Lʉʉka 24
24
Kusyʉka kwa Yesu
(Mataayi 28:1-10; Malɨka 16:1-8; Yohani 20:1-10)
1Ye kuhenga ɨkɨghono ɨkya kwasia mʉ mʉlʉngʉ, avakɨjʉʉva vala vakalʉta kʉ mbiipa. Avakɨjʉʉva avuo, vakapɨndile fino valyalɨngʼhanisie: amafuta nʉ nkota ʉghwa kʉsigha ʉmfimba ghʉleke kuvola. 2Ye vafikile, vakavona ɨlɨvue lɨno vakadindiile, lɨbɨlʉsivue lɨlɨ palʉbale pa mbiipa. 3Pepano, vakingila mʉnkate, vakavona ʉmʼbɨlɨ ghwa Mʉtwa ʉYesu, namweghʉle, vakadegha kyongo! 4Ye videgha, vakakenyemʉkɨla avakɨnhaata vavɨlɨ, vano vafwalile amenda ghano ghivalatɨka fiijo, vɨmile piipi na veene. 5Avakɨjʉʉva avuo, lʉkavakola ʉlʉdwesi. Vakinama kuhanga kufika paasi. Neke avakɨnhaata vala vakavavʉʉla vakati, “Kɨki mʉkʉmʉlonda ʉmwʉmi kʉ vafue? 6Napwale apa! Asyʉkile! Mʉkʉmbʉke amasio ghano alyavavʉlile ye alɨ kʉ Galilaya palɨkɨmo numue kuuti, 7‘Lʉnoghiile ʉne ne Mwana ghwa Muunhu nɨvɨkue mʉ mavoko gha vahosi, na kubudua pa kɨkovekano, ɨkɨghono ɨkya vʉtatu nisyʉka’!”
8Avakɨjʉʉva vala, vakakʉmbʉka amasio aghuo agha Yesu. 9Pe vakahʉma mʉ mbiipa. Vakalʉta kʉkʉvapangɨla imhola sila sooni avavʉlanɨsɨvua va Yesu kɨjigho na jʉmo, palɨkɨmo na vavɨngɨlɨli avange vooni. 10Neke avakɨjʉʉva avuo alyale ghwe: Maliya ʉmhʉma mʉ lɨkaaja ɨlya Magidala, nʉ Yoana, nʉ Maliya ʉngʼina ghwa Yakovo, palɨkɨmo na vakɨjʉʉva avange vano valyale palɨkɨmo na veene.
11Avasungʼhua#24:11 Avasungʼhua: Ɨmba ɨlɨsio Vasungʼhua kʉ Vʉghanʉle vwa Masio aMahesia. ye vipʉlɨka imhola sila, vakavona nasikola, navakɨtɨka. 12Neke ʉPeteli akɨɨma ngʼhaningʼhaani, akalʉta lʉvɨlo kʉ mbiipa. Ye afikile, akahʉngɨɨla mʉ mbiipa, akaghaagha gha menda gheene ghano vansyɨlɨla ʉYesu. Akavʉʉka pala, idegha sino sihʉmiile.
ɄYesu ikuhʉfia kʉ vavʉlanɨsɨvua vaake vavɨlɨ
(Malɨka 16:12-13)
13Ɨkɨghono kɨkio ɨkya pa Nywabaaha, avavʉlanɨsɨvua vavɨlɨ va Yesu valyale vilʉta kʉ kɨkaaja ɨkya Emau. Ɨkɨkaaja ɨkio, kɨlyale patali, ʉlʉghendo ʉlwa fivalɨlo fivɨlɨ kuhʉma kʉ Yelusalemu. 14Neke mʉ sɨla, avavʉlanɨsɨvua vala vakava vijova imhola sino sihʉmiile. 15Ye vajiighe vijova isio, ʉYesu jʉjuo akafika, akava ighenda palɨkɨmo na veene, 16neke ʉNgʉlʉve akavapela valeke kukagʉla kuuti ghwe Yesu.
