JON 1
1
A Leoi mwasoana
1Tomue siu God mo bei teu na ure, a Leo u toga beno; ingeie u toga mei God, ko ingeie God. 2Lo qatagigi redu, a Leo hi u toga tamwere mei God. 3I God u vei na gineu doluegi gina Leo hi; hatie gineu lo ure ve i God he taure tea. 4A mwasoana hi u toga mei God, ko a mwasoana hi mo voragi na leleo lawe na sinobu doluegi 5A leleo hi mo leleo lolo dodogi, ko a dodogi he qoragi leie tea.
6I God u hora na nona tangaloi vanai, a henana i Jon. 7Ingeie hi u vanai huri ve na laqagi matamwasaragi na leleo lawe na sinobu, siu ve a tangaloi doluegi rain rongo na huri na leleo ko ram ladohogo. 8Ingeie sibona hate leleo hi; ingeie mo vanai huri ve na laqagi matamwasaragi na leleo hi. 9A leleo hogo hi nge ngaha, a leleo hi mo vanai sulolo ure ko mo leleohagi na tangaloi doluegi.
10A Leo u toga lolo ure. I God u vei na ure gina Leo hi, nge a tangaloi talo ure ra he iloe tea. 11Ingeie u vanai sulo vanuana sibona, nge a nona sinobu sibona ra he lai vurugeginie tea. 12Nge lalavasigi rau lei vurugeginie ko rau ladohogo lune; siu ingeie u sireginire ve rain voragi re netui God. 13Ingere ram voragi re netui God, hate mwere na vavine mo bava na maresu, sige huri na taraniana nona mwera, nge huri na taraniana noi God.
14A Leo hi mo voragi tangaloi ko mo toga lolo livugada, u horo mangadi gena lologarea ko a hogo. Igamai gau lehi na nona gareana. A gareana hi mo vanai deni Netui Mama gatagale hogosie.
15I Jon u laqagi matamwasaragi hurie. Ingeie mo ngaragi lue vena, “A tangaloi hi nge ngaha neu nam laqagi hurie tavohe hi ineu nam veve vena, ‘Ingeie mo vanai lo taguku, nge ingeie u lawua liueu, huri ingeie u toga tomue siu neu nam bei vora.’ ”
16Huri ingeie u horo gina lologarea ko a hogo doluegi noi God, ko mo bete na tabeana lawe gide tangaloi mo hivo lalangi lune. 17I God u bete na Leo hora lui Mosis; nge a lologarea ko a hogo ru vanai lui Jisas Kraes. 18A tangaloi gatagale he lehi God tea vohogi. Nge i Netui Mama hogosie, ineie God, ko mo toga lo mwarasai Tamana, ingeie u haharaginie lawe gide.
A leo noi Jon Garuhigogona
19Nge ngaha a leo hogo huri Jon lune ira tomtomuegi lo vanue Jerusalem rau horara tangaloi lalakogi ko ira Livaet lawea ve rain huie vena, “Iniko hine?” 20I Jon he susu tea ve vin duvi, ne mo veve lo ute lawua vena, “Ineu hatie Kraes.” 21Mo rovo ingere ram huie vena, “?Siu iniko ihine? ?Wa iniko Elaeja?”
I Jon mo duvi vena, “Hatie, ineu hatie.”
Ingere ram huie vena, “?Wa iniko a Tangaloi veve rarai hi?”
Ingeie mo duvi vena, “Hatie.”
22Siu ingere ram veve vena, “?Iniko gon veve lawe gamai vei iniko ihine, ve gamai gain lei na duvi leogi vano taligu lawe na tangaloi ngerehi ram hora gamai. Iniko gon veve na hava gineu hurigo sibomu?”
23I Jon mo duvi vena, “Ineu ngaha hi: ‘A diloi hine gatagale mo waregi lo vanue vurogi mo veve vena: Nen vai vovohoigi na matahalai Huqe!’ ” (Nge ngaha hi a tangaloi veve rarai i Aesaea u veve.)
24Lavasigi dena tangaloi hi rau horara ingere a Varise. 25Ingere ram hui Jon ram veve vena, “?Tare ve iniko hatie Kraes, sige Elaeja, sige a Tangaloi veve rarai hi, iniko gom garuhigogonagi na tangaloi huri hava gineu?”
26I Jon mo duvi vena, “Ineu nam garuhigogonagi na tangaloi gena wai; a tangaloi gatagale mo labe lolo livugemiu, nge igimiu ne he iloe tea. 27Ingeie mo vanai lo taguku, nge ineu na he tatarise tea ve nain riqe na garoi nona sandel.”
28A gineu ingere ngaha doluegi ram rovo vanai lolo vanue Betani, lo tavului wai Jodan, aiehi Jon u garuhigogona ginire tangaloi.
