Luk 10
10
Yeezu Naŋ Toŋ O Potuuribo Lezaata Ne Pie
1A ŋaa puoriŋ, a Daana da iri la noba lezaata ne pie mine meŋ, a da toŋ ba bayi bayi ka ba daŋ gaa a tenne ane a ziiri na zaa o meŋɛ naŋ boɔrɔ gaabo. 2O da yeli ko ba la, “A weɛ boma maalɛɛ la yaga, kyɛ ka a tontonema ba seŋ bon, azuiŋ, yɛ sɔre a weɛ boma Daana ka o toŋ tontonema ka ba gaa te de a weɛ boma. 3Yɛ gɛrɛ. Yɛ nyɛ, N tonɔ yɛ la aŋa pebilii ka yɛ yi te kpɛ gboŋgboe poɔ. 4Yɛ ta de ganlɔge, bee woɔ, bee nɔɔteɛ, a kyɛ ta puori neɛzaa a sobiriŋ. 5Yiri na zaa poɔ yɛ naŋ wa kpɛ, yɛ daŋ yeli, ‘Ka maaroŋ be a yiri ŋa poɔ!’ 6Ka neɛzaa wa bebe a seŋ ne a maaroŋ nyaabo, a yɛ maaroŋ na be la o soba zie, kyɛ ka lɛ naane a yɛ maaroŋ na leɛ wa la yɛ zie. 7Yɛ maŋ kpeɛrɛ a yiri na poɔ a dire kyɛ nyuuro bonna a yideme naŋ korɔ yɛ, bonso, tontonɔ zaa seŋ ne la o san-yɔɔ. Yɛ ta lɔŋnɔ yie. 8Ka yɛnee maŋ wa kpɛ teŋɛ zaa ka a noba wa tuori de yɛ, yɛ kpeɛrɛ a be a dire bonna zaa ba naŋ ko yɛ. 9Yɛ saŋna a baalba naŋ be a be, kyɛ yeli ko ba, ‘A Naaŋmen naaloŋ wa peɛle yɛ la.’ 10Kyɛ ka yɛnee wa te kpɛ teŋɛ kanzaa, ka o noba ba de yɛ saanoŋ, yɛ yi gaa a sobie zu te yeli: 11‘A yɛ teŋɛ uuruŋ naŋ mɔge a te gbɛɛ, te piŋ a la ane posãã bare ka a do yɛ. Kyɛ yɛ baŋ ka: a Naaŋmen naaloŋ taɛ la.’ 12Maa yeli ko yɛ, a bebiri na daare, a Sodom teŋɛ deme na nyɛ la nembaalonzoe gaŋ a teŋɛ na deme.”
Weɛbo La A Tenne Na Naŋ Ba Leɛ A Eebo
(Mat 11:20-24)
13“Fo yuori la we, Korazen! Fo yuori la we, Bɛsaada! Ka a yelkpeɛne ama naŋ e yɛ poɔ da e Taaya ane Sedɔŋ poore, aŋa a tenne ama noba da leɛ la ba eebo saŋ zaa, a su kparre ba naŋ sɛ ne boɔre, a kyɛ zɛ tɛmpɛloŋ a zeŋ ne.#10:13 Neɛ naŋ su kparoo ba naŋ sɛ ne boɔre kyɛ zɛ tɛmpɛloŋ: A Gyuumine poɔ, ka neɛ wa su kparoo ba naŋ sɛ ne boɔre kyɛ zɛ tɛmpɛloŋ wulee posãã-kpoŋ o naŋ taa. 14Kyɛ a sɛrɛɛdiibu daare Naaŋmen na zo la a Taaya ane Sedɔŋ nembaaloŋ gaŋ yɛ. 15Kyɛ fõõ Kapanum,
fo teɛre ka ba na zɛge fo la do ne saa be?
Ai, ba na sigri fo la te eŋ dazugovũũ poɔ.”
