Luk 13
13
Yɛ Leɛ Yɛ Eebo Bee Ka Yɛ Wɛ
1A saŋ na meŋɛ poɔ la ka noba mine naŋ da be a be da yeli ko a Yeezu lɛnɛɛ Pilato naŋ da ko a Galili noba mine naŋ da maala bagre ka ba zẽẽ ne a donne zẽẽ da pulli taa. 2Ka a Yeezu soore ba, “Yɛ teɛre ka a Galili noba bama a zubie ŋa naŋ da pɔge da e la yelbe-erebɛ gaŋ a ba Galili taaba zaa be? 3Ai, maa yeli yɛ, ka yɛnee ba leɛ yɛ eebo, yɛ meŋ zaa na wɛ la aŋa ba naŋ da wɛ lɛ. 4Bee a noba pie ne banii na a Silom daŋkyinkpoŋ naŋ da le ko; yɛ teɛre ka ba da e la faa yaga gaŋ a banaŋ zaa naŋ da kpeɛrɛ a Gyɛruzɛlɛm poɔ be? 5Ai, maa yeli yɛ, ka yɛnee ba leɛ yɛ eebo, yɛ meŋ zaa na wɛ la aŋa ba naŋ da wɛ lɛ.”
Kaŋkanteɛ Naŋ Ba Wɔnɔ Sekpɔgre
6Lɛ la ka Yeezu da lɔɔ sekpɔgre ŋa, “Dɔɔ kaŋ la sɛle kaŋkanteɛ o dãã teere weɛ poɔ, a pãã da wa boɔrɔ wɔmɔ a teɛ zu kyɛ ba nyɛ wɔne zaa. 7Lɛ la ka o da yeli ko a neɛ na naŋ kaara a dãã teere weɛ zu, ‘Nyɛ! Yuomo ata la ŋaa ka N maŋ wa a na pɔre wɔmɔ a kaŋkanteɛ ŋa zu kyɛ daŋ ba nyɛ wɔne zaa. Kyɛ o lɔɔ bare! Bonso ka o na are pigi zie weɛlɛ.’ 8Ka a neɛ naŋ kaara a teere zu yeli ko o, ‘Neŋkpoŋ, vɛŋ ka a teɛ naŋ are yuon-yeni, ka N tu gɔlle o, a eŋ kuoluŋ. 9Ka o naŋ wa wɔŋ a yuoni kaŋ, a na soma la, kyɛ ka o naŋ ba wɔŋ, ka fo pãã kyɛ o bare.’ ”
Yeezu Naŋ Saŋ Pɔge Gbɛre Kaŋ
10A Yeezu da kanna la noba a puoruudie kaŋ poɔ a pɛnnoo bebiri daare. 11A lɛ poɔ la ka pɔge kaŋ sefaare naŋ da e ka o gbɛre yuomo pie ne anii da be a be. O eŋɛ da kɔɔ guree la, ka o da kontoɔ̃ dɔle o meŋɛ. 12A Yeezu naŋ da wa nyɛ o, O da boɔle o la ka o wa O zie, ka O yeli ko o, “Pɔge, a fo baaloŋ baarɛɛ la.” 13A Yeezu naŋ da wa de O nuuri pare a pɔge zu la ka a o eŋɛ deɛ dɔle ka o iri are tori o zaa, a piili ire Naaŋmen yuori. 14Kyɛ a puoruudie neŋkpoŋ suuri da iree la yaga ne a Yeezu naŋ da saŋ a pɔge ŋa a pɛnnoo bebiri daare. Ka o da yele korɔ a noba, “Beri ayoɔbo la be a daa gbuli zaa poɔ ka neɛ na toɔ̃ toŋ toma. Azuiŋ, yɛ maŋ wa a bebie ama poɔ ka ba wa saŋ yɛ. Yɛ ta maŋ wa a pɛnnoo bebiri daare.” 15Ka Yeezu yeli sɔge o, “Yɛnee bampuori-kombampoɔ mine! Yɛ buo soba la ba maŋ yuo a o naadɛre bee a o boŋɔ ka o yi nyu koɔ̃ a pɛnnoo bebiri daare? 16A ba seŋ ka a Aboraham pɔgeyaa ŋa Setaana naŋ leŋ yuomo pie ne anii ŋa zaa na nyɛ o faabo a pɛnnoo bebiri be?” 17A Yeezu naŋ da wa yeli a ŋaa, vi da kpɛ la a noba na zaa naŋ da kyiiri O, kyɛ ka a noba da kyellɛ ne a nɔmaa toma na zaa O naŋ da tonɔ.