17ɄYesu akavaposia akati, “Mujova ɨmhola nyɨki kʉmo mughenda?” Avaanhu vala vakɨɨma, kʉmo vasukuniile. 18Jʉmonga mʉ veene, jʉno akatambʉlwagha Kileopa, akamwamʉla akati, “Neke ʉve ghwe mwene mʉ vaanhu vooni mʉ Yelusalemu, veeve nʉkagwile sino sivombiike kʉla ifighono ifi?” 19Ghwope ʉYesu akati, “Kʉlɨ nongua nyɨki?” Vakamwɨtɨkɨla vakati, “Inongua sino vamʼbombile ʉYesu ʉghwa kʉ Nasaleti. Ʉmuunhu ʉjuo akaale mʼbɨli, kange akaale ni ngʉfu nyinga mʉ mbombele na mʉ masio ghaake, neke ʉNgʉlʉve na vaanhu vakankeliile. 20Neke avavaha va vatekesi, na valongosi viitu vantavʉla, kuuti ahɨghue kubudua. Pe vamʼbuda pa kɨkovekano. 21Ʉjuo ghwe mwene twahʉvɨlagha kuuti ilikʉtʉpoka ʉsue twe Vaisilaeli. Lɨno, ʉmʉsyʉghʉ kɨghono kya vʉtatu, kuhʉma isio sooni sivombeka.
22“Kange, avakɨjʉʉva vamonga mʉ kɨpʉgha kiitu vatʉkenyemwile, ʉlwakʉva ʉmʉsyʉghʉ ye kuhenga, vaveele valʉtile kʉ mbiipa, 23neke vavwene ʉmʼbɨlɨ namweghʉle. Visile kʉkʉtʉvʉʉla kuuti, vavaghile avanyamhola vano vavavʉlile kuuti ʉYesu mwʉmi. 24Pe vamonga mʉ kɨpʉgha kiitu vaveele valʉtile kʉ mbiipa, vavwene sili ndavʉle vaveele vapangile avakɨjʉʉva vala, voope navamwaghile ʉYesu.”
25Neke ʉYesu jʉjuo akavavʉʉla akati, “Ʉmue mʉlɨ vajasu! Kɨki mʉlɨ vasiiti kukwɨtɨka sooni sino silyajovilue na vavɨli! 26Asi, ʉKɨlɨsite naakanoghiile kukilila mʉ mhumuko sila sooni, neke pambele kukwingila mʉ vʉvaha vwake?” 27Pepano, akavavʉʉla imhola sooni isa mʉ Malembe aMɨmɨke, sino silyalembilue vwɨmɨla ʉmwene. Akajovagha isio kutengʉlɨla ifitabu ifya Moose ni fitabu fyoni ifya vavɨli.
28Ye valɨ piipi kufika ɨkɨkaaja kɨno valyale vilʉta, ʉYesu akava hwene ajiighe nʉ lʉghendo, ikilingʼhania. 29Neke aveene vakampelepesia fiijo vakati, “Ghukale apa palɨkɨmo nusue! Ongo lukutaana, ɨngʼhiisi jɨlɨ piipi.” Pe ʉYesu akingila mʉ nyumba, akikala na veene. 30Ye vikalile palɨkɨmo pilia ɨkyakʉlia, ʉYesu akatoola ʉnkate, akamhongesia ʉNgʉlʉve, akamenyʉlania, akava ɨkʉvapeela. 31Ʉnsiki ghʉghuo, ʉNgʉlʉve akavapelela kukagʉla kuuti ghwe Yesu, ʉmwene ye akasovanɨkagha pamaaso ghaave. 32Pe vakiposania viiti, “Fye nambe ʉnsiki ye ijova nusue mʉ sɨla, ɨkʉtʉvʉʉla sino sili mʉ Malembe aMɨmɨke, amoojo ghiitu ghaveele nʉ lʉkeelo!”
33Ʉnsiki ghʉghuo, vakavʉʉka vigomoka kʉ Yelusalemu. Ʉkuo vakavaagha avavʉlanɨsɨvua va Yesu kɨjigho na jʉmo vakongʼhanile palɨkɨmo na vange. 34Pe vikʉvavʉʉla vavɨlɨ vala viiti, “Se seene, ʉMʉtwa ghwitu lweli asyʉkile! Avoniike kwa Simoni!” 35Pepano voope vakavapangɨla sooni sino siveele sivahʉmiile mʉ sɨla, na vʉle vaveele vantangʼhinie ʉYesu ye imenyʉla ʉnkate na kʉkʉvapeela.
