispahtaau anite kaa waatikwaapiskahiikanuyich ekw kaa nuwekaapuut chechii piihteyaapahtahk. Mikw maak aniyuuh machunisha kaa piskweyetinaakanuyich chii waapahtam. E ati chiiwet maak chii maamituneyihtamihiikuu taan kaa ispayiyich.
Niishu chischinuhamuwaakanich Emmaus kaa ituhtetwaau
Mark 16.12, 13
13Ekw maak e peyakuhch an e chiishikaach niishu chischinuhamuwaakanich chii ituhteuch anite ihtaawiniyuu Emmaus kaa ishinihkaateyich. Wiyesh maak niishwaashch aschiiyuu tipahiikanh chii ishpishinaakuniyuu Jerusalemihch uhchi. 14Chii ayimitutamuch maak mekwaach e pimuhtetwaau misiwe chekwaayuu taan kaa pechi ispayiyich. 15Mekwaach maak e ayimihiitutwaau chii utihtikuuch Jesus kaa ati wiicheukutwaau. 16Namui maak uhchi miyaakanuuch chechii nisituunuwaatwaau aweyuu aniyuu. 17Ekw kaa kakwechimikutwaau, “Chekwaan uu kaa ayimitutamekw mekwaach e pimuhteyekw.”
Chii chipihchikaapuuch maak naashch e macheyihtamuunaakusitwaau. 18Ekw an peyakw Cleopas e ishinihkaasut kaa nishkweushihaat e itaat, “Eukw aa chiya mikw peyakushiyin anit Jerusalemihch ekaa chischeyihtaman uyuu chekwaayuuh taan kaa ispayihkwaau namui naashch weskach.” 19Ekw kaa kakwechimikutwaau, “Chekwaayuuh maak aniyuu kaa ispayihkwaau.” Ekw kaa tipaachimushtuwaatwaau misiwe taan kaa ihtuutawaakanuyich Jesus, Nazareth kaa uhchiyich e itaatwaau, “Uu Jesus chii uchischiwehiichesuu. Chishemanituuh ekw maak aniyuu iinuu chii iteyihtamiyuu misiwe aniyuu chekwaayuuh kaa ihtuutahk kaye aniyuu kaa ishi wiihtahk naashch e chii suuhcheyihtaakuniyikwaau. 20Chii pachishtinikuu kaa niikaanapitwaau ayimiheuchimaauh kaye aniyuuh iinuuh kaa niikaanishkuwaatwaau chechii nishuuwanaachimaakanuut. Kaa niskumutwaau chechii nipahaakanuyich ekw maak kaa chiistaaskuhwaatwaau. 21Nichii pukuseyimaanaan maak wiya chechii pimaachihaakupane Israel iinuuh. Eukw maak uu anuhchiish nishtu chiishikaau misiwe kaa ishpish ispayihch uu. 22Ekw maak utah miin pasch anichii iskweuch anit e tashiyaahch chii miskaashtaakusuuch taan kaa itaachimutwaau, wiipach chechishep chii ituhteuch anite kaa pimishimaakanuyich Jesus. 23Namui maak uhchi miskamuweuch wiiyuuyuu. Kaa takushinitwaau chii itweuch e chii nuukushiishtaakutwaau enchil e itikutwaau, ‘Pimaatisiiu wesin.’ 24Ekw pasch anit e tashiyaahch chii ituhteuch nete kaa pimishimaakanuyich. Taapwe maak ekun kaa ishinaakuniyich taan kaa itaachimuyich aniyuu iskweuh. Namui uhchi ihtaayuuh Jesus anite.”
25Ekw anichii chischinuhamuwaakanich kaa itikutwaau Jesus, “Chiyawaau naapeutikw, taapwe ekaa kaa iteyihtamekw, taanite wehchi ekaa uhchii taapwehtawekuch taan kaa ishi niikaan wiihtahkwaau aniyehkaa uchischiwehiichesuuch. 26Taapwe eukun kaa ishi nituweyihtaakuhch chechii ispayikupane, eukw uu Christ chechii wiisacheyihtamukupane kaye anit chechii uhchi chisteyihtaakusit.” 27Ekw Jesus kaa chihchi waawiihtamuwaat aniyuuh naapeuh misiwe taan kaa itasinahiikanuyich e aayimuumaakanuut anite Chishemanituu utayimuwinihch. Moses taan kaa itashtaayich e aayimuumikut chii uhchi chihchipayihtaau chek kaa utihtahahk taan kaa ishi masinahamiich e aayimuumikut aniyehkaanaan uchischiwehiichesuuh.
28Iskutak e ati peshuwaapahtahkwaau aniyuu ihtaawiniyuu Emmaus kaa wii ituhtetwaau ekw kaa ishinaakusit Jesus mwehch che ati saapuhtawehtet. 29Chii aayihkamiheuch maak Jesus ekaa etituu chechii chistuhteyich, e itaatwaau, “Ekut utah ihtaah, wesh shaash utaakushuu, shaash wiipach kata tipiskaau.” Ekw Jesus kaa ati wiichewaat e chiiweyitwaau. 30Iskutak maak waachimiichisuumaat chii utineu aaihkunaau, chii nanaaskumuu kaye chii pahkweneu ekw kaa maatinamuwaat. 31Ekw maak mwehch e aapahiipayikwaau uschiishikuwaau kaa iteyihtahkwaau. Ekw kaa nisituunuwaatwaau Jesus. Sischikuuch maak chii uhchi paasikuwaapameuch. 32Ekw maak kaa ititutwaau, “Taapwe chichii miyeyihtenaanuu chitehiinaahch e ati nisituhtamuhkw taanite kaa itwemakaniikupane Chishemanituu utayimuwin anite kaa aayimuumaakanuut kaye taan kaa ishi wiihtamaakuyihkw mekwaach kaa pimuhteyihkw anite meskanaahch.”
