Jọn 18
18
Ẹshẹ Vẹ Emuo ri Jesu
(Matiu 26.47-56; Mak 14.43-50; Luk 22.47-53)
1Ọke ri Jesu vwọ ta eta nana nu, ọ vẹ idibo rọye da yan vrẹn iyara ri Kidrọn, rẹ ogba epha, te ọye te idibo rọye da vwẹriẹ etiyin. 2Asakiephana Judas, rọ shẹrẹ na riẹn asan na; kidie Jesu vẹ idibo rọye ji kpo etiyin jovwo. 3Ọtiọye ri Judas, vwọ reyọ otu rẹ isodje vwọ ba oma kugbe iruiruo evo nẹ obọ rẹ ilori rẹ irherẹn kugbe Farisi rhe, ayen de kpo etiyin vẹ irhukpẹ vẹ ituerhanre vẹ ikpokpo. 4Etiyin Jesu, vwọ riẹn obo re cha phia kẹ ejobi, ọ da yanrhe obaro ọ da ta kẹ ayen, Ono ovwan guọnọ? 5Ayen da kpahe kẹ, Jesu ri Nazarẹt. Jesu da ta kẹ ayen, Mẹvwẹ hẹ ọye. Judas rọ shẹrẹ na, mudia kẹrẹ ayen. 6Ọke rọ vwọ ta kẹ ayen nẹ, Mẹvwẹ hẹ ọye, ayen de ghwe sihọ obuko ayen de she teye otọ. 7Ọ da rhoma nọ ayen, Ono ovwan guọnọ? Ayen da ta, Jesu ri Nazarẹt. 8Jesu da kpahe, Me ta kẹ ovwan nẹ mẹvwẹ hẹ ọye; ọtiọye na, o da dia omẹvwẹ ovwan guọnọ, gbe jẹn enana yanran. 9Ọnana ọ tare rere ota rọ tare na vwọ gba, Usun rẹ ihwo ru wọ vwọ kẹ vwẹ na ọvuọvo va vwẹ abọ ghwru-u. 10Etiyin Saimọn Pita, ro vwo ọlọkọ, de yoro rhe ọ da nyavwe orhọn rẹ obọrhe rẹ ọviẹn rẹ orherẹn rode na bru kufia. Odẹ rẹ ọviẹn na hẹ Makos. 11Jesu da ta kẹ Pita, Dje ọlọkọ wẹn vwọ hẹ ako rọye; Me rha da uko rẹ Ọsẹ mẹ vwọ kẹ vwẹ na?
A reyọ Jesu rhe Orherẹn rode na
(Matiu 26.57-58; Mak 14.53-54; Luk 22.54)
12Ọtiọye na otu rẹ isodje na kugbe inotu rayen kugbe iruiruo rẹ ihwo ri Ju de shabọ họ Jesu ayen da gba. 13Ẹsosuọ ayen de ke suo rhe Anas; kidie ọye hẹ ọgọ ri Kaifas, rọ dia orherẹn rode vwẹ ukpe yena. 14Kaifas hẹ ohwo rọ ta kẹ ihwo ri Ju nẹ o fori rere ohwo ọvo vwo ghwu kẹ ihwo na.
Pita Siẹn Jesu
(Matiu 26.69-70; Mak 14.66-68; Luk 22.55-57)
15Saimọn Pita de nene Jesu, ọtiọye je te odibo rọye ọfa. Rẹ orherẹn rode na vwọ riẹn odibo nana, ọ da ro ọguan rẹ orherẹn rode na vẹ Jesu, 16yi Pita mudia vwẹ otafe vwẹ anurhoro na. Ọtiọye je hẹ odibo ọfa, rẹ orherẹn rode na riẹnre, ọ da ro otafe ra ta ota kẹ ọmọtẹ rọ rhẹrẹ anurhoro na, ọ da reyọ Pita ro uwevwi. 17Ọmọtẹ na rọ rhẹrẹ anurhoro na da ta kẹ Pita, Wọ dia ọvo vwẹ usun rẹ idibo rẹ ohwo nana rhe? Ọ da ta, Ọ dia omẹvwẹ-ẹ. 18Asakiephana idibo na kugbe iruiruo na da vwẹ esia koko erhanre họ, fikiridie ekpahe muẹ, ayen de mudia yariẹ re sasa oma rẹ ayen; Pita vẹ ayen je hẹ etiyin rhe, o mudia rọ sasa oma rọye.
