San Juan 5
5
Tu'c paralíticu en Betesda
1Mit cʉs̈ it tu'c ma̱s̈ʉjw iwatcaway judíujat, mit Jesús nʉcs̈ pa Jerusalén. 2Mit Jerusalén itp tu'c nʉ'to'y tom ayé puerta mam inas̈ca borregujat. Ayé nʉ'to'y inʉ'jy hebreo-auni'c Betesda, mit ayé ijtʉu cinco corredorwájat. 3Mit jem icʉ́mnagaj may jayajwat tu'nijatway, winchat, cu̱s̈ujat mit paralíticujat, mit je'jat i-atsʉ̱ngap hasta itsugutwa'n ayé nʉ'. 4Ni'c inʉmgap ni'c it tiempu imanac tu'c ángel pa mam i-it ayé nʉ'to'y, mit i-actsugutp ayé nʉ'. Mit itsugutwa'n ayé nʉ', jeme tʉgʉjyʉ'cpay nʉ'jugum oytamp jaran de jʉmaygapa'tu enfermedáj ijtʉpay. 5Mit tsʉ̱nau jem tu'c jayau jeme tsʉ̱naway tu'nij treinta y ocho s̈iwitanu. 6Igui-is̈ Jesús mam icʉmna, mit iguijawij ni'c jego'cway itsʉ̱na wename, inʉjmau:
—¿Inwamp in-oytanwa'n?
7Iguipo'n ayé jayau tu'nijway:
—Señor, tʉnga-aguep pʉn tʉs̈comámpay nʉ'to'yni'c itsugutwa'n ayé nʉ', mit mientras tʉnʉs̈p, jatu'c jayau tʉgʉjyʉ'cp.
8Jesús inʉjmau:
—Ca's̈ʉ'c, pʉc into'c, mit yo'y.
9Mit oytan jaran ayé jayau, mit ipʉc ito'c mit yo'y. Mit wejpu'n tu'c po'cs̈ans̈ʉjw. 10Mit cʉs̈ ayé judíujat iguinʉmgajau ayé jayau jeme oytanway:
—Jinap po'cs̈ans̈ʉ́jw. Ca-oy is̈tsʉm into'c.
11Je' ipo'ngʉs̈:
—Jeme tʉs̈ac-oytanway je'yu tʉs̈najau: “Pʉc into'c mit yo'y.”
12Mit cʉs̈ i-ucyo'tcau:
—¿Pʉn ayé is̈nʉjmaway: “Pʉc into'c mit yo'y”?
13Mit ayé jeme oytanway igajawiwu pʉn ayé, ni'c Jesús pichin mam i-it ayé jayaujuc tsʉ̱ngaway jem. 14Cʉs̈ Jesús ipa̱t ayé jayau templuni'c, mit inʉjmau:
—E'p ni'c mi-oytanway. Camjawat mal pi is̈camijnac tanti más mʉgʉcway.
15Ayé jayau nʉcs̈, mit i-ajque's̈cʉs̈au judíujat ni'c Jesús ayé igui-ac-oytanway. 16Mit jemni'c judíujat ipo'ctangau Jesús, mit iche'ngajau ilaj pa igui-ago'jcawa'n, ni'c Jesús iwat ayʉ̱́j cosajat po'cs̈ans̈ʉuni'c. 17Mit Jesús ipo'ngʉs̈:
—Tʉnte̱t Dios yos̈watp hasta jinap, mit ʉ̱ tʉyos̈watpey.
18Jemni'c judíujat más iwangau igui-ago'jcawa'n, caje'yu ni'c igawatu cuenta ayé po'cs̈ans̈ʉjw, po ni'c je' inʉm ni'c Dios ayé ite̱t, mit niwajtʉu as̈am Dios.
Dios imoy poder iway
19Mit Jesús ipo'ngʉs̈:
—Iyacs̈ta'cway tʉnʉmgʉs̈ap ni'c ʉ̱ Dios tʉs̈wáy mit ca-oyap tʉs̈wat neti ʉ̱jyu, po tʉnwatp lo que tʉn-e'pay iguiwat tʉnte̱t Dios, ni'c nu'pʉjʉn iwatpay tʉnte̱t Dios, we'ney ʉ̱ tʉs̈watwa'n. 20Ni'c tʉnte̱t Dios tʉs̈wamp, mit tʉs̈actu-e'p nu'pʉjʉn je' iwatpay, mit tʉs̈actu-e'páj cosajat más oymanajcatway pa mijchat pi nigu-épigʉjʉ. 21Ni'c as̈am tʉnte̱t Dios igui-acjutucta̱jcʉs̈ á̱nimajat mit imoygʉs̈p vida, we'ney ʉ̱ tʉnmoygʉs̈p vida pʉn tʉnwa'námpay. 22Ni'c tʉnte̱t Dios nepʉn igajuzga̱tp, po ʉ̱ tʉs̈moy poder pa tʉs̈-arregla̱twa'n nu'pʉjʉn, 23pa nu'pʉjʉn jayajwat ma tʉs̈-oyninʉmgac ʉ̱ as̈am igui-oyninʉ́mga tʉnte̱t Dios. Jeme tʉs̈ca-oyninʉmpay ʉ̱, iga-oyninʉmpey tʉnte̱t Dios jeme tʉs̈ajyu'tway.
