Juaa̱ 14
14
Bi̱ tsꞌén katsóyà Kjisoo̱ nga kui xi ndi̱yà tsi̱ꞌe̱ nga kjóchotꞌáa̱ Na̱ꞌmii̱
1Ngata̱ nda̱jín maá ini̱ma̱jnú, sꞌijin ngatamajnú Néná, kó ti̱ sꞌijin ngatamajnú án. 2Ndiꞌaa̱ Na̱ꞌmina achichí ngi̱ndie tjín, tsi bo̱a̱jín kjiꞌi, jera̱ kixiyajnúꞌun, ja̱ je tsꞌénfíkꞌijñándajnúꞌun ngo ngi̱ndie xi tsa̱jún. 3Kó tsi kjuínkꞌijñandajnúꞌun ngo ngi̱ndie, kjoéꞌe̱ ngiñá an nga kjoéꞌe̱kjaꞌajnúꞌun, tsi̱ꞌe̱ nga nínga kotíjña̱ an ki̱a̱ ku̱i̱ndyionjnú nga. 4Kó ja̱ jè yàjnú ndi̱ya̱à ngi̱ndie nínga tsꞌénfí an.
5Sꞌe̱ bi̱ katsó Tomaa̱:
–Ndi̱a̱, yàjínjne̱ nínga tiꞌmi ji, ja̱ kótsꞌèn xcha̱ni ji̱n ndi̱ya̱à.
6Sꞌe̱ Kjisoo̱, bi̱ katsó:
–Án boá xi ndi̱ya̱à, ko̱jo xi ja̱koxi̱i̱, ko̱jo xi kjo̱a̱mindyioo̱n, ta̱ꞌyajínni xi kjo̱chókoón Na̱ꞌmii̱ tsi ngatꞌaa̱ ánjín. 7Tsi kamáyàjnúꞌun, ti̱ kamáyàra̱jnú Na̱ꞌmina. Kó ndeskande ngotꞌe̱ ꞌne̱ je yàjnú kuí, ngatꞌa̱ jè ndyi̱tsitsijenjnúu̱.
8Sꞌe̱ bi̱ katsó Ngiripee̱:
–Ndi̱a̱, takejne̱ Na̱ꞌmii̱, kó sꞌi̱ngojne̱.
9Sꞌe̱ Kjisoo̱, bi̱ katsó:
–Achichí kjín ni̱xtjin je kisꞌijñajinjnúꞌun, kó a kji̱e̱ yejínní Ngiripe̱. Xi je kamábena, ti̱ jè kamábe Na̱ꞌmina nga, kó kótsꞌèn bi̱ se ji: Takejne̱ Na̱ꞌmii̱. 10A sꞌijinjiín nga Na̱ꞌmii̱ tikónjìi̱n, kó nga Na̱ꞌmii̱ tikónjinna an. Kó én xí chjiá an jmí tsi én xi tsa̱ꞌa̱n so̱bo̱a̱, tsi̱ꞌe̱ Na̱ꞌmi xi tikónjinna boá, kuí xí tsꞌén ngayeje nii̱. 11Sꞌijin ngatamaa̱ nga Na̱ꞌmii̱ tikónjìi̱n, kó nga Na̱ꞌmii̱ tikónjinna an, kó tsi jmí, sꞌijin ngatamaa̱ ni xi tjítsꞌen an. 12Ja̱koxi̱, ja̱koxi̱ ni xi xiánjnúꞌun: Xi sꞌijii̱n an, xá xí tsꞌen an sa̱ꞌín ndatsa kui nga, kó tsie ngase ni xi sa̱ꞌín, ngatꞌa̱ Na̱ꞌmii̱ tsꞌénfikóo̱n, 13kó ngayeje ni xi chji̱e̱ꞌèe̱ Na̱ꞌmii̱ ngajona, sa̱ꞌin an, tsi̱ꞌe̱ nga xcha̱ kjo̱a̱jee̱ Na̱ꞌmii̱ kjiꞌanga xcha̱ ni xi sa̱ꞌín ndií. 14Tsi tjín ni xi chji̱e̱ꞌe ngajona, an sa̱ꞌinkjatjosón an.
Bi̱ tsꞌén katsóyà Kjisoo̱ nga sa̱ngíyáná A̱si̱énni̱xtjii̱n Néná
15Tsi tjójnú án, chjiéngá si̱ꞌankjatjosónjnú kjo̱a̱botíxomana. 16Kó án ꞌniú kuíꞌáa̱ Na̱ꞌmii̱, nga tsja̱a ingo xi sa̱ꞌíndajonjnú, tsi̱ꞌe̱ nga kꞌuijñájo̱jnú ngatsjéni̱xtjin: 17Kuí boá A̱siénni̱xtjin xi ko̱kóyá ja̱koxi̱i̱, kui xi ka̱májín sa̱ko̱ó xotaa̱ kui nga̱sondiee̱, ngatꞌa̱ bejín, ta̱nga jún jè yàjnú, ngatꞌa̱ ki̱a̱ tikónjinjnú, kó ki̱a̱ kꞌuijñájo̱jnú.
