Mbombo tsa Vapositili 27
27
ɄPaulo ihɨlɨkwa kʉ vʉtsenge wa Looma
1Pwʉ vakahʉmya ʉvʉlamutsi ʉkʉta tʉgende mu meeli ʉkʉbɨha kʉ kɨlʉnga kya Italiya. Vakanʼgotola ʉPaulo na vakʉngwa avange kʉ mbaha mpamato va vasikali, ʉvaatambʉlwagwa Yuliyo, va kɨpʉga kya vasikali avaloleeli va Kaisali Agusito. 2Pwʉ tʉkɨtoga mu meeli mamato, tʉkahega. Ɨmeeli ɨjyo jyahʉmile kʉ Adulamitiyo, ɨlɨkʉlʉta jigendela mu syɨmo sya meeli isyale mulʉgasimbale mu kɨlʉnga kya Asiya. Wʉ twihega apo, twale paninie nʉ Alisitaliko,#27:2 Alisitaliko Ʉmuunu ʉjʉ kakongosu aaveetsaga nʉ Paulo. Aale inninie mu vaanu avaantangaga ʉPaulo pa mbombo jya mwene. ʉmmolwa va vʉtsenge wa Tesalonike mu kɨlʉnga kya Makedoniya.
3Ɨkɨgono ɨkyakongile, tʉkasika pa lʉkanzimbale lwa nyanza, pa vʉtsenge wa Sidoni. Apo ʉYuliyo akambombela vʉnonu ʉPaulo, akantavʉla alʉte akaaganile na vamanyaani va mwene pakʉta vantange, vampe isiinu isyʉ naale nasyo. 4Wʉ twihega apo, tʉkagendela Kʉvʉhʉmo wa Litsʉva pa kɨlʉnga kya Kipulo ɨkyale pagati pa nyanza, pakʉta tʉleke ʉkʉkulugwa nʉ nkuluguuto ʉmbaha ʉgwatʉsigaga. 5Tʉkalovoka ɨnyanza ɨjyo, tʉkagendela ʉlʉvasu lwa kɨlʉnga kya Kilikiya nɨ kya Pamufiliya, tʉkasika mu vʉtsenge wa Mila mu kɨlʉnga kya Likiya. 6Apo, ʉmbaha va vasikali ʉlya akajɨvona ɨmeeli ɨjyahʉmile kʉ vʉtsenge wa Alekisanduliya, jɨlɨkʉlʉta kʉ kɨlʉnga kya Italiya. Akatwingitsa twɨ vooni mu meeli ɨjyo, namwene akiingila.
7Tʉkahega, tʉkagendelela nʉ lʉgendo lwitu mola mola isigono syongosu, ikange kwale nʉ vʉpala siitso. Kʉmbele, tʉkava pawiipi nʉ vʉtsenge wa Nido. Apo gʉkahʉmɨla ʉnkuluguuto ʉmbaha, gʉkatʉsiga, gʉkatʉpelela tʉgende kʉnsana gwa kɨlʉnga kya Kilete. Ɨkyo kɨkatʉsigilila kʉ nkuluguuto ʉgwakulaga. Tʉkagendela pawiipi nɨ ngʼʉmbʉngʼʉmbʉ ɨjyatambʉlwagwa Salumoni. 8Tʉlɨkʉgendelela ʉkʉlʉta kʉvʉlongolo mu lʉkanzimbale mwa nyanza kʉ vʉpala siitso. Kʉmbele, tʉkasika apoonu apaatambʉlwagwa Kyɨmo Kɨnonu, pawiipi nʉ vʉtsenge wa Laseya.