I Netui Sibsib bulei God
29Maraga robongi i Jon mo lehi Jisas mo vanai lobena ko mo veve vena: “Ne ngaha i Netui Sibsib bulei God, ngehi a rugurugu mo lai vohogi na galegaleasi nora tangaloi talo ure! 30A tangaloi hi ineu nam laqagi hurie, nau veve vena, ‘A tangaloi mo vanai lo taguku, ingeie u lawua denieu, huri ingeie u toga tomue siu ineu na bei vora.’ 31Ineu na he iloe tea ve ingeie ihine, nge ineu nam vanai nam garuhigogona ginire gina wai huri ve ineu nam haharaginie lawera duvi Israel, ve ingeie ihine.”
32Ko i Jon u laqagi matamwasaragi taligu vena: “Ineu nau lehi na Vui mo himei den eulu mwere na rangamea ko mo toga lune. 33Ineu na he iloe tea ve ingeie ihine, nge i God hi u horau ve nain garuhigogona ginire gina wai, nge mo veve laweau vena, ‘Iniko goin lehi na Vui vin himei ko vin toga lo ului hine; ingeie hi vin garuhigogonagi na tangaloi gina Vui Gogona.’ 34Ineu nau lehi na gineu hi ko nam laqagi mata mwasaragi lawe gimiu ve ingeie i Netui God.”
I Jisas mo tauvuigi mo warera nona rorongtagi
35Maraga robongi i Jon mo labe aiehi taligu mena nona rorongtagi gairue, 36mo lehi Jisas mo dige mo vano, me mo veve vena, “Nge ngaha i Netui Sibsib bulei God!” 37A rorongtagi gairue hi rom rongoe mo veve mwerehi ko rom Huri Jisas.
38I Jisas mo tudori, mo lehire rom hurie, mo huire vena, “?Igimiru nerom tarani na hava gineu?”
Ingere rom duvi vena, “?Rabae, gom toga logo?” (A leo naha “Rabae” lo noda leo vena, “Huhui.”)
39Ingeie mo duvi vena, “Nero vanai nero leo.” Siu ingere rom vano meie ko rom lehi na tanona ko rom toga meie lolo rani hi. Bataha a aho gaivesi lo matainaho vano.
40A tangaloi gatagale denire hi ru rongo Jon ko rom vano mei Jisas a henana i Andru, i tuei Saemon Bita. 41Tomuegi redu i Andru mo haqe tuana i Saemon ko mo veve lawea vena, “Igamai gau haqe i Ratahigi Vurei!” (A leo ngaha a iloilogi lo leo nora duvi Israel ve, “i Ratahigi Vurei.” Lo leo nora ta Kris, a iloilogi huri ve, “i Kraes.”)
42Mo rovo ingeie mo lai Saemon lawe Jisas. I Jisas mo lelehurie ko mo veve vena, “Iniko i Saemon, i netui Jon. A henamu vin ware ve i Kifas.” (Kifas a iloilogi vei Bita, nge a iloilogi lo noda leo ve a, ‘Vatu Toga.’)
Jisas mo ware Vilib ko i Nataniel
43Maraga lo rani tuegi i Jisas u tarani ve vin vano lo Kalili. Nge mo haqe Vilib ko mo veve lawea vena, “!Gon hurieu!” 44I Vilib ingeie dena vanue Betsaeda, a togagi venue hi Andru ko i Bita ru toga aie.
45Siu i Vilib mo haqe Nataniel ko mo veve lawea vena, “Igamai gau haqe na tangaloi hi i Mosis u uli hurie lolo bugui Leo hora ko ira tangaloi veve rarai rau uli hurie. Ingeie i Jisas, netui Josev, dena vanue Nasaret.”
46I Nataniel mo huie vena, “Wa gineu garea tea ve vin vanai dena vanue Nasaret?”
I Vilib mo duvi vena, “Gon vanai gom leo.”
47I Jisas mo lehi Nataniel mo vanai lobena, ko mo veve hurie vena, “Leo, ingeie a tangaloi a duvi Israel hogo; hate kalikeli meie!”
48I Nataniel mo huie vena, “Iniko gu iloau wuraha?”
I Jisas mo duvi vena, “Ineu nau lehigo tavohe hi gom toga lovavai duledule, tomue siu i Vilib mo veve lawego hurieu.”
49I Nataniel mo duvi lawea vena, “Huhui, iniko i Netui God! Iniko a Ratahigi a duvi Israel!”
50I Jisas mo veve vena, “Wa iniko gom ladohogo huri neu nau veve lawego ve nau lehigo tavohe hi gom toga lovavai duledule? Goin lehi na gineu rau lalawua liu denie ngaha!” 51I Jisas mo veve lawera vena, “A hogo, a hogo, nam veve lawe gimiu vena igimiu nein lehi na mahava vin waga ko ira engsel gogona noi God rain hage eulu ko rain himei vuine lo ului Netui Tangaloi!”
S'ha seleccionat:
JON 1: HNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Bible Society of the South Pacific, 2013