Luk 8
8
Pɔgebɔ Mine Naŋ Da Beɛle Yeezu
1A lɛ puoriŋ, Yeezu da gaa la a teŋkponni ane a tembilii poore, a moɔlɔ a Naaŋmen naaloŋ yɛlɛ. A O potuuribo pie ne bayi da be la O zie, 2a de ne pɔgeba mine naŋ da taa sefaare ane baaloŋ ka O da saŋ ba: A pɔge kaŋ yuori da la Mareya, ka o yuori kaŋ meŋ da la di Magdalina#8:2 Magdalina: Neɛ naŋ yi Magdala teŋɛ la ka ba da boɔlɔ Magdalina. A ŋaa wuli ka a Mareya ŋa da e la Magdala neɛ.; O eŋɛ la ka sefaare Ayopoĩ da yi, 3ane Yuwana, a Hɛrɔde tontonɔ Kyuza pɔgɔ, ane Suzaana ane pɔgeba yaga naŋ da soŋnɔ ba ne ba boma.
A Boreborɔ Sekpɔgre
(Mat 13:1-9; Mak 4:1-9)
4A nembeɛoŋ naŋ da wa te lantaa ka noba yire tatenne waana a Yeezu zie, O da lɔɔ la sekpɔgre ko ba: 5“Boreborɔ kaŋ la da yi gaa ka o te bore boma#8:5 Bore boma: A Gyuumine koɔbo poɔ, ba da maŋ yaare la a bombie bare a ba wɛre poore kyɛ kɔ tɛne pɔge a. A lɛ la ka ba da maŋ bore ba boma.; kyɛ o naŋ da borɔ, a bombie mine da le la sobiri zu, ka ba neɛ ne gbɛɛ, ka sazu nuuli wa de di. 6Amine da le la piiri zu a buli wieouŋ zaa kyɛ leɛ kpi, a naŋ da ba nyɛrɛ maaroŋ zuiŋ. 7Amine meŋ da le la goore poɔ, a buli kyɛ ka a goore fogle a. 8Amine meŋ da le la tɛnnoɔ poɔ, a buli, a maale eŋ bie kɔɔ.” O naŋ da yeli a ŋaa, O da zɛge la O kɔkɔre a yeli, “Vɛŋ ka neɛzaa naŋ taa tobo kyɛlle woŋ.”
A Sekpɔgɔ Lɔɔbo Tɛgɛ
(Mat 13:10-17; Mak 4:10-12)
9Lɛ la ka a Yeezu potuuribo da soore O a sekpɔgre pare. 10Ka O da yeli, “Yɛnee eŋ ba ko yɛ la a Naaŋmen naaloŋ yelsɔgle bammo, kyɛ a banaŋ naŋ kyɛre, sekpɔgɔ la ka N na maŋ lɔɔ ko ba, ka ba na:
‘maŋ kaara kyɛ koŋ baŋ nyɛ,
a kyɛllɛ wono kyɛ koŋ baŋ a tɛgɛ.’ ”
A Boreborɔ Sekpɔgre Pare
(Mat 13:18-23; Mak 4:13-20)
11“A sekpɔgre pare la ŋa: A bombie la a Naaŋmen yelbiri. 12A bombie anaŋ naŋ le a sobiri zu la a noba naŋ woŋ a Naaŋmen yelbiri kyɛ ka a sebɛlbɛllɛ wa nyɔge iri bare ba sukyie poɔ, ka ba na ta sage de a nyɛ faabo. 13A bombie na naŋ le a piiri zu la a banaŋ naŋ maŋ woŋ a Naaŋmen yelbiri, a de ne popeɛloŋ. Kyɛ a yelbiri naŋ ba tɛ nyaga ba sukyie poɔ zuiŋ, ba maŋ sage de la a yɛlɛ kyɛ ka toɔrɔ wa kpɛ ba ka ba le. 14A bombie na naŋ le a goore poɔ la banaŋ naŋ maŋ woŋ a yelbiri; kyɛ a ba yeldeebo poɔ, a teŋɛzu bombɔ yɛlɛ ane a bondaa-yɛlɛ maŋ fogle la a ba yeldeebo ko. 15Kyɛ a bombie anaŋ naŋ le a tɛnnoɔ poɔ la a banaŋ naŋ maŋ woŋ a Naaŋmen yelbiri, a de eŋ ba sukyie poɔ, a wɔŋ wɔmɔ ba kannyiri zuiŋ.”
Fentelɛ Gbaale Naŋ Pɔge
(Mak 4:21-25)
16“Neɛzaa daŋ ba kyɔŋ fentelɛ a de gbaale vɔgle pɔge, bee a de biŋ gado puliŋ, kyɛ o maŋ de pare la fentel-daa zu ka banaŋ zaa naŋ kpɛ a die poɔ na nyɛrɛ a veɛloŋ. 17Bonzaa ba kyebe naŋ sɔgle, a koŋ daasaa, kyɛ bee yelsɔglaa zaa ba kyebe naŋ koŋ yi veɛloŋ poɔ ka ba baŋ. 18Yɛ kyɛlle woŋ velaa; banaŋ naŋ taa boma, ba na la ko ba la amine poɔ; kyɛ banaŋ naŋ ba taa, haali a belaa na banaŋ taa ba na de a la yi ba zie.”
