Mbombo tsa Vapositili 6
6
Ʉkʉhalwa kwa vatangɨli lekelakʉpamato
1Mu sigono isyo ɨmbalɨlo jya vakongi va Yɨɨsʉ jɨlɨkʉgendelela ʉkwongelela. Kʉkahʉmɨla ʉkwɨngʼuula mu Vayahudi ʉwʉ vaatsovaga ɨnzovele jya Kɨyunaani#6:1 Kɨyunaani AVayahudi ʉwʉ vaahambile mu silʉnga isinge vaatsovaga ɨKɨyunaani. kʉ valya ʉwʉ vaatsovaga ɨKɨebulaniya. Valya ʉwʉ vaatsovaga ɨKɨyunaani valɨkwɨngʼuula ʉkʉta valya ʉwʉ vaatsovaga ɨKɨebulaniya navaavatangage avaswɨle va veene pa kʉvagavɨla isyakʉlya sya kɨgono nɨ kɨgono. 2Pwʉ avapositili valya kɨtsigo na vavɨlɨ (12) vakavalʉndamania avakongi valya vooni, vakavavʉʉla vakata, “Najinogela ʉwe twɨlekelwe ʉkʉmanyiisa ɨlimenyu lya Ngʉlʉve pakʉta tʉvagavɨlage avaanu isyakʉlya. 3Lɨno ʉnyie vɨɨdɨkivajiitu, ʉkʉhʉma mwanyie voomolwe avagoosi lekelakʉpamato (7) ʉwʉ vamanyikiike ʉkʉta vadɨtsiiwe amaka ga Mepo ʉMbalatse, ikange valʉmanyile vʉnonu ʉkʉtaama mu lʉgendo ʉlʉnonu ʉlwʉ ʉNgʉlʉve inogwa. Avo wʉ tʉvavɨɨke mu mbombo ɨjɨ jya kʉgava isyakʉlya. 4Ʉwe tʉve nʉ nsɨkɨ mwongosu gwa kʉnʼdoova ʉNgʉlʉve nʉ kʉmanyiisa avaanu ɨlimenyu lya mwene.”
5Wʉ vapʉliike ɨlimenyu ɨlyo, vooni vakahovoka siitso. Pwʉ vakamwomola ʉSitefano, ʉmuunu ʉvɨ aamwɨdɨkaga nʉ kʉmmʉʉvɨla ʉNgʉlʉve, ikange aadɨtsiiwe amaka ga Mepo ʉMbalatse. Vakavoomola avange ava: ʉFilipo, ʉPulokolo, ʉNikanoli, ʉTimoni, ʉPalumena, nʉ Nikolao va kʉ Antiokiya, ʉvɨ aatalile akiingila mu mpelela gwa Kɨyahudi ʉkʉhʉma kʉnzi kʉ Vayahudi.#6:5 Amataawa aga mongosu ga Kɨyunaani. Avaanu ava vaahalilwe pa vʉsumbe wa kʉhetsa ʉlwɨngʼuulo ʉlwahʉmye mu mpelela pa kulongwi jya kʉleka ʉkʉvatanga avadala avaswɨle aVayunaani. 6Avagoosi lekelakʉpamato ava vakavɨɨkwa pavʉlongolo pa vapositili. Pwʉ avapositili vakavadoovela kwa Ngʉlʉve, nʉ kʉvavɨɨkɨla isivoko pa kʉviingitsa mu mbombo.
7Ɨlimenyu lya Ngʉlʉve, pa kulongwi jya Yɨɨsʉ, lɨkagendelela ʉkʉvaala mu vaanu. Mu Yelusalemu, ɨmbalɨlo jya vakongi jɨlɨkwongelela siitso, ikange nakɨ kɨpʉga ɨkɨvaha kya vateeketsi vakamwɨdɨka ʉYɨɨsʉ.
Ʉkwibatwa kwa Sitefano
8ɄNgʉlʉve aampeetsaga amaka mongosu ʉSitefano, alɨkʉvomba isidego ni simanyilo isivaha mu vaanu. 9Lɨno, ɨkɨgono kɨpamato, aVayahudi avange vakatengʉla ʉkʉkaningʼana nave. Avaanu avo avange vaahʉmile mu lisinagogi,#6:9 Lisinagogi Ɨjɨ jyale nyumba jya pa litsumbe ʉmwʉ aVayahudi vaalʉndamanaga mu sigono sya Sabato. Lola ʉvʉganulu wa limenyu masinagogi kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. ɨlyʉ lyatambʉlwagwa Lisinagogi lya Vavopolwa. Avange vaahʉmile mu vʉtsenge wa Kilene nʉ wa Alekisanduliya. Avange vaahʉmile mu mpandʉlʉ gwa Kilikiya nʉ gwa Asiya. Nʉpwʉ jɨngave aVayahudi avo vaakaningʼanaga nʉ Sitefano, 10ʉmwene alɨkʉvalema ʉlwakʉva aatsovaga amamenyu ga lʉhala kʉ maka ga Mepo ʉMbalatse.
11Pwʉ vakavasunda avaanu vaninie kʉvʉtiitu, vakavavʉʉla ʉkʉta vateetsage, “Tʉmpʉliike ʉmuunu ʉjʉ itsova amamenyu ga kʉnʼdʉka ʉMoose nʉ Ngʉlʉve.” 12Wʉ vipitsova itso, amamenyu ga veene gakavaviipitsa siitso avanzagɨla va Vayahudi na vamanyisi va ndagɨlo, paninie na vaanu avange. Pwʉ vakamwibata ʉSitefano, vakammɨlɨka mu lʉlʉndamano lwa vavaha va kɨvʉmbʉkʉ kyoni kya Vaisilahɨli. 13Vakavɨɨmya avooleletsi va vʉnuasi, avo vakata, “Ʉmuunu ʉjʉ niduga ʉkʉtsova amamenyu amaviivi pa kulongwi jya tembile ɨmbalatse ɨjɨ, na pa kulongwi jya ndagɨlo tsa Moose! 14Tʉkampʉliike witsova ʉkʉta ʉYɨɨsʉ va kʉ Nazaleti alamamula ɨtembile ɨjɨ, ikange alaandʉla inyiiho itsʉ ʉMoose aatʉlekye.”
15Avaanu vooni ʉwʉ vaataamile mu lʉlʉndamano ʉlwa vakantsaalʉkɨla amiiho ʉSitefano, vakavona kʉmiiho kʉ mwene kungʼaala ʉngata kwa nsuungʼwa.#6:15 Kʉmiiho kʉ mwene kungʼaala ʉngata kwa nsuungʼwa Avaanu vaahʉʉvɨlaga ʉkʉta ʉSitefano wʉ amalile ʉkʉpʉlɨka ago, aale isʉsʉvala kʉmiiho. Lɨno najyahʉmɨle ndʉwʉ vaasaagile. Ʉkʉngʼaala ʉkwa kwalɨngʼiine nʉ kʉngʼaala kwa Moose palya ʉpwʉ aatsovaga nʉ Ngʉlʉve (Kʉhʉma 34:29-35).
S'ha seleccionat:
Mbombo tsa Vapositili 6: zga
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2019, Wycliffe Bible Translators, Inc. All rights reserved.