युहुन्ना 18
18
ये़सुन् मे़दे़म्सुॽ
(मत्ति २६:४७-५६; मर्कु १४:४३-५०; लुका २२:४७-५३)
1ये़सुरे़ अक्खेलॽरिक् तुवा चोगु सुरुआङ् कुहुॽसाम्बाहाॽनु किद्रोन मे़प्मनाबा हङ्हङ्वाःल्ले़ नाधाःम्बि पेरो॥ खे़प्मो जैतुन सिङ्ला थिक् ने़स्से़ हे़क्क्याङ् खे़ङ्हाॽ खे़प्मो मे़लासे़॥ 2खुने़ॽ इङ्ले़क् के़मे़प्पा यहुदाःल्ले़आङ् खे़न् ते़न्निन् निसुआङ् वये़, थेआङ्भे़ल्ले़ ये़सुरे़ कुहुॽसाम्बाहाॽ यरिक्ले़ङ् खे़प्मो तुमुसिआङ् वये़रो॥ 3खे़ल्ले़चोगुल्ले़ यहुदाःल्ले़ कुभा रोमि थक्सुबाहाॽ हे़क्क्याङ् तुम्निङ्वाॽफुसाम्बाहाॽ नु फरिसिहाॽरे़ मे़बाङ्घुसिबा माङ्हिम् के़गोबा तिलिङ्गाहाॽ खे़न् जैतुन सिङ्लाओ लाम्लोसुसिआङ् तारुसिरो॥ खे़ङ्हाॽरे़ तियालो, सेमि नु फे़जुम् फे़याहाॽ मे़गत्तुरो॥
4ये़सुरे़ आल्ल खुने़ॽनु थे पोङ् के़लॽबान् काक् निसुआङ् खुने़ॽ तगि पेआङ् खे़ङ्हाॽ सेःन्दोसुसि, “खिनिॽ हात् के़गोःत्तुम्बाबे?”
5खे़ङ्हाॽरे़ नोगप् मे़बिरु, “नासरतबा ये़सुन्॥”
ये़सुरे़ खे़ङ्हाॽ मे़त्तुसि, “खे़ङ्ग इङ्गाॽएरो॥” खे़न् ये़म्मो खुने़ॽ इङ्ले़क् के़मे़प्पा यहुदाःन्नाङ् खे़ङ्हाॽनु सोरिक् ये़बे़रो॥ 6ये़सुरे़ खे़ङ्हाॽ “खे़ङ्ग इङ्गाॽएरो” मे़त्तुसिल्ले़ खे़ङ्हाॽ एगाङ् मे़जत्छिङ्ल ले़राङ् काक्पे़त् खाम्मो मे़ले़क्खे़रो॥
7याम्मो ये़सुरे़ खे़ङ्हाॽ सेःन्दोसुसि, “खिनिॽ हात् के़गोःत्तुम्बाबे?” खे़ङ्हाॽरे़ नोगप् मे़बिरु, “नासरतसमा ये़सुन् लो॥”
8ये़सुरे़ नोगप् पिरुसि, “इङ्गाॽआरो फाॽआङ् मे़त्निङ्लो॥ खिनिॽ के़गोःत्तुम्बा मनाःङ्ग इङ्गाॽने़ फाॽग्र कङ्हाॽग पेःक्मा पाङ्घे़म्सिम्मे़ॽओ॥” 9के़बिराङ्बाहाॽओ थिक्काङ् मे़माःसुङ्ङिन्लो लॽरिक् ये़सुरे़ आबाङे पाःत्तुबा पाःन्निन् के़त्ल फाॽआङ् कन् अक्खे पोःक्खे़बारो॥
10हे़क्क्याङ् सिमोन पत्रुसरे़ ताभेन् तरप् फिःक्खुआङ् मानिङ्वाॽफुसाम्बाल्ले़ कुसे़वारोबा माल्खस मे़प्मनाबाल्ले़ कुजुप्साङ् ले़प्माङ्बा कुने़क्खोॽबान् पे़त्तु थाःसुरो॥