Yeezu Ma Ne O Yɔɔmine
(Mat 12:46-50; Mak 3:31-35)
19Lɛ la ka Yeezu ma ne O yɔɔmine da wa O zie, kyɛ da kontoɔ̃ ta O, a noba naŋ da waa yaga zuiŋ. 20Ka ba da yeli ko O, “A fo ma ne fo yɔɔmine are la yeŋ poɔ a boɔrɔ ka ba nyɛ fo.” 21Kyɛ ka a Yeezu yeli ko ba, “N ma ane N yɔɔmine la banaŋ naŋ woŋ a Naaŋmen yelbiri, a erɛ seŋ lɛ a yelbiri naŋ wuli.”
Yeezu Naŋ E Ka Sasekpeɛŋaa Ŋmaa
(Mat 8:23-27; Mak 4:35-41)
22Daare kaŋ Yeezu ne O potuuribo da kpɛ la gbori, ka O yeli ko ba, “Yɛ e ka te ŋmaa a mane gaa a konkoori kaŋ na.” Lɛ la ka ba de gɛrɛ, 23kyɛ ba naŋ da mɔnɔ a gbori gɛrɛ la ka Yeezu da faa gbiri. Sasekpeɛŋaa kaŋ da iri fuuro la yaga zaa a mane zu, ka a koɔ̃ piili kpeɛrɛ a gbori poɔ, ka ba da be toɔrɔ poɔ. 24Ba da te seŋ la a Yeezu a yele, “Daana, Daana, te weɛrɛ la!” Ka Yeezu da iri a goɔŋ poɔ a tanne a saseɛ ane a kɔmmie ka a ŋmaa vooroŋ, ka a zie e kyerekyere. 25Ka O soore ba, “A yɛ yeldeebo bɛ?” Dabeɛ̃ da kpɛ ba la ka ba nɔɛ zaa da maa, ka ba yele korɔ taa, “Nembo-tɔ la a neɛ ŋa, ka saseɛ ane koɔ̃ sagra O noɔre?”
Yeezu Naŋ Digi Sefaare Bare Dɔɔ Kaŋ Eŋɛ
(Mat 8:28-34; Mak 5:1-20)
26A Yeezu ne O potuuribo pãã da ŋmaa la a mane gaa a Gerasene paaloŋ naŋ tori a Galili. 27O naŋ da wa yire a gbori poɔ la ka dɔɔ kaŋ naŋ yi a teŋkpoŋ poɔ, a taa sefaare da tuori O. A da kɔɔrɛɛ la ka a dɔɔ ŋa da ba su boma, a da ba kpeɛrɛ die, kyɛ da maŋ gana yaare poɔ. 28O naŋ da wa nyɛ a Yeezu, o da le gbi la dumo O niŋesogɔŋ, a kyeere yaga zaa a yele, “Boŋ ka fo boɔrɔ N zie, Yeezu, a Naaŋmen Kpeɛ̃õ Zaa Daana Bie? N sɔrɔ fo la, ta dɔgre ma,” 29bonso, a Yeezu da tanne la a sefaa ka o yi a dɔɔ eŋɛ. (Gbɛɛ yaga ka a sefaa da maŋ iri a dɔɔ ka ba eŋ o kpule kyɛ leŋ o ne bɔnzɔlɔ, kyɛ guuro o, kyɛ o da maŋ ŋmaare la a zaa bare kyɛ zo kpɛ wɛgyɛŋ poɔ.) 30A Yeezu pãã da soore la a dɔɔ, “Fo yuori la boŋ?” Ka a dɔɔ yeli, “N yuori la Ligyin”; bonso, sefaare yaga la da be o eŋɛŋ. 31A sefaare da sɔre la a Yeezu ka O ta digi a ka a leɛ gaa a bogzuluŋ na naŋ ba taa baaraa poɔ.
32Dobasugo da be la a taŋ seɛŋ a dire boma, ka a sefaare sɔre a Yeezu ka O vɛŋ ka a te kpɛ a dobaare poɔ. Ka a Yeezu da ko a sori. 33A sefaare pãã da yi la a dɔɔ eŋɛ a te kpɛ a dobaare, ka a dobaare da yi a taŋ seɛ a ŋmore sigi kpɛ a mane koɔ̃ poɔ a kpi.
