Mbombo tsa Vapositili 5
5
Ʉvʉnuasi wa Ananiya nʉ Safila
1Aalepwo ʉmuunu mpamato, ɨlitaawa lya mwene aatambʉlwagwa vɨ Ananiya. ɄAnaniya paninie nʉ nʼdala va mwene ʉSafila, naveene vakagʉtsa ɨkɨlɨmɨla kya veene. 2Indalama itsʉ vaakavile, ʉAnaniya akagava itsinge tsive tsa veene. Ʉnʼdala va mwene namwene aalɨmanyile ɨlyo. Tsilya itsʉ tsyasigye, ʉAnaniya akahɨlɨka kʉ vapositili.
3Pwʉ ʉPetulo akambʉʉtsa akata, “Gwe Ananiya! Kɨki ʉntawe ʉSetano iingile mu numbula jyako? Ʉsikye ʉkʉtsova ʉvʉnuasi kʉ Mepo ʉMbalatse. Ʉve ʉsihile indalama itsinge itsʉ ʉkavile wʉ ʉgʉtsiitse ɨkɨlɨmɨla kyako. 4Wʉ ʉkaanale ʉkʉgʉtsa, kɨkaale mu vʉtavʉlɨlwa waako! Nʉpwʉ ʉkamalile ʉkʉkɨgʉtsa, ʉkaale nawo ʉvʉlamutsi wa kʉvombela indalama itsʉ ʉkavile ndʉwʉ vunogwa jyʉve! Lɨno, jɨvye ndeeti ʉsikye pa kʉlamula amamenyu aga mu numbula jyako ʉkʉta ʉvombe ɨkɨɨnu ɨkɨlɨ ndɨɨkɨ? Nʉtsovili ʉvʉnuasi kʉ vaanu kwene, apeene ʉtsovile ʉvʉnuasi na kwa Ngʉlʉve jyʉmwene!”
5ɄAnaniya wʉ apʉliike amamenyu ga Petulo ago, akagwa, akaswa baaho. Vooni ʉwʉ vaapʉliike ikulongwi itso, lʉkaviibata ʉlʉdwado ʉlʉvaha. 6Pwʉ avadɨɨmi vakabina ʉnsimba gwa mwene nɨ sanda, vakahʉmya kʉnzi, vakansɨɨla.
7Kʉmbele, wʉ tʉlʉtɨngʼiinie ʉtʉvalɨlo ʉta tʉdatu, ʉnʼdala va Ananiya namwene akiingila mu nyumba jɨlya, kɨtsila kʉlʉmanya ʉgwʉ gavombiike. 8ɄPetulo akambʉʉtsa akata, “Imbʉʉle, indalama itsʉ mukagʉtsiitse ɨkɨlɨmɨla kiinyo, ndeeti tsilɨ tsiitsi?” Akamwanda akata, “Jɨlweli, tsilɨ tsiitso!” 9ɄPetulo akambʉʉla akata, “Kɨki wɨdɨngʼiine nʉ nʼgoosi vaako ʉkʉnʼgela ʉMepo va Ntwa ʉNgʉlʉve? Pʉlɨhɨtsa! Avaanu avakaale kusɨɨla ʉnʼgoosi vaako, valɨ panzi pa ndyango apo. Lɨno najyʉve vihɨlɨka ʉnsimba gwako kʉnzi nʉ kʉkʉsɨɨla.”
10Akasɨkɨ kaako, namwene ʉSafila akagwa pa silʉnde sya Petulo, akaswa baaho. Avadɨɨmi valya wʉ vingye, vakavona ʉSafila namwene asue. Vakahʉmya kʉnzi ʉnsimba gwa mwene, vakansɨɨla pa lʉkanzi pa nʼgoosi va mwene. 11Ʉlʉdwado ʉlʉvaha lʉkaviibata avaanu vooni va mpelela, paninie na vange vooni ʉwʉ vaapʉliike ago.
Avapositili vivomba isidego
12Avapositili valɨkʉvomba isidego ni simanyilo syongosu mu vaanu kʉ maka ga Ngʉlʉve. Avɨɨdɨki vooni vaalʉndamanaga mu mbɨgo tsa tembile, pa Lyeve lya Solomoni.#5:12 Lyeve lya Solomoni Apa paale poonu apaswɨke mu lʉvɨgo lwa tembile ʉpwʉ avaanu vaalʉtɨngʼaniaga evo vaataamaga wʉ vipʉlɨhɨtsa imanyiiso. Apoonu apo paale kʉnzi kʉ Vʉtaamo ʉVʉvalatse wa Ngʉlʉve. 13Avaanu ʉwʉ navaamwɨdɨke ʉYɨɨsʉ valɨkʉvaginia siitso avɨɨdɨki, nʉpwʉ jɨngave aveene vaadwadaga ʉkwɨhanza navo. 14Napeene, ɨmbalɨlo jya vaanu avagoosi na vadala ʉwʉ vaamwɨdɨkaga ʉNtwa ʉYɨɨsʉ jɨlɨkwongelela siitso.
