LUCAS 24
24
Jesuspa kawsarimpusqan
(Mt 28.1-10; Mr 16.1-8; Jn 20.1-10)
1Samana qallariy p'unchaytaq pacha illarimuyta warmikunaqa aya p'ampanaman kutimurqanku wakichisqanku q'apaq hawinakunata aparikamuspanku. 2Chayaspataq aya t'oqo wisq'ana rumi tanqaqasqataña tarirqanku. 3Hinaspan haykuspa Señor Jesuspa cuerponta mana tarirqankuchu. 4Chaymi mancharikuspa mana imanaytapas atishaqtinku lliphipishaq p'achayoq iskay qharikuna qayllankupi sayaykurqanku. 5Mancharikuspanku pampaman k'umuykuqtinkutaq, qharikunaqa nirqanku: —¿imaraykun kawsaqtaqa wañusqakunaq kananpi maskhashankichis? 6Manan kaypiñachu, kawsarimpunñan. Galileapi kashaspanraq nisqasuykichista yuyariychis, 7paymi nirqan: Diospa Kachamusqan Runataqa*f** huchasapa runakunaman hap'ichiwaqtinkun chakatawanqaku, kinsakaq p'unchaytaq kawsarimpusaq, nispa.
8Hinan warmikunaqa nisqankunata chayraq yuyarirqanku. 9Aya p'ampanamanta ripuspataq, tukuy chaykunata chunka hukniyoq apostolkunaman*f** wakinkunamanwan willarqanku. 10Apostolkunaman*f** chaykunata willaqkunan karqan Magdalá llaqtayoq María, Juana, Jacoboq maman María, wakin warmikunapiwan. 11Warmikunaq willasqantaq apostolkunaman*f** yanqa rimasqaman rikch'akurqan, chaymi mana creerqankuchu.
12Chaywanpas, Pedroqa aya p'ampanamanmi phawarirqan, t'oqota qhawaykuspataq p'istusqa lino telakunallataña churarayashaqta rikurqan, hinaspan chay hina kasqanmanta musphaspa ripurqan.
Iskay yachachisqakunaman Jesuspa rikhurisqan
(Mr 16.12-13)
13Chay kikin p'unchaymi Jesuspa iskay yachachisqankuna Emaús nisqa huch'uy llaqtata risharqanku. Chay llaqtaqa Jerusalenmanta iskay legua kurakpin karqan. 14Chaykuna sucedesqanmanta parlaspan risharqanku. 15Paykuna parlaspa tapunakuspa rishaqtinkun, kikin Jesusqa asuykuspa paykunawan kuska rirqan. 16Paykunaq ñawintaq ayphayasqa hina karqan Jesusta mana reqsinankupaq.
17Jesustaq paykunata tapuykurqan: —¿Imamanta tapunakuspan purishankichis? nispa.
Chaymi paykunaqa llakisqa uyantin sayaykurqanku. 18Cleofas sutiyoq kaqtaq nirqan: —Jerusalén llaqtapi kay p'unchaykuna imachus sucedesqantaqa lliwmi yachan, ¿chaychu qanqa Jerusalenpi qorpachakushaspayki mana yachanki? nispa.
19Hinan Jesusqa nirqan: —¿Imataq sucederqan? nispa.
Chaymi paykunaqa nirqanku: —Nazaret llaqtayoq profeta*f** Jesustan imaymanata ruwaykurqanku. Paymi Diospa qayllanpipas llapa runaq qayllanpipas atiywanpuni rimarqanpas ruwarqanpas. 20Paytan sacerdote umallikuna, kamachikuqniykupiwan hap'ichirqanku huchachaspa wañuchinankupaq, hinan chakatarqanku. 21Ñoqaykuqa Israel suyuta kacharichinantan suyakusharqayku. Chaykuna sucedesqanqa kinsa p'unchayñan. 22Chaywanpas, ñoqayku t'aqa warmikunan musphachiwanku. Paykunan tutallamanta aya p'ampanaman rirqanku, 23manataq cuerponta tarimurqankuchu. Angelkunataqsi paykunaman rikhurispa nimusqa: Jesusqa kawsashanmi, nispa. 24Chaymi wakinniyku aya p'ampanaman rispa warmikunaq nisqanta hinapuni tarimurqanku, Jesustan ichaqa mana rikumurqankuchu, nispa.
25Hinan Jesusqa paykunata nirqan: —¡Mana yuyayniyoqmá qankunaqa kasqankichis! ¡Profetakunaq*f** nisqantapas ñak'ayllamá creesqankichis! 26¿Manachu Diospa Akllasqan Cristoqa chaykunata ñak'arinanpuni karqan manaraq hanaq pachapi hatunchasqa kashaspa? nispa.
27Hinaspan Moisespa qelqasqankunamanta llapallan profetakunaq*f** qelqasqankama paymanta lliw qelqasqata sut'incharqan.