9Wʉ tʉsiike apo, tʉkava tʉmalile isigono syongosu mu lʉgendo, ʉkʉsikila ʉpwʉ nakɨ kyaka kya kwɨdɨnda ʉkʉlya#27:9 Kyaka kya kwɨdɨnda ʉkʉlya Ɨkyaka ɨkɨ kyatambʉlwagwa Yomu Kipuli. Kyale kyaka kya kʉsajana nʉ Ngʉlʉve. Ʉnsɨkɨ gwa kʉvombeka ɨkyaka ɨkɨ gwaveetsaga kʉ vʉmalɨlo wa mwetsi gwa budikakʉpamato (9) evo pa vʉtengʉlɨlo wa mwetsi gwa kɨtsigo (10). Ɨmba Valawi 16:23, 26:32; Mbalɨlo 29:7-11. Ʉnsɨkɨ ʉgwa gwale vʉtengʉlɨlo wa nsɨkɨ ʉmpala siitso kʉ vaanu avaaveetsaga mu lʉgendo lwa mu nyanza, manya gwahʉmilaga ʉnkuluguuto ʉmbaha. kɨkava kɨlʉtɨngʼiinie. Pwʉ jɨkavoneka ʉkʉta tʉngagendelele nʉ lʉgendo lwitu tuweesa ʉkʉswa. Ɨlyo lɨkambɨɨka ʉPaulo avapavɨle avanine. Akatsova akata, 10“Nyɨ vagoosi ʉnyie, ndivona ʉkʉta ʉlʉgendo lwitu ʉlʉ jʉlwisila nʉ vʉpala ʉvʉlʉtɨɨlye siitso. Kʉlɨ kʉjatsa isiinu syongosu, ɨmeeli ɨjɨ paninie nɨ mitsigo gya jyene nava vaanu.”
11Lɨno ʉmbaha va vasikali ʉlya akavɨɨkɨla ʉntɨma amasaago ga vaanu vavɨlɨ ʉkʉlʉtɨɨlɨla amasaago ga Paulo. Akakonga amasaago ga ndongotsi va meeli, na ga mwenemeeli ɨjyo. 12Paninie nɨɨlyo pa lʉkanzimbale lwa nyanza apo napaave panonu ʉkʉtaama ʉnsɨkɨ gwa ngʼaala. Ɨlyo lɨkavapelela avaanu vongosu avaale mu meeli ɨjyo vɨɨdɨngʼane ʉkʉta vahege apo, valole nda viweesa ʉkʉsika kʉ Foinikise. Apo pwʉ pave pa kʉtaama ʉnsɨkɨ gwa ngʼaala ʉgwa. Pa Foinikise kyale kyɨmo kya meeli kya Kilete. Ɨkyɨmo ɨkɨ kyale nʉ wingililo vʉvɨlɨ ʉkʉhʉma kʉ nyanza, ikange apoonu apo napaave nʉ nkuluguuto.
ɄPaulo na vanine vigatatsiwa mu nyanza
13Kʉmbele, akapepo akanonu kakatengʉla ʉkʉpuula ʉkʉhʉma ʉlʉvasu lwa Kʉsika. Ɨlyo lɨkavapelela avavombi va mu meeli ɨjyo vasaage ʉkʉta vakavile ʉnsɨkɨ ʉnnonu gwa kʉgendelela nʉ lʉgendo lwa veene ndʉwʉ vaanogilwe. Pwʉ vakatotsa ɨkyʉma ɨkɨtsito kya kwɨmɨhɨtsa ɨmeeli.#27:13 Ɨkyʉma ɨkɨtsito kya kwɨmɨhɨtsa ɨmeeli Ɨlɨ lyale lyʉma ɨlitsito ɨlyʉ vaakʉngɨlɨtsaaga mu meeli. Ɨlyene ɨlyo lyʉ visaaga mu magasi wʉ vasiike apoonu pa kwɨmɨhɨtsa ɨmeeli. Ɨlyʉma ɨlyo kʉ Kɨswahɨli litambʉlwa nanga. Vakahega apo, valɨkʉgendetsa ɨmeeli mu lʉkanzi mwa Kilete. 14Ʉnsɨkɨ nsupi wʉ tʉhegile apo, gʉkiitsa ʉnkuluguuto ʉmbaha siitso ʉkʉhʉma kʉ Kilete, ʉgwatambʉlwagwa nkuluguuto ʉgwihʉma Kʉnena. 15Ʉnkuluguuto ʉgwa gʉlɨkʉkuluga ɨmeeli na maka. Ʉwe tʉkava tulemwa ʉkʉlʉngɨka ɨmeeli jɨlʉtage ʉkwʉ gwahʉmaga, pwʉ tʉkagʉleka gʉtʉhɨlɨke pagati pa nyanza.
