GÉNESIS 14
14
Abrampa Lot-ta kacharichisqan
1Chay tiempopin Amrafelqa Sinar rey karqan, Ariokqa Elasar rey karqan, Kidorlaomerqa Elam rey karqan, Tidalqa Goim rey karqan. 2Chaykunan maqanakurqan Sodoma rey Bera contra, Gomorra rey Birsa contra, Adma rey Sinab contra, Zeboim rey Zemeber contra, Bela rey contrapiwan. (Bela llaqtan Zoar nisqallataq). 3Chay phisqantinmi Sidim wayq'opi maqanakunapaq huñukurqanku. (Chaypin Kachi Qocha kashan). 4Chaykunan chunka iskayniyoq watata Kidorlaomerta servisqaku, chunka kinsayoq watapitaq ichaqa pay contra hatarisqaku. 5Chaymi chunka tawayoq watapi Kidorlaomerqa hamurqan, hinallataq paywan kashaq reykunapas. Hinaspan Astarot Karnaimpi atiparqanku Refaim runakunata, Ham llaqtapitaq Zuz runakunata, Save-kiriataimpitaq Em runakunata, 6Seir orqopitaq Hor runakunatapas, paykunatan ch'inneq qaylla El-Parán llaqtakama qatirqanku. 7Muyumpuspataq hamurqanku En-mispat llaqtaman (chaymi Kades nisqallataq), hinaspan Amalek runakunaq lliw suyunta atiparqanku, hinallataq Hazezon-tamarpi tiyaq Amor runakunatapas.
8Chaymi lloqsimurqanku Sodoma rey, Gomorra rey, Adma rey, Zeboim rey, Bela reypiwan, hinaspan Sidim wayq'opi maqanakurqanku, 9Elam rey Kidorlaomer contra, Goim rey Tidal contra, Sinar rey Amrafel contra, Elasar rey Ariok contrapiwan, phisqa rey tawa rey contra. 10Sidim wayq'otaq kasharqan brea p'uytu-p'uytullaña, chaymi Sodoma Gomorra reykunaqa ayqespanku chaykunaman urmaykurqanku, kinsataq orqokunaman ayqerqanku.
11Hinan atipaqkunaqa Sodomapi Gomorrapi tukuy kaqta tukuy mikhunatapas aparikuspa ripurqanku. 12Abrampa sobrinon Sodomapi tiyaq Lot-tapas apallarqankutaq tukuy kaqnintinta. 13Huk runataq ichaqa ayqemuspa Hebreo Abramman willarqan. Abramqa tiyarqan Amor runa Mamreq terebinto sach'ankuna qayllapin, chay Mamren wawqen Eskolwan Anerpiwan Abramwan hukllachakusqaku.
14Abramtaq wawqen preso kapusqanta uyarispa, paypapi naceq yuyayniyoqkaq kamachikunata alistarqan, kinsa pachak chunka pusaqniyoqta, hinaspan chay tawa reykunata Dankama qatirqan. 15Abrammi kamachinkunantin tuta rakinakurqanku, hinaspan tawantin reykunata atiparqanku, Damasco llaqtaq wichayninpi kaq Hobakamataq chaykunata qatirqanku. 16Hinaspanmi imaymana kaqkunata qechumurqan, hinallataq wawqen Lot-tapas kaqnintinta, warmikunatapas runakunatapas.
Melkisedekpa Abramta saminchasqan
17Sodoma reytaq Abramta chaskiq lloqsirqan “Rey Wayq'o” nisqa Save wayq'oman, Kidorlaomerta paywan kaq reykunatawan atipamusqanmanta kutimpushaqtin. 18Qollana Diospa sacerdoten Salem rey Melkisedektaq t'antata vinotawan Abramman haywarqan. 19-20Hinaspan payta samincharqan:
—Hanaq pachata kay pachatawan kamaq
Qollana Diospa saminchasqan Abramqa kachun,
awqaykikunata hap'iykachiqniyki
Qollana Diosqa yupaychasqa kachun, nispa.
Abramtaq tukuymanta diezmota payman qorqan. 21Sodoma reytaq Abramta nirqan:
—Runakunata qoway, qhapaq-kaytataq qan hap'ikunki, nispa.
22Abramtaq ichaqa Sodoma reyta nirqan:
—Hanaq pachata kay pachatawan kamaq Qollana Dios Señormanmi rimarirqani, 23huk q'aytutapas usut'a watutapas mana imaykitapas chaskikunaypaq, paqtan niwaq: Ñoqan Abramtaqa qhapaqyachini, nispa. 24Manan imatapas munanichu, aswanpas waynakunaq mikhusqallantan, ñoqawan riq Aner, Eskol, Mamre qharikunapas tupaqninkuta chaskikuchunku, nispa.
S'ha seleccionat:
GÉNESIS 14: QC88
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Biblia en Quechua de Cuzco © Sociedades Bíblicas Unidas, 1988.