Jẹnẹsis 12
12
Ọghẹnẹ se Ebram
1Asakiephana Ọrovwohwo da ta kẹ Ebram, Yanran nẹ orho wẹn kugbe ekru wẹn kugbe uwevwi rẹ ọsẹ wẹn vwo kpo otọ ri mi che dje kẹ wẹ. 2Ki mi ru we vwọ dia ẹgborho buebu, ki mi bruphihọ kẹ wẹ, ki mi ru odẹ wẹn rho, eriyin na ku wọ dia ebruphihọ. 3Ki mi bruba kẹ ihwo ri bruba kẹ wẹ, oro harhe owẹ ke Me harhọ; vwẹ oma wẹn irere rẹ akpọ na ejobi de vwo ebruphihọ kẹ oma rayen.
4Kọye Ebram da yanran, kirobo rẹ Ọrovwohwo ta kẹ, Lọt vẹ ọye da yan usun. Ebram da dia ikpe ujorha gbẹ ihwiori vwẹ ọke ro vwo vrẹn ni Haran. 5Ebram da reyọ Serai rẹ aye rọye, kugbe Lọt rẹ ọmọ rẹ oniọvo. rọye, kugbe ekuakua ri rhere ejobi, kugbe ihwo ro vwori vwi Haran, ayen vwo te otọ ri Kenan nu. Ọke rẹ ayen vwo te otọ ri Kenan, 6Ebram de ki otọ na re te asan re se Shikẹm, re te ọhahe ri Morẹh. Vwẹ ọke yena yẹ ihwo ri Kenan ji otọ na. 7Etiyin Ọrovwohwo da vwẹ oma phia kẹ Ebram, ọ da ta, Uvwiẹ wẹn Me cha vwẹ otọ nana kẹ. O da so agbada kẹ Ọrovwohwo rọ vwẹ oma phia kẹ, vwẹ Etiyin na. 8O de vrẹn nẹ Etiyin vwo kpo enu rẹ ugbenu rọ obọrhe ri Bẹtẹl, ọ da bọn utughẹ rọye, yi Bẹtẹl obọhwere, Ai da rha obọrhe; Etiyin ọ da so agbada kẹ Ọrovwohwo o de se odẹ rẹ Ọrovwohwo na. 9Ebram da rhoma mu oyan họ ọ da garo vi obi Nẹgẹb.
Ebram vwẹ Ijipt
10Vwẹ ọke nana owẹvwe de rhi fi vwẹ otọ na. Etiyin Ebram de kpo Ijipt ra dia fikiridie owẹvwe na firi gangan vwẹ otọ na. 11Ọke ro che vwo te otọ rẹ Ijipt re, ọ da ta kẹ Serai rẹ aye rọye, Me riẹnre nẹ wẹ aye vẹ erhuvwu siẹ re de ni we. 12Ọke rẹ ihwo rẹ Ijipt da rhe mrẹ wẹ, kẹ ayen cha tanẹ, Ọnana aye rọye, kẹ ayen che hwe vwe, ayen ki ju we vwo. 13Gba ta kẹ ayen nẹ wẹ oniọvo mẹ, rere o vwo yovwi kẹ vwẹ fiki wẹ, rere Me mrasan rhọ fiki wẹ. 14Ọke rẹ Ebram vwo te Ijipt re, ihwo rẹ Ijipt da mrẹ aye na nẹ oyovwiri gangan. 15Rẹ emọ rẹ ovie Fero, vwọ mrẹ, ayen de jiro ki Fero. A da reyọ aye na vwo rhe Fero. 16Vwi fiki rọye ọ da nabọ vwẹ ẹro te Ebram, o de vwo igegede, irhuẹn, ekẹtẹkẹtẹ rẹ eshare kugbe erẹ eya, idibo rẹ eshare kugbe emetẹ, kugbe kamẹl.
17Ọrovwohwo da vwẹ emiavwe mu Fero kugbe =uwevwi rọye ejobi fiki Serai aye rẹ Ebram. 18Etiyin Fero de se Ebram, ọ da ta, Ọnana die wo ru kẹ vwẹ na? Kidie wọ gbe ta kẹ vwẹ nẹ aye wẹ-ẹn? 19Die wọ vwọ tanẹ oniọvo mẹ? rọ da nẹrhẹ ovwẹ reyọ vwo ru aye? Nighe aye wẹn na, reyọ ru wọ yanran. 20Fero da kpokpa kẹ ihwo rọye kpahe Ebram, ayen de suo ro ughere, te aye rọye kugbe ihwo ro vwori ejobi.
S'ha seleccionat:
Jẹnẹsis 12: UBV77
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Bible in Urhobo © United Bible Societies, 1977.