Lʉʉka 23
23
ɄYesu ihɨghua kwa ntwa ʉPilato
(Mataayi 27:1-2, 11-14; Malɨka 15:1-5; Yohani 18:28-38)
1Pambele, avavaha vala vooni ava Vayahudi vakɨɨma, vakantwala ʉYesu kwa Pilato. 2Vakatengʉla kujova ifiteghe ifya kʉmpelela kuhɨghua, vakati, “Ʉmuunhu ʉjʉ, twamwagha ivʉlanɨsia sino sipela avaanhu kuuva vagalʉsi mʉ ɨɨsi jiitu. Ikaana avaanhu kusonga ɨsongo kwa Kaisali, kange ijova kuuti ʉmwene ghwe Kɨlɨsite, ʉNtwa.”
3ɄPilato akamposia ʉYesu, “Asi, ʉve veeve Ntwa ghwa Vayahudi?” ɄYesu akamwamʉla akati, “Ʉve ʉjovile.” 4Apuo, ʉPilato akavavʉʉla avavaha va vatekesi, palɨkɨmo nɨ lɨpʉgha lya vaanhu akati, “Nanɨkʉghwagha ʉnkole kwa muunhu ʉjʉ.” 5Avaanhu vala, vakakangasia vakati, “Ongo imbʉlanɨsio saake sipela avaanhu kuuva vagalʉsi! Akwɨsisie imbʉlanɨsio saake ɨɨsi ɨjɨ jooni ɨja Yudea, akatengwile kʉ Galilaya kuhanga afikile kʉno.”
6ɄPilato ye apʉliike isio, akaposia nave ʉYesu Nʼgalilaya. 7Ye akagwile kuuti Nʼgalilaya, ihʉma kʉ vʉtwa vwa Helode, akantwala kwa Helode, ʉlwakʉva ifighono ifio, ʉHelode alyale pala pala pa Yelusalemu.
ɄHelode ɨkʉmposia ʉYesu
8ɄHelode ye amwaghile ʉYesu, akahovoka kyongo, ʉlwakʉva akapʉlɨkagha imhola saake, neke ifighono finga akalondagha kʉkʉmʼbona. Lɨno, akahʉvɨlagha kuuti ilolele jʉjuo ɨkɨdegho kɨno ʉYesu ndepoonu ivomba. 9Pepano ʉHelode akamposia ʉYesu amasio minga, neke ʉmwene naakamwile nambe lɨsio. 10Avavaha va vatekesi na vavʉlanɨsi va ndaghɨlo vakɨɨma na kujova fiijo ifiteghe ifya kʉmpelela ʉYesu ahɨghue.
11Pe ʉHelode na vasikali vaake, vakatengʉla pikʉmʼbenapʉla ʉYesu na pikʉnnenela. Vakamfwasia amenda agha lʉtogo na kʉkʉnseka. Pepano ʉHelode akanʼgomosia ʉYesu kwa Pilato. 12Neke kuhʉma ɨkɨghono ɨkio, ʉHelode nʉ Pilato vakava vʉmanyaani, napano ʉlʉtasi valyale kɨlʉgʉ.
ɄYesu ihɨghua kwa ntwa ʉPilato
(Mataayi 27:15-26; Malɨka 15:6-15; Yohani 18:39–19:16)
13Pambele, ʉPilato akavakongʼhania avavaha va vatekesi, na valongosi va Vayahudi, palɨkɨmo na vaanhu avange. 14Akavavʉʉla akati, “Mʉndetiile ʉmuunhu ʉjʉ, na kujova kuuti ivʉlanɨsia avaanhu kuuti vaave vagalʉsi. Lɨno, mʉ masio aghuo ghano mujova, nɨmposisie pamaaso ghiinu, nanɨghwaghile nambe nkole ghʉmo kwa mwene. 15Ghwope ʉHelode naaghwaghile ʉnkole kwa mwene, fye nambe anʼgomwisie kʉlyʉsue. Lɨno mʉkagʉlaghe vʉnofu kuuti, ʉmuunhu ʉjʉ, nakwekɨlɨ kɨmonga kɨno avombile, kɨno kɨkʉmpelela abudue. 16Kwekʉti, ikopua ingʼhwegho, neke nɨkʉmʉlekesia.” 17Lwale lwiho pa kɨghono ɨkya Pasaka, ʉPilato kʉkʉvadindulila avaanhu ʉnkʉngua jʉmo.#23:17 Akadebe aka namwekale mʉ fitabu fimonga ifikʉʉlʉ.