16Kʉmbele, tʉkagendela ʉlʉvasu lwa Kʉsika lwa kɨlʉnga ɨkɨdebe ɨkyale pagati pa nyanza ɨkyatambʉlwagwa Kauda. Ɨkyo kɨkatʉtanga ʉkʉtʉsigilila kʉ nkuluguuto ʉgwakulaga, pwʉ nʉʉwe tʉkaweesa mu vʉpala ʉkwingitsa mu meeli ʉwaato#27:16 Ʉwaato Ʉnsɨkɨ ɨmeeli jigenda mu magasi agalitiime, avagendetsa meeli vaakʉngaga ʉwaato kʉnsana kʉ meeli vʉkwegwagwe. Ʉwaato ʉwa waale nɨ mbombo jya kʉvagendetsa avaanu wʉ vihʉma mu meeli evo wʉ avavombi va meeli vikwisa ɨkyɨmɨhɨtso kya meeli. Ikulongwi tsa waato lola kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. ʉwakwegwagwa kʉnsana kʉ meeli nʉ kʉvʉkʉnga. 17Wʉ avaanu vakwegye mu meeli ʉwaato ʉwa, vakajɨtsʉngʉtɨtsa ɨmeeli ʉndegehe ʉkʉhʉma paasi nʉ kʉkʉnga vʉnonu, manya vaadwadaga ʉkʉta ʉnkuluguuto gʉgela gubatsʉla ɨmeeli. Ikange vakava vidwadwa ʉkʉta vagela vihɨlɨkwa nʉ kwʉmɨɨlɨla mu nsekelewe gwa mu nyanza, pa lʉkanzimbale lwa nyanza ʉlwatambʉlwagwa Siliti. Pwʉ vakiisa ɨkyʉma ɨkɨtsito kya kʉjɨvandɨka ɨmeeli jɨleke ʉkʉnyila siitso. Vakajɨleka jɨlʉtage jikulugwa nɨ mepo.
18Ɨkɨgono ɨkyakongile, avavombi va meeli vakatengʉla ʉkʉtaaga ɨmitsigo mu nyanza, ʉlwakʉva amajɨga gaajɨkulugaga sivi ɨmeeli jiitu. 19Ɨkɨgono kya daatu wʉ kʉkie, vakahetsa isyombo isinge sya mu meeli, nasyene vakataaga mu nyanza. 20Wʉ silʉtɨngʼiinie isigono syongosu, kɨtsila kʉlɨvona ɨlitsʉva pange nondwe, nagwene ʉnkuluguuto wʉ gugendelela ʉkʉkula siitso, pwʉ ʉwe gʉkaswa gʉkamala ʉkʉta kʉlɨ kʉpona.
