Yohana 8
8
Ʉnʼdala ʉvibiitwe mu vʉligu
1Ʉmwene ʉYɨɨsʉ akahega pa tembile, akalʉta kʉ kɨdugala kya Mizeituni. 2Pavʉsiku wʉ kʉkie, akakilivuka ikange mu tembile, akatsikwingila ʉmwa. Avaanu vooni vakalʉta kʉ mwene, pwʉ akataama nʉ kʉtengʉla ʉkʉvamanyiisa. 3Avamanyisi va ndagɨlo#8:3 Avamanyisi va ndagɨlo vaale wʉ Vayahudi avamanyi va ndagɨlo itsivɨgilwe mu Lwɨdɨngʼano ʉLʉlaala ni nyiiho itsihʉma mu ndagɨlo itso. Avo wʉ vaanu avaavamanyiisaaga avaanu avange indagɨlo ni nyiiho itso mu masinagogi. tsa Moose na Vafalisayo, vakammɨlɨka kʉ mwene ʉnʼdala mpamato ʉvɨ ibiitwe mu vʉligu, vakambɨɨka pagati pa kɨpʉga kya vaanu. 4Pwʉ vakambʉʉla ʉYɨɨsʉ vakata, “Gwe Mmanyisi, ʉnʼdala ʉjʉ ibiitwe wʉ ivomba ʉvʉligu. 5ɄMoose, ʉkʉkongana ni ndagɨlo tsa mwene, aatʉlagye ʉkʉbuda avadala ndaava, kʉ nzɨla jya kʉtika na maganga.#Valawi 20:10; Simiilitso tsa Ndagɨlo 22:22-24 Pwʉ ʉve wiita ndeeti?” 6Aveene vaavʉtsiitse ndavʉle pa kʉnʼgela ʉYɨɨsʉ, pakʉta vavʉvone ʉwɨɨmɨlo wa kʉmmɨlɨka pa vʉhɨgi. Ʉmwene ʉYɨɨsʉ akiinama, akavɨga nɨ kɨvoko kya mwene paasi pa mmanga. 7Aveene wʉ vigendelela ʉkʉmbʉʉtsa, pwʉ ʉYɨɨsʉ akiinamuka akavaanda akata, “Ɨngave pwale mpamato pagati paanyie, ʉvɨ nagelili ʉkʉvomba imbiivi, vɨ atengʉle ʉkʉntika nɨ liganga ʉnʼdala ʉjʉ.” 8Akavuja akiinama, akagendelela ʉkʉvɨga pa mmanga.
9Wʉ vapʉliike ago, vakatengʉla ʉkʉhega mpamato mpamato, vakalongola avavaha vakakonga avadebe. Kʉ vʉmalɨlo akasigala ʉYɨɨsʉ mwene nʉ nʼdala ʉjwa ʉvɨ ɨɨmile pavʉlongolo pa mwene. 10Pwʉ ʉYɨɨsʉ akiinamuka, akambʉʉtsa akata, “Jyʉva, valɨ ndaku avakʉleetile ʉhɨgwe? Ndeeti, nakʉli ʉvaveetsaga ʉvɨ asigye pakʉta akʉhɨge?” 11Akamwanda akata, “Gwe Ntwa, nakʉli nʉ mpamato.” Pwʉ ʉYɨɨsʉ akambʉʉla akata, “Najyʉne nandɨkakʉhɨge. Lɨno lʉtaga, ʉkʉhʉma ɨleelo, wɨlekelwe ʉkwandɨsa ʉkʉvomba imbiivi.”#8:1-11 Inyandʉlʉ itsinge tsa katale tsa Vʉvɨge ʉVʉvalatse natsilɨ natso ingʼɨndɨ itsi.