11ये़सुरे़ पत्रुसे़न् मे़त्तु, “के़दाभेःन् फे़सिःप्पो याक्ते़ॽ! पानुदिङ् आम्बारे़ इङ्गाॽ पिआबा इनोगे़न् तुक्खेवा खोर्याओलाम् थुङुङ्लए पोङ्॥”#१८:११ ये़सुरे़ पाःत्तुबा पाःन्निन् फाॽइङ्ग पानुदिङ् कुम्बा निङ्वाॽफुमाङ्ङिल्ले़ कुनिङ्वाॽ कुइसिक् खुने़ॽ तुक्खे चामा यारिप् वये़॥
ये़सुन् हन्नासरो मे़देॽरुॽ
(मत्ति २६:५७; मर्कु १४:५३; लुका २२:५४)
12हे़क्केलॽरिक् थक्तुम्बा नु थक्सुबाहाॽरे़ हे़क्क्याङ् माङ्हिम्मोबा तिलिङ्गाहाॽरे़ ये़सुन् मे़दे़म्सुआङ् इमे़घेःक्खु, 13हे़क्क्याङ् खे़न् तङ्बेबा मानिङ्वाॽफुसाम्बा कैयाफासरे़ कुन्नोःप्पा हन्नासरे़ कुहिम्मो मे़देॽरुरो॥#१८:१३ साम्योथिम् कुइसिक् मानिङ्वाॽफुसाम्बाल्ले़ मे़न्छिए थारिक् से़वा चोगु, कर रोमि हाङ्युक्पाल्ले़ यरिक्ले़ङ् ले़क्खु॥ नाजिरि तङ्बे ६ ओ रोमि हाङ्युक्पाल्ले़ मानिङ्वाॽफुसाम्बा पोङ्से़ हन्नासे़न् मे़सेगु, हे़क्क्याङ् नाजिरि तङ्बे १५ ओ कुम्बाङ्मिॽ कैयाफासे़न् मे़सेगु॥ कर मे़न्छिए थारिक् हन्नासरे़ यरिक् मनाहाॽ खुने़ॽ ले़प्माङ् हिःसुसि॥ 14बा कन् कैयाफासरे़ए काक् मनाहाॽरे़ खुनिॽ ले़क्वा थिक् मनान् सिमाए नुबा पोङ् लॽरिक् यहुदिहाॽ मे़त्तुसिआङ् वये़रो॥
पत्रुसरे़ ये़सुन् नाॽरुॽ
(मत्ति २६:६९-७०; मर्कु १४:६६-६८; लुका २२:५५-५७)
15सिमोन पत्रुस नु वेॽ कुहुॽसाम्बाधिक्ले़ ये़सुन् तिम्दे़त्छुरो॥ खे़न् वेॽ हुॽसाम्बाल्ले़ मानिङ्वाॽफुसाम्बान् कुसिङ् निःत्तुआङ् वये़बाल्ले़ चोगुल्ले़ ये़सुन् तिम्दुर मानिङ्वाॽफुसाम्बाल्ले़ कुलक्खुम्मो थारिक् के़रे़॥ 16कर पत्रुसरे़ लाःक्कात् खुने़ॽ हाङ्घुर ये़बे़॥ खे़न् मानिङ्वाॽफुसाम्बान् कुसिङ् के़निःप्पा हुॽसाम्बान् सिगाङ्लाम् नुःक्खे़ फे़रे़आङ् लाम्धेःप् के़गोमा सेवारोमान् मे़त्तुआङ् पत्रुसे़न् सिगाङ् तेॽरुरो॥
17खे़न् सेवारोमाल्ले़ पत्रुसे़न् मे़त्तु, “खे़ने़ॽआङ् खे़न् मनाःल्ले़ कुहुॽसाम्बाहाॽओ थिक् मे़ःन्ने़बि?”