Bombi-bile Sekpɔgre
(Mat 13:31-32; Mak 4:30-32)
18A lɛ la ka Yeezu soore, “Wola ka a Naaŋmen naaloŋ waa? Boŋ ka N na de o manne ne? 19O waa ŋa tobiri ka neɛ de bore o weɛ poɔ. Ka o baa a te leɛ teɛ ka nuuli wa wuo a kyogri o ulli#13:19Teɛ ulee bee teɛ ulli: A Dagaaba mine maŋ boɔle la teɛ ulee bee teɛ ulli ka danu bee danuuri. zu.”
Dããbile Sekpɔgre
(Mat 13:33)
20A Yeezu da la soorɛɛ la, “Boŋ ka N na de manne ne a Naaŋmen naaloŋ? 21O waa ŋa dããbilɛ pɔge naŋ de bu ne zɔŋ ŋmannɔɛ ata poɔ ka a zɔŋ zaa iri p.”
A Dendɔ-fogloo Yɛlɛ
(Mat 7:13-14, 21-23)
22A Yeezu naŋ da gɛrɛ Gyɛruzɛlɛm, O da kpɛ la a teŋkponni ane a tembilii poore a kanna a noba gɛrɛ. 23Neɛ kaŋ da soore O la, “Daana, noba belaa la na nyɛ faabo be?” Ka O yeli ko ba: 24“Yɛ eŋ faŋ ka yɛ tu a dendɔre na naŋ e fogloo kpɛ; bonso, maa yele korɔ yɛ, noba yaga na e la a neɛ ka ba kpɛ kyɛ kontoɔ̃. 25Ka a yiri soba wa iri pɔge a dendɔre baare, kyɛ ka yɛ naŋ are a yeŋ poɔ a piili kpaara a pane yele, ‘Daana, yuo a pane ka te kpɛ’, o na yeli ko yɛ la, ‘N ba baŋ zie na yɛ naŋ yi.’ 26Yɛ pãã na piili yele la, ‘Te ne fo la da laŋ di kyɛ nyu, kyɛ ka fo kanne a te teŋɛ poɔ.’ 27Kyɛ O na yeli la, ‘N ba baŋ zie na yɛ naŋ yi. Yɛ tage yi be N zie, yɛnee zaa naŋ waa yelbe-erebɛ!’ 28Konni ane nyemɛ nyeroo na bebe la ka yɛnee wa nyɛ Aboraham, Aziki ane Gyekɔb ane a Ŋmen-yelmanneba zaa ka ba be a Naaŋmen naaloŋ poɔ kyɛ ka ba daa yɛnee bare yeŋe poɔ. 29Noba na yi la sapare, saniŋe, sapare nudoloŋ seŋ ane sapare nugɔɔ a wa kpɛ a Naaŋmen naaloŋ poɔ a di boma. 30Serɛzaa, ba mine be la puoriŋ a na wa de weɛ kyɛ ka ba mine meŋ de weɛ kyɛ na leɛ wa be puoriŋ.”
Yeezu Naŋ Koŋ A Gyɛruzɛlɛm Teŋɛ Yɛlɛ
(Mat 23:37-39)
31A gogo na poɔŋ la ka Faraziimine da wa a Yeezu zie a wa yeli ko O, “Yi a kyɛ gaa ziyuo, bonso, Hɛrɔde boɔrɔ la fo koobo.” 32Ka a Yeezu yeli ko ba, “Yɛ gaa te yeli ko a badɛre#13:32 Badɛre: A Dagaaba mine maŋ boɔle la a Badɛre ka Dɛpɛlɛrɛ. na ko ma, ‘N digre la sefaare bara kyɛ saŋ na baalba zenɛ ane bieu, kyɛ a beri ata daare N na baare la N toma. 33Kyɛ zenɛ ne bieu a ferɛɛ la ka N be N sori poɔ gɛrɛ, bonso, ba kontoɔ̃ ko a Ŋmen-yelmanna zie zaa ka a Gyɛruzɛlɛm poɔŋ naane.’ 34Gyɛruzɛlɛm, Gyɛruzɛlɛm, a teŋkpoŋ na naŋ maŋ ko a Ŋmen-yelmanneba kyɛ za a noba na Naaŋmen naŋ toŋ o zie ne kubo! Gbɛre bowola ka N da boɔrɔ ka N laŋ a fo biiri taa, aŋa nɔnyaaŋaa naŋ maŋ laŋ o bilii taa a uuni lɛ, kyɛ ka fo da ba sagra! 35Nyɛ, ba bare la a fo yiri ko fo. Maa yeli ko fo, fo koŋ la nyɛ ma kyɛ te ta saŋ na fo naŋ na yeli, ‘Soba na naŋ waana a Daana yuori eŋɛ nyɛ la maaloo.’ ”
S'ha seleccionat:
Luk 13: DNTTP
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
First New Testament in Dagaare Language © The Bible Society of Ghana, 2013.