16“Soba na zaa naŋ kyɛlle yɛ yɛlɛ, kyɛllɛ la N yɛlɛ, kyɛ soba na zaa naŋ zagre yɛ, zagre la N yɛlɛ, kyɛ ka soba na zaa naŋ zagre ma zagre la neɛ na naŋ toŋ ma.”
A Potuuribo Lezaata Ne Pie Naŋ Leɛ Wa
17A potuuribo lezaata ne pie da leɛ waɛ la ne kyelloo a wa yele, “Daana, a fo yuoriŋ, haali a sefaare sage la te noɔre!” 18Ka O yeli ko ba, “N nyɛ la Setaana ka o yi sazu a le teŋɛ a ŋa saa naŋ nyegre. 19Yɛ nyɛ, N ko yɛ la kpeɛ̃õ ka yɛ na neɛrɛ weere ane nanne, kyɛ taa faŋ a dɔndɔmɔ kpeɛ̃õ zaa zu, ka yelfaa zaa koŋ pɔge yɛ. 20Anealɛzaa, yɛ ta kyellɛ ne yɛ naŋ nyɛ faŋ sefaare zu, kyɛ yɛ kyellɛ ne yɛ yoe naŋ sɛge a tenvelaa#10:20 Tenvelaa: A Kiristabiiri mine maŋ boɔle la a yelbiri ŋa ka ‘Dapare.’ gane poɔ.”
Yeezu Naŋ Kyellɛ
(Mat 11:25-27; 13:16-17)
21A gogo na poɔŋ, Yeezu da taa la popeɛloŋ a Vooroŋ Soŋ poɔ a pãã yeli, “N Saa, a sazu ne teŋɛ Daana, N puoro fo la bareka ne fo naŋ sɔgle a yɛlɛ ama a yɛndeme ane baŋnema zie, kyɛ iri a wuli bilɛɛre. Õõ, N Saa, a fo poboɔbo sereŋ la a lɛ. 22A N Saa de la a boma zaa ko ma. Neɛzaa ba baŋ neɛ na a Bidɔɔ naŋ waa, ka a Saa yoŋ naane. Neɛzaa meŋ ba baŋ neɛ na a Saa naŋ waa, ka a Bidɔɔ yoŋ naane ane banaŋ a Bidɔɔ naŋ boɔrɔ ka O de a Saa wuli ba.”
23A Yeezu pãã da leɛ kyaare la a O potuuribo yoŋ kyɛ yeli ko ba, “Banaŋ naŋ nyɛrɛ a yɛlɛ ama yɛ naŋ nyɛrɛ nyɛ la maaloo! 24Bonso, maa yele korɔ yɛ, Ŋmen-yelmanneba ane namine yaga da boɔrɔ la ka ba nyɛ a yɛlɛ ama yɛ naŋ nyɛrɛ kyɛ da ba nyɛ a, a da boɔrɔ ka ba woŋ a yɛlɛ ama yɛ naŋ wono, kyɛ da ba woŋ a.”
A Sekpɔgre Naŋ Kyaare A Samareya Dɔɔ Meŋɛ
25Lɛ la ka a bege baŋna kaŋ da vaa-iri are ka o gyenne a Yeezu. O da soore la a Yeezu, “Wulwullo, boŋ ka a fere ka N e a nyɛ nyɔvore naŋ ba taa baaroo?” 26Ka Yeezu soore o, “Boŋ la ka ba sɛge eŋ a Naaŋmen begɛ poɔ? Fo maŋ sɔre ka boŋ?” 27Ka a dɔɔ yeli sɔge, “Nɔŋ a Daana fo Naaŋmen ne fo sukyiri zaa, ane fo seɛ zaa, ane fo faŋ zaa, ane fo yɛŋ zaa, kyɛ nɔŋ fo tɔ a seŋ lɛ fo naŋ nɔŋ fo meŋɛ.” 28Ka a Yeezu yeli ko o, “A yelmeŋɛ la a lɛ fo naŋ yeli. Erɛ a lɛ kyɛ fo na nyɛ la a nyɔvore naŋ ba taa baaroo.”