18Neke avaanhu vala vooni, vakoova palɨkɨmo vakati, “Ʉmuunhu ʉjuo, abudue! Tulonda ʉnʼdindulile ʉBalaba!” 19ɄBalaba alyadindilue mʉ ndinde, ʉlwakʉva alyapelile amabaatu minga mʉ lɨkaaja, na kubuda.
20ɄPilato alyale ilonda pikʉnʼdindulila ʉYesu, pe akajova navo kange avaanhu vala. 21Neke aveene vakaghina kukwova viiti, “Ʉnkomelele pa kɨkovekano! Ʉnkomelele pa kɨkovekano!”
22ɄPilato akajova navo kange ʉlwa vʉtatu akati, “Akomelelue mʉ lʉlɨku? Ʉmuunhu ʉjʉ, ahokile nkole mʉki? Ʉne nanɨkʉlwagha nambe lʉmonga kwa mwene lʉno lʉkʉmpelela abudue! Lɨno, itovua ni ngʼhwegho pepano nɨkʉnʼdindulila.” 23Looli avaanhu vala vakaghina kukwova fiijo, vilonda kuuti ʉYesu akomelelue pa kɨkovekano. Pambele, ɨlyovo lyave lɨkapelela kukwɨtɨkɨsɨvua.
24Pepano, ʉPilato akalamʉla kuvomba ndavʉle vansʉmile. 25Akanʼdindulila ʉBalaba jʉno valyankeliile, napano alyadindilue mʉlwa kʉpela amabaatu minga na kubuda. Neke akantavʉla ʉYesu kʉ vasikali, kuuti vamʼbombe ndavʉle avaanhu vilonda.
ɄYesu ikomelelua pa kɨkovekano
(Mataayi 27:32-44; Malɨka 15:21-32; Yohani 19:17-27)
26Avasikali ye vikʉntwala ʉYesu kʉkʉmʼbuda, vakatangʼhana nʉ muunhu jʉmonga jʉno akatambʉlwagha Simoni, ʉmhʉma kʉ lɨkaaja ɨlya Kileene. Ʉmuunhu ʉjuo alyahʉmile kʉ maghʉnda. Neke vakankola, vakamʼbeghasia ɨkɨkovekano ɨkya Yesu kuuti apɨnde. Pe akapɨnda ivɨngɨlɨla kʉnsana kwa Yesu.
27Ɨlɨpʉgha ɨlya vaanhu lɨkava lɨkʉmʼbɨngɨlɨla ʉYesu. Mʉ veene avuo, mwevalyale avakɨjʉʉva, vano valyale vilɨla na kusukunala vwɨmɨla ʉYesu. 28ɄYesu akavasyetʉkɨla, akavavʉʉla akati, “Mwe vakɨjʉʉva va mʉ Yelusalemu! Mʉlekaghe pilɨla vwɨmɨla ʉne! Looli, mʉlɨlaghe vwɨmɨla ʉvwʉmi vwinu na vaana viinu! 29Mʉkagʉlaghe vʉnofu kuuti, mʉ fighono fino fikwisa, avaanhu viliiti, ‘Vafunyilue avakɨjʉʉva vano vaghʉmba, vano navapapile nambe kukwongʼhesia!’ 30Pepano,
‘Avaanhu vilitisagha kʉ fidunda, “Tʉghwɨle!”
Viliiti kʉ fidunda ifidebedebe, “Tʉkupikile!”#Hosea 10:8 ’
31“Ʉlwakʉva, nave vivomba fivi enendɨɨkɨ, kʉ mpiki ʉmwighu ʉnnono, neke pe luliiva ndaani kʉ mpiki ghʉno ghwʉmile?”#23:31 Nave vivomba fivi enendɨɨkɨ, kʉ mpiki ʉmwighu ʉnnono, neke pe luliiva ndaani kʉ mpiki ghʉno ghwʉmile: Ʉmʉlʉvo ghwa lʉjovo ʉlʉ kwekʉti, nave avaanhu ava vivomba fivi kwa mwene (ʉYesu), jʉno mʉgholofu, kwekʉti vilivomba fivi kukila kʉ vaanhu avahosi, vano vanoghiile kukwʉpɨla ʉlʉtalamu kuhʉma kwa Ngʉlʉve.
