Yohana 9
9
ɄYɨɨsʉ ikʉmponia ʉmʼbosu
1Lola, ɨkɨgono kɨpamato ʉYɨɨsʉ wʉ igenda mu nzɨla, akambona ʉmuunu mpamato ʉvɨ aaholilwe mʼbosu. 2Avakongi va mwene vakambʉʉtsa vakata, “Gwe Mmanyisi, ʉmuunu ʉjʉ aaholilwe mʼbosu kʉ nongwa jya mbiivi tsyani? Ndeeti ʉlʉ lʉkooto lwa mbiivi tsa muunu ʉjʉ jyʉmwene evo lwa mbiivi tsa vahotsi va mwene?”#9:2 AVayahudi vaasaagaga ʉkʉta ʉvʉbosu nʉ vʉlema ʉvʉveetsaga sihʉmana nʉ lʉkooto ʉlwihʉma kwa Ngʉlʉve. Vaateetsaga ʉlwa luhʉmana ni mbiivi tsa muunu ʉndema jyʉmwene, evo tsa vahotsi va mwene evo ʉkʉhʉma kʉ mpamato va vanyienya va mwene (Kʉhʉma 20:5). 3ɄYɨɨsʉ akavaanda akata, “Ʉjʉ naviili mʼbosu kʉ nongwa jya mbiivi tsa mwene, evo imbiivi tsa vahotsi va mwene. Ʉmwene aaholilwe mʼbosu, pakʉta imbombo tsa Ngʉlʉve tsivonekele mu mwene. 4Pilondiwa tʉvombage imbombo tsa Ngʉlʉve ʉvɨ ansuungʼile wʉ kʉpitsiige muunyi, manya ɨkɨlo jikwitsa ʉpwʉ nakʉli ʉmuunu ʉvaveetsaga ʉvɨ jiiweesa ʉkʉvomba imbombo.#9:4 Mu lʉkɨndɨ ʉlʉ ʉYɨɨsʉ ivonia ʉkʉta ndʉwʉ avaanu vivomba imbombo ʉnsɨkɨ gwa pamuunyi wʉ najitsili ɨngʼiisi, vʉvʉle vʉle namwene ʉYɨɨsʉ pannogye ʉkʉvomba imbombo tsa Ngʉlʉve wʉ akaanale ʉkʉbudwa. 5Ʉnsɨkɨ wʉ ndɨlɨ mu kɨlʉnga ɨkɨ, ʉne neene ndikʉvapa ʉlʉmuli avaanu va mu kɨlʉnga.”
6ɄYɨɨsʉ wʉ atsovile ago, akabeha amati paasi, akasyoga ʉmmanga na mati ago, akamyandɨka mu miiho ga mʼbosu ʉjwa. 7Pwʉ akambʉʉla ʉmʼbosu akata, “Ʉbɨhage ʉkapuguhe kʉmiiho kʉ lisiva lya Silohamu.” Ɨlitaawa Silohamu kwʉ kʉta ʉvɨ aasuungʼilwe. Pwʉ ʉmʼbosu ʉjwa akalʉta kʉ Silohamu, akatsipuguha kʉmiiho, akapona, alɨkʉvuja kʉ myave ilola.
8Pwʉ avambʉtsengelanile va mwene na vange vooni ʉwʉ vaambonaga pa vʉtengʉlɨlo wʉ idoova isiinu, vakatengʉla ʉkʉvʉʉtsania valɨkʉta, “Ndeeti, ʉmuunu ʉjʉ navɨ mwene ʉlya ʉvɨ akataamaga paasi nʉ kʉdoova isiinu?” 9Avange vakata, “Ʉjʉ vɨ mwene.” Avange vakata, “Baako, ʉjʉ navɨ mwene, apeene ahwaniine siitso nʉ mwene.” Lɨno ʉvakaale mʼbosu, akavavʉʉla, “Tsa jɨlweli, ʉne neene ndɨkaale mʼbosu.” 10Pwʉ vakambʉʉtsa vakata, “Ɨngave jɨlweli ʉve veeve, pwʉ amiiho gaako gatengwe ʉkʉlola kʉ nzɨla nyiki?” 11Ʉmwene akavaanda akata, “Ʉmuunu ʉvɨ ɨlitaawa lya mwene vɨ Yɨɨsʉ, akabehile amati pa mmanga, akasyogile ʉmmanga na mati ago, nʉ kʉmyandɨka mu miiho gango. Pwʉ akambʉʉlile ʉne akata, ‘Ʉbɨhage ʉkapuguhe kʉmiiho kʉ lisiva lya Silohamu.’ Ndɨkalʉtile, ndɨkatsipuguha, pwʉ baaho ndɨkatengwe ʉkʉlola.” 12Pwʉ vakambʉʉtsa vakata, “Ndeeti, ʉmuunu ʉjwa alɨ ndaku?” Ʉmwene akavaanda akata, “Inyage, nandɨlʉmanyili.”