ɄYesu ikuhʉfia kʉ vavʉlanɨsɨvua vaake
(Mataayi 28:16-20; Malɨka 16:14-18; Yohani 20:19-23; Mbombo sa Vasungʼhua 1:6-8)
36Avavʉlanɨsɨvua va Yesu ye vifijova isio, ʉYesu jʉjuo akɨɨma pakate pa veene. Akavavʉʉla akati, “Mʉvisaghe nʉ lʉtengaano!” 37Vakakenyemʉka, vakoghopa kyongo, ʉlwakʉva vakasaghagha kuuti vikʉlyagha ɨlɨsyʉka.
38Neke, ʉYesu akavavʉʉla akati, “Kɨki muhangajɨka! Kɨki mʉlɨ ni nganighani mʉ moojo ghiinu! 39Mʉlole amavoko ghango na maghʉlʉ ghango, pe mʉkagʉle kuuti neene. Mʉnyabasie mʉlole, ʉlwakʉva ɨlɨsyʉka lɨsila mʼbɨlɨ, nambe mafupa. Neke ʉne ndavʉle mulola, nɨlɨ nafyo.”
40ɄYesu ye ajovile ʉluo, akavavonia amavoko na maghʉlʉ ghaake. 41Apuo avavʉlanɨsɨvua vaake, vakahovoka fiijo, kʉmo videgha kuhanga lʉkavapelela kusaagha kuuti pamo nase seene! Ye vajiighe vihovoka na kudegha, ʉYesu akavaposia akati, “Ndepoonu mʉlɨ nɨ kyakʉlia kɨmonga apa?” 42Vakampeela ɨkɨmenyʉle ɨkya samaki ɨnyaanye. 43Akʉpɨla na kulia pamaaso ghaave. 44Neke akavavʉʉla akati, “Isi, se sino nɨkavavʉlile ʉnsiki ye nɨlɨ palɨkɨmo numue, kuuti imhola sino silembilue mʉ ndaghɨlo sa Moose, mʉ fitabu ifya vavɨli, ni sa kɨtabu kya Sabuli sino sikwoleka vwɨmɨla ʉne, sooni sihanga sivombeka.”
45Pepano akavavʉlanɨsia mʉlwa kʉvapeela ʉvʉkagʉsi ʉvwa kʉghatangʼhania aMalembe aMɨmɨke aghuo, 46akavavʉʉla akati, “Lɨlembilue kuuti, ʉKɨlɨsite ilipumusivua, neke ɨkɨghono ɨkya vʉtatu, ilisyʉka kuhʉma kʉ vafue. 47Kange mʉ lɨtavua lyake, avaanhu ava fisina fyoni, kutengʉlɨla kʉ Yelusalemu, vilipʉlɨsɨvua kuuti, valaate inyɨvi saave, neke ʉNgʉlʉve avapyanɨle. 48Isi sino sivombiike, ʉmue mʉlɨ volesi, mʉvolekaghe avange.
49“Pʉlɨkɨsia! Lɨno, ʉne nilisuungʼha kʉlyʉmue ʉMhepo ʉMwɨmɨke jʉno ʉNhaata ghwango alyavavʉlile kuuti ilikʉvapeela. Lɨno, mukalaghe mʉ lɨkaaja ɨlɨ,#24:49 Mʉ lɨkaaja ɨlɨ: Pe pa Yelusalemu. kuhanga pano mupelua ingʉfu kuhʉma kʉkyanya.”
ɄYesu itogha kʉkyanya
(Malɨka 16:19-20; Mbombo sa Vasungʼhua 1:9-11)
50Pambele ʉYesu akahʉma navo mʉ lɨkaaja, ilʉta ʉlʉbale lʉno lwale piipi nɨ kɨkaaja ɨkya Betania. Ye vafikile pala, akagholosia amavoko ghaake kʉkyanya, akavafuunya. 51Ye ajiighe ɨkʉvafuunya, akaseghʉka padebe, pe akatolua kulʉta kʉkyanya.
52Apuo, vakamwɨmɨka. Vakagomoka kʉ Yelusalemu kʉmo vahovwike fiijo. 53Neke ifighono fyoni, vakavisagha mʉ nyumba ɨnyɨmɨke ɨja kufunyila, vikʉmʉghinia ʉNgʉlʉve.
S'ha seleccionat:
Lʉʉka 24: wbi
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© (Active), Wycliffe Bible Translators, Inc. All rights reserved.