18Kꞌuijñáxꞌi̱a̱njínjnúꞌun, kji̱ndi̱bákón nginíjnúꞌun. 19Ngi chiboa ni̱xtjin, kó xotaa̱ kui nga̱sondiee̱, ngiti̱ sku̱i̱e̱jínna, ta̱nga jún xcha̱jnúꞌun, ngatꞌa̱ tikòn án, kó ti̱ ku̱i̱ndyionjnú ndatsa jún nga. 20Kui ni̱xtjin jàn xcha̱jnú nga Na̱ꞌmina tikónjìi̱n, kó jún tindyionjinjnúꞌun, kó án tikónjinjnúꞌun jún. 21Xi tikoón kjo̱a̱botíxomana, kó sa̱ꞌínkjatjosón, kuí xi̱ꞌba̱ xi tjoó an, kó xi tjoó an, ti̱ sa̱ꞌíntjó Na̱ꞌmina, kó an sa̱ꞌíntjó an, kó kokòo̱ ꞌyání án.
22Sꞌe̱ bi̱ katsó Jundaa̱ (ta̱nga jmí tsi Junda̱ Iskariotee̱):
–Ndi̱a̱, kótsꞌèn ko̱kéjne̱ ji̱n ꞌyání jí, kó ko̱kéjíi̱n ꞌyání ji xotaa̱ kui nga̱sondiee̱.
23Sꞌe̱ Kjisoo̱, bi̱ katsó:
–Xi tjoó an, sa̱ꞌínkjatjosón kjo̱a̱botíxomana, kó Na̱ꞌmina tjó sa̱ꞌín, kó kji̱ndibáchonjne̱, kó ngo ngi̱ndie nijan ku̱i̱ndyionjo̱jne̱. 24Xi tjójiín an, tsꞌénkjátjosónjín kjo̱a̱botíxomana, kó én xí je tsintꞌié tsa̱ꞌa̱njín bo̱a̱, tsi̱ꞌe̱ Na̱ꞌmi xi katsangiyana boá.
25Kuí nii̱ xi je kixiyajnúꞌun kjiꞌanga kisꞌijñajo̱jnúꞌun. 26Ta̱nga kuí A̱si̱énni̱xtjii̱n Néná xi sa̱ꞌíndajonjnú, xi ngajona nga sa̱ngíyá Na̱ꞌmina, kuí xí ko̱kóyájnú ngayeje kui nii̱, kó sa̱ꞌínkjaꞌátsjienjnú ngayeje ni xi je kixiyajnúꞌun.
27Kjo̱a̱xióna kꞌuijñájnúꞌun, kjo̱a̱xióna tsjajnúꞌun, jmí tsi bo̱a̱ tsꞌén tsja an xikótsꞌèn tsjá xotaa̱ kui nga̱sondiee̱. Ngata̱ nda̱jín maá ini̱ma̱jnú, ti̱nde ngata̱ ndakonjínmájnú. 28Jè kandaꞌyájnú nga bi̱ kixian an: Je tsꞌénfí an, ta̱nga kjo̱e̱ꞌekón nginíjnúꞌun. Tsi tjójnú an katsaki, tsjara̱ ka̱majnú, ngatꞌa̱ je kixiyajnúꞌun an, nga Na̱ꞌmina tsꞌénfikóo̱n, ngatꞌa̱ nkꞌa ngase xaá Na̱ꞌmina ta̱bo̱a̱jiín an. 29Kó ngotꞌe̱ tsꞌénxiyàjnúꞌun kui nii̱, ngindiee̱ nga ka̱ma, tsi̱ꞌe̱ nga kjiꞌa ngije ka̱ma, sꞌijin ka̱majnú.
30Ngiti̱ tsiejín ngase ni kuichjiájojnúꞌun, ngatꞌa̱ jè tsꞌéndibá tiña xi botixómaá kui nga̱sondiee̱, kó kuí, ta̱ jmíjín ni xi tjiín kjo̱a̱a̱ an, 31tsꞌén án ni xi tsóna Na̱ꞌmina xi katsangiyana, tsi̱ꞌe̱ nga xotaa̱ kui nga̱sondiee̱ sku̱i̱e̱ nga tjóna Na̱ꞌmina. Ti̱sítji̱e̱njnú ꞌne̱, xín tjián.
S'ha seleccionat:
Juaa̱ 14: MAIX
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014