ɄYɨɨsʉ vɨ lʉmuli lwa kɨlʉnga
12Pwʉ ʉYɨɨsʉ akagendelela ʉkʉtsova ikange nɨ kɨpʉga kɨlya akata, “Ʉne neene ndikʉvapa ʉlʉmuli avaanu va mu kɨlʉnga. Ʉmuunu ʉvaveetsaga ʉvɨ ikʉngʼonga ʉne, nalagende lʉsiku mu ngʼiisi, apeene iveetsaga nʉ lʉmuli ʉlwʉ lukʉndongolela kʉ wʉʉmi wa sikutsooni.” 13AVafalisayo vakambʉʉla ʉYɨɨsʉ vakata, “Ʉve vukwolela jyʉve ikulongwi tsyako. Ʉwooleletsi waako ʉwa nawa lweli.” 14ɄYɨɨsʉ akavaanda akata, “Nʉpwʉ jɨngave ndikwoleletsa jyʉne ikulongwi tsyango, ʉgwʉ nditsova ga jɨlweli, ʉlwakʉva ndɨkʉmanyile ʉkwʉ ndɨhʉmile, ikange ndɨkʉmanyile ʉkwʉ ndilʉta. Lɨno ʉnyie namukʉmanyili ʉkwʉ ndɨhʉmile nʉ kwʉ ndilʉta. 15Ʉnyie mukʉnnyɨga ʉne ʉkʉkongana ni siinu isivoneka, lɨno ʉne nandikʉmmɨga ʉvaveetsaga. 16Lola, napeene ndɨngammɨge ʉmuunu, ndikʉmmɨgɨla mu vʉgolosu, manya nandɨlɨ jyʉne, apeene ndɨlɨ paninie nʉ Daada ʉvɨ ansuungʼile. 17Mu ndagɨlo tsiinyo jɨvɨgilwe ʉkʉta, ʉwooleletsi wa vaanu vavɨlɨ, vukwɨdɨkiwa ʉkʉta wa jɨlweli.#Simiilitso tsa Ndagɨlo 17:6; 19:15 18Kʉ nzɨla ɨjɨ ʉne ndikwoleletsa ikulongwi tsyango, namwene ʉDaada ʉvɨ ansuungʼile ikwolela ikulongwi tsyane.”
19Pwʉ aVafalisayo vakambʉʉtsa ʉYɨɨsʉ vakata, “Ndeeti, ʉDadaajo alɨ ndaku?” ɄYɨɨsʉ akavaanda akata, “Ʉne namummanyili, namwene ʉDaada namummanyili. Mukaale muve mummanyile ʉne, pwʉ mukaale muweesa ʉkʉmmanya najyʉ Daada.” 20ɄYɨɨsʉ aatsovile ago gooni wʉ imanyiisa kʉ tembile, wʉ alɨ piipi na poonu ʉpwʉ vaavɨɨkaga isikongʼolo sya kʉlahɨla isyavʉpe. Paninie nɨɨlyo naalepwo ʉmuunu va kʉmwibata, ʉlwakʉva ʉnsɨkɨ gwa mwene gwale gʉkaanale ʉkʉsika.
ɄYɨɨsʉ itsova ikulongwi tsa vʉswe wa mwene
21Pwʉ ʉYɨɨsʉ akavavʉʉla ikange aVafalisayo avo akata, “Ʉne ndihega. Lola, wʉ ndɨhegile ʉnyie jʉmukʉndondaga ʉne, napeene jʉmwiswa wʉ mukaanale ʉkʉsyɨkɨlwa ʉvʉtulanongwa wiinyo. Ʉkwʉ ndilʉta ʉnyie namukaweese ʉkwitsa.” 22Baaho aVayahudi vakatengʉla ʉkʉvʉʉtsania vakata, “Kɨki itsova ʉkʉta natʉkaweese ʉkʉnkonga ʉkwʉ ilʉta? Jiiva ilʉta kukɨbuda jyʉmwene?” 23ɄYɨɨsʉ akagendelela ʉkʉvavʉʉla akata, “Ʉnyie mwihʉma apa paasi pa kɨlʉnga ɨkɨ, wʉ ʉne ndihʉma ʉkʉ kʉkyanya kwa Ngʉlʉve. Ʉnyie mulɨ va kɨlʉnga ɨkɨ, wʉ ʉne nandɨlɨ va kɨlʉnga ɨkɨ, 24kyʉ mene ndɨvavʉʉlile ʉkʉta ʉnyie jʉmwiswa wʉ mukaanale ʉkʉsyɨkɨlwa ʉvʉtulanongwa wiinyo. Jɨlweli ɨngave namukwɨdɨka ʉkʉta Ʉne Neene ndɨ Ndɨlɨkwo,#8:24 Ʉne Neene ndɨ Ndɨlɨkwo Apa ʉYɨɨsʉ ikɨtsova ndʉwʉ ʉNgʉlʉve ɨɨtsovile mu Lwɨdɨngʼano ʉLʉlaala (Kʉhʉma 3:14; Yesaya 43:10). jʉmwiswa kʉ nongwa jya vʉtulanongwa wiinyo.”
