GÉNESIS 16
16
Agarwan Ismaelwan
1Abrampa warmin Saraitaq mana paypaq wachakurqanchu, Saraipataq karqan Egipto warmi kamachin, Agar sutiyoq. 2Chaymi Saraiqa Abramta nirqan:
—Yachankin riki Señor Diosqa mana wachakuqman tukuchiwasqanta, valekuyki kamachiywan tiyanaykipaq, icha paypi wawaykuna kanman, nispa.
Hinan Abramqa Saraita kasurqan. 3Chaymi Saraiqa Egipto warmi kamachin Agarta Abram qosanman warmin kananpaq qorqan, chunka wataña Abramqa Canaán suyupi kashaqtin. 4Hinan payqa Agarwan puñurqan, paymi wiksallikurqan. Wiksallikuspataq patronanta pisichayta qallarirqan. 5Hinaqtinmi Saraiqa Abramta nirqan:
—¡Qanmi kaypaqqa huchayoq kanki! Ñoqan kamachiytaqa warmiyki kananpaq qorqayki, wiksallikuspañataq pisichashawan. ¡Señor Diosña mayqenninchistapas huchachawasun! nispa.
6Abramtaq Saraita nirqan:
—Kayqa kamachiykiqa makiykipin kashan, ima munasqaykita payta ruway, nispa.
Sarai sinchita muchuchiqtintaq Agarqa ayqekapurqan. 7Señor Diospa angelninmi ichaqa Agarta tarirqan ch'inneqpi Shur ñanpi kaq unu pukyu patapi. 8Hinaspan payta nirqan:
—Agar, Saraipa kamachin, ¿maymantan hamushanki, maytataq rishanki? nispa.
Paytaq kutichirqan:
—Patronay Saraimantan ayqekushani, nispa.
9Hinaqtinmi Señor Diospa angelninqa payta nirqan:
—Patronaykiman kutipuy, hinaspa payman k'umuykuy. 10Mirayniykitan sinchita askhayachisaq, mana yupay atiymi kanqa askha kasqanrayku. 11Ñan wiksallikurqankiña qhari wawatataq wachakunki, hinaspan Ismael #Hebreo simipi “Diosmi uyarin” ninanta nin. sutita churanki, waqasqaykita Señor Diospa uyarisqanrayku. 12Paymi mana llamp'uyaq runa kanqa, llapawanmi maqanakunqa, llapataq paywan maqanakunqaku, llapa wawqenkuna hark'akushaqtintaq tiyanqa, nispa.
13Hinan Agarqa rimaykuqnin Señor Diosta suticharqan: Qanmi “Rikuq Dios” kanki, nispa, nirqanmi:
—Diosmi rikuwan kawsashaniraqtaq, nispa. 14Chaymi chay pukyuqa “Rikuwaqniy-kawsaq-pukyu” nisqa. Kadespa Beredpa chawpinpin kashan.
15Hinaspan Agarqa Abrampaq huk qhari wawata wachakurqan, Abramtaq chay churinta suticharqan Ismaelta. 16Agarmi Ismaelta wachakurqan Abram pusaq chunka soqtayoq watayoq kashaqtin.
S'ha seleccionat:
GÉNESIS 16: QC88
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Biblia en Quechua de Cuzco © Sociedades Bíblicas Unidas, 1988.