15Ʉkʉkongana ni sidego isyʉ vaavombaga avapositili, avaanu valɨkʉvavɨɨka avatamu mu nzɨla mu sitanda, na mu mateesu, ʉkʉta ʉPetulo wʉ ilʉtɨngʼania, ʉmwɨtsɨɨtsɨ gwa mwene pangave poonu gʉvasikile vaninie, vapone. 16Avaanu vongosu vaahʉmaga mu vʉtsenge ʉvʉlɨ pongosu wa mu lʉvasumbale, valɨkʉlʉndamana apo pa Yelusalemu. Valɨkʉgega avatamu, na valya ʉwʉ imepo imbiivi tsyavibiite. Vooni valɨkʉpona.
Avapositili vigatatsiwa
17Pwʉ ʉnteeketsi ʉmbaha, paninie na vanine vooni va kɨpʉga kya Vasadukayo, kɨkaviibata siitso ɨkɨvini pa kulongwi jya mbombo itsʉ vaavombaga avapositili. 18Vakaviibata avapositili, vakavadɨndɨla mu kɨkʉngwa. 19Lɨno pakɨlo ʉnsuungʼwa va Ntwa ʉNgʉlʉve akiitsa, akadɨndʉla ɨmilyango gya nyumba jya kɨkʉngwa, akavalongotsa, vakahʉma kʉnzi. Akavavʉʉla akata, 20“Lʉtagi mukɨɨme mu lʉvɨgo lwa tembile, mukavalʉmbɨlɨlage avaanu amamenyu gooni ga wʉʉmi ʉvʉpya ʉvʉ.” 21Pwʉ avapositili avo vakalaava kʉ tembile, ndʉwʉ ʉnsuungʼwa akavavʉʉlile. Wʉ vasiike mulya vakatengʉla ʉkʉvamanyiisa avaanu.
Kʉ nsɨkɨ ʉgwa ʉnteeketsi ʉmbaha, paninie na vanine, vakiitsa kʉ tembile, vakavalʉndamania avavaha va kɨvʉmbʉkʉ kyoni kya Vaisilahɨli. Vakavasuungʼa avaloleeli kʉ kɨkʉngwa, pakʉta vakavatoole avapositili valya. 22Lɨno wʉ vingye mu kɨkʉngwa ʉmwa, vakavona avapositili valya navamuli. Vakakilivuka kʉ vavaha, vakavavʉʉla vakata, 23“Tsa kʉdega itsivombiike. Wʉ tʉtsisiike kʉ kɨkʉngwa ʉkʉ, tʉweene ɨmilyango gɨtsiige gɨdɨndilwe. Kange tʉweene avaloleeli vatsiige vɨmile pa milyango viloleela. Lɨno wʉ tʉdɨndwe ɨmilyango, natʉmbweni muunu mulya!” 24Ʉmbaha va valoleeli paninie na vavaha va vateeketsi valya, wʉ vapʉliike ago, vakagangapalɨlwa. Pwʉ vakavʉʉtsania vakata, “Ikulongwi itsi jʉtsiiva ndeeti?”
25Pwʉ akiitsa ʉmuunu mpamato, akavavʉʉla akata, “Pʉlɨhɨtsi! Avagoosi valya ʉwʉ mukavadɨndye mu kɨkʉngwa, ʉnsɨkɨ ʉgʉ valɨ mu lʉvɨgo lwa tembile vikʉvamanyiisa avaanu.” 26Pwʉ ʉmbaha va valoleeli, paninie na valoleeli va mwene valya, vakalʉta kukʉvatoola. Vakatsilongotsania na vapositili valya. Vakiitsa vɨvandye navo kɨtsila kʉvagagavɨka, ʉlwakʉva vaadwadaga ʉkʉta avaanu jʉvikʉvatika na maganga.
27Wʉ vasiike navo, vakavɨɨmya pavʉlongolo pa lʉlʉndamano lwa vavaha va kɨvʉmbʉkʉ kyoni kya Vaisilahɨli. Ʉnteeketsi ʉmbaha akatengʉla ʉkʉtsova akata, 28“Ʉnyie tʉkavalagye mwɨlekelwe ʉkʉvamanyiisa avaanu ikulongwi tsa muunu ʉjʉ! Lɨno mupitsiige mukwolosa imanyiiso tsiinyo mu vʉtsenge ʉvʉ wooni wa Yelusalemu. Munogwa ʉwe tʉvoneke ʉkʉta tʉtulile ɨnongwa jya kʉmʼbuda!”