21Avagoosi valya, wʉ vamalile isigono syongosu kɨtsila kʉlya ɨkɨveetsaga, ʉPaulo akɨɨma pagati pa veene, akavavʉʉla akata, “Nyɨ vagoosi ʉnyie, ʉnsɨkɨ gʉlya ʉgwʉ ndyavapavye kʉ Kilete ʉkʉta tʉleke ʉkʉhega ʉkʉ, paavanogye ʉkʉmmʉlɨhɨtsa. Mwale muve mummʉlɨhiitse, ndalɨno nakɨpali ɨkɨnangiike evo ʉkʉjaga ndavʉle. 22Paninie nɨɨlyo, lɨno ndikʉvadoova siitso ʉkʉta mwɨkangatse inumbula. Pagati paanyie nakʉli nʉ mpamato ʉvɨ jiiswa, apeene ɨmeeli jyene jyʉ jilʉngwa jidwiviila. 23Ʉne ndɨ muunu va Ngʉlʉve, ikange ndɨ mbombi va mwene, ndɨtsimanyile itsi ʉlwakʉva ʉnsuungʼwa va mwene mpamato akambonekye ɨleelo pakɨlo, 24akambʉʉlile akata, ‘Paulo, ʉladwadaga, manya wɨgane wa Ngʉlʉve ʉkɨɨme pavʉlongolo pa Kaisali. Ikange ʉlʉmanye vʉnonu ʉkʉta ʉNgʉlʉve mu lʉhʉngʉ lwa mwene, akʉhʉngʉkye kʉ nzɨla jya kʉvapoka avaanu vooni ʉwʉ mulɨ nzɨla mamato pakʉta valeke ʉkwongomela.’ 25Mwe vajyango, mwɨkangatse inumbula ʉlwakʉva ndikʉmwɨdɨka ʉNgʉlʉve, ndihʉʉvɨla ʉkʉta galya ʉgwʉ ambʉʉlile jyʉ givombeka. 26Paninie nɨɨlyo wɨgane wa Ngʉlʉve jʉtʉhɨlɨkwe mu kalʉnga kapamato ʉkwʉ kalɨ pagati pa nyanza.”
ɄPaulo na vanine vipokwa mu nyanza
27Tʉkamala isigono kɨtsigo na sinni (14) wʉ tʉtsiige tukulugwa nʉ nkuluguuto ʉgwakulaga kʉnʉ na kʉnʉ mu nyanza jya Adiliya. Pakɨlo pagati, ɨkɨgono ɨkyo ɨkya kɨtsigo na sinni, avavombambombo va mu meeli vakasaaga ʉkʉta ipange vahegelye kʉ lʉkanzi kʉ kɨlʉnga kɨpamato. 28Pwʉ vakiisa ɨkɨgelelo mu magasi, vakavona ʉkʉsika paasi palɨ mita isitsigo sidatu na lekelakʉpamato (37). Wʉ vahegelye pavʉlongolo padebe, vakiisa ikange ɨkɨgelelo kɨlya mu magasi, vakavona ʉkʉsika paasi palɨ mita isitsigo sivɨlɨ na lekelakʉpamato (27). 29Vakadwada ʉkʉta ɨmeeli jɨgela jikɨbamitsa mu maganga amavaha agalɨ kʉ lʉkanzi lwa nyanza. Pwʉ vakiisa isyɨmɨhɨtso sinni mu magasi isyale kʉnsana kʉ meeli. Valɨkʉdoova ʉkʉta kʉkie ngʼaningʼaani.
30Avavombambombo avo vaanogwagwa ʉkʉnyiemelʉka vahege mu meeli. Pwʉ vakatengʉla ʉkwisa ʉwaato mu magasi, vakɨdyetsa ʉngata vinogwa ʉkwisa isyɨmɨhɨtso sya meeli ʉlʉvasu lwa kʉvʉlongolo kʉ meeli. 31Pwʉ ʉPaulo akambʉʉla ʉmbaha va vasikali, paninie na vasikali va mwene akata, “Avavombambombo ava, ɨngave navakatsige paninie nʉʉwe mu meeli ɨjɨ, ʉnyie namukapone.” 32Pwʉ avasikali valya vakadumula ɨmilegehe ɨgyʉ gyakʉngilwe mu waato ʉwa, vakavʉleka vʉgwe mu nyanza.
33Wʉ kutandaalʉka, ʉPaulo akavadoova siitso avanine vooni ʉkʉta valye ɨkyakʉlya, akata, “Ɨleelo mumalile isigono kɨtsigo na sinni mulɨ mu lʉdwado, ikange namuliili ɨkɨveetsaga. 34Lɨno ndikʉvadoova ʉkʉta mulye ɨkyakʉlya, pakʉta mugendelelage ʉkʉva vʉʉmi. Nakʉli nʉ mpamato ʉvɨ jiiswa evo ʉkʉlemala!”
