Juan 5
5
Jesús suchu runata puririchin
1Chay qhepata judiokunaj rayminku karqa, Jesustaj Jerusalenman rerqa. 2Chaypacha Jerusalén llajtapi, Oveja Yaykuna punku qayllapi yaku jap'ina uj estanque karqa, hebreo rimaypi Betesda sutiyoj. Chay estanquetaj phishqa corredorniyoj karqa. 3Chay corredorkunapi ashkha onqosqa sirisqa kasharqanku: Ñawsakuna, suchukuna, wist'u chakiyojkuna ima. Paykunataj yaku kuyurinanta suyaj kanku, 4imaraykuchus chaypacha yuyaj kanku unaymanta unay, uj ángel urayk'amuspa yakuta kuyurichisqanta. Pichus ñawpajta estanqueman yaykojtaj ima onqoyllamantapis qhaliyachisqa kanan karqa. 5Chay onqosqakuna ukhupi uj runa kashallarqataj, paytaj kinsa chunka pusajniyoj watataña onqosqa kasqa. 6Jinapi Jesús chay onqosqata rikorqa, unayña ajina kasqanta yachaspataj, taporqa: Qhaliyapuyta munawajchu? nispa.
7Onqosqataj kuticherqa: Wiraqochíy, mana piniypis kanchu estanquepi yaku kuyurejtin ichuykunawanpaj. Sapa kuti yakuman yaykuyta munashajtiy, wajllapuni ñawpaykuwan, nispa. 8Jesustaj payta nerqa: Sayariy, phulluykita oqharispataj, wasiykiman ripuy, nispa.
9Jesús chayta nejtinkama, chay runa ujllata qhaliyaporqa, phullunta oqharispataj, puriyta qallarerqa. Chay p'unchayrí samarina p'unchay karqa. 10Chayrayku judiokunaj kurajninkukuna chay runata nerqanku: Samarina p'unchay kasqanrayku, puñunaykita mana apayta atinkichu, nispa.
11Paytajrí kuticherqa: Pichus qhaliyachiwaj niwarqa: Phulluykita oqharispa, wasiykiman ripuy, nispa.
12Chantá paykuna taporqanku: Pitaj karqa phulluykita oqharispa ripunaykita nisojri? nispa.
13Chay purirej runataj mana yacharqachu pichus qhaliyachisqanta, Jesús runa ukhupi chinkarisqanrayku. 14Chaymanta qhepata Jesús chay runata Temploj pationpi taripaspa, nerqa: Qhaliyachisqaña kaspa, amaña juchalliyñachu, ama astawan llakiy qhatirisunanpaj, nispa.
15Chantá chay runa ripuspa, judiokunaj kurajninkukunaman willamorqa Jesús payta qhaliyachisqanta. 16Chayrayku wañuchiyta munaspa, paykuna Jesusta qhatiykacharqanku, samarina p'unchaypi mana ruwanata ruwasqanmanta. 17Jesustajrí paykunaman kuticherqa: Tatayqa kunankama imachus ruwananta ruwashallanpuni, noqapis ruwanayta ruwashallanitaj, nispa.
18Chayta Jesús nisqanrayku judiokunaj kurajninkukuna payta wañuchinankupaj astawan kallpachakorqanku, samarina p'unchaypi runata qhaliyachisqanrayku, chantá Diosqa Tatan kasqanta nisqanrayku ima. Chayta nispa, Jesús yachayta qorqa payqa Dios jinallataj kasqanta.
Diosqa Churinman atiyta qon
19Chaypacha Jesús paykunata nerqa: Kayta sut'ita niykichej: Diospa Churenqa sapallanmanta mana imatapis ruwayta atinchu, manachayqa pay ruwan imatachus Tatanta ruwajta rikun, chayllata. Tukuy imatachus Tata Dios ruwan, chayllatataj Churinpis ruwan.#Jn 5.30; 8.28. 20Tata Diosqa Churinta munakun. Chayrayku imatachus pay ruwan, chay tukuyta Churinman rikuchin. Chantá aswan jatuchaj ruwanataraj ruwananpaj rikuchenqa, qankunataj chayta rikuspa, t'ukunkichej. 21Imaynatachus Tata Dios wañusqakunata kawsarichispa, kawsayta paykunaman qon, ajinallatataj Churinpis, pikunamanchá kawsayta qoyta munan, chaykunaman qon. 22Jinallataj Tata Diosqa mana pitapis juzganchu, manachayqa Churinman tukuy atiyta qon, pay runakunata juzgananpaj. 23Ajinamanta tukuy runakuna Churinta maypaj qhawanqanku, imaynatachus Tata Diosta maypaj qhawanku, ajinata. Pillapis Diospa Churinta mana maypaj qhawajrí nillataj kachamoj Tatantapis maypaj qhawanchu.#Lc 10.16; Jn 15.23; 1 Jn 2.23.