Orherẹn Rode na nẹ Jesu Enanọ
(Matiu 26.59-66; Mak 14.55-64; Luk 22.66-71)
19Orherẹn rode na da nọ Jesu kpahe idibo rọye kugbe uyono rọye. 20Jesu da kpahe kẹ, Me ta ota gbonoze kẹ akpọ na. Kọke kọke ejobi mi vwo yono vwi Sinagọg kugbe uwevwi rẹ ẹga, asan rẹ ihwo ri Ju ejobi de koko, Me ta ota ọvuọvo vwẹ odjahọ-ọ. 21Die wọ vwọ nọ vwẹ? Nọ ayen otu ri nyo vwe, obo re me ta kẹ ayen; ayen riẹn obo re me tare. 22Ọke rọ vwọ ta ọnana nu, oruiruo ọvo ro mudia kẹrẹ etiyin da vwẹ obọ ghwiẹ Jesu, tanẹ, ọtiọye wọ kpahe ota kẹ orherẹn rode na? 23Jesu da kpahe kẹ, Me da ta ota ọchọchọ, gbe se oseri rẹ ota ọchọchọ na; ẹkẹvuọvo ọ da dia uyota me ta na, die wọ vwọ ghwiẹ vwẹ? 24Anas gbarọ o de vwo rhe Kaifas rẹ orherẹn rode na.
Pita Rhoma Siẹn Jesu
(Matiu 26.71-74; Mak 14.69-72; Luk 22.58-62)
25Ri Saimọn Pita ji vwo mudia rọ sasa oma rọye na, ayen da ta kẹ, Wọ je dia ọvo vwẹ usun rẹ idibo rọye? Ọ da ghwọ unu tanẹ, ọ dia omẹvwẹ-ẹ. 26Ọvo vwẹ usun rẹ odibo rẹ orherẹn rode na, omoni rẹ ohwo ri Pita nyavwe orhọn rọye bru kufia na, da nọ, Me mrẹ wẹ vẹ ọye vwẹ obo ogba na? 27Pita da rhoma ghwọ unu; siẹvuọvo ọhọ de whe bo.
Jesu vwẹ Obaro ri Pailet
(Matiu 27.1-2, 11-14; Mak 15.1-5; Luk 23.1-5)
28Etiyin ayen de sun Jesu nẹ uwevwi ri Kaifas kpo obo ọguan rẹ Pailet vwẹ irhiọke. Ekpuyovwi rẹ ayen sa ro ọguan na-a, fikirẹ obo rẹ ayen vwo jẹ ẹgua egbe, ẹkẹvuọvo re ayen vwo sa re ẹwanvrẹn na. 29Ọtiọye na Pailet da ro otafe bru ayen ọ da ta, Didi urhi ovwan vwo mu ohwo nana? 30Ayen da kpahe kẹ, Ọ da dianẹ ohwo nana dia ohwoumwemwu-u, avwanre e muo rhe we-e. 31Pailet da ta kẹ ayen, Ekpuyovwi rẹ ovwan ọvo reyọ vwo gu ẹdjọ nene urhi rẹ ovwan. Ihwo ri Ju na da ta kẹ, Ọ fori kẹ avwanre re vwo hwe ohwo ghwu-u. 32Ọnana kọye ota ri Jesu tare vwọ gba ro vwo dje oka rẹ ughwu ro che ghwu.
33Pailet da rhoma ro ọguau na o de se Jesu, ọ da ta kẹ, Wẹ hẹ ovie ri Ju na? 34Jesu da kpahe, Wẹ ọvo re vwẹ ọhọrobọ wẹn ta ọnana vwo, eyẹ ihwo efa tarọ kpahe ovwẹ kẹ wẹ? 35Pailet da kpahe, Mẹvwẹ hẹ ihwo ri Ju? Ẹgborho wẹn kugbe ilori rẹ irherẹn na ri mu uwe vwo rhe vwe; Didi emu wo ruru? 36Jesu da kpahe, Uvie mẹ dia ọ rẹ akpọ nana-a; ọ dianẹ uvie mẹ ọ rẹ akpọ nana, manẹ idibo mẹ a họnre, re de ji uvwe emuo kẹ ihwo ri Ju; ẹkẹvuọvo uvie mẹ dia akpọ o nurhe-e. 37Pailet da ta kẹ, Ọtiọye na wẹ kẹ ovie? Jesu da kpahe, We rẹ tare nẹ mẹvwẹ ovie. Kidie ọnana e vwo vwiẹ vwẹ, je vwi fiki rẹ ọnana me vwọ rhe akpọ na, rhi se oseri kẹ uyota na. Kohwo kohwo rọ dia ọ rẹ uyota na ko nyo urhuru mẹ. 38Pailet da ta kẹ, Die hẹ uyota?
Ebrorhiẹ rẹ Ughwu Hwẹ Jesu
(Matiu 27.15-31; Mak 15.6-20; Luk 23.13-25)
Rọ vwọ ta onana nu, ọ da rhọma ro otafe bru ihwo ri Ju na, ọ da ta kẹ ayen, Me mrẹ oruchọ vwẹ obọ rọye-e. 39Ẹkẹvuọvo ovwan vwo uruemu rere mi siobọ nẹ ohwo ọvo kẹ ovwan vwẹ ẹwanvrẹn na, ki mi siobọ nẹ Ovie ri Ju na kẹ ọvwan? 40Ayen da rhoma kuvwie, Ọ dia ohwo nana, ẹkẹvuọvo Barabas. Asakiephana Barabas na oji.
S'ha seleccionat:
Jọn 18: UBV77
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Bible in Urhobo © United Bible Societies, 1977.