AVafalisayo vikʉmbʉʉtsa ʉvɨ aale mʼbosu
13Pwʉ avaanu valya vakammɨlɨka kʉ Vafalisayo ʉmuunu ʉvɨ aale mʼbosu pa vʉtengʉlɨlo. 14Ɨkɨgono ɨkyʉ ʉYɨɨsʉ aasyogile ʉmmanga nʉ kʉmponia ʉmʼbosu ʉjwa, kyale kɨgono kya Sabato. 15Pwʉ aVafalisayo naveene vakambʉʉtsa ʉmuunu ʉjwa vakata, “Ndeeti, ʉkatengwe ʉkʉlola kʉ nzɨla nyiki?” Akavaanda akata, “Ʉmuunu mpamato akamyandiike ʉmmanga ʉgwʉ asyogile mu miiho gango, ndɨkalʉtile ndɨkatsipuguha kʉmiiho, lɨno ndilola.” 16Pwʉ aVafalisayo vaninie vakata, “Ʉmuunu ʉvɨ avombile ndavʉle nihʉma kwa Ngʉlʉve, ʉlwakʉva ivomba ʉgwʉ gabeelilwe ʉkʉvombwa mu kɨgono kya Sabato.” Lɨno avange vakata, “Jiweesekana ndeeti kʉ muunu ʉntulanongwa ʉkʉvomba isimanyilo isyo?” Pwʉ vakasʉtɨngʼana vaveene kwa veene.
17Kʉ vʉmalɨlo aVafalisayo vakambʉʉtsa ikange ʉmuunu ʉjwa vakata, “Ʉve wiita ndeeti pa kulongwi tsa muunu ʉjwa ʉvɨ akʉponiitse amiiho gaako?” Ʉmwene akavaanda akata, “Ʉne ndivona ʉmuunu ʉjwa nyamalago va Ngʉlʉve.” 18Lɨno aVafalisayo navɨɨdɨke ʉkʉta ʉmuunu ʉjwa pa vʉtengʉlɨlo aale mʼbosu. Pwʉ vakavɨɨlanga avahotsi va mwene. 19Vakavavʉʉtsa vakata, “Ndeeti, ʉmuunu ʉjʉ lweli mwana viinyo? Ndeeti, jɨlweli ʉmwene aaholilwe mʼbosu? Ɨngave lweli aaholilwe mʼbosu, pwʉ lɨno tsivye ndeeti ilola?” 20Pwʉ avahotsi va mwene vakavaanda vakata, “Ʉwe tʉlʉmanyile ʉkʉta ʉjʉ lweli mwana viitu, ikange lweli aaholilwe mʼbosu. 21Lɨno natʉlʉmanyili ɨkɨhʉmye kʉ mwene, ɨkɨmpelye atengʉle ʉkʉlola, evo ʉmuunu ʉvɨ amponiitse amiiho ga mwene. Mumbʉʉtse jyʉmwene, manya ʉjʉ muunu nʼdʉlʉsu, iweesa ʉkwɨtsovela jyʉmwene.” 22Avahotsi va mwene vaatsovile ndavʉle, manya vaavadwadaga avalongotsi avo, ʉlwakʉva avalongotsi vɨɨdɨngʼiine ʉkʉta ʉmuunu ʉvaveetsaga ʉvɨ ikwɨdɨka ʉkʉta ʉYɨɨsʉ vɨ Mesiya, aveetsage va kʉtengwa nʉ kʉswɨmwa mu masinagogi ga veene. 23Ɨkɨ kyʉ kyavapelye avahotsi avo vate, “Mumbʉʉtse jyʉmwene, ʉlwakʉva ʉmwene muunu nʼdʉlʉsu, iweesa ʉkwɨtsovela jyʉmwene.”