32Ʉnsiki ʉghuo, avasikali vakava vikʉvatwala avahosi vavɨlɨ vakavabude palɨkɨmo nʉ Yesu. 33Ye vafikile pano pakatambʉlwagha Lɨngʼala lya Mutu, vakankomelela ʉYesu pa kɨkovekano. Voope avahosi vala vavɨlɨ vakavakomelela, nʉjʉnge pa kɨkovekano, jʉmo ʉlʉbale ʉlwa kʉndio ʉlwa Yesu, ʉjʉnge ʉlʉbale ʉlwa kʉngʼhɨghɨ. 34ɄYesu akati, “Ghwe Nhaata! Ʉvasaghɨle! Ʉlwakʉva sino vivomba, navasitangʼhinie.”#23:34 Amalembe aghange agha Kɨyunaani naghalɨ na malembe agha, ghano ghiiti, ɄYesu akati, “Ghwe Nhaata! Ʉvasaghɨle! Ʉlwakʉva sino vivomba, navasitangʼhinie.” Avasikali vala vakaghavana amenda gha Yesu, mʉ sɨla ɨja lʉsodolelo. 35Avaanhu vakɨɨma pala vilola.
Avavaha va Vayahudi vakatengʉla pikʉnnenela ʉYesu viiti, “Avapokagha avange! Lɨno, nave ʉmwene ghwe Kɨlɨsite ʉnsalʉlua ghwa Ngʉlʉve, ipoke jʉjuo!” 36Avasikali voope, vakannenela. Vakava vikʉmʼbelelela na kʉkʉmpeela ʉlʉhʉʉje lʉno lʉlʉjwike, 37vakamʼbʉlagha viiti, “Nave veeve Ntwa ghwa Vayahudi, ghupoke jʉʉve!”
38Neke pakyanya pa kɨkovekano pekɨlyale ɨkɨtapa kɨno kɨlyalembilue amasio agha, “ɄJɄ GHWE NTWA GHWA VAYAHUDI.”
39Neke ʉmo mʉ vahosi vala vavɨlɨ, akamʉligha ʉYesu akati, “Ʉve naveeve Kɨlɨsite? Ghupoke jʉʉve, neke ʉtʉpoke na jʉsue!” 40Neke ʉjʉnge jʉla ʉghwa vʉvɨlɨ akanʼdalɨkɨla akati, “Ghwe! Naghʉkʉmwoghopa ʉNgʉlʉve? Ongo tweni tʉhɨghilue mʉ lʉtalamu lʉluo. 41Ʉsue tʉnoghiile kukwʉpɨla ʉlʉtalamu ʉlʉ, ʉlwakʉva tʉhɨghilue vwɨmɨla sino tʉhokile. Neke ʉjʉ, naahokile nambe kɨmonga.” 42Pe akati, “Ghwe Yesu! Ghuliiva ghukwingila mʉ Vʉtwa vwako,#23:42 Mʉ Vʉtwa vwako: Amalembe aghange agha Kɨyunaani ghalembilue ndɨɨkɨ, pano ghuliiva ghukwisa kuuva Ntwa. ʉngʼhʉmbʉkaghe!” 43ɄYesu akamwamʉla akati, “Kyangʼhaani nɨkʉkʉvʉʉla, ʉmʉsyʉghʉ ghuuva palɨkɨmo nuune kʉ Paladɨsi.”
ɄYesu ifua pa kɨkovekano
(Mataayi 27:45-56; Malɨka 15:33-41; Yohani 19:28-30)
44Kutengʉla akavalɨlo aka ntanda pamwisi, ɨngʼhiisi jɨkakupikila ɨɨsi jooni kuhanga kufika akavalɨlo aka budikalʉbale, 45ɨlɨjʉva nalɨkava limulika. Ʉmwenda#23:45 Ʉmwenda: Ʉmwenda ʉghʉ ghwe ghʉno ghʉlyaghavinie Pavwɨmɨke na Pavwɨmɨke pa Pavwɨmɨke mʉ nyumba ɨnyɨmɨke. Ʉmwenda ʉghuo ʉvʉtali ghʉlyale ni mita kɨjigho kɨmo na lekelakwoni, ʉvʉkome ghʉlyale imita budikalʉbale. Kange, ghʉlyale nʉ mʉghindi ghwa sentimita itatu. ghʉno ghʉlyaghavinie pavɨlɨ ɨnyumba ɨnyɨmɨke ɨja Ngʉlʉve,#23:45 Ɨnyumba ɨnyɨmɨke ɨja Ngʉlʉve: Ɨmba ɨlɨsio Nyumba ɨnyɨmɨke ɨja kufunyila kʉ Vʉghanʉle vwa Masio aMahesia. ghʉkademʉka pavɨlɨ kuhʉma kʉkyanya kufika paasi. 46Pe ʉYesu akalɨla fiijo akati, “Ghwe Nhaata! Nivɨɨka ʉmwojo ghwango mʉ mavoko ghaako.” Ye ajovile isio, akakʉngʉka. 47Ʉmʼbaha ghwa vasikali ye asivwene sino sihʉmiile, akamʉghinia ʉNgʉlʉve akati, “Kyangʼhaani, ʉmuunhu ʉjʉ akaale mʉgholofu!”
