Yohana 2
2
Kalima ma nywomirok i Kana
1I ndelo mar'adek kalima ma nywomirok obedo i tindi ma Kana i Galili. Min Yesu oyido nikenyo 2aka Yesu kodi jofonjirok pere bende oyido olwoŋi jo i kalima no. 3Munyo vini je orumo, min Yesu owaco rigo ni, “Kole vini orumo rijo.” 4Yesu odwoko ni, “Dhakodwoŋ, raŋo ithuyan gi wac me? Kole ndir paran fodi k'otundo.” 5Gikenyo min Yesu owaco ri joma poko cemo gi gir'amadha ni, “Tim win gimoro je ma go owaci riwin.” 6Joyuda jonitie gi kite ma logo, riameno kenyo oyido nitie degi aucel ma telin, aka kisi acel nwaŋo dwoŋ ma romo ayigin aŋwen kosa aucel. 7Yesu owaco ri jotic ni, “Ere poŋ win pi i degi no.” Jopoŋo degi no gi pi kiri malo ni cut, 8to waco rijo ni, “Onyo twom win pi moro witer ri jadwoŋ ma telo kalima.” Jono jotero rigo pi no, 9to go bilo, aka onwaŋo ni oyido otieko lokere vini. Go k'oŋeyo kama vini no owok'iye to jotic ma jotwomo pi ama joŋeyo. Gikenyo go olwoŋo won kalima, 10to waco rigo ni, “Kole dhano je kutho pen poko vini maber tektek mere, aka ka wendo jotieko medho m'oromo aka nyaka poko vini ma ndir je. To in ikano vini maber tektek mere tundo pama!”
11Yesu otimo gir'aura marapena me i Kana i Galili; kenyo go onyuth'iye dwoŋ pere, aka jofonjirok pere joyeyo go.
12 #
Mat 4:13
Munyo gino orumo, Yesu kodi yokimere, gi wutmin kodi jofonjirok pere jokidho Kapernaum, to jobedo kenyo ndelo manok.
Yesu kidho i Ot pa Were
(Mat 21:12-13; Mar 11:15-17; Luk 19:45-46)
13 #
Wok 12:1-27
Munyo ndir oyido orikere ma poyo kalima ma Kadho, Yesu okidho i Yerusalem. 14Go onwaŋo ji jotana gigipiny i Ot pa Were paka: Dhok, rombo, kodi akurin aka joma wilo pesa oyido jobedo dho meza pajo. 15Gikenyo go omino adasa to riemo woko le je i Ot pa Were, gi rombo kanyacel gi dhok; aka oywoyo woko pesa to ŋilo woko mezin pa jowili pesa; 16Ooro joma tana akurin ni, “Kwany win woko akurin no ka! Wikiri wiloki Ot pa Baba katale!” 17#Zab 69:10Gikenyo jofonjirok pere jopoyo gim'ondiki ni, “Maro Ot perin, a Were, waŋ i cunyan pa mac.”
18Rumacen Joyuda jodwoko bonge gi penji ni, “Gir'aura aŋo m'inyalo timo ma nyutho wan nike initie gi meni ma timo gime?” 19#Mat 26:61; 27:40; Mar 14:58; 15:29Yesu odwoko ni, “Kedhi win woko Ot pa Were me aka i hongo ma ndelo adek abino gero kendo.” 20Jopenjo go ni, “Ot pa Were me m'otero wan oro piero aŋwen g'acel gipi gero, am'iwaco n'ibino gero i ndelo adek won kende?”
21To Ot pa Were ma Yesu oluwo kwoŋe oyido obedo delkwoŋe ayino. 22Am'omiyo munyo go ocerino kwoŋ jom'otho, jofonjirok pere jopoyo nike go oyido waco gino ayin; gikenyo to joyeyo gim'ondiki kodi wac ma Yesu owaco. 23Munyo go fodi ni Yerusalem i kalima ma Kadho, ji madit joyeyo nyingi go munyo joneno ranyuth m'otimo. 24To Yesu k'onyuthere kamaler rijo kwoŋbedo go oyido oŋeyo dhano je. 25Oyido ongoye kony nyatoro waco rigo gimoro kwoŋ jo rupiri go won oyido oŋeyo gima ni cuny jo.
S'ha seleccionat:
Yohana 2: DHOCDC
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Dhopadhola DC Bible © Bible Society of Uganda, 2018.