33Chii pisikuuch ekw tiiwehch kaau kaa ituhtetwaau anite Jerusalemihch chechii wiihtamuwaatwaau chischinuhamuwaakanh. Kaa miskawaatwaau aniyuu kaa peyakushaapuyich chischinuhamuwaakanh kaye kutak aweyuu e chii maausikuwiiwaakupanen. 34Ekw kaa itikutwaau, “Taapwe wesin chii wanishkaau Utipeyihchikeu, wesh chii nuukushiishtaakuu Simon.” 35Ekw kaa wiihtahkwaau wiyawaau taan kaa ispayiyich mekwaach anite kaa pimuhtetwaau meskanaahch kaye maak aniyuu kaa pahkwenaayich aaihkunaau anit kaa uhchi chischeyimaatwaau e aawiyich Jesus.
Jesus kaa nuukushiishtuwaat uchischinuhamuwaakanh
Matthew 28.16-20; Mark 16.14-18; John 20.19-23; Acts 1.6-8
36Mekwaach maak e aayimuumaatwaau Jesus, chii uhchi nuukusiyuu mekwesiinuu anit e ihtaatwaau. Ekw kaa itikutwaau, “Chiyaameyihtamukw.” 37Ekw naashch kaa kushkupayitwaau kaye chii sechisuuch, Chiipai uu niwaapamaanaan chii iteyihtamuch. 38Ekw kaa itikutwaau Jesus, “Chekwaan wehchi naashch mukushkaateyihtamekw kaye wehchi mista aanuwehtamekw. 39Pechi kanawaapahtamukw maa nitihchii kaye nisit chechii uhchi cheshtinaahuyekw mitun taapwe niya e aawiyaan. Pechi nituu memetininikw wesh chiipai taapaa ayaau wiyaasuwiniyuu maak uskanh taan e ishi waapamiyekw niya e ishi ayaayaan.” 40Iskutak Jesus kaa chiishi ayimit chii waapahtiyeu utihchii kaye usith. 41Yaapach maak namui taapwe uhchi taapwehtamiyuu Jesus e aawiyich, kaa ishpish miyeyihtahkwaau kaye kaa ishpish mamukushkaateyihtahkwaau. Ekw kaa kakwechimikutwaau, “Ihtakun aa chekwaan e miichinaanuuhch.” 42Kaa miyaatwaau namesa e chii takasuyich. 43Kaa naanaakachihaatwaau mekwaach e miichisuyich. 44Ekw kaa itikutwaau, “Eukw maak uu kaa ishi waawiihtamaatakuch eshkw mekwaach e chii wiicheutakuch kaa itweyaan, cheshtinaash kata tipipayuu misiwe e ishi aayimuumikuyaan anite Moses uwiishuwewinihch kaye anite umasinahiikaniwaahch aniyehkaa uchischiwehiichesuuch, kaye David unikamuwinihch.”
Jesus maahchishtai kaa ishi chiskutamaachet
45Ekw uyuu kaa ishi wiihtamuwaat chechii piyekasch nisituhtamiyich taan e ishi wiihtamaachemakaniyich Chishemanituu utayimuwinihch. 46E itaat, “Itashteu Christ yaaitei che wiisacheyihtamukupane, ekw maak kaau che wanishkaat nipuwinihch uhchi chii nishtuchiishikaayiche. 47Ekw maak chipaa waawiihtamuwaakanuuch misiwe e itiskaanesitwaau awenichii chechii kweskaatisiitwaau kaye chechii wepeyihtamuwaakanuutwaau umachihtwaawinawaauh niya pechi naashitwaawenich. Jerusalemihch maak niishtam chika uhchi mishihtepayuu uu che ishi waawiihtaakanuuhch. 48Chiyawaau maak chichii waapahtenaawaau taan kaa ispayihch, chechii wiihtamuwekuch kutakach awenichii. 49Ekw maak che pechi itishahamaatakuch an Kaa payehchisiit Ahchaahkw aniyuuh Nuuhtaawii kaa itwet cheshtinaash che pechi itishahwaat. Ashuwaapikw maak anite Jerusalemihch paatish chii utihtahukuyekwe suuhcheyihtaakusuwin kihchikiishikuhch kaa uhchipayihch.”
Jesus kaa uhpiskaat
Mark 16.19, 20; Acts 1.9-11
50Iskutak maak kaa ishi chischinuhtahaat peshuch anite ihtaawiniyuu Bethany kaa ishinihkaateyich, ekw kaa uhpinischeyit e shaweyimaat. 51Eshkw maak mekwaach e shaweyimaat ekut kaa uhchi nakataat, kihchikiishikuhch kaa ishi uhpiskaat. 52Ekw anichii chischinuhamuwaakanich chii nuuchiishtuweuch Utipeyihchikeu ekw kaau kaa chiiwetwaau Jerusalemihch naashch e miyeyihtahkwaau. 53Muush maak chii ihtaauch anite chisheayimiheukamikuhch e maamihchimaatwaau Chishemanituu.
S'ha seleccionat:
Luke 24: crjrNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.