34A dobakyeenemɛ naŋ da nyɛ lɛ a yɛlɛ naŋ e, ba da zo gaa te manne ko la a noba naŋ be a teŋkpoŋ poɔ ane a paaloŋ lamboe zaa. 35Lɛ la ka a noba da yi gaa ka ba te nyɛ bonna naŋ e, kyɛ ba naŋ da wa a Yeezu zie, ba da nyɛ la a dɔɔ a sefaare naŋ yi o eŋɛ ka o zeŋ a Yeezu puliŋ a su boma, a nyɛ o meŋɛ ka dabeɛ̃ da kpɛ ba. 36A banaŋ naŋ da nyɛ lɛ a yɛlɛ naŋ da e, da manne ko la a noba lɛ a dɔɔ naŋ da taa a sefaare naŋ nyɛ o sammo. 37Lɛ la ka a Gerasene paaloŋ noba zaa da yeli a Yeezu ka O yi a teŋɛ poɔ kyɛ bare ba; bonso, dabeɛ̃ da kpɛ ba la yaga. Lɛ la ka a Yeezu te kpɛ gbori a leɛ gaa. 38A dɔɔ na eŋɛ a sefaare naŋ da yi da sɔre la a Yeezu ka O vɛŋ ka o tuuro O; kyɛ a Yeezu da ba sage kyɛ yeli ko o: 39“Leɛ kuli a te manne ko a fo noba, bonna Naaŋmen naŋ e ko fo.” Lɛ la ka a dɔɔ da gaa, a te moɔlɔ a teŋkpoŋ zaa poɔ bonna zaa a Yeezu naŋ da e ko o.
Yeezu Naŋ Seŋ Pɔglee Kaŋ Kuuni Poɔ Ane Pɔge Kaŋ Naŋ Nyɛ O Sammo
(Mat 9:18-26; Mak 5:21-43)
40A Yeezu naŋ da leɛ ŋmaa a mane wa, a nembeɛoŋ da tuori de O la, bonso, ba zaa da kyɛllɛ O la. 41A be poɔŋ la ka a puoruudie neŋkpoŋ kaŋ yuori naŋ di Gyaruse da wa a be. O da wa gbi la dumo a Yeezu puliŋ a kyɛ sɔre O, ka O wa o yiri, 42bonso, o pɔgeya-yeni o naŋ taa, ka o e ŋa yuomo pie ne ayi, da beɛrɛ la a te tɔgle kũũ.
O naŋ da gɛrɛ, a nembeɛoŋ da fogle O la. 43Pɔge kaŋ da be la a noba poɔ a da taa pɔge pɛge baaloŋ kaŋ a maŋ kyire zẽẽ faa zaa. O da taa la a baaloŋ ŋa yuomo pie ne ayi, a da sãã o libie zaa ka o saŋ o meŋɛ kyɛ tegetegrɛ zaa da ba toɔ̃ na saŋ o. 44A pɔge da wa are la a Yeezu puori a seene O kparoo nɔzoɔrɔ, ka a zẽẽ deɛ ŋmaa daadaalɛ. 45Lɛ la ka Yeezu soore, “Aŋ la seene ma?” A noba zaa naŋ da kyiiri la ka Piita yeli, “Daana, nyɛ lɛ a noba naŋ ŋmaa-gyili fo, a fogle fo lɛ.” 46Kyɛ ka a Yeezu yeli, “Neɛ kaŋ seene ma la, bonso, N nyɛɛ la ka kpeɛ̃õ yi la N eŋɛ.” 47A pɔge naŋ da nyɛ ka o koŋ la baŋ sɔgle, o da miine la a wa le a Yeezu niŋeŋ, a yeli a noba zaa niŋeŋ, bon naŋ so ka o seene a Yeezu ane lɛ o naŋ nyɛ sammo a paretɛloŋ na poɔ. 48Ka Yeezu da yeli ko a pɔge, “N pɔgeyaa, a fo yeldeebo saŋ fo la; gɛrɛ ne emmaaroŋ.”
49O naŋ da naŋ kyɛnɛ yele a yɛlɛ la ka neɛ kaŋ yi a neŋkpoŋ yiri a wa yeli, “A fo pɔgeyaa kpie la; ta la dɔɔnɔ a wulwullo weɛ lɛ.” 50A Yeezu naŋ da woŋ ŋaa, ka O da yeli sɔge, “Ta zoro dabeɛ̃. Fõõ eŋ sage de, kyɛ a fo pɔgeyaa na nyɛ la faabo.” 51A Yeezu naŋ da wa te ta a yiri, O da ba sage ka neɛzaa na tu O kpɛ, ka Piita, Gyɔɔn, Gyimisi ane a bie saa ne o ma yoŋ naane. 52A noba zaa da kono la a bie, a ŋmeɛrɛ kpɛlle, kyɛ ka Yeezu yeli, “Yɛ ta kono, bonso, o ba kpi, o gbiree la.” 53A noba da laara la a Yeezu, bonso, ba da baŋ ka a bie kpie la. 54Kyɛ Yeezu da nyɔge la a bie nu kyɛ boɔle o, “Bie, vaa-iri!” 55A bie vooroŋ da leɛ waɛ la, ka o vaa-iri dayeni. Lɛ la ka Yeezu da yeli ka ba ko a bie bondirii ka o di. 56A bie dɔgrebɔ nɔɛ da maaɛ la yaga; kyɛ ka Yeezu da kpãã ba ka ba ta wa yele a yɛlɛ naŋ e ko neɛzaa.
S'ha seleccionat:
Luk 8: DNTTP
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
First New Testament in Dagaare Language © The Bible Society of Ghana, 2013.