Lʉʉka 20
20
Ʉlʉposio vwɨmɨla ʉvʉtavʉlɨlua vwa Yesu
(Mataayi 21:23-27; Malɨka 11:27-33)
1ɄYesu akavʉlanɨsyagha avaanhu mʉ lʉvɨɨka ʉlwa nyumba ɨnyɨmɨke ɨja kufunyila, na kupʉlɨsia ɨMhola ɨNofu. Ɨkɨghono kɨmonga, avavaha va vatekesi, avavʉlanɨsi va ndaghɨlo, na vagojo va Vayahudi vakamʉlʉtɨla, 2pe vakamposia vakati, “Ʉtʉvʉʉle, ghuvomba isi mʉ vʉtavʉlɨlua vwani?#20:2 Ghuvomba isi mʉ vʉtavʉlɨlua vwani: Valyamposisie ʉlʉ vwɨmɨla imbombo sino ʉYesu akavombagha ndavʉle: kukwingila mʉ Yelusalemu na kaluulu, kudaga avaanhu mʉ nyumba ɨnyɨmɨke ɨja kufunyila, kuvʉlanɨsia avaanhu ni singi nyinga. Ghwe veeni jʉno akʉpeliile ʉvʉtavʉlɨlua ʉvuo?”
3Akavavʉʉla akati, “Na jʉʉne nɨkʉvaposia lʉmonga, mʉmbʉʉle, 4ʉvʉtavʉlɨlua ʉvwa Yohani kukwofugha avaanhu, vʉlyahʉmile kwani? Vʉlyahʉmile kwa Ngʉlʉve, kʉ vaanhu?” 5Apuo, vakatengʉla kuposania veene viiti, “Tʉngati vʉlyahʉmile kwa Ngʉlʉve, kyaiiti, ‘Ongo namʉlyamwɨtiike?’ 6Nambe tʉngati vʉlyahʉmile kʉ vaanhu, avaanhu vooni ava, kyavikʉtʉtova na mavue, ʉlwakʉva vantangʼhinie ʉYohani kuuti mʼbɨli.” 7Pambele, vakamʼbʉʉla vakati, “Natʉkagwile ʉvʉtavʉlɨlua ʉvuo kʉno vʉlyahʉmile.” 8ɄYesu akavavʉʉla akati, “Na jʉʉne, nanɨkʉvavʉʉla kʉno vuhʉma ʉvʉtavʉlɨlua ʉvwa kʉvomba isi.”
Ɨkɨhwanɨkɨsio ɨkya vavombi avaviivi
(Mataayi 21:33-46; Malɨka 12:1-12)
9Pepano ʉYesu akatengʉla kʉkʉvavʉʉla avaanhu ɨkɨhwanɨkɨsio ɨkɨ, akati, “Kwealyale ʉmuunhu jʉmonga alyalɨmile ʉmʉghʉnda,#20:9 Ʉmʉghʉnda, kɨhwanɨkɨsio kya vaanhu va Ngʉlʉve, aVaisilaeli (Yesaya 5:1-7). akavyala isabibu. Akakodesia kʉ vaanhu ʉmʉghʉnda ghʉla, ʉmwene akakyʉla, akalʉta kʉ ɨɨsi ɨja kʉ vʉtali. Ʉkuo akikala ifighono finga.
10“Ʉnsiki ʉghwa kʉpeta ye ghʉfikile, akasuungʼha ʉmʼbombi ghwake kʉ vaanhu vala kuuti vampeele ɨlɨghavo lyake ɨlya mpeto. Neke ʉmʼbombi jʉla ye afikile, avaanhu vala vakantova na kʉkʉnʼdaga, akagomoka mavoko gheene.
11“Ʉnya mʉghʉnda, akasuungʼha ʉmʼbombi ʉjʉnge. Neke ghwope vakantova na kʉkʉmʼbombela sino nasinoghiile, pe vakanʼdaga kɨsila kʉmpeela kɨmonga. 12Akasuungʼha ʉghwa vʉtatu. Ʉjuo ghwope vakamʉlemasia, vakantaagha kʉnji.#20:12 Kʉnji: Ʉlole ɨkɨhwani kya mʉghʉnda ghwa sabibu kʉ kɨtabu kya Malɨka 12:1.
13“Pambele, ʉnya mʉghʉnda akati, ‘Lɨno nɨkɨte kɨki? Ʉnsiki ʉghʉ, nɨkʉnsuungʼha ʉmwanango ʉmʉghanɨke! Pamo ʉjʉ valamwɨtɨka.’ 14Ʉnswambe akavʉʉka ilʉta, neke avaanhu vala ye vikʉmwagha, vakava vivʉlana viiti, ‘Ʉjʉ ghwe nya vʉhaasi ghwa mʉghʉnda ʉghʉ. Lɨno, tʉmʼbude, neke ʉvʉhaasi vʉʉve vwitu.’ 15Vakankwesa kʉnji kuhʉma mʉghʉnda ʉghwa sabibu, vakamʼbuda.”
