YOHAN 3
3
Yesu nuiyc Nikodemu
1Pharise nuk wawc vmuingc Nikodemu ngoz yaq Yuda miqsaz vyungx vlaungx washiz vhttax rvtueq. 2Kvruex waz kuex raungnyauk nuex Yesu kox nuex kaz vtueq, “Rabbi lex, mnoz kuex Tishox rueq vtvkaz tvluingc waz vshiz rvtoq lvmx kuex nuiyshiq rueq tuiuz lvp vshix. Mnoz rueq vwangc juing romzyac htenc tvkhic vshuiux htenc kuex Tishox lomx muq ngoz ruiux uraq muinz shuimx lot muq,” ngoz tueq vpiq muex jungx tueq.
3Yesu rueq, “Ngaz rueq mnoz muex vsuing jungx kuq ix, vjawc rvhumc yek muq waz ukhaq yuq muinz Tishox Mungtan kuex khiz lvp shuex rvmuq,” ngoz tueq tvralc tueq.
4Nikodemu rueq, “Rullungx miq laungx shex kuex yvmx khoc kvjawc yek juing lac? Vnyuiuz wuk mungx nuex nyuip waung yek vtueq, lauk nueyc jawc rvhumc yek juing haz!” ngoz tueq wiz tueq.
5Yesu rueq, “Ngaz rueq mnoz muex vsuing jungx kuq ix, yuix nuiyc Siyac maq vjawx rvmuq ngoz ruiux kuex ukhaq muinz Tishox Mungtan nuex nyuip lvp muq. 6Gvnngvmx maq vjawx kuex gvnngvmx rvtueq, Siyac maq vjawx kuex siyac rvtueq. 7Vjawc rvhumc yek juing ngoz tueq ngaz rueq jungx vphaungx kvmac nauk wangc kaz. 8Raungguil kuex miqmac guil roc tuex kox nuex guil yaq, raungguil tvruingc kuex tay ruiux muinz, mruex kox maq guil vtueq, mkox nuex lac kaz wvnc vtvnx kuex tuiuz miq. Siyac maq jawc jix waz muinz kvrulc rv-ngvlc dvyx rvtueq,” ngoz tueq tvralc tueq.
9Nikodemu rueq, “Vhtenc vruex kuex yvmx khoc maq lac yaungx wvnc tvnx?” ngoz tueq wiz tueq.
10Yesu rueq, “Mnoz kuex Israel miqsaz htenc muex tvluingc kuy jix vyungx washiz rvtoq rvhvt maq, vruex phvnx htenc kuex mnoz rueq tuiuz muq ix? 11Ngaz rueq mnoz muex vsuing jungx kuq ix, nuiyshiq kuex miqmac rueq tuiuz vshix lvmz kuex jungx vshix nuiyc nuiyshiq rueq khiz vshix phvnx htenc kuex hakhix khvmc vshix, yuq muinz nuimshiq vshiz raung rueq muinz lvp wvnc muit. 12Mungkawx nuex seng yaq lvmx htenc kuex ngaz rueq tvkhic kuq phaungx nuex nuimshiq kvmx muik ngoz ruiux kuex, raungmungx nuex seng yaq lvmx htenc tvkhic kuq ruiux yuq, yvmx khoc maq lac nuimshiq kvmx tuinx? 13Raungmungx maq vsvt kaz Miq Saz vruex maq lvy vtueq ukhaq muinz raungmungx nuex httuiuc wuez muq doc.”#Yoh 6:33,38; Kamx 2:34; 1Kor 15:47; Eph 4:9-10
14Moshe rueq kumtsvy tvnx maq nvyrvyx puiuc yac kuex tsomz tueq ikhoc, 15vpiq muex kvmluimx jix htenc rueq pattup rullungx lvp wvnc laz Miq Saz vruex muinz vtsomz gay rvhumc tuex.#Wkh 21:9 16Yvmx khoc lac ngoz ruiux lec Tishox rueq vpiq Saz muex kvmluimx jix htenc kuex batac momaq kay rvhumc muq maq pattup rullungx mlvp wvnc shueq ngoz tueq, vpiq Saz vshiz lauk lauk kuex kuy gay nuex httuiuc laz mungkawx kuex pinhtumc lungwawx tueq. 17Tishox rueq vpiq Saz mungkawx nuex tvkaz tueq kuex mungkawx miqsaz muex khac phoc kuy kay tvkoc rvmuq, vpiq maq palc daungc wvnc rvhumc tvkoc tvkaz tueq.
