Lucas 21
21
Wajcha warmisapa Diosman qolqeta qon
(Mc 12.41-44)
1Uj kuti Jesús Temploj pationpi kashaspa, qhawasharqa imaynatachus qhapajkunaqa Diospaj qolqeta apamusqankuta qolqe churanaman churashasqankuta. 2Rikullarqataj uj wajcha warmisapatapis iskay phatallata churaykojta. 3Chantá Jesús nerqa: Kayta sut'ita niykichej: Kay wajcha warmisapaqa tukuy runamanta nisqaqa astawan ashkhata churan. 4Chayta niykichej, imaraykuchus chay ujkuna puchoj qolqellankumanta Diosman qonku. Kay warmisaparí wajcha kayninpi tukuy kapusqanta churaykun.
Templo thuñisqa kananmanta
(Mt 24.1-2; Mc 13.1-2)
5Wakinkuna parlasharqanku Temploqa k'acha sumachaj rumikunawan ruwasqa kasqanmanta, jinallataj may k'achitu k'achanchasqa kasqanmantawan ima. Jesustajrí paykunata nerqa: 6Jamoj p'unchaykunapirí kay tukuy ima rikusqaykichej thuñisqa kanqa, manataj uj rumillapis waj rumi patapi qhepakonqachu, nispa.
Jatun ñak'ariykuna kanqa
(Mt 24.3-28; Mc 13.3-23)
7Chantá Jesuspa yachachisqankuna taporqanku: Yachachej Wiraqochíy, jayk'ajtaj chay tukuy ima kanqari? Ima señaltaj kanqa chay tukuy ima kananpajri? nispa.
8Chantá Jesús nerqa: Allinta qhawakuychej, pajtataj pipis q'otiyasunkichejman. Chayta niykichej, imaraykuchus ashkha runakuna jamuspa, nenqanku: Noqaqa Diospa kachamusqan Cristo kani, nispa. Nillanqankutaj: Chay p'unchay qayllaña, nispa. Qankunarí amapuni qhepankuta riychejchu.#Mc 13.21; Lc 17.23; 1 Jn 2.18. 9Jinallataj maqanakumanta, ch'ajwamanta ima uyarispa, ama mancharikunkichejchu. Chay tukuy ima ñawpajta kananpuni tiyan. Chaywanpis manaraj kay pachaj tukukuyninchu kanqa, nispa.
10Chantá Jesús nillarqataj: Uj suyu waj suyoj contranta oqharikonqa, uj kamachejtaj waj kamachejpa contranta. 11Sinch'i jallp'a ikhakuykuna kallanqataj, yarqhaykuna, tukuynejpi wañuchej onqoykuna ima. Manchachikunapaj jina imakuna kanqa, janajpipis runaj mana jayk'aj rikusqan t'ukuna imakuna kallanqankutaj.#Is 19.2; Ap 6.3-8,12-17.
12Chaywanpis manaraj chay tukuy ima kashajtin, runakuna qankunata ñak'arichisunaykichejpaj presochasonqachej. Chantá tantakunanku wasiman apasonqachej, carcelkunamantaj wisq'arasonqachej. Jinallatataj kuraj kamachejkunaj ñawpaqenman, llajtata kamachejkunaj ñawpaqenman ima pusasonqachej yachachisqaykuna kasqaykichejrayku. 13Chaywanpis qankuna chaynejta noqamanta tukuy runaman willarayta atinkichej. 14Chayrayku imatachus kutichikunaykichejtaqa ama ñawpajta wakichikuychejchu, 15imaraykuchus noqamin yachayta qosqaykichej, yuyaychasqaykichejtaj imatachus parlanaykichejta. Jinapi awqaykichejkuna chay parlasqaykichejta mana atipanqankuchu, nitaj kutichikuytapis atenqankuchu.#Mt 10.19-20; Mc 13.9-11; Lc 12.11-12.
16Chaywanpis kikin tataykichejwan, wawqeykichejwan, aylluykichejwan, jinataj kawsaqeykichejwan ima qankunata jap'ichisonqachej.#Mt 10.21; Mc 13.12; Lc 12.52-53. Wakinniykichejtataj wañuchenqanku. 17Noqarayku tukuy runaj chejninan kankichej. 18Chaywanpis umaykichejmanta mana uj chujchallapis chinkanqachu. 19Sinch'ita sayaychej, ajinamantataj wiñay kawsayta tarinkichej.