25Pwʉ vakambʉʉtsa ʉYɨɨsʉ vakata, “Tʉvʉʉle ʉve veeve veeni?” ɄYɨɨsʉ akavaanda akata, “Wʉ nditengʉla ʉkʉmanyiisa, ndɨkavavʉʉlile ʉkʉta ʉne neene veeni. 26Ndɨlɨ nago mongosu ʉgwʉ ndɨkaale nditsova nʉ kʉvahɨga ʉnyie, lɨno ʉne ndikʉvavʉʉla avaanu vooni ikulongwi tsilya tsyene itsʉ ndipʉlɨka ʉkʉhʉma kʉ mwene ʉDaada. Ʉjwa vɨ mwene ʉvɨ ansuungʼile, ikange itsova ʉwajɨlweli.” 27Aveene navaalʉmanye ʉkʉta aatsovaga navo ikulongwi tsa Daada va kʉkyanya.
28Pwʉ ʉYɨɨsʉ akavavʉʉla akata, “Wʉ muhʉʉsiitse ʉMwana va Muunu pakʉta mumʼbude, pwʉ jʉmukʉlʉmanya ʉkʉta Ʉne Neene ndɨ Ndɨlɨkwo. Gooni ʉgwʉ ndivomba, nandivomba kʉ vʉtavʉlɨlwa wango jyʉne, apeene ndivomba nʉ kʉtsova galya ʉgwʉ ʉDaada ammanyiise. 29Ʉvɨ ansuungʼile ʉne alɨ paninie nʉʉne. Ʉmwene nikʉndeka ndɨ mwene, manya ʉnsɨkɨ gwoni ndivomba galya ʉgwʉ gikʉmmovosa.”
30ɄYɨɨsʉ wʉ itsova ago, avaanu vongosu vakamwɨdɨka.
ɄNgʉlʉve ikʉvavɨɨka avaanu vave vavopolwa
31Pwʉ ʉYɨɨsʉ akavavʉʉla aVayahudi valya avaamwɨdiike akata, “Ɨngave mukʉgakonga amamenyu gango, mwiva vakongi vango va jɨlweli, 32ikange mukʉvʉmanyaga ʉwajɨlweli. Pwʉ kʉ nzɨla jya wajɨlweli ʉwa, ʉNgʉlʉve jiikʉvavɨɨka vavopolwa.”
33Aveene vakambʉʉtsa vakata, “Kɨki witsova wiita ʉwe jʉtuvɨɨkwa vavopolwa wʉ ʉwe tʉlɨ vitsʉkʉlʉ va Abulahamu,#8:33 Abulahamu Ikulongwi tsa Abulahamu ɨmba kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. ikange nakʉli ʉmuunu ʉvagelile lʉsiku ʉkʉtʉvɨɨka vavanda va mwene?” 34ɄYɨɨsʉ akavaanda akata, “Jɨlweli ndikʉvavʉʉla ʉkʉta, ʉmuunu ʉvaveetsaga ʉvɨ igendelela ʉkʉvomba imbiivi, imbanda va mbiivi.#Valooma 6:12-23 35Ʉmbanda nivalɨlwa ʉkʉta va kʉtaama nʉ mwenenyumba va mwene sikutsooni, apeene ʉmwana va mwenenyumba vɨ itaama apo sikutsooni. 36Pwʉ ndɨ Mwana va Ngʉlʉve ndɨngavavopole ʉkʉhʉma mu mbiivi tsiinyo, namukaave vavanda ikange, apeene mwiva vavopolwa jɨlweli. 37Ndɨlʉmanyile ʉkʉta ʉnyie mulɨ vitsʉkʉlʉ va Abulahamu. Nʉpwʉ jɨngave wʉ jɨlɨwo, ʉnyie mulonda ʉkʉmbuda ʉne, ʉlwakʉva namukwɨdɨka ʉgwʉ ndikʉvamanyiisa ʉnyie. 38Ʉne ndikʉvavʉʉla ʉgwʉ ndɨgaweene kwa Daada, lɨno ʉnyie muvomba ʉgwʉ ʉdadajiinyo avamanyiise ʉnyie.”