24Kaytapis nillaykichejtaj: Sichus pipis parlasqayta uyarispa, kachamuwaj Tataypi atinikun chayqa, payqa wiñay kawsayniyoj, manataj juicio p'unchaypi juchachasqachu kanqa. Pay mana jayk'ajpis juchachasqachu kanqa, imaraykuchus wañuymanta kawsayman chimpapunña.#Jn 3.15-18; Ro 8.1. 25Nillaykichejtaj: Chay p'unchay chayamunan karqa, kunantaj chayamunña. Chaypachataj wañusqakuna Diospa Churinpa wajyasqanta uyarenqanku, pikunachus uyarejkunataj kawsanqanku. 26Imaynatachus Tata Diosqa pay kikinpi kawsayniyoj, ajinallatataj Churinmanpis atiyta qorqa pay jinallataj kawsayniyoj kananpaj.#Jn 1.4. 27Jinallataj Tata Dios payman tukuyta juzgananpaj atiyta qollarqataj, imaraykuchus paymin Runaj Churenqa.
28Ama kay nisqaymanta t'ukuychejchu. Uj p'unchay chayamonqa, chaypachataj tukuy wañusqakuna Runaj Churinpa parlasqanta uyarenqanku. 29Allin kajta ruwajkuna wiñay kawsayman yaykunankupaj kawsarimonqanku. Mana allin kajta ruwajkunatajrí juiciopi juchachasqa kanankupaj kawsarimonqanku, nispa.#Dn 12.2; 2 Mac 7.9-14,23.
Jesusmanta testigokuna
30Jesús judiokunaj kurajninkukunata nillarqataj: Mana imatapis noqallamantachu ruwani. Noqaqa Tataypa niwasqanman jina pitapis juzgani,#Jn 5.19. juzgasqaytaj cheqanpuni, imaraykuchus mana munasqallaytachu ruwayta mask'ani, manachayqa kachamuwaj Tataypa munaynillanta.
31Sichus noqalla pichus kasqayta niyman chayqa, qankuna llullakushasqayta niwajchej. 32Chaywanpis noqamanta willajqa waj tiyan, yachanitaj noqamanta imatachus willasqanqa cheqapuni kasqanta. 33Qankuna Bautizaj Juanta tapunankupaj kachakunata kacharqankichej, paytaj noqamanta cheqa kajta paykunaman willarqa. 34Noqaqa mana pipis noqamanta testigo jina parlarinanta necesitanichu. Chaywanpis kayta Juanmanta niykichej qankuna noqapi atinikusqaykichejrayku Dios qhespichisunaykichejpaj. 35Juanpa yachachisqanqa laqhapi k'anchay jina karqa, qankunataj yachachisqanta uyarispa, kusikorqankichej.
36Noqaj ruwasqayrí Juanpa willasqanmanta astawanraj noqa pichus kasqaymanta sut'inchan. Noqaqa Tata Dios imatachus kamachiwasqanta ruwani, chay ruwasqaytaj Tata Dios kachamuwasqanmanta sut'ita yachayta qon.#Jn 10.25,38; 14.11. 37Kachamuwaj Tata Diospis noqamanta willallarqataj, qankunataj mana jayk'ajpis parlasqanta uyarerqankichejchu, nitaj rijch'aynintapis rikorqankichejchu. 38Diospa nisqanqa mana sonqoykichejpi sayanchu, imajtinchus Churinpi mana atinikunkichejchu. Noqamin Tata Diospa kachamusqan kani.
39Qankunaqa Diospa Qhelqachisqanta allin allinta qhawankichej, imaraykuchus qhelqasqapi imatachus nisqannejta wiñay kawsayta tarinaykichejta yuyankichej. Chay qhelqasqarí noqamanta willan.#Dt 4.1; 8.1; 30.15-20; Bar 4.1. 40Chaywanpis qankuna mana noqaman jamuyta munankichejchu wiñay kawsayta tarinaykichejpaj, nispa.
41Jesús nillarqataj: Noqaqa runakuna jatunchanawankuta mana mask'anichu. 42Aswanpis noqa sonqoykichejta sumajta rejsini, yachanitaj qankuna Diosta mana munakusqaykichejta. 43Noqaqa Tataypa sutinpi jamuni, qankunataj qhesachawankichej. Waj runachus mana pejpa kachamusqallan jamusunkichejman chayrí, paytaqa mana qhesachawajchejchu. 44Qankunaqa qankunapuralla jatunchanakuyta munankichej, manataj Dios jatunchasunaykichejta mask'ankichejchu. Jina chayqa, imaynatataj noqapi atinikuwajchejri?
45Ama yuyaychejchu noqa Tataypa ñawpaqenpi qankunata juchachanayta. Qankunata juchachajqa wajmin, chaytaj Moisés. Qankunataj paypi atinikuspa, qhespichisqa kayta suyashankichej.#Dt 31.26-27. 46Moisespa nisqantachus jap'ikuwajchej chayqa, nisqaytapis jap'ikullawajchejtaj, imaraykuchus payqa noqamantamin qhelqarqa. 47Moisespa nisqantachus mana jap'ikunkichej chayrí, imaynatataj nisqayta jap'ikuwajchejri? nispa. Ajinata Jesús nerqa.
S'ha seleccionat:
Juan 5: DQDC
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Revisión Biblia Quechua Boliviano © Sociedad Bíblica Boliviana, 2017.