29ɄPetulo na vapositilivanine vakaanda vakata, “Jilondiwa tʉmpʉlɨkage ʉNgʉlʉve ʉkʉlʉtɨɨlɨla ʉkʉvapʉlɨka avaanu! 30Nʉpwʉ jɨngave mwamʼbudile ʉYɨɨsʉ kʉ nzɨla jya kʉntovelela pa kɨdamingʼanie, lɨno ʉNgʉlʉve va vanyienya viitu aantsʉʉsiitse. 31Akamwɨmɨka ʉjʉ pakʉta ave ndongotsi paninie nʉ mwene,#5:31 Ave ndongotsi paninie nʉ mwene ƗKɨyunaani kiita ambɨɨke kʉ kɨvoko kya mwene kya kʉndyo. ave Mbaha ikange Mpoki, pakʉta avatange aVaisilahɨli vooni vapele imbiivi tsa veene, nʉ kʉsyɨkɨlwa. 32Ikange patʉnogye ʉwe ʉkʉvavʉʉla avaanu, ʉlwakʉva ʉwe tʉlɨ vooleletsi vaago gooni, namwene ʉMepo ʉMbalatse, ʉvɨ ʉNgʉlʉve avapye avikʉmwɨdɨka, ivonia ʉkʉta itsi tsa lweli.”
33Avavaha valya wʉ vapʉliike ago, vakaviipa siitso, valɨkʉnogwa ʉkʉvabuda. 34Mulya mu lʉlʉndamano lwa vavaha va kɨvʉmbʉkʉ kyoni kya Vaisilahɨli, aalemwo ʉFalisayo#5:34 ɄFalisayo Ʉvʉganulu wa litaawa Vafalisayo lola kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. mpamato, ʉvɨ ɨlitaawa lya mwene aale vɨ Gamalieli. Ʉjwa aale mmanyisi va ndagɨlo, ʉvɨ avaanu vooni vaamwɨmɨkaga. Pwʉ akɨɨma ʉmwa, akahʉmya ʉlʉlagɨlo ʉkʉta vavahʉmye kʉnzi avapositili kʉ nsɨkɨ nsupi. 35Wʉ vahʉmile, akavavʉʉla avavahavanine valya akata, “Nyɨ vagoosi ʉnyie va mu Isilahɨli, ɨlɨ ɨlyʉ munogwa ʉkʉvomba kʉ vaanu ava, mwɨvandɨle nalyo. 36Mukʉmbʉke isigono sya kʉnsana, aahʉmye ʉmuunu mpamato ʉvɨ aatambʉlwagwa Teuda. Alɨkwiginia alɨkʉta ʉmwene muunu mbaha. Avaanu ʉwʉ vaahegelye kʉ mileevʉlʉ gɨnni (400) vɨɨmile paninie nave. Lɨno kʉ vʉmalɨlo, akabudwa, naveene valya vooni ʉwʉ vaankongaga vakalekengʼana. Imbombo tsa veene tsyoni tsikaduga baaho. 37Ikange kʉmbele, ʉnsɨkɨ gʉlya ʉgwʉ ɨsilikali jyavalile ɨmbalɨlo jya vaanu, aahʉmye ʉNʼgalilaya mpamato, ɨlitaawa lya mwene aatambʉlwagwa Yuuda. Akavasyova avaanu vankonge ʉmwene pa vʉsumbe wa kʉnogwa ʉkʉjɨhambʉkɨla ɨsilikali. Namwene akabudwa. Valya vooni ʉwʉ vaamwɨdiike, vakalekengʼana. 38Lɨno ndikʉvavʉʉla ʉkʉta aleke ʉkʉvepwo ʉmuunu va kʉvahɨga avaanu ava! Muvaleke vʉvʉle! Ɨngave aga masaago ga veene, evo ɨngave ʉgwʉ vivomba gahʉmile kʉ vaanu, jʉgiduga geene. 39Lɨno gangave gahʉmile kwa Ngʉlʉve, namukaweese ʉkʉvasiga, manya mwiva mukʉnsiga ʉNgʉlʉve jyʉmwene.”
40Amasaago ago ʉgwʉ aahʉmiitse ʉGamalieli, avanine vakagɨɨdɨka. Vakavɨɨlanga avapositili valya, vakahʉmya ʉlʉlagɨlo ʉkʉta vatowe isikoti, vakatowa. Pwʉ vakavabeetsa vakata vɨlekelwe ʉkʉgendelela ʉkʉtsova kʉ vaanu mu vʉtavʉlɨlwa wa litaawa lya Yɨɨsʉ, vakavatavʉla ʉkʉta valʉtage.
41Avapositili valya vakahega pa lʉlʉndamano lwa vavaha va kɨvʉmbʉkʉ kyoni kya Vaisilahɨli kʉnʉ vahowiike, ʉlwakʉva ʉNgʉlʉve aweene vanogye ʉkʉbedwa pa kulongwi jya litaawa lya Yɨɨsʉ. 42Navɨɨlekelwe ʉkʉvamanyiisa avaanu nʉ kʉlʉmbɨlɨla ɨLivangɨli ʉkʉta ʉYɨɨsʉ vɨ Kɨlɨsiti.#5:42 Kɨlɨsiti Lola ʉvʉganulu wa litaawa ɨlɨ kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. Isigono syoni vaagendelye ʉkʉmanyiisa nʉ kʉlʉmbɨlɨla mu mbɨgo tsa tembile, na mu nyumba tsa vaanu.
S'ha seleccionat:
Mbombo tsa Vapositili 5: zga
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2019, Wycliffe Bible Translators, Inc. All rights reserved.