Pe ʉYesu akavaposia akati, “Lɨno, ndepoonu ʉnya mʉghʉnda jʉla kyaɨkʉvavomba kɨki avaanhu vala? 16Ikwisa ɨkʉvabuda, neke ikodesia kʉ vaanhu avange ʉmʉghʉnda ghʉla.” Avaanhu ye vapʉliike amasio aghuo, vakati, “Isio sileke kuhʉmɨla nambe lʉsiku!” 17Neke ʉYesu akavalola, akavaposia akati, “Pe amalembe agha, ghalɨ nʉ mʉlʉvo mʉki?
‘Ɨlɨvue lɨno avajengi valyalɨkanile,
lye lɨvue ɨlɨvaha ɨlya pa nguto.’#20:17 Lɨvue ɨlɨvaha ɨlya pa nguto: Ɨmba kʉ Vʉghanʉle vwa Masio aMahesia.
18“Ʉmuunhu angaghue pa lɨvue ɨlio, idenyengʼhana, kange ʉmuunhu ghweni lɨngamʉghwɨle, lɨkʉnʼdijania lwoni.”
19Pe avavʉlanɨsi va ndaghɨlo na vavaha va vatekesi, vakakagʉla kuuti ɨkɨhwanɨkɨsio ɨkio kɨkʉvajova aveene. Pepano vakava vilonda pikʉnkola pala pala, neke vakoghopa ɨlɨpʉgha ɨlya vaanhu.
Kusonga ɨsongo kwa Kaisali
(Mataayi 22:15-22; Malɨka 12:13-17)
20Pe avavaha va Vayahudi, vakava vikʉmwʉvɨla ʉYesu. Vakasuungʼha avaanhu vano vakivɨɨka hwene vanya vʉfumbue vʉnono, neke vahʉngɨɨle sino ivomba ʉYesu. Vakavombagha ʉluo kuuti vakyaghe ɨkɨteghe vwɨmɨla amasio ghaake, neke vankole na kʉkʉntwala kwa ntwa kuuti ahɨghue.
21Pepano avaanhu vala vakamposia ʉYesu vakati, “Mʼbʉlanɨsi, tʉkagwile kuuti ghujova na kuvʉlanɨsia isa kyangʼhaani. Kange, naghukwoghopa nambe muunhu vwɨmɨla ʉvʉvaha vwake, looli ghuvʉlanɨsia mʉ vwakyangʼhaani sino ilonda ʉNgʉlʉve. 22Asi, indaghɨlo sa Moose sikwɨtɨkɨsia kusonga ɨsongo kwa Kaisali?”#20:22 Kaisali, alyale ghwe ntwa ʉmʼbaha ʉghwa Valooma. Ɨmba kʉ Vʉghanʉle vwa Masio aMahesia.
23Neke ʉYesu akakagʉla ʉvʉkedʉsi vwave, akavavʉʉla akati, 24“Mʉhʉfie ɨhela ɨdinali. Ɨkɨhwani ɨkɨ nɨ lɨtavua ɨlɨ, fyani?” Vakamwamʉla vakati, “Fya Kaisali.” 25Pe ʉYesu akavavʉʉla akati, “Lɨno, ifya Kaisali, mʉmpelaghe ʉKaisali; ifya Ngʉlʉve, mʉmpelaghe ʉNgʉlʉve.” 26Avaanhu vala vakadegha kyongo ʉlwamʉlo lwa Yesu, vakajika kɨmihe. Vakakunua ɨkɨteghe ɨkya kʉnkolela, vwɨmɨla amasio ghano ajovile pamaaso gha vaanhu.
Ɨmhola ɨja lʉsyʉko lwa vafue
(Mataayi 22:23-33; Malɨka 12:18-27)
27AVasadukayi#20:27 AVasadukayi: Ɨmba ɨlɨsio Vasadukayi kʉ Vʉghanʉle vwa Masio aMahesia. vakavʉlanɨsyagha kuuti, avafue navalasyʉka nambe lʉsiku. Pe vamonga mʉ veene vakalʉta kwa Yesu, vakamposia vakati, 28“Ghwe Mʼbʉlanɨsi, ʉMoose alyatʉlembiile ʉlʉlaghɨlo kuuti, nave ʉmuunhu afwile, neke amʉlekile ʉnʼdala kɨsila mwana, lʉnoghiile ʉnnine amhaale ʉmfwɨle jʉla, kuuti ampapɨle avaana ʉnyakʉsila.#Similisio sa Ndaghɨlo 25:5-6 29Lɨno, kwevalyale avanamuunhu. Ʉghwa kwanda akatoola ʉnʼdala, akafua kɨsila mwana. 30Ʉghwa vʉvɨlɨ, akamhaala ʉmfwɨle jʉla, ghwope akafua kɨsila kʉleka mwana.#20:30 Akadebe aka namwekale mʉ fitabu fimonga ifikʉʉlʉ. 31Ghwope ʉghwa vʉtatu akamhaala, lʉkava vʉle vʉle kʉ vooni lekelalʉbale, valyafwile kɨsila kʉleka mwana. 32Pambele, ʉnʼdala jʉla ghwope akafua. 33Lɨno, nave kwelʉle ʉlʉsyʉko lwa vafue, ʉmʉkɨjʉʉva jʉla iliiva nʼdala ghwani? Ʉlwakʉva alyatolilue na vala vooni lekelalʉbale.”