39Aveene vakamwanda ʉYɨɨsʉ vakata, “Ʉwe ʉdadajiitu vɨ Abulahamu.” ɄYɨɨsʉ akavavʉʉla akata, “Mukaale muve jɨlweli mulɨ vaana va Abulahamu, mukaale muvombaga galya ʉgwʉ ʉAbulahamu aavombaga. 40Lɨno mulonda ɨnzɨla jya kʉmbuda, nʉpwʉ jɨngave ndɨvavʉʉlile ʉwajɨlweli ʉwʉ ndɨvʉpʉliike ʉkʉhʉma kwa Ngʉlʉve. ɄAbulahamu naavombe itso itsʉ munogwa ʉkʉvomba kwane. 41Imbombo itsʉ muvomba tsihʉma kwa dadajiinyo ʉjyʉnge.” AVayahudi avo vakamwanda ʉYɨɨsʉ vakata, “Ʉwe natʉlɨ vaana avaholilwe mu vʉligu, apeene ʉNgʉlʉve mwene vɨ Dadajiitu.” 42ɄYɨɨsʉ akavaanda akata, “Jɨkaale jɨve ʉNgʉlʉve vɨ Dadajiinyo, pwʉ mukaale mukʉngana ʉne. Ʉne nanditsili kʉ vʉtavʉlɨlwa wango jyʉne, apeene ʉNgʉlʉve vɨ ansuungʼile. 43Kɨki namukʉgamanya ʉgwʉ nditsova? Namukʉgamanya ʉlwakʉva mubeela ʉkwʉpɨlɨla imanyiiso tsyango. 44Ʉnyie mulɨ vaana va dadajiinyo ʉSetano. Ikange munogwa ʉkʉvomba galya ʉgwʉ ʉdadajiinyo ʉjwa ikʉganogwa. ɄSetano ʉkʉhʉma kʉ vʉtengʉlɨlo imʼbudi, ikange ninogwa ʉkwɨma mu wajɨlweli, ʉlwakʉva ʉwajɨlweli navʉmuli mu numbula jya mwene. Ʉkʉtsova ʉvʉnuasi lwiho lwa mwene ʉSetano, manya ʉmwene innuasi ikange vɨ dadaaje va vanuasi vooni. 45Lɨno ʉlwakʉva ʉne ndikʉvavʉʉla ikulongwi tsa jɨlweli, ʉnyie namukʉnnyɨdɨka.
46“Veeni pagati paanyie ʉvɨ iweesa ʉkʉtsova ʉkʉta ʉne ndɨlɨ ntulanongwa? Ɨngave galya ʉgwʉ ndikʉvavʉʉla ga jɨlweli, pwʉ kɨki namukʉnnyɨdɨka? 47Ʉmuunu va Ngʉlʉve ikʉmpʉlɨka ʉNgʉlʉve. Lɨno ʉnyie namukʉmpʉlɨka ʉNgʉlʉve ʉlwakʉva namulɨ vaanu va mwene.”
