Jẹnẹsis 10
10
Uvwiẹ re Emọ ri Noa
(1 Ikun rẹ Ivie 1.5-23)
1Enana ye orua rẹ emọ ri Noa, Shẹm, Ham, kugbe Jafẹt, rẹ oghwe na vwọ kpọnu ayen de rhi vwiẹ emọ.
2Emọ ri Jafẹt kẹ ena: Goma, Magog, Madai, Javan, Tubal, Mẹshẹk, Tiras. 3Emọ ri Goma kẹ ena: Ashkenaz, Rifat, kugbe Togarma. 4Emọ ri Javan Elishah, Tarshish, Kitim, kugbe Dodanim. 5Oma rẹ ihwo nana kọye ihwo rẹ orhoma rẹ urhie na nurhe. Enana keye emọ ri Jafẹt vwẹ otọ rayen, dohwo depherẹ rọye, vẹ uvwiẹ rayen, vwẹ evun rẹ ẹgborho rayen.
6Emọ ri Ham Kush, Ijipt, Put, kugbe Kenan 7Emọ ri Kush Seba, Havilah, Sabta, Raama, kugbe Sabteka. Emọ ri Raama Sheba kugbe Dedan. 8Kush kọye ọsẹ ri Nimrọd, ọye ohwo rẹ ẹsosuọ vwẹ akpọ na rọ to dia ọgban. 9Ọ da dia ọgban rẹ ibefii rode vwẹ obaro rẹ Ọrovwohwo, fiki rẹ ọtiọye kọye a vwọ tanẹ, Kiri Nimrọd ọgban rẹ ibefi rode vwẹ obaro rẹ Ọrovwohwo. 10Emuophihọ rẹ uvie rọye ki Babẹl, Erẹk kugbe Akad, enana ejobi kẹ otọ ri Shinar epha. 11Otọ yena kọye o nu kpo Asiria, ọ da ra bọ Ninivẹh, Rehobọt-Ir, Kala, kugbe 12Resẹn vwẹ uvwre ri Ninivẹh vi Kala, kọye orere rode na. 13Ijipt, da dia ọsẹ ri Ludim, Anamim, Lehabim, Naftu-him, 14Patrusim, Kaslu-him (kẹ Etiyin Filistia nurhe), kugbe Kaftorim.
15Kenan kọye ọsẹ ri Sidọn, ọmọkpako rọye, kugbe Hẹt, 16kugbe ihwo ri Jebus, ihwo ri Amọr, ihwo ri Gergas, 17ihwo ri Hiv, ihwo ri Arka, ihwo ri Sin, 18ihwo ri Arvad, ihwo ri Zema kugbe ihwo ri Hamat. Ukuko rọye uvwiẹ ri Kenan na da rhe hrabọ. 19Otọ rẹ ihwo ri Kenan da hẹre nẹ Sodọm vwẹ ẹbẹre ri Gẹra, re te Gaza, vwẹ abọ ri Sidọn, Gomora, Adma kugbe Zẹboiim, rhiri re te Lasha. 20Enana eye emọ ri Ham, vwẹ ekrekru rayen, vẹ ephẹrẹ rayen, otọ rayen, kugbe ẹgborho rayen.
21Ji vwi Shẹm na, ọye ọsẹ rẹ emọ rẹ Ẹber ejobi, oniọvo ri Jafẹt rẹ ọkpako, ọye vwiẹ emọ kẹ. 22Emọ ri Shẹm: Elam, Asshur, Apak-shad, Lud, kugbe Aram. 23Emọ ri Aram: Uz, Hul, Gether kugbe Mash. 24Apak-shad kọye rha ọsẹ ri Shelah; Shelah ke rha dia ọsẹ rẹ Eber. 25Eber de vwiẹ emọ ivẹ odẹ rẹ ọvo ki Pẹlẹg, ọke rọye akpọ na vwọ hẹriẹ, odẹ rẹ oniọvo rọye ke rha Joktan. 26Joktan kọye ọsẹ ri Almodad, Shelef, Hazarmaveth, Jerah, 27Hadoram, Uzal, Diklah, 28Obal, Abima-el, Sheba, 29Ofir Havilah, kugbe Jobab; enana ejobi na emọ ri Joktan. 30Otọ rẹ ayen diare hẹre ni Mesha vwẹ ẹbẹre ri Sefar re te orho rẹ ugbenu rẹ ọnre va nẹcha na. 31Enana emọ ri Shẹm, vwẹ ekrekru rayen, vẹ ephẹrẹ rayen, otọ rayen kugbe ẹgborho rayen.
32Enana eye ekru rẹ emọ ri Noa, kirobo rẹ orua rayen wanre, vwẹ ẹgborho rayen; vwẹ oma rẹ enana kọye ẹgborho rẹ akpọ na ejobi hra nurhe rẹ oghwe na vwọ kponu.
S'ha seleccionat:
Jẹnẹsis 10: UBV77
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Bible in Urhobo © United Bible Societies, 1977.