18Vsaz muex kvmluimx jix waz kuex vphoc rvhumc muq, kvmluimx muq jix waz kuex Tishox Saz pumshiz waz muex kvmluimx muq ningkhvnc nuex majuiuc doc muinz vphoc rvhumc yaq. 19Vphoc rvhumc yaq lvmx kuex vkhoc rvtueq; raungwuic kuex mungkawx nuex httuiuc kaz tueq, yuq muinz miqsaz kengx vlayx honc vbac ningkhvnc nuex, tsuingshiq rueq raungwuic htauk nuex jvnc vtueq raungnyauk kuex lungwawx wuez yaq. 20Yvmx khoc lac ngoz ruiux honc vbac yauk shuimc jix ukhaq yuq muinz, raungwuic kuex shuiuc pac vtueq miqmac honc vbac kuex kvkhic kay muex hiz ningkhvnc nuex, raungwuic nuex kvnvp wuez muq. 21Yuq muinz tsuingrux lvmx phvnc jix kuex miqmac rueq shuimx kaz yaq yauk shuimc htenc kuex Tishox thuinroc rulc rv-ngvlc yaungx yaq lvmx mkhiz wvnc shueq ngoz tueq raungwuic nuex kvnvp wuez yaq, ngoz tueq.
Yesu nuiyc Yohan
22Kvruex yimaq Yesu kuex vpiq sangac bix rulc vdvmz nuex Yuda mungx wawc miqghaq htenc nuex khuemx kaz ruiux, tsuinghez rulc vdvmz guilc vtueq yuix luip kuq tueq. 23Yohan rueq muinz Salim ghaq hep Enun nuex yuix paunghvlc httax yaq ningkhvnc nuex, kvruex yuq yuix luip kuq tueq. Miq htenc muinz piq kox nuex kaz vtueq yuix luip lvmz wuez tueq. 24(Kvruex kaq Yohan kuex khoktep nuex max shauk dvyx doc.)#Mat 14:3; Mak 6:17; Luk 3:19-20
25Yohan sangac wvyvmc kuex yuix luip lvmc lvmx nuex seng vtueq Yuda miqsaz washiz rulc rvkhawc lvlc tueq. 26Kvkhoc rvtueq tsuingshiq kuex Yohan kox nuex kaz vtueq, “Tvluingc waz lex, Yodan ruilx shaldungc kox nuex mnoz rulc vdvmz httaz yoalx mnoz rueq hakhix khvmc toq waz kuex rvwvl lvp vshuiux haz? Majuiuc vpiq rueq yuix luip kuq yaq, miq htenc muinz vpiq kox nuex kaz yaq!” ngoz tueq piq muex jungx tueq.
27Yohan rueq, “Tishox rueq vkuq rvmuq ngoz ruiux kuex miq rueq yvmx muinz lvp wvnc shuex rvmuq. 28‘Ngaz kuex Mesia rvmauk, vpiq max nuex vtvkaz waz dvyx rvtauk,’ ngoz tueq ngaz rueq jungx vphaungx, nuimshiq pumz kuex ngvy hakhix rvtuit.#Yoh 1:20; Mal 3:1; Mak 1:2; Luk 1:17 29Nyuiuz nyalx lvp jix waz kuex waz nyalx waz rvtueq. Waz nyalx waz piq kungjix waz kuex tvyoalc yoalx maq waz nyalx waz kvjaz tay yaq, piq kuex waz nyalx waz kvjaz tay lvp vtueq pinhtumc kokez yaq. Kvkhoc ngaz muinz thuinz nuex mvrc laz kokez vtaungx. 30Vpiq kuex pinhtumc vyungc vloayc rvwvnc tuex, ngaz kuex vruinc rvwvnc taungx,” ngoz tueq.
Raungmungx maq Httuiuc Kay jix Waz
31Raungx maq httuiuc kay jix waz kuex lotlaz htauk nuex vyungx pinhtumc waz rvtueq. Ghaq wawc vdung waz kuex ghaq nuex seng yaq rvtueq ghaq lvmx dvyx jungphvnx thenc yaq, yuq muinz raungmungx maq httuiuc kay jix waz kuex lotlaz htauk nuex rvtueq. 32Vpiq kuex vpiq rueq khiz tueq, tay tueq lvmz htenc kuex hakhix khvmc yaq, yuq muinz vpiq bomjungc kuex uraq muinz lvp wvnc muq. 33Vpiq bomjungc lvp wvnc jix waz kuex Tishox kuex tsuingrux rvtueq, ngoz tueq hakhix khvmc jix waz rvtueq. 34Tishox rueq vtvkaz waz rueq Tishox bomjungc kuex jungphvnx kuq yaq, yvmx khoc lac ngoz ruiux lec Tishox vpiq rueq vtvkaz waz muex Siyac kuex mvrc laz kuq tueq. 35Vwaz rueq Vsaz kuex lungwawx vtueq vpiq luimc vkawc phvnx ruip saz kuex vpiq muex lekuq tueq.#Mat 11:27; Luk 10:22; Heb 2:8 36Vsaz muex kvmluimx jix waz kuex pattup rullungx lvp wvnc tueq. Vsaz kvjaz tay muq waz kuex rullungx tvraungx lvmx lvp wvnc shuex rvmuq, Tishox thuinkhvy murx kuex gurc jix rvtueq.
S'ha seleccionat:
YOHAN 3: HNOT01
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Hawa Naga Bible © Bible Society of Myanmar, 2014.