Gɔ̃mèjèje be Xoma 9
9
Mawu ɖùzò ku Nɔà
1Mawu tu sì na Nɔà ku èviawo, gblɔ̃ na wo be: “Mì jì ɖo e ji eye mìa sùgbɔ ne mìa ɖɔ ànyigbã kpata ji. 2Mì la nyi vɔ̃vɔ̃ ku ŋɔji donu na èlãwo kpata lè ànyigbã ji ku àyamèxèviwo kpata. Ènu ɖekpekpe kè le hùã lè ànyigbã ji ku èsì mè a, èlãwo kpata lè mìa simè. 3Ènu ɖekpekpe kè lè àgbè le hùã, la nyi mìabe ènuɖùɖu sìgbè àlekè ègbe mumu ya lè na mì vɔ̀a nène, mù sɔ ènuwo kpata na mì. 4Vɔ̀ gãkea, mì mu la ɖù èlã àgbèagbe ò, e gɔ̃mè ye nyi be èlã kè mè èhũ lè ò. 5Eye nènea ke be nyi ne mìabe èhũ, kè nyi mìabe àgbèa, mù la biɔ yebe èhlɔ̃ èlã ɖekpekpe eye mù la gbà biɔ àgbètɔ na àmè sia àmèa, mù la biɔ ɛ̀ nɔ̀via be àgbè be èhlɔ̃.
6Àmè kè kɔ̀ àgbètɔ be èhũ ɖo ànyi a,
wo la kɔ̀ ye cã be èhũ ɖo ànyi; ɖoa,
ɖo Mawu be nɔ̀nɔmè mè ye Mawu wɔ̀ àgbètɔ.
7Kè mìawo ya mì jì ɖo e ji ne mìa sùgbɔ, mì hùã ɖo e ji lè ànyigbã ji eye mìa ɖɔ ànyigbã ji.”
8Mawu gblɔ̃ na Nɔà ku èviawo be: 9“Mù la ɖùzò ku mì, kudo mìabe jìjimèviwo, 10gbàkudo ènu àgbèagbèwo kpata kèwo lè gbà ku mìa: xèviwo, àxomèlãwo, ègbemèlãwo kpata kèwo lè gbà kudo mìa, kpoe ɖe a, ènu kèwo kpata to lè àɖakàhũa mè kudo mìa, ègbemèlãwo ŋutɔ cã. 11Ma ɖùzò ku mì: ŋutilã ɖekpekpe mu la gbà kpɔ cɔ̃crɔ̃ to èsì gbɛ̀lu ɖɔɖɔ mè ò; èsìɖɔɖɔ gbɛ̀lu mu la gbà ɖè ànyigbã gbèɖe ò.” 12Mawu gblɔ̃ be: “Kpɔɖa jèsì kè ma sɔ ɖo èkpe zòɖùɖu kè mù wɔ̀ ku mì ku ènu àgbèagbe ɖekpekpe sɔ na jìjimèwo kpata kèwo gbãnà ye kè. 13Mù sɔ àpe ànyiɖohùɛɖo dà ɖo lilikpoa mè ne bèa nyi zòɖùɖu be jèsì lè ènyè ku ànyigbã dòmè. 14Wàlɛbɛ kè mù la na lilikpowo la va àyamè lè ànyigbã ji eye wò la kpɔ ànyiɖohùɛɖo la ze lè lilikpoa mèa, 15ma ɖoŋù zòɖùɖu kè lè ènyè ku mì kudo ènu àgbèagbe ɖekpekpe dòmèa ji; èsìwo mu la gbà va trɔ èsìɖɔɖɔ gbɛ̀lu sɔ crɔ̃ ŋutilã gbèɖe ò. 16Ànyiɖohùɛɖo a la nɔ̀ lilikpoa mè eye mù la kpɔ ɛ̀ sɔ ɖoŋù zòɖùɖu kòkòɖàbì lè Mawu ku ènu àgbèagbe ɖekpekpe dòmèa, ŋutilã ɖekpekpe kè lè ànyigbã jia.” 17Mawu gblɔ̃ na Nɔà be: “Ekèa ye le nyi zòɖùɖu kè mù wɔ̀ ku ŋutilã ɖekpekpe kè lè ànyigbã jia be jèsìdo.”
Nɔà be èviwo: Sɛm, Cam ku Jafɛ̀t
18Sɛm, Cam ku Jafɛ̀t wo nyi Nɔà be èvi kèwo to lè àɖakàhũa mèa; Cam, ye nyi Kanàn be ètɔ. 19Wo, àmè ètɔ̃awo ye nyi Nɔà be èvi ŋusùwo. Woabe jìjimèviwo ye gbã kpe ànyigbã ji.
20Nɔà ye nyi àgblèdàtɔ cucugbã tɔ̀a. E do vɛ̃ti, 21eye e nù vɛ̃a, be mu ì eye e ci àma-àma lè yebe gòxɔa mè. 22Kanàn be ètɔ, Cam kpɔ àma mè na ètɔa eye e yì to è na nɔ̀viawo lè xixe nu. 23Sɛm ku Jafɛ̀t wo sɔ Nɔà be àwùgãa, ekè wo sɔ dà ɖo woabe àbɔta, wo zɔ̃ ŋùgbe-ŋùgbe, sɔ àwùa sɔ yì cɔ̃ woa tɔa be àma. Ekè wo trɔ ŋùkumè le kpɔ àfi bua, wo mu kpɔ woa tɔa be àma ò. 24Wàlɛbɛ kè àhà kɔ̀ na Nɔà eye be va nya ènu kè èvia dòmètɔ̀a wɔ̀a, 25E do àpa gblɔ̃ be:
“Kpɛ̃sɛ̃ ne nɔ̀ Cam be èvi Kanàn ji,
ne bèa nyi kluviwo be kpɔ̀tɛ na nɔ̀viawo.”
26Sɔ kpea, e gblɔ̃ be:
“Sìtu ye nyi Tɔhonɔ̀, Sɛm be Mawu a,
ne Kanàn bèa nyi kluvi na ɛ̀!
27Na Mawu be àsi ne nɔ̀ Jafɛ̀t ji,
ne bèa nɔ̀ Sɛm be gòxɔawo mè tɛ̀gbɛ̀,
eye Kanàn bèa nyi woabe kluvi.”
Dùkɔ̃wo be xoma: jìjimè hɛ̃nu xoma
28Lè èsìɖɔɖɔ gbɛ̀lua yomè a, Nɔà nɔ̀ àgbè èpè èkà ènyi takpo ci èwo (350). 29Yebe àgbè nɔ̀ zã kpata nyi èpè èkà èwì vɔ ètɔ̃ takpo ci èwo (950) eye e ku.
S'ha seleccionat:
Gɔ̃mèjèje be Xoma 9: GEN
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Mina Bible © Bible Society of Togo, 2014.