28Emaús llaqtachaman chayashaqtinkutaq Jesusqa aswan karuman puriq hina karqan. 29Chaymi paykunaqa hark'arqanku: —Ch'isiñamá, tutayashanñataq kanpas, ñoqallaykuwanña qhepakuy, nispa.
Hinan Jesusqa paykunawan samakuq haykurqan. 30Paykunawan mikhuq tiyaykuspataq t'antata hap'ispa Diosman graciasta qorqan, phasmispataq paykunaman haywarqan. 31Chay raton ñawinku kicharikuqtin Jesusta reqsirqorqanku, paytaq qhawashaqtinku chinkarqapurqan. 32Chaymi paykuna ninakurqanku: —¿Manachu ñanpi rimapayawaspanchis Diospa Simin Qelqaq nisqanta willashawaqtinchisqa sonqonchis kawsarirqan? nispa.
33Kaq ratopachan Jerusalén llaqtaman kutirqanku, hinaspan chunka hukniyoq apostolkunata*f** paykunawan kashaqkunatapas huñunasqata tarirqanku. Hinan nirqanku: 34—Cheqaqtapunin Señor Jesusqa kawsarimpun, Simonmanpas rikhurinñan, nispa.
35Emausmanta kutimuqkunapas willakullarqantaq imaynatachus ñanpi paykunaman rikhurisqanta, mikhunapaq t'antata phasmishaqtin Jesusta reqsirqosqankutawan.
Yachachisqankunaman Jesuspa rikhurisqan
(Mt 28.16-20; Mr 16.14-18; Jn 20.19-23; Hch 1.6-8)
36Chaykunamanta rimashaqtinkun Jesusqa chawpinkupi sayaykuspa paykunata napaykurqan: —Sonqoykichis “thak” nichun, nispa.
37Paykunataq ichaqa llaksasqa mancharikuspanku espirituta rikushasqankupaq yuyarqanku. 38Jesustaq ichaqa nirqan: —¿Imanaqtintaq mancharikunkichis? ¿Imanaqtintaq sonqoykichispi iskayrayashankichis? 39Qhawariychis makiykunata chakiykunata, ñoqa kikiypunin kani. Llamiykuwaychis qhawaykuwaychis, espirituqa manan aychayoqchu manan tulluyoqchu, rikusqaykichis hinapas ñoqaqqa kanmi cuerpoy, nispa.
40Chayta nispataq makinkunata chakinkunata paykunaman qhawaykachirqan. 41Kusikuymanta musphaspa manaraq creeshaqtinkutaq Jesusqa nirqan: —¿Imallaykichispas mikhuykunaypaq kashanchu? nispa.
42Paykunataq phasmi challwa kankata haywarqanku. 43Hinan Jesusqa ñawpaqenkupi mikhurqan. 44Hinaspan paykunata nirqan: —Kaykunan hunt'akun Moisespa kamachikuy qelqanpi, profetakunaq*f** qelqanpi, Salmo qelqasqakunapipas ñoqamanta llapan qelqasqakuna. Chaykunamantan qankunawan kashaspayraq willarqaykichis, nispa.
45Chay raton yuyayninkuta kicharirqan Diospa Simin Qelqata entiendenankupaq. 46Hinaspan paykunata nirqan: —Qelqasqa kasqanman hinapunin Diospa Akllasqan Cristoqa ñak'arinay karqan, wañuspataq kinsakaq p'unchaypi kawsarimpunay karqan. 47Chay hinapi Jerusalén llaqtamanta qallarispa hinantin suyukunapi ñoqaq sutiypi Diosman kutirikuypas huchakuna pampachaypas willasqa kanan karqan. 48Qankunan chaykuna sucedesqanmanta rikuq yachaq kankichis. 49Qhawariychis, ñoqan Yayaypa prometesqan Santo Espirituta kachamusqaykichis. Chaykamataq qankunaqa Jerusalén llaqtapi suyashaychis hanaq pachamanta hamuq atiyta chaskinaykichiskama, nispa.
Jesuspa hanaq pachaman wicharipusqan
(Mr 16.19-20; Hch 1.9-11)
50Chaymantataq Jesusqa paykunata llaqta hawaman pusarqan Betania llaqtakama. Chaypin makinta mast'arispa paykunata samincharqan. 51Saminchashaspanmi qayllankumanta t'aqarikurqan, hinaspan hanaq pachaman hoqarisqa karqan. 52Paykunataq Jesusta yupaycharqanku, hinaspan ancha kusisqa Jerusalén llaqtaman kutimpurqanku. 53Dios yupaychana wasipiqa kashallaqkupunin, Diosta yupaychaspanku saminchaspanku.
S'ha seleccionat:
LUCAS 24: QC88
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Biblia en Quechua de Cuzco © Sociedades Bíblicas Unidas, 1988.