पत्रुसरे़ नोगप् पिरु, “इङ्गाॽ मे़ःन्नाॽरो॥”
18साॽरिक् चुङ्जिःक्ते़बाल्ले़ चोगुल्ले़ से़वारोबाहाॽ नु माङ्हिम् के़गोबा तिलिङ्गाहाॽरे़ मिमे़दुप्तुआङ् खिरि मिजाॽनु मे़ये़बे़रो॥ पत्रुसे़न्नाङ् खुनिॽ पेसाङ् मिजाॽनु ये़बे़रो॥
मानिङ्वाॽफुसाम्बाल्ले़ ये़सुन् सेःन्दोसुॽ
(मत्ति २६:५९-६६; मर्कु १४:५५-६४; लुका २२:६६-७१)
19आल्ल हिम्सिगाङ् मानिङ्वाॽफुसाम्बाल्ले़ ये़सुन् खुने़ॽ कुहुॽसाम्बाहाॽ नु कुनिसाम्मिल्ले़ कुयाःम्बेओ सेःन्दोसुर यागे़॥
20ये़सुरे़ नोगप् पिरु, “इङ्गाॽग काक्ले़ मे़घे़प्सुरए पाःराङ्लो, इङ्गाॽग काक् यहुदिहाॽ मे़जुम्बा यहुदि चुम्लुङ्हिम्मो नु माङ्हिम्मो मनाहाॽ सदादिङ् हुॽरुङ्सिङ्ल वाॽरो॥ इङ्गाॽ स्वाःत्ताङ् थेआङ् मे़म्बाःप्पे़न्लो॥ 21हे़क्केःल्ले़ थेआङ् अक्खेलॽरिक् याप्मि सेःन्गे़दोसिबे? इङ्गाॽ पाःत्तुङ्बा के़घे़म्बाहाॽए सेःन्दोसे़म्सिम्मे़ॽओ थेआङ्भे़ल्ले़ खे़ङ्हाॽरे़ इङ्गाॽ पाःत्तुङ्बा पाःन्हाॽ से़क्खाए मे़घे़प्सुआङ् मे़वाॽरो॥”
22ये़सुरे़ हे़क्के पाःत्तुल्ले़ खे़प्मो निःत्ताङ् के़ये़प्पा सुहाङ्युक्पाधिक्ले़ ये़सुरे़ कुने़दे़ङ्बान् ले़क्खुआङ् मे़त्तु, “अक्खेलॽरिक् मानिङ्वाॽफुसाम्बान्नु मुरा के़दोबि?”
23ये़सुरे़ नोगप् पिरु, “इङ्गाॽ पान् फेःन्दुङ्ने़ फाॽग्र पाःत्ते़ॽ॥ कर इङ्गाॽ से़क्खा पान् पाःत्तुङ्ङाङ् वाॽआने़ फाॽग्र थेआङ् के़हिप्पाबाबे?” 24हे़क्क्याङ् हन्नासरे़ ये़सुन् इमे़घेःक्खुबान् मे़म्भाःङ्ङे मानिङ्वाॽफुसाम्बा कैयाफासरो पाङ्घुदेसुरो॥
पत्रुसरे़ ये़सुन् याम्मो नाॽरुॽ
(मत्ति २६:७१-७५; मर्कु १४:६९-७२; लुका २२:५८-६२)
25सिमोन पत्रुसे़न् मिजाॽनु ये़बे़ल्ले़ कुभारे़ सेःन्मे़दोसु, “खे़ने़ॽआङ् खे़ल्ले़ कुहुॽसाम्बाहाॽओ थिक् मे़ःन्ने़बि?”