ɄYɨɨsʉ vɨ ndʉti nakʉ kwa Abulahamu
48AVayahudi avo vakambʉʉtsa ʉYɨɨsʉ vakata, “Ndeeti, ʉwe natwitsova ɨlweli wʉ twita ʉve ʉlɨ Nsamaliya ikange ʉlɨ ni mepo imbiivi?” 49ɄYɨɨsʉ akavaanda akata, “Ʉne nandɨlɨ ni mepo imbiivi. Ʉne ndikʉmwɨmɨka ʉDaada, lɨno ʉnyie namukʉnnyɨmɨka ʉne. 50Lola, ʉne nandilonda ʉkwɨjɨmɨka jyʉne, ʉNgʉlʉve vɨ mwene inogwa ndyɨmɨkiwaagwe ikange ʉmwene vɨ mmɨgi va jɨlweli. 51Jɨlweli ndikʉvavʉʉla ʉkʉta, ʉmuunu ʉvaveetsaga ʉvɨ ikonga galya ʉgwʉ ndimanyiisa, nalaaswe lʉsiku.”#8:51 Nalaaswe lʉsiku Ʉvʉganulu wa mamenyu aga lola Yohana 6:50.
52Pwʉ aVayahudi avo vakambʉʉla ʉYɨɨsʉ vakata, “Lɨno tʉlʉmanyile ʉkʉta ʉve ʉlɨ ni mepo imbiivi! ɄAbulahamu nava vanyamalago vaasue, lɨno ʉve wiita, ‘Ʉmuunu ʉvaveetsaga ʉvɨ ikonga galya ʉgwʉ nditsova, nalaaswe lʉsiku!’ 53Jɨlweli, ʉve nʉlɨ mbaha ʉkʉlʉtɨɨlɨla ʉkʉkʉjiitu ʉAbulahamu! Ʉmwene aasue. Avanyamalago naveene vaasue. Ndeeti, ʉve vukɨvɨɨka ʉlɨ veeni?” 54ɄYɨɨsʉ akavaanda akata, “Ɨngave ndikɨjɨmɨka jyʉne, ʉkwɨjɨmɨka kwango kwiva kʉtsila mbombo ɨjɨveetsaga. Lɨno ʉDaada vɨ mwene ikʉʉma ʉwɨɨmɨkiwa ʉne, ʉvɨ ʉnyie mwita vɨ Ngʉlʉve viinyo. 55Nalɨ lɨno mupitsiige namummanyili ʉNgʉlʉve, apeene ʉne ndɨmmanyile. Ndɨngate nandɨmmanyili ʉNgʉlʉve, pwʉ ndiiva ndɨlɨ nnuasi ndʉʉnyie. Ʉne ndɨmmanyile ʉNgʉlʉve, ikange galya ʉgwʉ itsova ndikʉgakonga. 56Ʉkʉkʉjiinyo ʉAbulahamu aahowiike siitso pa kʉlʉmanya ʉkʉta ʉne ndɨliitsa. Aale ʉngata ambwene, aahowiike siitso.”
57Pwʉ aVayahudi vakaviipa, vakambʉʉtsa ʉYɨɨsʉ vakata, “Ʉve ʉpitsiige nʼdebe nʉsikiili ɨmyaka isitsigo sihaano (50), pwʉ wambwene ndeeti ʉAbulahamu?” 58ɄYɨɨsʉ akavaanda akata, “Jɨlweli ndikʉvavʉʉla ʉkʉta, Ʉne Neene ndɨ Ndɨlɨkwo, ndyale kwʉndɨle wʉ ʉAbulahamu akaanale ʉkʉholwa.” 59AVayahudi wʉ vapʉliike ago, vakahola amaganga pakʉta vantike nʉ kʉmʼbuda. Ʉmwene ʉYɨɨsʉ akajaganika, akahega apoonu pa tembile.#8:59 AVayahudi vaaholile amaganga pakʉta vantike nʉ kʉmʼbuda ʉYɨɨsʉ, ʉlwakʉva vaasaagaga ʉkʉta ikʉnʼdʉka ʉNgʉlʉve pa kulongwi jya kwɨtambʉla mu litaawa lya Ngʉlʉve.
S'ha seleccionat:
Yohana 8: zga
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2019, Wycliffe Bible Translators, Inc. All rights reserved.