35Wʉ ʉPaulo amalile ʉkʉtsova ewo, akatoola ʉnkate, akasaana kwa Ngʉlʉve pavʉlongolo pa vaanu avo vooni, akamenyulania, akatengʉla ʉkʉlya. 36Pwʉ vooni vakatseesiwa inumbula, naveene vakalya. 37Ʉwe twɨ twale mu meeli ɨjyo, ɨmbalɨlo jiitu jyasikye avaanu ɨmileevʉlʉ gɨvɨlɨ isitsigo lekelakʉpamato na vange ntanato (276). 38Wʉ valie ɨkyakʉlya nʉ kwiguta, pwʉ vakataaga ɨngano mu nyanza, pakʉta vajɨvɨɨke ɨmeeli jɨve nyebeepe.
39Wʉ kʉkie, avavombambombo va mu meeli vakakɨvona ɨkɨlʉnga, napeene navaalʉmanye ʉkʉta kɨlʉnga kya ndaku. Ikange vakapavona apoonu ʉpwʉ amagasi ga nyanza gingye kʉ kɨlʉnga ɨkyale nʉ nsekelewe. Vakasaaga ʉkʉta ipange, vajɨleke ɨmeeli jiingile ʉkwa. 40Pwʉ vakadumula ɨmilegehe ɨgyakʉngilwe mu syɨmɨhɨtso sya jyene. Ikange vakavopola nagɨ milegehe ɨgyʉ gyakʉngilwe mu vʉsukaani wa meeli, vakatotsa ʉnsabwa ʉmbaha gwa kʉgendehetsa ɨmeeli,#27:40 Ʉnsabwa ʉmbaha gwa kʉgendehetsa ɨmeeli Ɨkɨɨnu ɨkyo kʉ Kɨswahɨli kitambʉlwa tanga. Gwale nsabwa mbaha ʉgwakʉngwagwa mu meeli. Wʉ gupuulwa nɨ mepo gwatangɨlaga ʉkʉgendetsa ɨmeeli jɨlʉtage ʉkwʉ jilotsa ɨmepo. pwʉ vakalʉngɨka ɨmeeli kʉ kɨlʉnga ɨkɨlagasu. 41Lɨno ɨmeeli jɨlya wʉ jɨlʉtile pavʉlongolo padebe, ʉlʉvasu lwa kʉvʉlongolo lwa jyene lʉkiingila na maka mu nsekelewe ʉgwale mu magasi, jɨkʉʉmɨɨlɨla baaho. Ʉlʉvasu lwa kʉnsana lwa jyene lʉlɨkʉtowa na majɨga, ʉkʉsikila ʉpwʉ lʉkatengʉla ʉkʉbatsʉka.
42Pwʉ avasikali vakasaaga ʉkʉta vavabude avakʉngwa vooni, pakʉta aleke ʉkʉvepwo nʉ mpamato mu veene ʉvɨ jiikwogeela nʉ kʉkɨmbɨla. 43Lɨno ʉmbaha va veene aanogilwe ʉkʉmpoka ʉPaulo, pwʉ akavabeetsa valeke ʉkʉvomba ɨlyo. Akavalagɨla vooni ʉwʉ vaakɨmanyile ʉkwogeela ʉkʉta valongole ʉkwɨlahɨɨla mu nyanza, voogeele valovoke vakave pa vʉlagasu. 44Ikange, akavalagɨla ʉwʉ navaakɨmanye ʉkwogeela vatoole imbavo evo isipande sya meeli ɨjɨdeenyiike, vɨjibatɨlɨle wʉ vikwogeela. Wʉ jyale twɨ vooni tʉkalovoka vʉnonu.
S'ha seleccionat:
Mbombo tsa Vapositili 27: zga
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2019, Wycliffe Bible Translators, Inc. All rights reserved.