48Neke avaanhu vooni vano valyakongʼhanile pala, ye vasivwene sino sihʉmiile, vakagomoka kʉ kaaja kʉvanave, vikutovatova pa fifuva fyave nʉ lʉsukunalo. 49Kange, vooni vano valyakagʉliine nʉ Yesu, palɨkɨmo na vakɨjʉʉva vano valyale vikʉmʼbɨngɨlɨla kuhʉma kʉ Galilaya, valyɨmile patali vilola sino sivombeka.
ɄYesu ivɨkua mʉ mbiipa
(Mataayi 27:57-61; Malɨka 15:42-47; Yohani 19:38-42)
50-51Kwealyale ʉmuunhu jʉmonga jʉno akatambʉlwagha Yosefu, ʉmhʉma mʉ lɨkaaja ɨlya Alimataya, mʉ ɨɨsi ɨja Yudea. ɄYosefu alyale ʉmo mʉ vavaha va Vayahudi. Neke naalyɨtɨngʼhiine na vajaake mʉ nongua ɨja kʉmʼbuda ʉYesu, ʉlwakʉva alyale mʉgholofu pamaaso gha Ngʉlʉve. Kange, alyale ihʉvɨɨla kukwisa ʉVʉtwa vwa Ngʉlʉve.
52Pe ʉmuunhu ʉjʉ akalʉta kwa Pilato kʉkʉnsʉʉma kuuti atoole ʉmʼbɨlɨ ghwa Yesu, akasyɨle. 53ɄPilato ye ɨtiike, pe ʉmwene akalʉta kukwisia ʉmʼbɨlɨ pa kɨkovekano. Akaghʉniengelela nʉ mwenda ʉghwa kʉsyɨlɨla, akaghʉvɨɨka mʉ mbiipa jɨno jabughulilue mʉ lɨnhalavue. Ɨmbiipa ɨjio, naalyaghelile kusyɨlua muunhu. 54Ɨkɨghono ɨkio kyale kya kʉlɨngʼhania ɨSabati,#23:54 Ɨkɨghono ɨkio kyale kya kʉlɨngʼhania ɨSabati: Ɨkio kyale kɨghono kya pa Kɨhaano, pepano aVayahudi valyale vikulɨngʼhania mʉlwa kɨghono kyave ɨkya Sabati. ƗSabati ɨjio jɨkatengʉlagha pa Kɨhaano pakɨvwilile. ʉlwakʉva jaale piipi kutengʉla.
55Avakɨjʉʉva vano valyalʉtile palɨkɨmo nʉ Yesu kuhʉma kʉ Galilaya, vakava lʉmo nʉ Yosefu kʉ mbiipa. Vakajaagha ɨmbiipa, kange vakaghwagha nʉ mʼbɨlɨ ghwa Yesu, ndavʉle vaghʉghonisie. 56Pambele, vakagomoka kʉ kaaja, vakalɨngʼhania amafuta nʉ nkota ʉghwa kʉsigha kuvola.#23:56 Amafuta nʉ nkota ʉghwa kʉsigha kuvola, filyale fya kʉpaka mʉ mʼbɨlɨ ghwa Yesu. Neke ɨkɨghono ɨkya Sabati vakapʉʉma, ndavʉle indaghɨlo sa Moose vʉle silʉngɨka.
S'ha seleccionat:
Lʉʉka 23: wbi
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© (Active), Wycliffe Bible Translators, Inc. All rights reserved.