34ɄYesu akavavʉʉla akati, “Avaanhu va lɨno, vitoola na kutolua. 35Neke avaanhu vano ʉNgʉlʉve ivona kuuti vanoghiile kusyʉsɨvua kuhʉma kʉvʉlʉngʉ#20:35 Kʉvʉlʉngʉ, kwe kʉno vikukala avafue. Ɨmba kʉ Vʉghanʉle vwa Masio aMahesia. na kukukala kʉ ɨɨsi ɨmhia, avuo navalatoola, nambe kutolua. 36Palɨkɨmo nʉluo navalafua kange, ʉlwakʉva viliiva ndavʉle avanyamhola. Viiva vaana va Ngʉlʉve, ʉlwakʉva vasyʉsivue kuhʉma kʉvʉlʉngʉ.
37“Najʉ Moose alyajovile kuuti avafue vilisyʉka. Alyajovile ʉluo mʉ Malembe aMɨmɨke mʉ mhola ɨja kɨhanji kɨno kɨlyale kiviika ʉmwoto. Alyantambwile ʉMʉtwa ʉNgʉlʉve kuuti, ‘Ngʉlʉve ghwa Abulahamu, Ngʉlʉve ghwa Isaka, Ngʉlʉve ghwa Yakovo.’#Kuhʉma 3:6#20:37 Ngʉlʉve ghwa Abulahamu, Ngʉlʉve ghwa Isaka, Ngʉlʉve ghwa Yakovo: Avakʉʉlʉ ava mwe kɨvʉmbʉkiile ɨkɨsina ɨkya Vayahudi, napano valyafwile, vajiighe vʉʉmi pamaaso gha Ngʉlʉve. 38ɄNgʉlʉve naNgʉlʉve ghwa vafue, looli Ngʉlʉve ghwa vʉʉmi, ʉlwakʉva kwa mwene vooni vʉʉmi.”
39Apuo, avavʉlanɨsi vamonga ava ndaghɨlo vakati, “Mʼbʉlanɨsi, ʉjovile se seene!” 40Kutengʉlɨla apuo, vakava vikwoghopa kʉkʉmposia.
Ʉlʉposio vwɨmɨla ʉKɨlɨsite
(Mataayi 22:41-46; Malɨka 12:35-37)
41Neke ʉYesu akavaposia akati, “Asi, lwandaani avaanhu viiti, ʉKɨlɨsite Mwana ghwa Davɨdi? 42Ʉlwakʉva ʉDavɨdi jʉjuo, alyalembile mʉ kɨtabu kya Sabuli, alyatiile,
‘ɄMʉtwa ʉNgʉlʉve alyamʼbʉlile ʉMʉtwa ghwango,
“Ʉʉve nʉ vʉtavʉlɨlua palɨkɨmo nuune,
43kuhanga nɨkʉtange ʉvaleme avalʉgʉ vaako,
ʉvateme.” ’#20:43 Kuhanga nɨkʉtange ʉvaleme avalʉgʉ vaako, ʉvateme: Mʉ Kɨyunaani lɨlembilue, kuhanga nɨvavɨɨke avalʉgʉ vaako paasi pa maghʉlʉ ghaako.
44“Lɨno, ʉDavɨdi ɨkʉntambʉla ʉKɨlɨsite iiti, ‘Mʉtwa.’ Pe ʉKɨlɨsite ivisagha mwanaake ndaani?”
ɄYesu ɨkʉvapavɨla avaanhu vwɨmɨla avavʉlanɨsi va ndaghɨlo
(Mataayi 23:1-36; Malɨka 12:38-40; Lʉʉka 11:37-54)
45Avaanhu vooni ye vikʉmpʉlɨkɨsia ʉYesu, ʉmwene akavavʉʉla avavʉlanɨsɨvua vaake akati, 46“Mulolelelaghe na vavʉlanɨsi va ndaghɨlo, vano viiva nʉ lʉkeelo kughenda vafwalile isopeka, kuuti avaanhu vavahʉngɨlaghe nʉ vwoghofi mʉ mapuulo. Pano valɨ mʉ masinagogi, vilonda kukukala kʉvʉlongolo. Na mʉ fikulukulu vilonda kukukala kʉ fitengo ifya voghopua. 47Avaanhu ava vikʉvafumba avafwɨle ifiinu fyave. Neke mʉ vʉkedʉsi vwave vikufuunya inyifuunyo inhali, kuuti vavoneke vagholofu. Avuo, ʉNgʉlʉve ilikʉvapeela ʉlʉpumuko ʉlʉkome!”
S'ha seleccionat:
Lʉʉka 20: wbi
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© (Active), Wycliffe Bible Translators, Inc. All rights reserved.