पत्रुसरे़ खे़न् पाःन्निन् नाॽरुर मे़त्तु, “इङ्गाॽ मे़ःन्नाॽरो॥”
26पत्रुसरे़ ने़क्खोॽबान् पे़त्तु थासुबा मनाःल्ले़ कुगाॽइ मानिङ्वाॽफुसाम्बाल्ले़ वेॽसमा कुसेवारोबाधिक्काङ् खे़प्मो ये़बे़॥ खे़ल्ले़ पत्रुसे़न् मे़त्तु, “खे़ने़ॽ जैतुन सिङ्लाओ ये़सुन् नु के़वये़बा निने़बा मेःम्बि?” 27पत्रुसरे़ याम्मो मेःन्लो लॽरिक् पाःत्तुल्ले़ बा खे़न् ये़म्मोए इङ्वा कासे़रो॥
ये़सुन् सुहाङ्गे़म्बा पिलातसरे़ कुदगि मे़ये़प्सुॽ
(मत्ति २७:१-२,११-१४; मर्कु १५:१-५; लुका २३:१-५)
28यहुदि लाम्लोबाहाॽरे़ ये़सुन् तानाम्सा कैयाफासरे़ कुहिम्मोलाम् रोमि सुहाङ्गे़म्बाल्ले़ कुहाङ्हिम्मो मे़देॽरु॥ कर साम्योथिम् कुइसिक् आसुत्थो आबोङ्ङाङ् यहुदि चोःक्युम्भो तङ्नाम्बा चा चामा खोमे़दे़त्ने़न् फाॽआङ् खे़ङ्हाॽ हिम्सिगाङ् मे़न्लासे़न्लो॥#१८:२८ यहुदिहाॽ थिम्मे़न्दङ् सुवाङ्हाॽरे़ खुनिॽ हिम्सिगाङ् लाःप्मा मे़न्नुःम्नाबा थिम् वये़रो॥ मे़लाःस्से़ल्ले़ आसुत्थो मे़बोङ्बा नु तङ्नाम्रे़ चा चामा मे़ङ्घोसुन्बा वये़॥ 29हे़क्केःल्ले़ सुहाङ्गे़म्बा पिलातसरे़ लाःक्कात् लःन्दे़आङ् मे़त्तुसि, “कन् मनाःल्ले़ कुदक्ले़ङ्वाओ थे आप्तिक् के़दारुम्माङ् के़वयिॽबे?”
30खे़ङ्हाॽरे़ नोगप् मे़बिरु, “कन् मनाःल्ले़ याःम्बक् मे़म्भेःन्ने वये़ल्ले़ग खे़ने़ॽओ मे़दारुम्बे़न् मेःन्॥”
31हे़क्केःल्ले़ पिलातसरे़ खे़ङ्हाॽ मे़त्तुसि, “कन् मनान् तेॽरे़म्मे़ॽआङ् खिनिॽ साम्योथिम् कुइसिक् खासे़न् लोःन्दे़म्मे़ॽ॥”
हे़क्केःल्ले़ यहुदि लाम्लोबाहाॽरे़ खुने़ॽ मे़मे़त्तु, “आनिगे़ग आत्तिन् मनाःन्नाङ् सिमे़ल्ले़न् खुम्दिङ् पिमा युक् मे़गत्तुम्बे़न्लो॥” 32कङ्ग ये़सुरे़ खुने़ॽ आक्तङ्बा सिमे़ल्ले़ सि लॽरिक् पाःत्तुबा पाःन्निन् के़त्ल#१८:३२ युहु ३:१४, १२:३२-३४ ओ माङ्निङ्वाॽपान् पाःत्तुबा कुइसिक् खुने़ॽ सिलाम्साक्मा सिङ्ङो कुलाङ् कुहुक्हाॽओ फे़न्तिङ्ङिल्ले़ मे़धे़प्तुआङ् मे़भोन्दु मे़से़रुॽ॥ यहुदि साम्योथिम्मो सिमे़ल्ले़ खुम्दिङ्ङिन् लुङ्ङिल्ले़ ले़प्माआङ् से़प्मा वये़, कर रोमि थिम्मो सिमे़ल्ले़ खुम्दिङ्ङिन् सिलाम्साक्मा सिङ्ङो फोमा से़प्मा वये़॥ फाॽआङ् अक्खे पोःक्खे़बारो॥
33पिलातसे़न् याम्मो हाङ्हिम् सिगाङ् लासे़आङ् ये़सुन् उःत्तुआङ् सेःन्दोसु, “से़क्खा खे़ने़ॽ यहुदि हाङ्ने़बि?”