24’Iyacs̈ta'cway tʉnʉmgʉs̈ap: Jeme imarapay lo que tʉnyʉmpay, mit icupʉcp Dios jeme tʉs̈-ajyu'tway, ijtʉp vida jeme cacʉs̈ámpay. Mit catsʉ̱náj condena̱tic mit cajatsʉ̱nap as̈am o'guic, po ijtʉnup vida. 25Iyacs̈ta'cway tʉnʉmgʉs̈ap: Cojáj hora, mit coyway hora, cuandu o'guijcatway imaraugáj icotswa'n Dios iway, mit jeme imaraugámpay, itcʉjʉ́j vida. 26Ni'c as̈am tʉnte̱t Dios je'yu iyacp vida, we'ney tʉs̈moy pa tʉs̈yacwa'n vida ʉ̱. 27Mit we'ney ʉ̱ tʉs̈moy poder pa tʉ-arregla̱twa'n, ni'c ʉ̱j ayé tʉjatway jayau. 28Camnigu-épigʉjʉ ni'c tʉnʉmgʉs̈au cojáj hora cuandu nu'pʉjʉn tsʉ̱ngapay á̱nimacʉtʉm tʉs̈maraugáj tʉs̈mucotscʉs̈wa'n. 29Mit pichingáj á̱nimajat. Jeme iwatcaway oy jutucta̱jcáj pa i-itcʉjʉwa'n vida, po jeme iwatcaway mal jutucta̱jcáj pa iguicondena̱tcawa'n.
Lo que iwatpay Cristu
30’Ʉ̱jyu ca-oyap tʉs̈wat neti. As̈am tʉs̈marau, wename tʉ-arregla̱t. Mit tʉ-arregla̱tp yacs̈ic ni'c tʉngache'mp pa tʉs̈watwa'ñ-jyu tʉnwampay, po pa tʉs̈watwa'n lo que iwampay tʉnte̱t Dios jeme tʉs̈ajyu'tway. 31Ni'c te ʉ̱jyu tʉ-actujawigʉs̈p lo que tʉnwatpay, inʉmgáj ni'c caje' iyacs̈ta'cway lo que tʉnyʉmpay. 32Itp jatu'c jeme is̈actujawigapay lo que tʉnwatpay, mit tʉnjawip ni'c iyacs̈ta'cway lo que inʉmpay de ʉ̱. 33Mijchat inajyu'tcau mandajwatpajyat pa mam itsʉ̱na Juan, mit je' is̈actujawigawey lo que iyacs̈ta'cway. 34Po ʉ̱ tʉnganesita̱tp nejʉmay jayau inʉmámpay nat ʉ̱ tʉtsʉ̱na, po tʉ-actujawigʉs̈p ayʉ̱́j pa pi nisalva̱tcʉjʉ. 35Juan as̈am tu'c jʉmbola jeme tininway mit jeme ta'cs̈way, mit mijchat pa tu'c tiempujyu inwangau is̈nijatcawa'n ayé luz inʉmdacyo'yway. 36Po ʉ̱ tʉnaguep tu'c jeme más ijawipay nat ʉ̱ tʉtsʉ̱na, mit ayé más mʉjninʉmic que Juan. Ni'c tʉnte̱t Dios tʉs̈moy tu'c yos̈ pa tʉs̈cʉs̈wa'n, mit ayé yos̈ nije'yu tʉnwatpay, is̈actujawigap ni'c tʉnte̱t Dios tʉs̈ajyu't. 37We'ney tʉnte̱t Dios jeme tʉs̈ajyu'tway, ayé is̈actujawigap nat ʉ̱ tʉtsʉ̱na, mit mijchat nunca inganimaraugap icots, ne ingani-e'pcap nat ique's̈, 38ne inganimutangap injo̱tni'jcat lo que inʉmpay, ni'c ingacupʉjcap ayé i-ajyu'tway je'. 39Inche'ngap mam itsʉ̱na ja'yic Dios ilibruni'c, ni'c mijchat is̈jawiga jem is̈aguepca vida jeme cacʉs̈ámpay, po ayé tsʉ̱napay ja'yic is̈actujawigap pa is̈cupʉjcáj ʉ̱. 40Po ingawangap inmingawa'n mit ʉ̱ pa is̈aguepcawa'n vida jeme cacʉs̈ámpay.
41’Tʉngache'mp pa jayajwat tʉs̈-oyninʉmgáj. 42Po tʉ-is̈capcʉs̈p ni'c ingawangap Dios mit nu'pʉjʉn injo̱jtat. 43Tʉmín ni'c tʉnte̱t Dios tʉs̈ajyu't, mit ʉ̱ is̈capʉctsougap. Po te jatu'c jayau je'yu nimanda̱jtʉp pa imi'nwa'n, ayé impʉctsougáj. 44¿Nat incupʉjcawa'n? ni'c mini-oyninʉmgʉjʉp mijchatu mit ingache'ngap pa is̈-oyninʉmgáj ayé Dios tu'gujyuway. 45Camnʉmgawit ni'c ʉ̱ tʉ-acusa̱tcʉs̈áj mit tʉnte̱t Dios. Ayé ley ija'yway Moisés is̈-acusa̱tcap, mit mijchat ayé incupʉjcap. 46Ni'c te incupʉjcau ayé ley ija'yway Moisés, is̈cupʉjcájate ʉ̱, ni'c je' ja'y pa is̈-is̈capcáj ʉ̱. 47Po te ingacupʉjcap ija'yway, ¿natpaj is̈cupʉjcawa'n lo que tʉnyʉmpay?
S'ha seleccionat:
San Juan 5: PSNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Nuevo Testamento en Popoluca de Sayula © Sociedad Bíblica de México, [1969].