24Pwʉ avalongotsi va Vayahudi vakamwɨlanga ikange ʉmuunu ʉvɨ aale mʼbosu pa vʉtengʉlɨlo, vakambʉʉla vakata, “Mwɨmɨkage ʉNgʉlʉve, manya ʉwe tʉlʉmanyile ʉkʉta ʉmuunu ʉjwa, ʉvɨ akʉponiitse, ntulanongwa.” 25Pwʉ akavaanda akata, “Inyage angave ntulanongwa. Ʉne ndɨkɨmanyile ɨkɨɨnu kɨpamato, ndɨkaale mʼbosu, lɨno ndilola.” 26Pwʉ vakambʉʉtsa vakata, “Ndeeti, ʉmuunu ʉjwa akakʉvombye kɨki? Akakʉponiitse amiiho gaako ndetindeeti?” 27Ʉmwene akavaanda akata, “Ʉne ndɨmalile ʉkʉvavʉʉla, namupʉliiki? Kɨki munogwa ndɨvavʉʉle ikange? Ndeeti, najyʉnyie munogwa ʉkʉva vakongi va mwene?”
28Pwʉ aveene vakanʼdʉka vakata, “Ʉve ʉlɨ nkongi va mwene! Lɨno ʉwe tʉlɨ vakongi va Moose. 29Tʉlʉmanyile ʉkʉta ʉNgʉlʉve aatsovile nʉ Moose, lɨno ʉmuunu ʉjwa natʉlʉmanyili ʉkwʉ ahʉmile.”
30Ʉmwene akavaanda akata, “Ʉne ndidega siitso! Ʉnyie mwita namummanyili ʉkwʉ ahʉmile, wʉ ʉmwene ammoniitse ʉne amiiho gango! 31Tʉlʉmanyile ʉkʉta ʉNgʉlʉve nipʉlɨhɨtsa inyɨsajo tsa vatulanongwa,#Zabuli 34:15-16; Sumbo 15:29 apeene ikʉmpʉlɨhɨtsa ʉmuunu ʉvaveetsaga ʉvɨ ikʉmwɨmɨka, ikange ivomba itsa vʉnogwe wa mwene ʉNgʉlʉve. 32Ʉkʉhʉma pa vʉtengʉlɨlo ʉpwʉ ʉNgʉlʉve aapelile ɨkɨlʉnga, natʉgelili ʉkʉpʉlɨka nalʉsiku ʉkʉta kwale ʉvɨ amponiitse ʉmuunu ʉvaholilwe mʼbosu. 33Ɨngave ʉmuunu ʉjʉ nihʉma kwa Ngʉlʉve, pwʉ naale aweese ʉkʉvomba ɨlɨ.” 34Aveene vakaanda vakata, “Ʉve waaholilwe nʉ kʉlelwa mu vʉtulanongwa. Lɨno wigela ʉkʉtʉmanyiisa ʉwe!” Pwʉ vakantenga mu mpelela, vakanswɨma ahege pa veene.
Ʉvʉbosu wa mu numbula tsa Vafalisayo
35ɄYɨɨsʉ wʉ apʉliike ʉkʉta vantengile nʉ kʉnswɨma ʉmuunu ʉjwa, akalʉta kukʉndonda. Wʉ ambwene, akambʉʉtsa akata, “Ndeeti, vukʉmwɨdɨka ʉMwana va Muunu?” 36Ʉmuunu ʉjwa akamwanda akata, “Gwe ntwa, ʉMwana va Muunu vɨ veeni pakʉta ndɨmwɨdɨkage?” 37ɄYɨɨsʉ akamwanda akata, “Ʉve ʉmbwene, ikange vɨ mwene ʉvɨ itsova nʉʉve.” 38Ʉmuunu ʉjwa akata, “Ndikʉkwɨdɨka, Ntwa.” Pwʉ akasugama pavʉlongolo pa Yɨɨsʉ akasaana kʉ mwene.
39Pwʉ ʉYɨɨsʉ akata, “Ʉne nditsile mu kɨlʉnga ʉmʉ kwihɨga, pakʉta avabosu valolage, ikange avaanu ʉwʉ vilola, vave vabosu.” 40Pwʉ aVafalisayo avange ʉwʉ vaalepwo apo, wʉ vapʉliike ikulongwi itso, vakambʉʉtsa vakata, “Oogo, wiita ʉwe najyʉwe tʉlɨ vabosu?” 41ɄYɨɨsʉ akavaanda akata, “Mwale muve vabosu, mwale mwiva vatsila vʉgalo. Lɨno mugendelelaga ʉkʉva nʉ vʉgalo ʉlwakʉva mukɨtsova mwita mwilola.”
S'ha seleccionat:
Yohana 9: zga
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2019, Wycliffe Bible Translators, Inc. All rights reserved.