Lucas 15
15
Chinkasqa ovejamanta rijch'anachina
(Mt 18.10-14)
1Impuestota cobrajkuna, mana allin kawsayniyoj runakuna ima Jesusman qayllaykusharqanku parlasqanta uyarinankupaj. 2Chayrayku fariseokunawan, Diospa kamachisqanmanta yachachejkunawan ima thutuspa, nisharqanku: Kay runaqa juchasapakunawan kawsakun, paykunawantaj mikhun, nispa.
3Jinapi Jesús kay rijch'anachinata willarqa: 4Qankunamanta mayqenpis pachaj ovejayoj kaspa, ujnin chinkajtin, manachu chay jisq'on chunka jisq'onniyojta ch'innejpi saqespa, chinkasqa kajta tarinaykichejkama mask'aj riwajchej? 5Ovejanta tariytawantaj, michejqa may kusisqa lijrariykukun. 6Wasinman chayaytawantaj, kawsaqenkunata, llajta masinkunata ima tantaykuspa, paykunata nin: Noqawan khuska kusikuychej, imaraykuchus chinkasqa ovejayta tarikapuni, nispa. 7Kayta niykichej: Ajinallataj janaj pachapi aswan kusiy tiyan juchasapa runa Diosman kutirikojtin, jisq'on chunka jisq'onniyoj mana juchayojkunamanta nisqaqa, pikunachus Diosman mana kutirikunankuchu tiyan, chaykunamanta, nispa.
Chinkasqa qolqemanta rijch'anachina
8Jesús nillarqataj: Manachu pi warmipis chunka qolqenmanta ujnin kajta chinkachispa, chay ratopacha lamparata jap'ichin, wasinta pichaspataj, qolqenta tarinankama mask'an? 9Tariytawantaj kawsaqenkunata, llajta masinkunata ima tantaykuspa, paykunata nin: Noqawan kusikuychej, imaraykuchus chinkachisqay qolqeyta tarikapuni, nispa. 10Nillaykichejtaj Diospa angelninkunaj ñawpaqenpi ajina kusiy kasqanta, juchasapa runa Diosman kutirikojtin, nispa.
Munakuyniyoj tatamanta rijch'anachina
11Jesús nillarqataj: Uj runa iskay churiyoj kasqa. 12Sullk'a kajtaj tatanta nisqa: Tatáy, manaraj wañupushaspa kunanpacha chayaqeyta qopuway, nispa. Tatankutaj sapa ujninkuman chayaqenkuta qopusqa.
13Mana unaymanchu sullk'a kaj churi tukuy chayaqenta vendeytawan, chay qolqeta tantaykuspa, karu llajtaman ripusqa. Jaqaypitaj tukuy qolqenta tukuchisqa mana allinta purispa. 14Maypachachus tukuy qolqen tukukojtin, chaypachallataj chay llajtapi manchay yarqhay kasqa, paytaj pisichikuyta qallarisqa. 15Chayrayku chay llajtayoj patronpaman qayllaykuspa, ganakunanpaj ruwanata mañakusqa. Chay patrontaj jallp'anman kachasqa khuchita michinanpaj. 16Chaypitaj waynaqa yarqhaymanta khuchi mikhuna thaqota mikhuyta munasqa. Chaywanpis mana pipis ni imatapis jaywasqachu.
17Chantá waynaqa yuyayninman churakuspa, sonqonpi nisqa: Tataypa wasinpeqa peonkuna ashkha mikhunayoj kanku, noqatajrí kaypi yarqhaymanta wañushaniña. 18Chayrayku tataypa wasinman kutiripusaj, chantá nisaj: Tatáy, Diospa contranta juchallini, qanpa contraykitapis. 19Manaña wawayki kanaypaj jinachu kani. Chayrayku ujnin peonniyki jinallatapis jap'iway ari, nispa. 20Sayariytawantaj, waynaqa tatanpaman kutipusqa.
Karullapiraj kashajtintaj, tatanqa wawanta rikuspa, mayta khuyarikusqa. Chantá usqhayta taripamuspa, wawanta ojllaykusqa, much'aykusqataj. 21Jinapi churin nisqa: Tatáy, Diospa contranta juchallini, qanpa contraykitapis. Manaña wawayki kanaypaj jinachu kani, nispa.
22Tatanrí uywaqenkunata kamachisqa: Usqhayllata aswan sumaj p'achata orqhomuspa, kay wawayta p'achallichiychej. Anillotapis makinman churaychej, mosoj juk'utatapis chakinman. 23Chantá wirayachisqa torillota ñak'aychej, imaraykuchus raymita ruwaspa, sumajta mikhusunchej. 24Kay wawayqa wañusqa karqa, kawsarimuntaj. Chinkasqa karqa, kunantajrí tarikapuni, nispa. Ajinamanta tukuyninku mayta kusikuspa, raymita ruwayta qallarisqanku.
25Chaykama kuraj kaj chureqa chajrallapiraj kashasqa. Wasinman kutimuspataj takisqankuta, tususqankuta ima uyarisqa. 26Jinapi ujnin kamachita wajyaspa, tapusqa: Ima ch'ajwataj chayri? nispa. 27Paytaj kutichisqa: Wawqeyki chayampun, tataykitaj wirayachisqa torillota ñak'achin, wawqeyki allillan kutimpusqanrayku, nispa.
28Chantá kuraj kaj chureqa phiñakuspa, manapuni wasiman yaykuyta munasqachu. Tatantaj llojsimuspa, mayta nisqa yaykunanta. 29Paytajrí tatanman kutichisqa: Noqaqa kay chhika watataña qanpaj llank'ani, manataj jayk'ajpis uj cabritallatapis qowarqankichu kawsaqeykunawan mikhuspa kusirikunaypaj. 30Kay lloqallaykirí tukuy kapuyniykita usuchimorqa imaymana khuchi warmikunawan purispa. Chaywanpis kutimojtenqa, qan wirayachisqa torillota paypaj ñak'achinki, nispa.
31Tatantajrí kutichisqa: Wawáy, qanqa noqawanpuni kashanki, tukuy imaypis qanpatapuni. 32Chaywanpis raymita ruwaspa, kusikunanchejpuni karqa, imaraykuchus kay wawqeykeqa wañusqa karqa, kawsarimuntaj, chinkasqa kasqanmantataj tarikapunchej, nispa. Ajinata Jesús runakunaman yachacherqa.
S'ha seleccionat:
Lucas 15: DQDC
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Revisión Biblia Quechua Boliviano © Sociedad Bíblica Boliviana, 2017.