29Kyɛ a dɔɔ naŋ da boɔrɔ ka o wuli o mennoŋ la ka o da soore a Yeezu, “N tɔ la nembuo?” 30Ka Yeezu da yeli sɔge o, “Dɔɔ kaŋ la da yi Gyɛruzɛlɛm a sigre a Gyɛreko teŋɛ. Nannyig-kpeɛne mine da yi ŋmaa la a dɔɔ ŋa a faa o boma zaa, a yagre o bonsuuri bare a kyɛ ŋmɛ o gbɛre kyɛ te gɛrɛ. 31Ka Naaŋmen bagmaala kaŋ meŋ la lɛ a da tu a sori na waana, kyɛ o naŋ da wa nyɛ a dɔɔ naŋ gaŋ, o da bale o la bare kyɛ te gɛrɛ. 32A lɛ ne o zu la ka Levi boorɔ neɛ kaŋ meŋ te wa ta a zie na a dɔɔ naŋ gaŋ, ka o da bale a dɔɔ baala ŋa bare kyɛ te gɛrɛ. 33Kyɛ Samareya dɔɔ kaŋ meŋ da tu la a sori na waana, a wa nyɛ a dɔɔ ka o gaŋ, ka o nembaaloŋ zaa kpɛ o. 34O da gaa la a dɔɔ ŋa zie a te pore kãã ane tedãã waare a o felɛ,#10:34 Tedãã pore eŋ felɛ: A Gyuumine da maŋ pore la a tedãã eŋ neɛ fele ka ka o dare. a de pɛmɛ leŋ ne. O da de o la pare a doŋɔ o naŋ zɔ̃ɔ̃ zu, a taa o gaa ne zie kaŋ saama naŋ maŋ gaŋ ka ba te kaa o zie. 35A nyaazie daare, a Samareya dɔɔ da iri la warbie ayi ko a neɛ naŋ da kaara a zie a saama naŋ maŋ gaŋ kyɛ yeli, ‘De kaara ne a dɔɔ baala ŋa zu, ka maa wa leɛ wa, N na wa yɔɔ fo la sane na zaa fo naŋ na ŋmɛ o eŋɛ.’ 36A Yeezu pãã da soore la a nɔbaŋna: A noba bama bata poɔ, buo soba la waa a dɔɔ ŋa naŋ le a nannyig-kpeɛne nuuriŋ tɔ?” 37Ka a nɔbaŋna yeli, “A soba na naŋ zo o nembaaloŋ.” Ka a Yeezu yeli o, “Meŋ gaa te erɛ a lɛ.”
Yeezu Naŋ Gaa Maata Ne Mareya Zie
38A Yeezu ane O potuuribo naŋ da be a sobiriŋ gɛrɛ la ka ba da wa te kpɛ teŋɛ kaŋ poɔ, be ka pɔge kaŋ yuori naŋ di Maata da yi tuori de O gaa ne o yiri. 39A Maata da taa la yɔɔ ka o yuori di Mareya. A Mareya da wa zeŋ la a Yeezu zie a kyɛlle a yɛlɛ O naŋ yele. 40Kyɛ Maata naŋ da nyɛ ka o toma waa yaga o zie, lɛ la ka o da yeli ko a Yeezu, “Daana, fo ba nyɛ ka Mareya bare la a toma zaa ko N yoŋ be? Yeli ko o ka o wa soŋ ma” 41Kyɛ ka a Daana yeli sɔge o, “Maata, Maata, fo dɔɔnɔ la fo meŋɛ, a vɛŋ ka yɛlɛ yaga pigre fo; 42yeli yenaa yoŋ la ferɛ. A bonvelaa la ka Mareya kaa-iri, ka ba koŋ baŋ faa o yi o zie.”
S'ha seleccionat:
Luk 10: DNTTP
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
First New Testament in Dagaare Language © The Bible Society of Ghana, 2013.