20Jerusalén llajtata soldadokunawan muyurisqata rikuspaqa, qankuna yachaychej manaraj imapi thuñisqapuni kananta. 21Chaypacha Judeapi kajkuna orqokunaman ayqechunku, Jerusalenpi kajkunataj llajtamanta jawaman llojsispa, ripuchunku. Jinallataj chajrapi kajkunapis ama llajtaman kutirimuchunkuchu, 22imaraykuchus ñak'ariy p'unchaykuna kanqa ñawpa qhelqasqapi nisqanman jina junt'akunanpaj. 23Chaypacha manchay llakiy kanqa wijsayoj warmikunapaj, ñuñoj wawayojkunapajpis, imaraykuchus kay suyupi manchay sinch'i ñak'ariy kanqa, jinallataj manchay jasut'iykuna kay llajtata qhatirenqa. 24Wakenqa espadawan wañuchisqa kanqanku, wakintaj presochasqa tukuy suyuman apasqa kanqanku. Chantá mana judío kajkunaqa Jerusalén llajtata saronqanku chay tiempo junt'akunankama.
Runaj Churinpa kutimuynin
(Mt 24.29-35,42-44; Mc 13.24-37)
25Chaypacha intipi, killapi, ch'askakunapi ima runaj mana jayk'aj rikusqan t'ukuna rikhurillanqataj. Kay pachapipis tukuy runakuna manchayta llakikuspa, musphaykachanqanku, mama qochaj qhollchoqeyasqanta rikuspa, yaku moqo oqharikusqanta uyarispa ima. 26Tukuy runataj ima llakiykunachus kay pachata qhatirinanmanta yuyaspa, llawch'iyanqanku, imaraykuchus janajpi atiykunapis, ch'askakunapis thalarasqa kanqanku. 27Chantá runakuna chaypacha rikonqanku Runaj Churinta phuyupi jamushajta, manchay atiywan, jatun kayninpa lliphipiyninwan ima.#Dn 7.13. 28Chay tukuy ima rikhurejtintaj, kallpachakuychej, jinataj patata qhawariychej, imaraykuchus qhespichisqa kanaykichej p'unchay qayllamushanña, nispa. Ajinata Jesús yachacherqa.
29Jesús kay rijch'anachinata nillarqataj: Higo sach'ata qhawariychej, chayrí mayqen sach'allatapis. 30Q'omeryajta rikuspa, yachankichejña q'oñi tiempo qayllapiña kashasqanta. 31Jinallatataj qankunapis chay tukuy ima pasasqanta rikuspa, yachaychej Diospa kamachiynin qayllapiña kashasqanta.
32Kayta sut'ita niykichej: Manaraj mita masiykichej tukukushajtinku, kay tukuy ima junt'akunanpuni tiyan. 33Janajpis, kay pachapis tukukaponqanku. Chaywanpis, nisqayqa mana jayk'ajpis pasanqachu, junt'akonqankupuni.
34Qankunarí qhawarikuychej. Pajtataj anchata mikhunawan, machaykunawan, kay kawsaymanta phutikuykunawan ima sonqoykichej atipachikunman. Pajtataj chay p'unchay mana wakichisqata jap'isunkichejman. 35Chay p'unchayqa tukuy kay pachapi kawsajkunata tojlla jina mana yuyasqallamanta jap'enqa. 36Qankunarí wakichisqapuni kaychej ari, tukuy tiempo Diosmanta mañarikuspa chay tukuy ima jamoj llakiymanta llusp'inaykichejpaj, ajinamanta Runaj Churinpa ñawpaqenpi mana manchachikuspa rikhuriyta atinaykichejpaj, nispa.
37Jesús sapa p'unchay Temploj pationpi#Lc 19.47; 22.53; Jn 18.20. yachachej, tutantaj Olivos sutiyoj orqopi qhepakoj. 38Tukuy runataj tutamantapacha Temploman jamoj kanku paypa yachachisqanta uyarinankupaj.
S'ha seleccionat:
Lucas 21: DQDC
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Revisión Biblia Quechua Boliviano © Sociedad Bíblica Boliviana, 2017.