34ये़सुरे़ नोगप् पिरु, “खे़ने़ॽ कन् पाःन्निन् आबाङे के़निङ्वाॽइल्ले़ के़बाःत्तुबाबि, इ वेॽ मनाहाॽरे़ इङ्गाॽ आयाःम्बेओ के़म्मे़त्ते़बाबि?”
35पिलातसरे़ नोगप् पिरु, “इङ्गाॽ यहुदिआबि? आबाङे के़याप्मिहाॽ नु तुम् निङ्वाॽफुसाम्बाहाॽरे़ खे़ने़ॽ हुक्मे़सुप्ताङ्ङाङ् वाॽ॥ खे़ने़ॽ थे याःम्बक् के़भेःन्दु?”
36ये़सुरे़ मे़त्तु, “इङ्गाॽ आहाङ्जुम्मिङ्ग कन् इक्सादिङ् खाम्बेःक्मोबा मेःन्लो॥ कप्मोबा वये़ल्ले़ग इङ्गाॽ आसे़वारोबाहाॽरे़ इङ्गाॽ याप्मि ते़म्मा मे़ङ्घोआन्ल फाॽआङ् यहुदिहाॽनु थङ् मे़जोगुबामे़न्, कर आहाङ्जुम्मिन् कप्मोबा मेःन्लो॥”
37पिलातसरे़ मे़त्तु, “हे़क्केने़ फाॽग्र खे़ने़ॽ हाङ्ने़ए ने़बि?”
ये़सुरे़ नोगप् पिरु, “इङ्गाॽ हाङ्आ फाॽआङ् खे़ने़ॽए के़बाःत्तुॽरो॥ कन् इक्सादिङ् खाम्बेःक्मो से़क्खाःल्ले़न् तोःन्दि पिसे़ इङ्गाॽ सावाःन्छिङाङ्बारो॥ से़क्खाओ के़बप्पाहाॽरे़ इङ्गाॽ आबाःन्निन् मे़घे़प्सुॽरो॥”
38पिलातसरे़ सेःन्दोसु, “से़क्खाःङ्ग थे़माःन्बे?” खे़ल्ले़ हे़क्के पाःत्तुर लाःक्कात् लःन्दे़आङ् यहुदिहाॽ अक्खे मे़त्तुसि, “कन् मनाःल्ले़ कुदक्ले़ङ्वाओ थेआङ् आप्तिक् मे़ङ्घोबान्लो॥ 39कर यहुदि चोःक्युम्भो तङ्नाम्मो खिनिॽ लागि पुङ्लाहिम्मो साक्पा के़धाःबाधिक् ले़रुङ् पिनिङ्बा थिम् के़गत्तुम्, हे़क्केःल्ले़ यहुदि हाङ्ङिन् ले़रुङ् पिनिङ्बि?”
40खे़ङ्हाॽरे़ मे़अःक्ते़र मे़मे़त्तु, “मेःन्! खे़न् मेःन्! बरब्बासे़न् ले़रे़ आबिरे़ॽ!” (आल्ल बरब्बासे़ङ्ग हाङ्बिफ्युङ्बा वये़रो॥)
S'ha seleccionat:
युहुन्ना 18: LIF
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2009, 2023, Wycliffe Bible Translators, Inc. All rights reserved.